३५ अर्ब ११ करोडको बाँडफाँड मै अलमल, घर बनाउन शुरु गर्ने एक लाख मात्रै
काठमाडौं । भूकम्प गएको दुई वर्ष वित्दा पनि राष्ट्रिय पुनर्निर्माण प्राधिकरणले ३५ अर्ब ११ करोड रुपैयाँ बाँडफाँड (अंश बण्डा) नै सकेको छैन । रकम खर्च गर्ने परियोजनाहरूको मोडालिटी तयार नहुँदा अर्थात ढिला गरी मोडालिटी तयार हुँदा उक्त रकम अबण्डाको रुपमा रहेको हो । भारत सरकारले स्रोत विनियोजन गर्ने भनिएको साढे १२ अर्ब रुपैयाँको अझै सम्झौता हुन नसकेको, जर्मन, कोरियाजस्ता सिधै स्रोत भुक्तान गर्ने प्रतिवद्धता गरेका राष्ट्र समक्ष कार्यक्रम नै पेश गर्न नसक्नु तथा स्रोत विनियोजन गरेका जाइका, एडीबीलगायतका विकास साझेदारबाट विनियोजित रकम खर्च गर्न प्रयास गर्दा गर्दै पनि खर्च गर्न नसकिएको कारण ठूलो रकम अबण्डामा परेकोप्राधिकरणका प्रमुख कार्यकारी अधिकृत प्राडा गोविन्दराज पोखरेलले बताए । चालु आर्थिक वर्षको ६ महिनापछिमात्र त्रिभुवन विश्वविद्यालय भवन निर्माणको मोडालिटी तयार भएको, विद्यायत तथा गुम्बा पुननिर्माणको मोडालिटी ढिलो गरी तय भएको छ । जसले गर्दा परियोजना अघि बढाउन गाह्रो भएको हो । प्राधिकरणले चालु आवमा पुननिर्माणका लागि कुल एक खर्ब ११ अर्ब खर्च गर्ने अख्तियारी पाएको थियो । सो रकममध्ये हालसम्म करिब ५६ प्रतिशत रकममात्र खर्च हुन सकेको प्राधिकरणले जानकारी दिएको छ । एकलाखले मात्रै बनाउन शुरु गरे घर भूकम्प गएको दुई वर्षमा प्राधिकरणले सवा ६ लाख भूकम्प पीडितसँग पहिलो किस्तको सम्झौता गरेपनि एक लाखलेमात्र घर निर्माण कार्य शुरु गरेका छन् ।प्राधिकरणका अनुसार५० हजार पाएकामध्ये१ लाख १० हजार ६ सय ४९ भूकम्प पीडितलेमात्रै घर निर्माण कार्य शुरु गरेका हुन् । अहिलेसम्म ५ लाख ९२ हजार ९ सय ६१ ले घर निर्माणका लागि सरकारबाट पहिलो किस्ताको अनुदान पाएका छन् । सोमध्ये ४ लाख ८२ हजार ३ सय १२ पीडित परिवारले घरको जगसमेत हालेका छैनन् । विनाशकारी भूकम्पका कारण ३१ जिल्लाका ७ लाख ४६ हजारले आफ्नो निजी आवास गुमाएका छन् । सरकारले अहिलेसम्म ६ लाख २८ हजार ४ सय ४३ भूकम्पपीडित परिवारसँग अनुदान सम्झौता गरिसकेको छ भने एक लाख १७ हजार पाँच सय ५७ लाभग्राहीसँग अझै सम्झौता गर्न सकेको छैन । पहिलो किस्ता पाएकामध्ये ७७ हजार १ सय ८० परिवारले घरको जग हालेर दोस्रो किस्ताको लागि आवेदन दिएका छन् । सो मध्ये ६४ हजार ३ सय २१ आवेदन प्रमाणिकरण भइसकेका प्राधिकरणले जानकारी दिएको छ । प्राधिकरणका अनुसार अहिलेसम्म ३८ हजार ७ सय २४ वटा घरहरु निर्माण भएका छन् । यस्तै ४८ हजार २१ परिवारले दोस्रो किस्ता वापतको १ लाख ५० हजार रुपैयाँ बुझिसकेका छन् । ३१ जिल्लाका २ हजार २ सय ३४ पीडित परिवारले तेस्रो किस्ता वापतको १ लाख रुपैयाँ पनि बुझिसकेका छन् । भूकम्पमा निजी आवास गुमाएका पीडितलाई नयाँ घर बनाउन सरकारले तीन किस्तामा गरी तीन लाख रुपैयाँ उपलब्ध गराउने छ । सो योजनाअनुसार पहिलो किस्तामा ५० हजार, दोस्रो किस्तामा १ लाख ५० हजार र तेस्रो किस्तामा १ लाख रुपैयाँ उपलब्ध गराइने छ ।
