काठमाडौं । धितोपत्र बोर्डका नवनियुक्त अध्यक्ष भिष्मराज ढुंगानालाई शेयर बजारले स्वागत गरेको छ । पूँजी बजारको नियामक निकाय, बोर्डले शेयर बजारका विज्ञलाई अध्यक्षको रुपमा पाएपछि त्यसको सकारात्मक प्रभाव मंगलबारको शेयर बजारमा परेको हो ।

कारोबार शुरु भएदेखि नै उकालो लागेको बजारमा नेप्से परिसूचक र कारोबार रकम दुबैमा उल्लेख्य सुधार भएको छ । अघिल्लो दिनको तुलनामा नेप्से परिसूचक १६.२३ अंकले उकालो लागेर १२१६.९२ अंकमा पुगेको छ । जुन अघिल्लो दिनको तुलनामा १.३५ प्रतिशतले बढेको हो भने गत चार महिना यताकै उच्चतम बिन्दु हो ।

सात महिना यताकै उच्च कारोबार

मंगलबार मात्रै एक अर्ब १० करोड रुपैयाँ बराबरको शेयर कारोबार भएको छ । जुन गत सात महिना यताकै उच्च कारोबार हो । गत जेठ १६ गतेको बजारमा करिब डेढ अर्ब रुपैयाँ बराबरको शेयर किनेबेच भएको थियो । मंगलबारको कारोबार रकम सोमबारको तुलनामा करिब २६ करोड रुपैयाँ बढी कारोबार भएको हो । गत सोमबार कूल ८४ करोड रुपैयाँ बराबरको शेयर किनबेच भएको थियो ।

कूल १७९ कम्पनीको कारोबार भएको बजारमा सबैभन्दा बढी माछापुच्छ्रे बैंकको शेयर किनबेच भएको छ । बैंकको एकैदिन १९ करोड ४९ लाख रुपैयाँ बराबरको शेयर कारोबार भएको छ । माछापुच्छ्रे बैंकसँगै अधिकांश वाणिज्य बैंकको शेयर कारोबारमा सुधार देखिएको छ । बैंकहरुले गत आर्थिक वर्षको नाफाबाट लाभांश सुरक्षित गरी शेयर बिक्री गर्न थालेपछि उनीहरुको कारोबार रकममा वृद्धि भएको हो ।

बढी कारोबार गर्नेको टप टेन लिष्टमा माछापुच्छ्रे सहित ७ वटा वाणिज्य बैंक रहेका छन् । जसमा एनआईसी एशिया, प्रभु, नेपाल क्रेडिट एण्ड कमर्शियल बैंक, एनएमबि, सिद्धार्थ र सानिमा बैंक रहेका छन् ।

बजारमा दुई समूह बाहेक बाँकी १० समूह हरिया देखिएका छन् । सबैभन्दा बढी निर्जीवन बीमा समूह ८६ अंकले उकालो लागेको छ । उत्पादनमूलक र होटल समूह क्रमशः २२.६६ र ८.३७ अंकले घटेका छन् भने बाँकी समूह उकालो लागेका छन् ।

मंगलबार सिभिल लघुवित्त वित्तीय संस्थाको शेयर मूल्य १० प्रतिशतले बढेको छ । त्यस्तै, वोमी माइक्रोफाइनान्स वित्तीय संस्था ९.९७, सेन्ट्रल फाइनान्स कम्पनी ९.७६ र सबैको लघुवित्त वित्तीय संस्थाको शेयर मूल्य ९.४९ प्रतिशतले बढेको छ । सो दिन सबैभन्दा बढी बोटलर्स नेपाल(तराई)का शेयरधनीले ३.९४ प्रतिशत गुमाएका छन् ।

सम्बन्धित शिषर्कहरु

कार्वन व्यापारलाई थप प्रभावकारी बनाउनु पर्ने

४ महिनामा १० प्रतिशत मात्रै विकास खर्च, राजस्व सङ्कलन २२.३६ प्रतिशत

१० अर्ब लगानीमा पब्लिक कम्पनी स्थापना गरेका छौँ, मालिक बन्ने सुनौलो अवसर हो

आइतबारदेखि निर्वाचन आचारसंहिता लागू, बैंकका कर्मचारीले पनि पालना गर्नुपर्ने

निष्कृय खाताको रकम बैंकिङ विकास कोषमा जम्मा गर्दै एनआईएमबी

एनएमबि बैंकले ५ जिल्लामा १४ ठाउँको घरजग्गा बेच्दै