काठमाडौं । यस वर्षको शरदयाममा म्याग्दीस्थित धवलागिरि हिमाल आरोहणका लागि १४ जनाले अनुमति लिएका छन् । विश्वको सातौँ अग्लो धवलागिरि हिमाल म्याग्दीको धवलागिरि गाउँपालिका–४ मा पर्दछ ।

एउटा समूहका १४ जना पुरुष पर्वतारोहीले धवलागिरि हिमाल आरोहणका लागि अनुमति लिएका पर्यटन विभागले जनाएको छ । विभागका अनुसार धवलागिरि हिमाल आरोहणको अनुमति लिएकाबाट १६ लाख ८९ हजार रुपैयाँ सलामी दस्तुर (शुल्क) प्राप्त भएको छ ।

गत वसन्त याममा तीन समूहका २२ पुरुष र ८ जना महिलाले धवलागिरि हिमाल आरोहण गर्ने अनुमति लिएका थिए । सोबापत ७१ लाख ७० हजार ७५० रुपैयाँ शुल्क सङ्कलन भएको विभागले जनाएको छ ।

आरोहण अनुमति लिएका आरोही, शेर्पा, पथप्रदर्शक, भरिया र सहयोगी आधार शिविर आउने तयारी गरेका इटली आधार शिविरका होटल व्यवसायीसमेत रहेका धवलागिरि गाउँपालिका–४ का वडा सदस्य हरिप्रसाद तिलिजाले बताए ।

पर्यटन विभागको पछिल्लो विवरणअनुसार चालु यामका लागि नेपालका १० हिमाल आरोहणका लागि ५४ देशका ८८ महिला र २७४ जना पुरुषले अनुमति लिएका छन् । उनीहरुबाट ४ करोड ५२ लाख ४५ हजार ८४८ रुपैयाँ आरोहण शुल्क प्राप्त भएको छ ।

शरद्मा सगरमाथाबाहेक ८ हजार मिटर अग्ला हिमाल आरोहण गर्न चाहने विदेशीले सलामी दस्तुर प्रतिआरोही ९ सय डलर तिर्नुपर्ने प्रावधान रहेको विभागले जनाएको छ । अन्य साना हिमालका लागि न्यूनतम १२५ देखि अधिकतम चार सयसम्म सलामी दस्तुर तिर्नुपर्ने व्यवस्था छ ।

शरद् याममा सबैभन्दा बढी गोरखामा रहेको ८ हजार १६३ मिटर अग्लो मनास्लु हिमाल आरोहण गर्न २८ वटा समूहका तीन सय आठ जनाले अनुमति लिएका पर्यटन विभागले जनाएको छ । मनास्लुपछि धेरै आरोहणको अनुमति लिएको हिमाल धवलागिरि हो ।

पुथा हिमचुली नौ जना, अन्नपूर्ण चौथो ५, थाकर गो इस्ट ४, पुङ्गी ५, कुम्भकर्ण ५, अरनीको चुली ३, अपी ६ र मकालु पहिलो आरोहण गर्न २ जनाले अनुमति लिएका छन् । सरदयाममा नेपालका हिमाल आरोहणका लागि सबैभन्दा बढी चीनका ६१ जनाले अनुमति लिएका विभागले जनाएको छ ।

गत वसन्तयाममा नेपालका ३० वटा हिमाल आरोहणका लागि १ हजार २ जनाले अनुमति लिएका थिए । उनीहरुले ६८ करोड ९९ लाख ७५ हजार ३११ रुपैयाँ आरोहण शुल्क तिरेको विभागले जनाएको छ ।

सम्बन्धित शिषर्कहरु

बलम्बुमा महालक्ष्मी जात्रा सुरु (फोटो फिचर)

लुम्बिनी विकास कोषको ७७ करोड ५५ लाख बजेट पारित

हुम्लाबाट जिल्ला बाहिर जान टिकटको समस्या

एनएमबि लघुवित्तको नाफासँगै ईपीएस धनात्मक, ब्याज आम्दानी ४०.८५ प्रतिशत बढ्यो

ग्लोबल आइएमई लघुवित्तको नाफा १९ प्रतिशत बढ्यो, खराब कर्जा पनि घट्यो

रवि लामिछानेलाई पोखराबाट रुपन्देही लगिंदै