काठमाडौँ । नेपाल राष्ट्र बैंकले नेपाल स्टक एक्सचेञ्ज (नेप्से) मा आफ्नो स्वामित्वमा रहेको मध्ये करीब २० प्रतिशत सेयर तीन संस्थागतले खरिद गरेका छन् ।

नेप्सेमा रहेको राष्ट्र बैंकको सेयर कर्मचारी सञ्चय कोष, लक्ष्मी बैंक र प्रभु बैंकले खरिद गरेका हुन् । सेयर खरिदका लागि ३ संगठित संस्थाले गोप्य शिलबन्दी बोलपत्र पेश गरेका थिए । बुधबार ती तीन संस्थालाई सेयर बिक्री गरिएको राष्ट्र बैंकका प्रवक्ता लक्ष्मीप्रपन्न निरौलाले जानकारी दिए ।

राष्ट्र बैंकले आफ्नो स्वामित्वमा नेप्सेमा रहेको १७ लाख २९ हजार ९८९ कित्ता सेयर असार ३१ गतेदेखि भदौ २ गतेसम्म बिक्रीका लागि खुला गरेको थियो । शिलबन्दी बोलपत्र बुधबार खोलिएको हो ।

राष्ट्र बैंकले १०० रुपैयाँ अंकित दरमा लगानी गरेको नेप्सेको सेयरलाई ९३२ रुपैयाँ प्रिमियम सहित न्यूनतम १०३२ रुपैयाँ वा सो भन्दा बढी मूल्यमा लिलामी बिक्रीमा राखेको हो । सबै शेयर बेच्दा राष्ट्र बैंकले कम्तिमा एक अर्ब ७१ करोड ६१ लाख प्रिमियम संकलन गर्ने जनाइएको छ । गत मंसिरमा नै राष्ट्र बैंकले नेप्सेलाई पत्र लेखेर आफ्नो स्वामित्वमा रहेको सेयर बिक्रीका लागि सहजीकरण गर्न आग्रह गरेको थियो ।

पचास करोड रुपैयाँ चुक्ता पूँजी रहेको नेप्सेमा सरकारको ५८.६६ प्रतिशत, राष्ट्र बैंकको ३४.६० प्रतिशत, एनआईडीसीको ६.१२ प्रतिशत र धितोपत्र दलाल व्यवसायी (ब्रोकर) को ०.६२ प्रतिशत सेयर स्वामित्व रहेको छ । आफ्नो स्वामित्वमा रहेको करीब २० प्रतिशत सेयर बिक्री गरेको र अब बाँकी १४ प्रतिशत सेयर बिक्रीका लागि पुनः लिलामीमा राख्ने कि के गर्ने भन्ने बारेमा छलफल गरिने प्रवक्ता निरौलाले बताए ।

सम्बन्धित शिषर्कहरु

नेप्सेमा ३ कम्पनीको बोनस सेयर सूचीकृत, कुनको कति ?

कर्मचारीको काम सन्तोषजनक भएन, ऋण तिर्न राजश्वको दायरा बढाउनुहोस्

सबैभन्दा बढी कर तिर्ने बैंक बन्यो नबिल, आठौं पटक सम्मानित

करको दायरा विस्तार गरिने

एलआईसी नेपालले मंसिर १२ गतेदेखि हकप्रद सेयर बिक्री गर्ने, यसरी दिन सकिन्छ आवेदन

शाहको क्रिकेट प्रेम : अष्ट्रेलियाको क्लबदेखि सुदूरपश्चिम रोयल्ससम्म