अग्नि ग्रुप मार्फत ११ सय २८ थान जर्सी तथा ट्राक प्रदान
काठमाडौं । बिहिबार अग्नि ग्रुपका तर्फबाट अर्जुन शर्माले एपीएफ प्रमुख सिंह बहादुर श्रेष्ठलाई आगामी सिजनको लागि आवश्यक पर्ने जम्मा ११ सय २८ थान जर्सी तथा ट्राक प्रदान गरेका छन् । अग्नि ग्रुप नेपाल एपीएफ क्लबको फुटबल खेल प्रवद्र्धनको लागि अग्नी इन्कर्पोरेटेड प्रा.लि.(महिन्द्रा) ले प्रायोजन गर्दै आएको छ । अग्नि ग्रुपले उक्त टिमलाई ५ वर्षको लागि प्रायोजन गरेको छ । यस अवस्थामा अग्निले एपीएफ क्लवलाई वर्षभरि आवश्यक पर्ने खेल सामग्री निरन्तर उपलब्ध गराउँदै आएको जानकारि दिइएको छ । एपीएफ क्लबले समग्र देशको खेलकुद विकासमा उत्तरदायी एवं जिम्मेवारीपूर्ण भूमिका खेल्दै आएको तथा। अग्नि ग्रुपले आफ्नो सामाजिक उत्तरदायी भूमिका अन्तर्गत यसपटक आफूलाई नेपाली खेल जगत्मा केन्द्रित गराएको उल्लेख छ । राष्ट्रिय लिगमा मात्र केन्द्रित नभई खेलकुदको समग्र विकास गर्नमा अग्नि केन्द्रित रहदै आएकोले गर्दा नेपाली फुटब तथा फुटबलका फ्यानहरुलाई विशेष फलदायी भएको जानकारि दिइएको छ ।
बैंक तथा वित्तिय संस्थालाई चुक्ता पुँजी पुर्याउने समय असोज मसान्तसम्म-चिन्तामणी शिवाकोटी
काठमाडौं । नेपाल राष्ट्र बैंकका कायम मुकायम गभर्नर चिन्तामणी शिवाकोटीले बैंक तथा वित्तिय संस्थाहरुलाई चुक्ता पुँजी पुर्याउने समय असोज मसान्तसम्म प्रदान गरिएको बताएका छन् । सिद्धार्थ डेभलपमेन्ट बैंक एक्वायर गरेपछि जनता बैंकको एकिकृत कारोबार सुभारम्भ कार्यक्रमलाई सम्बोधन गर्दै कायम मुकायम गभर्नर शिवाकोटीले भने–‘हामीले तोकेको चुक्ता पुँजी पुर्याउन असोज मसान्तसम्मको समय दिने भएका छौं, यो भनेको समय थपिएको होइन, सहुलियत दिएका मात्रै हौं ।’ उनले आगामी साधारण सभाबाट पनि चुक्ता पुँजी पुर्याउन नसक्ने बैंक तथा वित्तिय संस्थाहरुलाई भने कारवाही गर्ने स्पष्ट पारे । ‘आगामी साधारण सभाबाट पनि तोकिएको चुक्ता पुँजी पुर्याउन नसक्नेहरुलाई कारवाही हुनबाट कसैले रोक्न सक्दैन’, शिवाकोटीले भने । उनले असोज मसान्तसम्ममा चुक्ता पुँजी पुर्याउन नसक्ने बैंक तथा वित्तिय सस्ंथाहरुलाई निक्षेप संकलन, कर्जा प्रवाह र शाखा विस्तारमा रोक लगाउने स्पष्ट पारे । उनले पुराना नोटहरुको कारोबार गर्ने बैंक् तथा वित्तिय संस्थाहरुलाई पनि कारवाही गर्ने बताए । बैंक तथा वित्तिय संस्थाहरुले पुराना नोटको साटेर जनतालाई नयाँ नोट दिन अटेरी गरेको पनि बताए । कायम मुकायम गभर्नर शिवाकोटीले हाल क, ख, ग र घ वर्गका बैंक तथा वित्तिय संस्थाहरुको शाखा सञ्जाल ४ हजार ८ सय ९४ वटा पुगेको बताए । बाणिज्य बैंकको शाखा सञ्जाल १ हजार २ सय ६२ वटा, विकास बैंकको ८०५ वटा, फाइनान्स कम्पनीको १४८ वटा र माइक्रोफाइनान्सको १ हजार ८ सय २५ वटा शाखा रहेको जानकारी दिए ।
