केपी शर्मा ओलीले गरे झापा- ५ बाट उम्मेदवारी दर्ता
काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले प्रतिनिधिसभा निर्वाचनका लागि झापा क्षेत्र नं. ५ बाट उम्मेदवारी दर्ता गराएका छन् । मंगलबार (आज) उनले दमकस्थित निर्वाचन अधिकृतको कार्यालयमा पुगेर मनोनयन दर्ता गराएका हुन् । सोही क्षेत्रबाट राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाहले मनोनयन दर्ता गराइसकेका छन् । दुवै नेताले आफूलाई भावी प्रधानमन्त्रीका रूपमा प्रस्तुत गरेका छन् । आगामी फागुन २१ गते हुने प्रतिनिधिसभा निर्वाचनमा यो क्षेत्र सर्वाधिक रोचक प्रतिस्पर्धाको केन्द्र बन्ने देखिएको छ ।
रास्वपाबाट सस्मित पोखरेलले गरे क्षेत्र नं ५ बाट मनोनयन दर्ता
काठमाडौं । राष्ट्रिय स्वतन्त्र पार्टी (रास्वपा)बाट काठमाडौं क्षेत्र नं ५ बाट सस्मित पोखरेलले उम्मेदवारी दर्ता गरेका छन् । पोखरेलले मंगलबार (आज) उम्मेदवारी दर्ता गरेका हुन् । उम्मेदवार पोखरेलले पार्टीको मूल नीतिलाई मजबुत बनाउँदै निर्वाचन क्षेत्रमा विकास र समृद्धि प्राथमिकतामा राख्ने प्रतिबद्धता व्यक्त गरेका छन् ।
नेपाल बैंकको ‘लिङ्क, लोड तथा विदड्र’ अभियान, १५ हजार जित्ने अवसर
काठमाडौं । नेपाल बैंक लिमिटेडले डिजिटल बैंकिङ कारोबारलाई प्रवर्द्धन गर्ने उद्देश्यले ‘लिङ्क, लोड तथा विदड्र – पुरस्कार जित्ने अवसर’ नामक अभियान सञ्चालनमा ल्याएको छ । नेपाल बैंक लिमिटेड र खल्ती डिजिटल वालेटको सहकार्यमा सञ्चालनमा आएको उक्त अभियान बैंकको ब्राण्ड प्रवर्द्धन तथा डिजिटल बैंकिङ सेवाको विस्तारलाई लक्षित गरिएको बैंकले जनाएको छ । माघ महिनाभर सञ्चालन हुने यस अभियानमा नेपाल बैंकका कर्मचारी तथा बैंकमा खाता रहेका ग्राहकहरू सहभागी हुन सक्नेछन् । अभियान अवधिभर नेपाल बैंकको खाता खल्ती वालेटसँग लिङ्क गरी कारोबार गर्ने ग्राहक तथा कर्मचारीहरूमध्ये हरेक हप्ता एक जना भाग्यशालीलाई चलचित्र टिकट वा खल्ती प्रो सदस्यता पुरस्कार प्रदान गरिनेछ। त्यसैगरी, अभियान अवधिभर भएको कुल कारोबारको आधारमा एक जना सहभागीलाई नगद १५ हजार रुपैयाँ पुरस्कार प्रदान गरिने बैंकले जनाएको छ । पुरस्कारको घोषणा अभियान समाप्त भएपछि गरिनेछ । अभियानमा सहभागी हुन इच्छुक व्यक्तिले खल्ती वालेटमा दर्ता भई आफ्नो परिचय विवरण अद्यावधिक गरेको हुनुपर्नेछ। साथै, नेपाल बैंकको खाता खल्ती वालेटमा लिङ्क गरी उक्त खातामार्फत कारोबार गरेको हुनुपर्ने सर्त