काठमाडौं । माघ महिनाका लागि अघिकांश वाणिज्य बैंकहरूले ब्याजदर स्थिर राखेका छन् । हाल सञ्चालनमा रहेका २० मध्ये १५ वटा वाणिज्य बैंकले माघका लागि ब्याजदर स्थिर राखेका हुन् ।

यसैगरी, ३ वटा बैंकले ब्याजदर घटाएका छन् भने २ वटा बैंकले ब्याजदर बढाएका छन् । नेपाल एसबीआई बैंकले ब्याजदर ०.५० प्रतिशत घटाएको छ । एसबीआईले व्यक्तिगत निक्षेप र संस्थागत निक्षेप दुवैतर्फ ०.५० प्रतिशत ब्याजदर घटाएको हो ।

पौष महिनाका लागि एसबीआई बैंकले व्यक्तिगत निक्षेपका लागि ६ र संस्थागत निक्षेपका लागि ५ प्रतिशत ब्याजदर तोकेको थियो । बैंकले माघ महिनामा व्यक्तिगततर्फ ५.५० र संस्थागत तर्फ ४.५० प्रतिशत ब्याजदर तोकेको छ ।

यसैगरी, नेपाल बैंकले माघ महिनाका लागि संस्थागत निक्षेपतर्फ ब्याजदर घटाएको छ भने व्यक्तिगत निक्षेपतर्फ स्थिर राखेको छ । बैंकले पौष महिनामा संस्थागत निक्षेपकर्तालाई ४.७० प्रतिशत ब्याज दिएको थियो । माघ महिनामा संस्थागतलाई ४.१५ प्रतिशत ब्याज दिने बैंकले जनाएको छ । अर्थात संस्थागत निक्षेपतर्फ बैंकले ०.५५ प्रतिशत ब्याजदर घटाएको हो ।

बैंकले व्यक्तिगततर्फ पौष महिनाको ५.६० प्रतिशत ब्याजदरलाई नै निरन्तरता दिएको छ । यसैगरी, कृषि विकास बैंकले व्यक्तिगत ब्याजदर घटाएको छ भने संस्थागत ब्याजदर स्थिर राखेको छ । पौष महिनामा बैंकले व्यक्तिगततर्फ ५.५७ प्रतिशत ब्याज दिएको थियो । माघ महिनामा व्यक्तिगततर्फका निक्षेपकर्तालाई ५.५१ प्रतिशत ब्याज दिने बैंकले जनाएको छ । अर्थात माघ महिनामा व्यक्तिगततर्फ बैंकले ०.०६ प्रतिशत ब्याज घटाएको हो ।

संस्थागततर्फ पौष महिनामा बैंकले लागू गरेको ३.२५ प्रतिशतलाई नै निरन्तरता दिएको छ ।

यता, लक्ष्मी सनराइज बैंक र सिटिजन्स बैंकले ब्याजदर बढाएका छन् । लक्ष्मी सनराइजले व्यक्तिगत निक्षेपका लागि ब्याजदर बढाएको छ भने सिटिजन्सले संस्थागत निक्षेपका लागि ब्याजदर बढाएको छ ।

पौष महिनामा लक्षी सनराईजले व्यक्तिगततर्फ ५.५० प्रतिशत ब्याजदर तोकेको थियो । माघ महिनामा उक्त ब्याजदर बढाएर ५.७५ प्रतिशत पुर्‍याएको छ । अर्थात माघ महिनामा बैंकले व्यक्तिगततर्फ ०.२५ प्रतिशत ब्याजदर बढाएको हो । संस्थागततर्फ भने बैंकले पौष महिनाकै ब्याजदर ४.५० प्रतिशतलाई नै निरन्तरता दिएको छ ।

सिटिजन्स बैंकले पौष महिनामा संस्थागततर्फ ४ प्रतिशत ब्याजदर तोकेको थियो । माघ महिनाका लागि बैंकले संस्थागततर्फ ४.५० प्रतिशत पुर्‍याएको छ । अर्थात ०.५० प्रतिशत ब्याजदर बढाएको छ ।

