आयल निगम भन्छ- बजारमा ग्यास र पेट्रोल पर्याप्त छ, भण्डारण नगर्नू
काठमाडौं । नेपाल आयल निगमले पेट्रोलियम पदार्थको अनावश्यक स्टोर नगर्न आग्रह गरेको छ । निगमले पेट्रोलियम पदार्थको नियमित आयात भइरहेको हुँदा अनावश्यक स्टोर गरेर जोखिम नबढाउन आग्रह गरेको हो । ‘पेट्रोलियम पदार्थको आयात पाइपलाइनमार्फत नियमित रूपमा भइरहेको छ, आसन्न निर्वाचनको समयमा पनि पर्याप्त मात्रामा पेट्रोलियम पदार्थको आयात जारी रहनेछ, यो समयमा भण्डार नगर्नूहोला, यसले अनावश्यक जोखिम निम्त्याउँछ,’ निगमले भनेको छ । निगमले पेट्रोलियम पदार्थको अनावश्यक रूपमा जर्किन, ड्रममा स्टोर गर्दा हुनसक्ने सम्भावित जोखिमलाई मध्यनजर गर्न पनि आग्रह गरेको छ । पेट्रोलियम पदार्थ स्टोर गर्न निषेधित रहेको पनि निगमको भनाइ छ ।
कांग्रेसमा खुले मिराज ढुङ्गाना, गगनलाई समर्थन गर्न पुगे सर्लाही*
काठमाडौं । जेनजी आन्दोलनमा चर्चामा आएका मिराज ढुङ्गानाले नेपाली कांग्रेसलाई समर्थन गरेका छन् । उनी कांग्रेस सभापति गगनकुमार थापालाई समर्थन गर्न उनीसहितका युवाहरू सर्लाही ४ मा पुगिसकेका छन् । मिराज त्यस्ता जेनजी अगुवा हुन् जसले गत भदौ २३ गतेको जेनजी आन्दोलनका लागि काठमाडौं जिल्ला प्रशासन कार्यालयबाट स्वीकृति पाएको थियो । माइतीघरबाट सुरु भएको उक्त जुलुस नयाँ बानेश्वर पुग्ने र सभामा परिणत गर्ने कार्यक्रम गर्ने तयारी थियो । उक्त आन्दोलनमा घुसपैठ हुनासाथ मिराजले सबै जेनजीहरूलाई आन्दोलन आफूहरूको नियन्त्रणबाट बाहिर गएकाले सबैलाई घर फर्कन आह्वान गरेका थिए । (*शीर्षक सच्याइएकाे)
काठमाडौंको सडक सुनसान
काठमाडौं । निर्वाचनको मौन अवधि शुरु हुनै लाग्दा काठमाडौंको सडक सुनसान देखिएको छ । मतदाताहरू आ–आफ्नै जिल्ला मतदान गर्ने प्रयोजनका लागि मतदान केन्द्रतर्फ जाने थालेपछि सोमबार होली पर्वका दिन पनि काठमाडौंको मुख्यमुख्य सडकमा केही ठाउँमा होलि खेल्दै गरेका केही समूहबाहेक सुनसान देखिएका हुन् । अब फागुन २१ गते अर्थात मतदानका लागि ३ दिन मात्रै बाँकि छ । राजनीतिक दल र त्यसका उम्मेदवारहरु आज बेलुका राति १२ बजेबाट मौन अवधि शुरु हुने भएपछि उनीहरुले यतिखेर आ–आफ्नो निर्वाचन क्षेत्रमा केन्द्रित चुनावी प्रचार अभियानको विट मार्ने तयारीमा छन् । त्यसैगरी मतदाताहरु पनि मतदानका लागि आ-आफ्नो निर्वाचन क्षेत्रमा जाने कामलाई तीब्रता दिएका छन् । काठमाडौंको सडकमा यहाँका उम्मेदवार र उनीहरुको प्रचारका लागि हिँडेका केही गाडीहरुले उम्मेदवारको प्रचारका लागि माइकिङ गर्दै हिँडेको देखिन्छ । यस पटकको निर्वाचनमा राजनीतिक दलहरुले घरदैलो अभियानलाई अघि बढी जोड दिएका