तोकिएको छ। यस सम्बन्धमा थप जानकारी लिन नजिकैको नेपाल बैंकको शाखा कार्यालय वा बैंकको कल केन्द्रको फोन नम्बर ०१–५९७१२२२ मा सम्पर्क गर्न बैंकले अनुरोध गरेको छ । उक्त अभियानले ग्राहकहरूलाई डिजिटल बैंकिङ सेवातर्फ आकर्षित गर्न महत्वपूर्ण भूमिका खेल्ने विश्वास बैंकले लिएको छ । हाल नेपाल बैंक लिमिटेडले देशभर २३१ शाखा, २३७ स्वचालित टेलर मेशिन (एटिएम) तथा ६१ विस्तार काउन्टरमार्फत करिब २७ लाख ग्राहकलाई वित्तीय सेवा प्रदान गर्दै आएको छ ।
सुदूरपश्चिमका कांग्रेस सभापति बलायरले गरे निर्वाचन नलड्ने घोषणा
काठमाडौं । नेपाली कांग्रेस सुदूरपश्चिम प्रदेशका सभापति वीरबहादुर बलायरले प्रतिनिधिसभा निर्वाचन नलड्ने घोषणा गरेका छन् । जेनजी आन्दोलनको निहुँमा छद्म ढंगले प्रतिनिधिसभा विघटन गरिएको र फेरि उही प्रकृतिको निर्वाचनतर्फ मुलुक धकेलिन लागेको ठहर गर्दै आफू उम्मेदवार नबन्ने मनस्थितिमा पुगेको उनले जानकारी दिए । बलायरले प्रतिनिधिसभा फेरि पनि विघटन नहुने स्पष्ट र विश्वसनीय ग्यारेन्टी नरहेको अवस्थामा त्यस्तो सभामा उम्मेदवार बन्नु उपयुक्त नहुने बताएका छन् । ‘बारम्बार प्रतिनिधिसभा विघटनको अभ्यासले लोकतान्त्रिक प्रणालीप्रति जनविश्वास कमजोर बनाएको छ,’ उनले भने, ‘त्यसै कारण यस पटक म निर्वाचनमा नउत्रिने निर्णयमा पुगेको हुँ ।’ उनका अनुसार यो निर्णयबारे यसअघि नै पार्टी नेतृत्वलाई जानकारी भइसकेको छ । ‘मैले कार्त्तिक महिनामै पार्टी सभापति शेरबहादुर देउवा, महामन्त्रीहरू गगन थापा र विश्वप्रकाश शर्मालाई आफ्नो धारणा र निर्णय अवगत गराएको हुँ,’ बलायरले स्पष्ट पारे ।
उज्यालो नेपाल पार्टीका श्री गुरुङले काठमाडौं- ५ बाट गराए मनोनयन दर्ता
काठमाडौं । उज्यालो नेपाल पार्टीका नेता श्री गुरुङले काठमाडौं क्षेत्र नं ५ बाट आफ्नो उम्मेदवारी मनोनयन दर्ता गराएका छन् । मंगलबार (आज) सम्बन्धित निर्वाचन कार्यालयमा पुगेर गुरुङले आधिकारिक रूपमा मनोनयन दर्ता गराएका हुन् । मनोनयन दर्तापछि सञ्चारकर्मीहरूसँग कुरा गर्दै गुरुङले सुशासन, रोजगारी सिर्जना र स्थानीय विकासलाई आफ्नो प्रमुख एजेन्डा बनाउने बताएका छन् ।
जुनियरलाई डीसीईओ बनाएपछि बरालले छोडे बैंक
