साउदीमा कामदारको बिजोग, कुटनीतिक पहलमा सरकार कमजोर रहेको सरोकारवालाको भनाइ

२०७३ मंसिर १६ गते १५:०२ विकासन्युज

काठमाडौं, १६ मंसिर । नेपाल सरकारले कुटनीतिक पहल नगर्दा साउदी अरेबीयामा कार्यरत नेपालीहरु पिडित भएका छन् । रोजगारीका लागि साउदी जानुपूर्व कामदारसँग भएका कुनै पनि सम्झौता रोजगारदाता कम्पनीले लागू नगर्दा त्यहाँ कार्यरत नेपाली कमदारहरु पीडित भएका हुन् । saudima-kamdar

बुधबार आयोजित ‘वैदेशिक रोजगारीका क्रममा साउदी अरबमा देखिएका समस्या र समाधान’ विषयक अन्तरक्रिया कार्यक्रमका बक्ताहरुले सरकारको कुटनीति कमजोर भएकोले साउदीमा नेपाली कामदार पीडित हुनुपरेको बताए । पूर्व श्रम तथा रोजगारमन्त्री कमल चौँलागाईले पछिल्लो समय साउदीमा नेपालीहरुले सेवा सुविधा नपाएर पिडा खेपीरहनु परेको बताए ।

‘त्यसै पनि अहिले युद्धको भयले साउदी जाने नेपाली कामदारको संख्या घटिरहेको छ, उनले भने, तर भएका नेपाली कामदारहरु समेत पिडित भइरहेका छन्, यसबारे सरकारले चाँडो कुट्नीतिक पहल चाल्नुपर्छ,’ चौलागाईले भने ।

बैदेशिक रोजगार विभागका माहानिर्देशक विश्वराज पाण्डेले साउदी अरेबियाको समस्याबारे आफूहरु जानकार रहेकोले त्यसको समाधानका लागि पहल भईरहेको बताए । ‘सरकारी स्तरबाट पहल भईरहेको छ ।’ उनले भने, ‘विगतमा भन्दा हामीले समस्या केही समाधान गरिसकेका छौँ ।’

नेपाल सरकार श्रम तथा रोजगार मन्त्रालयका सहसचिब भरत भुर्तेलले पनि साउदीमा नेपालीहरुले दुख पाइरहेको भन्ने कुरा स्वीकार गरे । उनले भने, ‘साउदीको समस्यालाई सरकारले गम्भीर रुपमा लिएको छ ।’

कार्यक्रममा नेपाली साझा मंचका उपाध्यक्ष भक्त बहादुर (हमाल) मल्लले कार्यपत्र पेश गरेका थिए । कार्यपत्रमा साउदीमा बैदेशिक रोजगारका क्रममा भए÷गरेका सम्झौता, तलब ज्याला, बीमा, भीसाको समस्या, रेसिडेन्ट परमीट, काममा देखिएका समस्याहरु, कामदारका गुनासो, लेवर कोर्टका समस्या, नेपाली महिला कामदारको समस्या, जेलको कठिनाई, दुतावासको सहयोगमा अभावलगायतका समस्या उल्लेख गरिएको थियो ।

साउदीमा कामदारको बिजोग, कुटनीतिक पहलमा सरकार कमजोर रहेको सरोकारवालाको भनाइ