सिद्धार्थ एक्वायर गरेपछि जनताको एकिकृत कारोबार आरम्भ, ११३ शाखाबाट देशैभर सेवा
काठमाडौं । सिद्धार्थ डेभलपमेन्ट बैंक अक्वायरपछि जनता बैंकले एकिकृत कारोबार सुरु गरेको छ । एकिकृत कारोबारको नेपाल राष्ट्र बैंकका कायम मुकायम गभर्नर चिन्तामणी शिवाकोटीले आरम्भ गरेका हुन् । एक्वायरपछि जनता बैंकको शाखा सञ्जाल ११३ वटा पुगेको छ । बैंकको निक्षेप ५० अर्ब पुगेको छ भने कर्जा ४५ अर्ब रहेको छ । ७ अर्ब चुक्ता पुँजी पुर्याएको बैंकले आगामी बोनस सेयर दिएर ८ अर्ब पुँजी पुर्याउने बताएको छ । बैंकका प्रमुख कार्यकारी अधिकृत पर्शुराम कुँवर क्षेत्रीले बाणिज्य बैंक तर्फ सबै भन्दा धेरै उत्पादनशिल क्षेत्रमा लगानी गर्ने बैंकका रुपमा जनता बैंक स्थापित भैसकेको बताए । बैंकमा कर्मचारीको संख्या एक हजार पुगेको छ । प्रमुख कार्यकारी अधिकृत क्षेत्रीले बैंकको शाखा विस्तार नभएका १४ जिल्लाका १५ स्थानीय तहमा बैंकले शाखा विस्तार गर्ने तयारी गरेको बताए । कार्यक्रममा नेपाल राष्ट्र बैंकका कायम मुकायम गभर्नर चिन्तामणी शिवाकोटीले सिद्धार्थ बैंकलाई अक्वायर गरेसँगै जनता बैंकको प्रतिष्पर्र्धी क्षमता थप बढ्ने बताएका थिए । उनले सबै जनतामा पुग्ने लक्ष्य अनुसार जनता बैंकले न्युनतम शुल्कमा छिटो छरिटो र विश्वनिय सेवा प्रदान गर्ने विश्वास व्यक्त गरेका थिए । बैंकर्स एसोसियसनका अध्यक्ष अनिल शाहले २८ वटा बाणिज्य बैंकहरुबिचको प्रतिष्पर्धामा जनता बैंक अब्बल हुने विश्वास व्यक्त गरेका थिए ।
ठूलो लगानीमा क्यान्सर अस्पताल
चितवन । निजी क्षेत्रमा क्यान्सरको समेत उपचार गराइरहेको यहाँको एनपिआई नारायणी सामुदायिक अस्पतालले ठूलो लगानीमा छुट्टै क्यान्सरको विशेषज्ञ अस्पताल सञ्चालन गर्नेभएको छ । बिपी कोइराला मेमोरियल क्यान्सर अस्पतालका पूर्व अध्यक्ष र कार्यकारी निर्देशक रहिसक्नुभएका डा भक्तमान श्रेष्ठको नेतृत्वमा रहेको नारायणी सामुदायिक अस्पतालले नेपालमै सबैभन्दा ठूलो लगानीमा अत्याधुनिक क्यान्सर अस्पताल सञ्चालन गर्न लागेको हो । नारायणी सामुदायिक अस्पतालका कार्यकारी अध्यक्ष समेत रहेका श्रेष्ठका अनुसार बर्सेनि नेपालबाट ४० प्रतिशत क्यान्सरका बिरामी विदेश उपचार गर्न जाने गर्दछन् । ती बिरामीलाई समेत रोक्न सक्ने गरी अत्याधुनिक अस्पताल सञ्चालन गरिने उनले बताए । अस्पताल सञ्चालनका लागि भरतपुर महानगरपालिका–९ गोन्द्राङस्थित राजमार्गबाट एक किलोमिटर दक्षिणतर्फ तीन बिगाहा ६ कठ्ठा जमिनसमेत खरिद गरिसकिएको छ । करिब २ अर्ब लगानी गरी तीन वर्षभित्र अस्पताल सञ्चालनमा ल्याइने श्रेष्ठले बताए। हाल नारायणी सामुदायिक अस्पतालमा १८० जना लगानीकर्ता रहेका छन् । यसको मातृ संस्थाको रुपमा नेपाल पोलिटेक्निक इन्स्टिच्यूट