छन् । मतदातासँग प्रत्यक्ष भेटेर मत माग्ने कुरालाई उनीहरुले प्राथमिकता दिएकाले आमसभा लगायतका कार्यक्रमहरु पनि कम देखिएका छन् । निर्वाचन आयोगले पनि निर्वाचन आचारसंहिता उल्लंघन हुनेगरी हुलहुज्जत नगर्न पनि राजनीतिक दल र तिनको उम्मेदवारहरु सचेत गराउँदै आएको छ । निर्वाचन केन्द्रित अभियानका कारण यस वर्षको होलि पर्वमा पनि धेरै जमघट हुन नसकेको विश्लेषण गरिएको छ ।
कपिलवस्तुको तीनवटै क्षेत्रमा प्रहरीको मोटरसाइकल गस्ती सुरु
काठमाडौं । कपिलवस्तुमा प्रतिनिधि सभाको निर्वाचनलाई लक्षित गरेर प्रहरीले मोटरसाइकल गस्ती सुरु गरेको छ । सोमबार मध्यान्ह जिल्लाका तीनवटै निर्वाचन क्षेत्रमा प्रहरी मोटरसाइकल गस्ती निस्केका हुन् । तीनवटा क्षेत्रमा प्रहरीले सुरक्षा दिन सुरु गरेको जिल्ला प्रहरी कार्यालयका सूचना अधिकारी रिपेन्द्रकुमार सिंहले जानकारी दिए । सिंहका अनुसार १४ मोटरसाइकलमा आवश्यक हातहतियारसहित २८ जना प्रहरी परिचालन छन् । उनका अनुसार १ नम्बर क्षेत्रमा प्रहरी नायब निरीक्षक किरण तामाङको कमाण्डमा १४ गस्ती गर्नेछन् । आवश्यक हातहतियार तथा असभावका सामग्रीसहित प्रहरीले सुरक्षा दिनेछ । क्षेत्र नम्बर २ मा प्रहरी हवल्दार अर्जुन रिजालको कमाण्डमा १४ वटा मोटरसाइकल २८ जना प्रहरी हातहतियारमा गस्तीमा निस्केका छन् । क्षेत्र नम्बर ३ मा भने प्रबनानि लील बहादुर कुँवरको कमाण्डमा १४ वटा मोटरसाइकलमा २८ जना प्रहरी गस्ती परिचालन रहेका छन् ।
सक्रिय जीवन बीमालेखको संख्या १४.५७ प्रतिशतले वृद्धि, सबैभन्दा धेरै हिस्सा लघु जीवन बीमाको
काठमाडौं । चालू आर्थिक वर्ष २०८२/८३ को माघसम्ममा जीवन बीमा कम्पनीहरूमा सक्रिय बीमालेखको संख्या १ करोड ६२ लाख ५३ हजार वटा रहेका छन् । गत आवको यही अवधिमा सक्रिय जीवन बीमालेखको संख्या १ करोड ४१ लाख ५३ हजार वटा थियो । चालु आवको ७ महिनासम्ममा सक्रिय जीवन बीमालेखको संख्या १४.५७ प्रतिशतले वृद्धि भएको छ। पछिल्लो समय बीमा कम्पनीहरूले विगतको तुलनामा समयमै नवीकरण गर्ने प्रवृत्तिमा केही सुधार भएसँगै सक्रिय बीमालेखेको संख्या बढ्न थालेको बीमा कम्पनीहरू बताउँछन् । कम्पनीहरूका अनुसार बीमासम्बन्धी ज्ञान विस्तारै बीमितमा बढ्दै गएको छ । जसको कारण पनि समयमै बीमा नवीकरण गर्ने बीमितको संख्या बढ्दै गएको हो । जीवन बीमा कम्पनीहरूले विभिन्न प्रकारका बीमालेख जारी गर्दै आइरहेका छन् । माघ मसान्तसम्ममा सक्रिय जीवन बीमालेखहरूको संख्याको आधारमा सबैभन्दा बढी हिस्सा लघु जीवन बीमा बीमालेखको रहेको छ । लघु जीवन बीमालेखको हिस्सा ३५.१६ प्रतिशत रहेको छ । गत आवको तुलनामा लघु जीवन बीमालेखको संख्या ४१.