झापा । पहाडको अन्नबाली नहुने रुखोपाखो जग्गाबाट संकलन हुने कमसल काठबाट उत्पादन भइरहेको भेनियर पाता (कोर भेनियर) को निकासी दररेट घटाउन व्यवसायीले माग गरेका छन् ।

नेपाल भेनियर उत्पादक संघ केन्द्रीय समितिले मंगलबार झापाका प्रमुख जिल्ला अधिकारी बन्धु बाँस्तोलामार्फत प्रधानमन्त्रीलाई ज्ञापनपत्र पठाउँदै भेनियर पाताको निकासी दररेट घटाउनेलगायतका तीन वटा माग राखेका छन् ।

हाल भेनियर पाताको भारत निकासी दररेट प्रतिकेजी ६ रुपैयाँ रहेको जनाउँदै त्यसलाई घटाएर तीन रुपैयाा कायम गर्न सरकारसँग माग गरिएको नेपाल भेनियर उत्पादक संघका केन्द्रीय अध्यक्ष दीपक पाण्डेले बताए ।

शून्य भन्सार दररेटमा निकासी भइरहेको प्लाइउडलाई सरकारले ६ प्रतिशत अनुदान दिइरहेको विषयमा ध्यानाकर्षण गराउँदै संघले प्रधानमन्त्रीलाई पठाएको ज्ञापन पत्रमा दैनिक दुई करोड रुपैयाँ विदेशी मुद्रा भित्र्याउने र दैनिक ४५ लाख रुपयाँभन्दा बढी राजस्व बुझाउने भेनियर उद्योगलाई भने राज्यले सहुलियत र प्रोत्साहन दिनुको साटो चर्को निकासी शुल्क लगाएको गुनासो गरिएको छ ।

भेनियर पातालाई भारतबाहेक तेस्रो मुलुकमा निर्यात गर्ने वातावरण तयार पार्न संघले सरकारलाई जोडदार आग्रह गरेको छ । हाल नेपालमा एक सय ८० वटा भेनियर उद्योग सञ्चालनमा रहेका छन् । जसले ८० हजार भन्दा बढी मजदुरलाई प्रत्यक्ष परोक्ष रुपमा रोजगारी प्रदान गरिरहेको संघका उपाध्यक्ष श्याम न्यौपाने बताउँछन् ।

उनका अनुसार पहाडको निजी आवादी जग्गामा हुर्काइएका कमसल प्रजातिका उत्तिस, कदम, मलातो, पिठारी, मौवा लगायतका रुखको काठलाई कच्चा पदार्थको रुपमा प्रयोग गरेर भेनियर उद्योगले भेनियर पाता उत्पादन गर्दै आएका छन् ।

यसरी उत्पादन गरिएको भेनियर पाताको २० प्रतिशत मात्रा स्थानीय प्लाईउड उद्योगहरुले खपत गर्छन् भने बाँकी ८० प्रतिशत भारत निकासी हुने गरेको छ । भारत निकासी हुँदा दैनिक करोडको अंकमा विदेशी मुद्रा भित्रिने र लाखौँ रकम राजस्व राज्यको ढिकुटीमा जम्मा हुने गरेको छ ।

नेपाल उद्योग वाणिज्य महासंघका केन्द्रीय सदस्य नरेन्द्रकुमार खड्काले पछिल्लो समय प्लाईउड उद्योगीले एकलौटी लाभ लिनका लागि भेनियर उत्पादनको भारत निर्यात निरुत्साहित गर्न सरकारी निकायमा गलत ढंगले पैरवी गरिरहेको बताए ।

नेपाल वन पैदावर व्यवसायी संघ इलामका अध्यक्ष दीपक खड्काले नेपालभित्र ठूलो मात्रामा रोजगारीको अवसर सिर्जना गर्ने, कृषि उपज निकासी गरेर किसानको आर्थिकस्तर वृद्धि गर्ने, वैदेशिक मुद्रा भित्र्याउने र राजस्व बढाउन योगदान दिने भेनियर उद्योगको उचित मूल्यांकन हुनुपर्ने धारणा व्यक्त गरेका छन् ।

‘पहाडमा बसाइँ सर्नेक्रम बढिरहेको हुँदा खेतबारीमा अन्नबाली उत्पादन हुन छाडेको छ र बारीभरि काठपात हुर्किरहेका छन्’ उनले भेनियर उद्योगलाई निरुत्साहित गर्न नहुने जिकिर गर्दै भने, ‘आर्थिक मन्दीका कारण उद्योगी बैंकको ब्याज तिर्न नसकेर व्यवसायबाट पलायन भइरहेको अवस्थामा भेनियर उद्योगलाई धरासायी हुनबाट जोगाउन सरकारले निकासीमा सहुलियत प्रदान गर्नुपर्छ ।’ रासस

सम्बन्धित शिषर्कहरु

५७४ किलोमिटर नयाँ पाइपलाइनको अन्तिम परीक्षण सम्पन्न

जीतपुर-सिमरामा ४ दिन सार्वजनिक बिदा

वैदेशिक रोजगारीमा जानेले अब बिना धितो ऋण पाउने, मिटरब्याजको अन्त्य गर्ने रणनीति

नेपालमा लगानी गर्न उद्योगमन्त्री भण्डारीद्वारा विदेशी लगानीकर्तालाई आह्वान

कार्यवाहक प्रधानमन्त्रीको जिम्मेवारी प्रकाशमान सिंहलाई

गृहमन्त्री लेखकले घटाए ‘भिभिआइपी’ बिदाइ र स्वागतमा पदाधिकारी सङ्ख्या