काठमाडौं । आफूभन्दा कनिष्ठ कर्मचारीलाई नेपाल बैंकको नायव प्रमुख कार्यकारी अधिकृत (डीसीईओ) नियुक्त गरिएकाे भन्दै सहायक प्रमुख कार्यकारी अधिकृत (एसीईओ) विश्वराज बरालले बैंकबाट राजीनामा दिएका छन् । सञ्चालक समितिले होमबहादुर खड्कालाई डीसीईओमा नियुक्त गरेपछि बरालले पद तथा प्रतिष्ठामा अन्याय भएको महसुस गर्दै राजीनामा दिएको बताएका हुन् । बरालले माघ ४ गते राजीनामा पत्र बुझाएको र कर्मचारी सेवा विनियमावलीअनुसार एक महिनाको समय दिएर फागुन १० गतेदेखि लागू हुने गरी राजीनामा दिएको जानकारी दिए । उनले राजीनामा पत्र बैंकका प्रमुख कार्यकारी अधिकृत (सीईओ)लाई बुझाइसकेको र अब स्वीकृत गर्ने विषय व्यवस्थापनको हातमा रहेको बताए । ‘मैले माघ ४ गते नै राजीनामा बुझाएको हुँ । कर्मचारी सेवा विनियमावलीअनुसार एक महिनाको समय दिनुपर्ने भएकाले फागुन १० गतेदेखि लागू हुने गरी राजीनामा दिएको हुँ । राजीनामा बुझाइसकेको छु, अब स्वीकृत गर्ने विषय उहाँहरूको काम हो,’ बरालले भने । उनले आफूभन्दा जुनियर कर्मचारीलाई सिनियर पदमा पदोन्नति गरेपछि जागिर छाड्ने निर्णय गर्न बाध्य भएको बताए । ‘कनिष्ठलाई सिनियर बनाएपछि नै मैले बैंक छोड्ने निर्णय गरेको हुँ,’ उनले भने । बराल आगामी फागुन २० गते अनिवार्य अवकाशमा जाने तयारीमा थिए । तर, अवकाशको करिब १० दिन अगावै उनले राजीनामा दिने निर्णय गरेका हुन् । बैंकका एक कर्मचारीका अनुसार बरालले राजीनामा दिए पनि २० वर्षे सेवा अवधि पूरा गरिसकेकाले कर्मचारी सेवा विनियमावलीअनुसार पाउने सम्पूर्ण सेवा सुविधा प्राप्त गर्नेछन् । ‘१० दिन अगाडि नै राजीनामा दिनुभए पनि विनियमावलीअनुसार सबै सेवा सुविधा पाउनु हुन्छ । २० वर्षे सेवा अवधि नपुगेको भए फरक हुन्थ्यो । तर, उहाँले सबै सुविधा पाउनु हुन्छ,’ ती कर्मचारीले भने, ‘तर, आफूभन्दा जुनियरलाई डीसीईओ बनाएपछि उहाँ निकै मर्माहत हुनुभयो । बाँकी दुई महिनाको अवधिमा काम गर्ने वातावरण नै बनेन ।’ ती कर्मचारीका अनुसार बैंकका सीईओलाई सहयोग गर्ने उद्देश्यले डीसीईओमा खड्कालाई ल्याइएको थियो । तर, नियुक्ति भएलगत्तै सीईओ र डीसीईओबीच समन्वयभन्दा बढी खटपट सुरु भइसकेको दाबी पनि गरिएको छ । नेपाल बैंकभित्र वरिष्ठताक्रम मिचेर गरिएको पदोन्नतिले कर्मचारी मनोबलमा गम्भीर असर पार्न सक्ने भन्दै यस विषयमा बैंकभित्रै व्यापक असन्तुष्टि देखिन थालेको छ । नेपाल बैंकभित्र राजनीतिक चेपुवामा कर्मचारी, कनिष्ठलाई डीसीईओ बनाएपछि जागिर छाड्दै सिनियर डीसीईओ र एसीईओ नियुक्तिले गरम बन्दै नेपाल बैंकभित्रको राजनीति, विष्णु पौडेल शक्ति केन्द्र
काठमाडौं क्षेत्र नं ५ बाट नेकपाकी कल्पना शर्माले गरिन् मनोनयन दर्ता