४२ प्रतिशतले वृद्धि भएको छ । गत आवको माघसम्ममा लघु जीवन बीमालेखको संख्या ४० लाख ३१ हजार रहेकोमा चालु आवको सोही अवधिमा सो संख्या वृद्धि भएर ५७ लाख पुगेको छ । लघु जीवन बीमापछि दोस्रो धेरै हिस्सा म्यादी जीवन बीमाको रहेको छ । म्यादी जीवन बीमालेखको हिस्सा २१.१४ प्रतिशत रहेको छ । सात महिनाको अवधिमा कम्पनीले ३४ लाख २७ हजार ७६२ वटा बीमालेख रहेको छ । गत आवको सोही अवधिमा म्यादी जीवन बीमालेखको संख्या २४ लाख ४ हजार वटा थियो । गत आवको तुलनामा म्यादी जीवन बीमालेखको संख्या ४.३४ प्रतिशतले वृद्धि भएको देखिन्छ । वैदेशिक रोजगार म्यादी जीवन बीमालेखको संख्या गत आवको तुलनामा २.४३ प्रतिशतले बढेको छ । बीमा प्राधिकरणको अनुसार गत आवमा वैदेशिक रोजगार म्यादी जीवन बीमालेखको संख्या २३ लाख ४६ हजार रहेकोमा चालु आवमा २४ लाख ४ हजार रहेको छ । सात महिनाको अवधिमा उक्त बीमालेखको हिस्सा १४.४७ प्रतिशत छ । सावधिक जीवन बीमालेखको संख्या २१ लाख ८९ हजार, बालबच्चासम्बन्धी सावधिक जीवन बीमालेखको संख्या १० लाख ८९ हजार, रूपान्तारिक सावधिक जीवन बीमालेखको संख्या ६ लाख, अग्रिम भुक्तानी सावधिक जीवन बीमालेखको संख्या ४ लाख ५७ हजार, आजीवन जीवन बीमालेखको संख्या १ लाख ७० हजार, अन्य जीवन बीमालेखको संख्या १ लाख २३ हजार र एकल बीमा शुल्क बीमालेखको संख्या १ लाख ११ हजार रहेको छ । गत आवको तुलनामा सावधिक जीवन बीमालेखको संख्या ६.६७, बालबच्चासम्बन्धी सावधिक जीवन बीमालेखको संख्या ७.२५, रूपान्तारिक सावधिक जीवन बीमालेखको संख्या १२.१४, अग्रिम भुक्तानी सावधिक जीवन बीमालेखको संख्या २.९५ प्रतिशले वृद्धि भएको छ । त्यस्तै, आजीवन जीवन बीमालेखको संख्या ३.८८ र अन्य जीवन बीमालेखको संख्या ०.२२ प्रतिशतले घटेको छ ।
युएई आक्रमणमा एक नेपालीको मृत्यु, सभापति थापाद्वारा दुःख व्यक्त
काठमाडौं । नेपाली कांग्रेसका सभापति गगनकुमार थापाले संयुक्त अरब इमिरेट्स (युएई) मा भएको पछिल्लो आक्रमणमा परी एक नेपाली श्रमिकको ज्यान गएको घटनाप्रति दुःख व्यक्त गरेका छन् । उनले सोमबार शोक विज्ञप्तिमार्फत दिवङ्गत आत्माप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति समवेदना प्रकट गरेका छन् । सभापति थापाले उक्त क्षेत्रमा रहेका सम्पूर्ण नेपालीलाई उच्च सतर्कता अपनाउन र सुरक्षित रहन आग्रह गरेका छन् । सभापति थापाले द्वन्द्वग्रस्त र असुरक्षित क्षेत्रमा रहेका नेपाली नागरिकहरूको सुरक्षाका लागि आवश्यक सतर्कता र समन्वय अपरिहार्य रहेको उल्लेख गर्दै नेपाल सरकारको ध्यानाकर्षण गराएका छन् । साथै उनले कूटनीतिक पहललाई थप तीव्र, प्रभावकारी र परिणाममुखी बनाउन आग्रह गर्दै विदेशमा रहेका नेपालीको सुरक्षालाई प्राथमिकतामा राखेर तत्काल पहल गर्न सरकारसँग माग गरेका छन् । सभापति थापाले जनसम्पर्क समिति, गैरआवासीय नेपाली सङ्घ तथा समग्र नेपाली समुदायलाई अप्ठ्यारोमा परेका नेपाली नागरिकको पहिचान, सहयोग र आवश्यक समन्वयका लागि सक्रिय भूमिका निर्वाह गर्न अनुरोधसमेत गरेका छन् ।