एनपिआई रहेको छ । एनपिआई समूहले अस्पतालको नेतृत्व गर्नेछ । यो समूहभित्र झण्डै ७०० लगानीकर्ता रहेको अस्पतालका सञ्चालक चुडामणि खनालले बताए । विशेषज्ञ चिकित्सक र स्थानीय वासीलाई लगानीका लागि आह्वान गरिएको छ । नपुग रकम बैंकबाट ऋण लिइने खनालले बताए । अस्पताललाई प्राइभेट लिमिटेडको रुपमा विकास गरिने जानकारी दिँदै खनालले सर्वसाधारणका लागि पनि शेयर दिइने बताए । अस्पतालमा मानिसको शरीरमा क्यान्सर भए नभएको पत्ता लगाउने पेटस्क्यान, रेडियोथेरापीको अत्याधुनिक मेसिन आइजिआरडी, टाउकोको रेडियोथेरापी गर्ने गाफानाइफ, क्यान्सरको जेनेटिक थेरापी गर्ने उपकरण लगायतका अत्याधुनिक उपकरण र शल्यक्रिया कक्ष हुने अध्यक्ष श्रेष्ठले बताए । भविष्यमा रोवट सर्जरी गर्ने लक्ष्यका साथ अस्पताल स्थापना गर्न लागिएको उनको भनाइ छ । यससँगै अस्पतालमा मुटुरोग र मृगौला रोगको पनि विशेषज्ञसहितको उपचार गरिने छ । विश्व स्वास्थ्य सङ्गठनका अनुसार नेपालमा बर्सेनि ४० देखि ४६ हजार क्यान्सरका नयाँ बिरामी थपिने गरेका छन् । रासस
अनलाईन मेघा स्टोरको छुट कुपन असार ३० देखि साउन ५ गते सम्म
काठमाडौं । अनलाईन मेघा स्टोरले ग्राहकहरुलाई सहुलियत दिने उद्देश्यले स्मार्ट डोकोले निश्चित सामानको खरिदमा असार ३० देखि साउन ५ सम्म कुपनको व्यवस्था ल्याएको छ । ‘स्मार्ट डोकोले’ ग्राहकहरुलाई सहुलियत दिने उद्देश्यले निश्चित सामानको खरिदमा ५० प्रतिशत सम्म छुट तथा अन्य ससामानको खरिदमा ५ प्रतिशत सम्मको छुटको व्यवस्था ल्याएको जानकारि दिएको छ । स्मार्ट डोकोमा विभिन्न उमेर एवम् समुहका लागि विभिन्न वस्तुहरु रहेका छन् । यो संस्थाले कानुनी रुपमा मान्यता पाएको तथा कुनै पनि ग्राहक वर्गले किनेको सामान फिर्ता गर्न सकिने जानकारि दिइएको छ । साथै उक्त अनलाइनले स्मार्टडोको एप्सको पनि उपलव्धता गराएको जारी प्रेस विज्ञप्तिमा उल्लेख छ । स्मार्टडोकोमा १८ भन्दा धेरै उत्पादन समुह रहेको छन् । भने त्यस अन्तर्गत अन्य उपसमुह पनि रहेका छन् । यहाँ ग्राहकले सहजै रुपमा मोबाइल फोन, विद्युतीय सामान, फेसन आइटम, बच्चाका सामान, घरपालुवा जनावरहरुलाई आवश्यक पर्ने सामान, खाद्य एवं पेय पदार्थ लगायत अन्य थुप्रै सामानहरु पाउने जनाएको छ । हाल स्मार्ट डोकोमा ४५ भन्दा बढी समानहरु रहेका छन भने हरेक दिन नयाँ समानहारु थप्दै गएको तथा ग्राहकहरुको सन्तुष्टिका लागि स्मार्टडोकोले ५सय रुपैयाँ देखि २५सय रुपैयाँ सम्म गिफ्ट कार्ड पनि ल्याएको उल्लेख छ । काठमाडौं, पोखरा, नारायणगढ, विराटनगर, इटहरी, धरान र बीरगन्जमा छिटोभन्दा छिटो डेलिभरी सुविधा रहेको कम्पनीले जनाएको छ ।
अलैँची ब्लकलाई पिकअप भ्यान र ट्रयाक्टर