यसैगरी, व्यक्तिगततर्फ बैंकले पौष महिनामा कायम ५.५६ प्रतिशतलाई नै निरन्तरता दिएको हो ।

ब्याजदर स्थिर राख्ने बैंकहरू

१५ वटा बैंकले संस्थागत र व्यक्तिगत दुवै तर्फको ब्याजदर स्थिर राखेका छन् । ग्लोबल आईएमई र नबिल बैंकले पौष महिनामा कायम व्यक्तिगततर्फ ५.५७ र संस्थागततर्फ ४.२५ प्रतिशत ब्याजदरलाई नै माघ महिनामा पनि निरन्तरता दिएका छन् । यसैगरी, कुमारी बैंकले व्यक्तिगत तर्फ ५.९१ र संस्थागततर्फ ४.९१ प्रतिशत ब्याजदरलाई नै माघ महिनामा पनि निरन्तरता दिएको छ ।

माछापुच्छ्रे बैंकले व्यक्तिगततर्फ ६ र संस्थागततर्फ ४ प्रतिशत ब्याजदरलाई नै निरन्तरता दिइँदा सिद्धार्थ र एभरेष्ट बैंकले व्यक्तिगततर्फ ६ र संस्थागततर्फ ५ प्रतिशत ब्याजदरलाई नै माघ महिनाका लागि पनि निरन्तरता दिएका छन् ।

यसैगरी, राष्ट्रिय वाणिज्य बैंकले व्यक्तिगततर्फ ६ र संस्थागततर्फ ३.५० प्रतिशत, सानिमा बैंकले व्यक्तिगततर्फ ६.०५ र संस्थागततर्फ ४.३० प्रतिशत, प्रभु बैंकले व्यक्तिगततर्फ ६.१० र संस्थागततर्फ ५.१०, प्राइम कमर्सियल बैंकले व्यक्तिगततर्फ ६.२५ र संस्थागततर्फ ४ प्रतिशत, स्टान्डर्ड चार्टर्ड बैंकले व्यक्तिगततर्फ ६.२५ र संस्थागततर्फ ३.२५ र हिमालयन बैंकले व्यक्तिगततर्फ ६.२५ र संस्थागततर्फ ५.२५ प्रतिशत ब्याजदरलाई नै माघ महिनाका लागि पनि निरन्तरता दिएको छ ।

यस्तै, नेपाल इन्भेष्टमेन्ट मेगा बैंकले व्यक्तिगततर्फ ६.५० र संस्थागततर्फ ५.१० प्रतिशत ब्याजदरलाई माघ महिनामा निरन्तरता दिँदा एनएमबी र एनआईसी एशिया बैंकले व्यक्तिगततर्फ ६.६० र संस्थागततर्फ ५.६० प्रतिशत ब्याजदरलाई नै माघ महिनामा पनि निरन्तरता दिएको जनाएको छ ।

सम्बन्धित शिषर्कहरु

सहकारीमा थप कडाइ, अधिकतम् ५० लाखसम्मको बचत सीमादेखि १० लाख बचतमा स्रोत खुलाउनु पर्नेसम्म

अब सासु कोषको नियमन राष्ट्र बैंकले गर्ने, १० करोड बढी कारोबार गर्ने इन्भेष्टमेन्ट कम्पनीको जिम्मा सेबोनलाई

अब सरकारी कर्मचारीले स्वदेशी पोसाक मात्रै लगाउनुपर्ने, यस्तो छ नयाँ व्यवस्था

तीन महिनापछि राजपत्र सच्याउने अवस्थामा किन पुग्यो अर्थमन्त्रालय ?

मुक्तिनाथ विकास बैंकको १८ औं साधारण सभा सम्पन्न

सहकारी बैंकको कमजोरीमा राष्ट्र बैंकको ‘ब्लण्डर’, अवैधानिक निर्णयबाटै काम फत्ते