काठमाडौं । नेपाली कम्युनिस्ट पार्टी (नेकपा)बाट काठमाडौं क्षेत्र नं ५ मा कल्पना शर्माले औपचारिक रूपमा मनोनयन दर्ता गराएकी छन् । आगामी निर्वाचनलाई लक्षित गर्दै शर्माले मंगलबार (आज) निर्वाचन कार्यालय पुगेर उम्मेदवारी दर्ता गराएकी हुन् । मनोनयन दर्तापछि प्रतिक्रिया दिँदै शर्माले जनताको आवाज संसदमा बलियो रूपमा उठाउने प्रतिबद्धता व्यक्त गरिन् ।
२०२८ मा जर्मनीलाई उछिन्दै भारत, ५ ट्रिलियन डलर अर्थतन्त्र बन्ने प्रक्षेपण
काठमाडौं । भारतले अर्को महत्त्वपूर्ण आर्थिक उपलब्धि हासिल गर्ने तयारीमा छ । सन् २०३० सम्म भारत ‘उच्च–मध्यम आय’समूहमा प्रवेश गर्ने प्रक्षेपण गरिएको छ । यससँगै भारत चीन र इन्डोनेसियाजस्ता मुलुकहरूको पंक्तिमा उभिनेछ । स्टेट बैंक अफ इन्डिया (एसबीआई) रिसर्चको एक रिपोर्टले यो तथ्य सार्वजनिक गरेको हो । रिपोर्टअनुसार भारत सन् २०२८ सम्म विश्वको तेस्रो ठूलो अर्थतन्त्र बन्ने मार्गमा समेत अघि बढिरहेको छ । यो अनुमान भारतको प्रति व्यक्ति कुल राष्ट्रिय आय (जीएनआई) मा निरन्तर वृद्धि र समग्र जीडीपी विस्तारका आधारमा गरिएको हो । एसबीआई रिसर्चको रिपोर्टमा भनिएको छ कि आगामी चार वर्षभित्र अर्थात् सन् २०३० सम्म भारतको प्रति व्यक्ति आय ४ हजार अमेरिकी डलर पुग्ने सम्भावना छ । यसले भारतलाई औपचारिक रूपमा उच्च–मध्यम आय समूहमा समावेश गराउनेछ । हालको वर्गीकरणअनुसार भारत चीन र इन्डोनेसियासँगै सोही समूहमा रहनेछ, जसले देशको आय संरचनामा आएको ठूलो परिवर्तनलाई देखाउँछ । विश्व बैंकले देशहरूलाई प्रति व्यक्ति कुल राष्ट्रिय आयका आधारमा चार वर्गमा विभाजन गर्छ— निम्न आय, निम्न–मध्यम आय, उच्च–मध्यम आय र उच्च आय । सन् १९९० मा विश्वभरका २१८ देशमध्ये ५१ देश निम्न आय वर्गमा थिए । तर सन् २०२४ को पछिल्लो वर्गीकरणअनुसार यो संख्या घटेर २६ मा सीमित भएको छ । त्यस्तै, उच्च आय भएका देशहरूको संख्या सन् १९९० मा ३९ मात्र थियो भने सन् २०२४ मा बढेर ८७ पुगेको छ । एसबीआई रिसर्चका अनुसार भारतलाई स्वतन्त्रतापछि निम्न–मध्यम आय समूहबाट बाहिर निस्कन करिब ६० वर्ष लागेको थियो । सन् १९६२ मा भारतको प्रति व्यक्ति जीएनआई मात्र ९० डलर थियो, जुन सन् २००७ सम्म आइपुग्दा ९१० डलर पुगेको थियो । त्यसपछि भारतको आर्थिक प्रगति तीव्र गतिमा अघि बढ्यो । सन् २००९ मा प्रति व्यक्ति आय १ हजार डलर, सन् २०१९ मा २ हजार डलर पुगेको थियो भने सन् २०२६ सम्म ३ हजार डलर पुग्ने अनुमान गरिएको छ । यी सबै उपलब्धि भारतलाई उच्च–मध्यम आय राष्ट्र बनाउने दिशामा महत्त्वपूर्ण कदम मानिन्छन् । रिपोर्टमा भनिएको छ, ‘भारत आगामी चार वर्षभित्र अर्थात् २०३० सम्म प्रति व्यक्ति आय ४ हजार डलर पुर्याउने मार्गमा छ । यसले भारतलाई उच्च–मध्यम आय देश बनाउनेछ र चीन तथा इन्डोनेसियासँगको समूहमा समावेश गराउनेछ ।’ यसलाई भारतको आर्थिक अवस्थालाई थप सुदृढ बनाउने ठूलो उपलब्धिका रूपमा हेरिएको छ । उच्च आय देश बन्न भारतले सन् २०४७ सम्म आफ्नो प्रति व्यक्ति जीएनआई वार्षिक ७.५ प्रतिशतको चक्रवृद्धि दरमा वृद्धि गर्नुपर्ने एसबीआई रिसर्चले जनाएको छ । यो दर सम्भव देखिन्छ किनकि सन् २००१ देखि २०२४ सम्म भारतको औसत वृद्धि दर ८.३ प्रतिशत रहेको छ । यद्यपि यदि उच्च आय देशको मापदण्ड १३ हजार ९३६ डलरबाट बढेर सन् २०४७ सम्म १८ हजार डलर प्रति व्यक्ति पुगेमा भारतले त्यस अवधिसम्म वार्षिक ८.९ प्रतिशतको दरले प्रति व्यक्ति आय बढाउनुपर्ने हुन्छ । आर्थिक मोर्चामा पनि भारतको अवस्था झनै बलियो हुने प्रक्षेपण गरिएको छ । एसबीआई रिसर्चका अनुसार भारत सन् २०२८ सम्म ५ खर्ब डलर (५ ट्रिलियन डलर)को अर्थतन्त्र बन्नेछ । त्यसपछि सन् २०३५ सम्म १० खर्ब डलरको अर्थतन्त्र बन्ने क्षमता भारतसँग रहेको छ । हाल विश्वको सबैभन्दा ठूलो अर्थतन्त्र अमेरिका हो भने त्यसपछि चीनको स्थान छ । तर भारतले सन् २०२८ सम्म जर्मनीलाई पछि पार्दै विश्वको तेस्रो ठूलो अर्थतन्त्रको हैसियत हासिल गर्ने प्रक्षेपण गरिएको छ, जसले विश्व आर्थिक परिदृश्यमा ठूलो प्रभाव पार्नेछ । सन् १९९० मा भारत विश्वको १४औं ठूलो अर्थतन्त्र थियो । तर सन् २०२५ सम्म आइपुग्दा भारत चौथो ठूलो अर्थतन्त्र बन्ने अनुमान छ । यसले पछिल्ला केही दशकमा भारतले गरेको तीव्र आर्थिक प्रगतिलाई स्पष्ट रूपमा देखाउँछ । एसबीआई रिसर्चले यो प्रगति कायम राख्न सुधार कार्यक्रमलाई निरन्तरता दिनुपर्नेमा जोड दिएको छ । रिपोर्टमा भनिएको छ, ‘भारतले अतिरिक्त र द्रुत आर्थिक वृद्धि हासिल गर्न सुधारहरूको एजेन्डालाई निरन्तर अघि बढाउनुपर्छ, जसले देशलाई उच्च आय राष्ट्रको श्रेणीमा पुर्याउन आवश्यक आधार तयार गर्छ ।’ रिपोर्टअनुसार भारतको प्रति व्यक्ति आय र हालको मूल्यमा जीडीपी दुवैमा औसत ११–११.५ प्रतिशतको वार्षिक वृद्धि सम्भव छ । यही वृद्धिदरले भारतलाई सन् २०३० सम्म उच्च–मध्यम आय र सन् २०४७ सम्म उच्च आय देशको श्रेणीमा पुर्याउन मद्दत गर्ने निष्कर्ष निकालिएको छ ।