इलाम । प्रधानमन्त्री कृषि आधुनिकीकरण परियोजनाअन्तर्गत देउमाई नगरपालिकामा सञ्चालित अलैँची ब्लक कार्यक्रमलाई ४० लाख मूल्य बराबरको सामग्री हस्तान्तरण गरिएको छ । जिल्ला कृषि विकास कार्यालय इलाममा बुधबार आयोजित कार्यक्रममा देउमाई ब्लक सञ्चालक समितिका अध्यक्ष राम रानालाई एक पिकअप भ्यान र एक ट्याक्टरको साँचो स्थानीय विकास अधिकारी ध्रुवबहादुर खड्काले हस्तान्तरण गर्नुभयो । परियोजनाअन्तर्गत ८५ प्रतिशत अनुदानमा पिकअप ५० प्रतिशत अनुदानमा ट्याक्टर उपलब्ध गराइएको वरिष्ठ कृषि विकास अधिकृत राम सोगारथ शाहले जानकारी दिए । पिकअपको मूल्य २१ लाख र ट्याक्टरको १८ लाख परेको कार्यालयले जनाएको छ । अलैँची ब्लक कार्यक्रममा साना सिँचाइलाई ५ लाख, नर्सरी निर्माणमा ६ लाख, कस्टम हायरिङ सेन्टरलाई १५ लाख, पोष्ट हार्भेस्ट सेन्टर निर्माणमा २० लाख, माटो परीक्षण शिविरलाई ६० हजार रुपैयाँ र बीउ बेर्नाका लागि ६० हजार रुपैयाँ उपलव्ध भएको शाहले बताए । इलाममा परियोजनाअन्तर्गत सूर्योदय नगरपालिकाको आठघरेमा तरकारी ब्लक र देउमाई नगरमा अलैँची ब्लक सञ्चालनमा रहेका छन् । आठघरे तरकारी ब्लकमा यसअगाडि नै ३ वटा पिकअप भ्यान हस्तान्तरण गरिसकिएको छ । २ हजार रोपनी क्षेत्रफलमा कुनै एक बालीलाई आधुनिकीकरण गरी यान्त्रीकरणतर्फ उन्मुख गराउनका लागि परियोजना सञ्चालन हुँदै आएको छ । यस्तै, जिल्लामा धान, मकै, अदुवा, तरकारी लगायतका क्षेत्रमा २५ वटा पकेट कार्यक्रम सञ्चालनमा रहेका छन् । रासस ––––––––
बूढानीलकण्ठको बजेट ७१ करोड
काठमाडौँ । बूढानीलकण्ठ नगरपालिकाको प्रथम नगर सभा बिहिबारदेखी सुरु भएको छ । सभाको सांसद डा राजन भट्टराईले आज उद्घाटन गर्दै सरकारले स्थानीय तहलाई असाधारण अधिकार दिएकाले त्यसको सदुपयोग गर्न आग्रह गरे। उनले स्थानीय तह लोकतन्त्रलाई संस्थागत गर्ने निकाय भएकाले सर्वसाधारणलाई अपनत्व हुने गरी काम गर्नुपर्ने बताउँदै स्थानीय तह स्थानीय सरकार भएकाले स्थानीय स्रोतसाधनलाई अधिकतम प्रयोग गरी विकास गर्नुपर्नेमा जोड दिए । नगरपालिकाका प्रमुख उद्धव खरेलले बजेट र नीति तथा कार्यक्रम प्रस्तुत गर्दै बूढानीलकण्ठको विकास गर्न सबैको सहयोग हुनुपर्नेमा जोड दिए । उनले आ.व २०७४/०७५ का लागि ७० करोड ९७ लाख ८६ हजार छ सय १० को बजेट प्रस्तुत गरे । पूँजीगततर्फ ५४ करोड ९७ लाख ८६ हजार छ सय १० र चालुतर्फ १८ करोड बजेट प्रस्तुत गरिएको छ । प्रमुख खरेलले खानेपानी र भौतिक पूर्वाधारको विकासलाई प्राथमिकतामा राखिएको जानकारी दिए । उनका अनुसार खानेपानी पूर्वाधार निर्माण र वितरणमा १ करोड ५० लाख, शैक्षिक सुधार र पूर्वाधार विकासमा १ करोड २५ लाख, फोहोर मैला व्यवस्थापनमा एक करोड, बालमैत्री बूढानीलकण्ठ निर्माणमा ५० लाख र नगरपालिका भवन निर्माण गर्न ५ करोड बजेट प्रस्तुत गरिएको थियो । उनले शनिबार बजेट र नीति तथा कार्यक्रम बारेमा छलफल गरिने जानकारी दिए । कार्यक्रममा उपप्रमुख रमा राईले बूढानीलकण्ठको विकास गर्न आफूहरु प्रतिबद्ध भएको बताएकी थिइन् । रासस