अबुधाबीमा ड्रोन निष्क्रिय पार्दा अस्ताए गोरखाका दिवस श्रेष्ठ
काठमाडौं । संयुक्त अरब इमिरेट्स (युएई)को अबुधाबीमा ज्यान गुमाउने नेपालीको पहिचान खुलेको छ । ज्यान गुमाउनेमा गोरखाका २९ वर्षीय दिवस श्रेष्ठ रहेको अबुधाबीस्थित नेपाली दूतावासले जनाएको छ । अबुधावीस्थित जायद अन्तर्राष्ट्रिय विमानस्थलमा ड्रोन निष्क्रिय पार्ने क्रममा भएको घटनामा उनको ज्यान गएको हो । श्रेष्ठ मिडलइस्ट कम्पनीमा सेक्युरिटी गार्डको रूपमा कार्यरत थिए । उनको निधनप्रति नेपाली राजदूतावास अबुधाबीले गहिरो दुःख व्यक्त गरेको छ। परिस्थिति सहज भएपछि मृतक श्रेष्ठको शव यथाशीघ्र नेपाल पठाउने पनि दूतावासले जनाएको छ। युएईमा इरानको आक्रमणमा परी तीन जनाको मृत्यु भएको थियो । एक(एक बंगलादेशी र पाकिस्तानी नागरिकको पनि मृत्यु भएको हो । युएईमा रहेका सम्पूर्ण नेपाली नागरिकहरूलाई संयमता अपनाउन र सुरक्षित स्थानमा रहन समेत दूतावासले आग्रह गरेको छ । इरानले युएईमा १६५ वटा ब्यालिस्टिक मिसाइल प्रहार गरेको थियो ।
पोखरा र समृद्धि मर्जपछि पोखरा फाइनान्स बन्ने, मिश्र अध्यक्ष र गुरुङलाई सीईओको जिम्मेवारी
काठमाडौं । पोखरा फाइनान्स र समृद्धि फाइनान्सले चैतभित्रै एकीकृत कारोबार गर्ने लक्ष्य राखेका छन् । समान हैसियतमा गाभिन लागेका यी दुई वित्तीय संस्थाले नेपाल राष्ट्र बैंकबाट छिटो अन्तिम स्वीकृति पाए चैत मसान्तभित्रै एकीकृत कारोबार सुरु गर्ने योजना बनाएका हुन् । दुवै संस्थाबीच १ः१ सेयर अनुपातमा मर्ज हुने सहमति भएको छ । अर्थात् गाभिएपछि दुवै कम्पनीका सेयरधनीले समान अनुपातमा सेयर प्राप्त गर्नेछन् । मर्जरपछि कम्पनीको नाम पोखरा फाइनान्स नै रहनेछ । कम्पनीको दर्ता कार्यालय पोखरामा र कर्पोरेट कार्यालय काठमाडौंमा रहने जनाइएको छ । यस्तो बन्नेछ मर्जरपछि सञ्चालक समिति मर्जरपछि बन्ने पोखरा फाइनान्सको सञ्चालक समितिको टुंगो लागिसकेको छ । मर्जपछि बन्ने सञ्चालक समिति सात सदस्यीय हुनेछ । समृद्धि फाइनान्सबाट चार जना र पोखरा फाइनान्सबाट तीन जना सञ्चालक रहने सहमति भएको छ । समृद्धि फाइनान्सबाट अजय मिश्र, दुर्गा थापा, दिनेशकुमार बर्तौला र सुदीप घिमिरे सञ्चालक बन्नेछन् । हालका अध्यक्ष अजय मिश्र गाभिएपछि पनि अध्यक्ष बन्ने स्रोतले जनाएको छ । विनोद कुमार सुवेदी र रोशन पन्त भने बाहिरिने छन् । पोखरा फाइनान्सबाट प्रतीक गुरुङ, यमबहादुर सुर्खाली र तीलबहादुर गुरुङ सञ्चालक बन्नेछन् । हालका अध्यक्ष राजकुमार गुरुङ र गंगा घले भने बाहिरिनेछन् । मर्जरपछि कम्पनीको प्रमुख कार्यकारी अधिकृत (सीईओ) प्रकाश गुरुङ बन्ने सहमति भएको छ । स्रोतका अनुसार समृद्धि फाइनान्सका हालका प्रमुख कार्यकारी अधिकृत सन्तोषकुमार घिमिरे नायव प्रमुख कार्यकारी अधिकृत रहने वा नरहने विषय भने टुंगो लागेको छैन । कर्मचारी व्यवस्थापन आन्तरिक रूपमा भइरहेको कम्पनी स्रोतले जनाएको छ । कर्मचारीहरू हाल जुन पदमा छन्, सोही पदमा रहने र सेवा-सुविधामा कुनै कटौती नहुने स्पष्ट पारिएको छ । मर्जरपश्चात यस्तो बन्नेछ फाइनान्स मर्जरपछि चुक्ता पुँजी १ अर्ब ९० करोड १४ लाख ६८ हजार रुपैयाँ पुग्नेछ । हाल पोखरा फाइनान्सको चुक्ता पुँजी १ अर्ब ८ करोड २५ लाख ५६ हजार रुपैयाँ र समृद्धि फाइनान्सको ८१ करोड ८९ लाख ११ हजार रुपैयाँ रहेको छ । चालु आर्थिक वर्ष २०८२/८३ को दोस्रो त्रैमाससम्मको तथ्यांकअनुसार मर्जरपछि कम्पनीको निक्षेप १० अर्ब ३७ करोड ९९ लाख ९४ हजार रुपैयाँ र कर्जा लगानी ६ अर्ब ३० करोड ७४ लाख ३४ हजार रुपैयाँ पुग्नेछ । हाल पोखरा फाइनान्सको निक्षेप ७ अर्ब ३८ करोड ९० लाख ७१ हजार रुपैयाँ र समृद्धि फाइनान्सको २ अर्ब ९९ करोड ९ लाख २३ हजार रुपैयाँ रहेको छ । कर्जातर्फ पोखराको ४ अर्ब ३३ करोड ७५ लाख ४१ हजार रुपैयाँ र समृद्धिको १ अर्ब ९६ करोड ९८ लाख ९३ हजार रुपैयाँ रहेको छ । पोखरा फाइनान्सको खराब कर्जा अनुपात २५.१० प्रतिशत र समृद्धि फाइनान्सको ८.१७ प्रतिशत रहेको छ । मर्जरपछि कम्पनीको खराब कर्जा दर उच्च रहने देखिए पनि त्यसलाई क्रमशः नियन्त्रणमा ल्याउने योजना रहेको कम्पनी स्रोतले जनाएको छ । मर्जरपछि शाखा सञ्जाल ३६ वटा पुग्नेछ । एउटै स्थानमा रहेका शाखा आवश्यक परे गाभिने जनाएको छ । कर्मचारी संख्या करिब ३ सय पुग्नेछ, जसमा पोखरा फाइनान्सका करिब २ सय र समृद्धिका करिब १ सय कर्मचारी समाहित हुनेछन् । कम्पनी स्रोतका अनुसार शाखा संख्याको हिसाबले नम्बर वान हुनेछ । यसमा कतिपय शाखा गाभ्नुपर्ने हुन सक्छ । जस्तो पोखरामा पोखरा फाइनान्स र समृद्धि फाइनान्सको शाखा छ । व्यवसायको हिसाबमा दुइटा कम्पनीको जोड्दा अन्य फाइनान्सको प्रतिस्पर्धीको रुपमा आउन सकिन्छ । दुवै संस्थाबीच गरिएको विस्तृत मूल्यांकन (ड्यु डिलिजेन्स अडिट) प्रतिवेदनअनुसार करिब ७ प्रतिशत अन्तर देखिएको छ । प्रारम्भिक सहमति अनुसार १० प्रतिशतभित्र रहने समझदारी भएको र प्रतिवेदन पनि सोही सीमाभित्र आएको कम्पनी स्रोतले जनाएको छ ।
