फोटोन मोटर्सको नयाँ शोरुम इटहरीमा
काठमाडौं । फोटोन मोटर्स नेपालले इटहरीमा आफ्नो नयाँ शोरुम उद्घाटन गरेको छ। प्रमुख व्यापारिक केन्द्रका रूपमा रहेको इटहरीस्थित यो नयाँ शोरुमले सुनसरी, मोरङ तथा आसपासका जिल्लाका ग्राहकहरूलाई सेवा प्रदान गर्ने जनाइएको छ। यो विस्तार कम्पनीको नेपालभर आफ्नो उपस्थितिलाई अझ बलियो बनाउने र पूर्वी क्षेत्रका ग्राहकहरूसम्म आफ्ना उत्पादन तथा सेवाहरू सहज रूपमा पुर्याउने निरन्तर प्रयासको एक हिस्सा हो । फोटोन मोटर्सको आधिकारिक विक्रेता एमएडब्लु वृद्धि हो । नयाँ शोरुमलाई पूर्ण थ्रीएस सुविधासहित डिजाइन गरिएको छ, जसबाट ग्राहकहरूले एकै स्थानमा सेल्स, आफ्टर सेल्स सर्भिस तथा जेनुइन स्पेयर पाट्र्स सजिलै प्राप्त गर्न सक्नेछन् । शोरुम उद्घाटनसँगै ग्राहकहरूसँग प्रत्यक्ष अन्तरक्रिया गर्ने उद्देश्यले विशेष ‘कस्टमर मिट कार्यक्रम पनि आयोजना गरिएको थियो । कार्यक्रममा हालका तथा सम्भावित फोटोन ग्राहकहरूले आफ्ना अनुभव, अपेक्षा र सुझावहरू राखेका थिए । देशभर १६६ भन्दा बढी स्थानमा सीसीएसटु टाइप डीसी फास्ट चार्जिङ नेटवर्क विस्तार भइसकेको छ र यो विस्तार अझै जारी छ । यसले इलेक्ट्रिक सवारीसाधनको प्रयोगलाई थप सहज र भरपर्दो बनाउँदै रेन्ज सम्बन्धी चिन्ता घटाउने र देशव्यापी पहुँच वृद्धि गर्ने अपेक्षा गरिएको छ । एमएडब्लु वृद्धि कमर्सियल नेपालमा व्यावसायिक सवारीसाधन आपूर्ति गर्ने कम्पनी हो।
मनोकामना मोडर्न इन्जिनियरिङको आम्दानी १.८३ अर्ब रुपैयाँ, ऋण साढे २ अर्ब
काठमाडौं । निर्माण उपकरण तथा निर्माण सामग्री व्यापारमा सक्रिय मनोकामना मोडर्न इन्जिनियरिङ प्रालिले सन् २०२५ मा करिब १ अर्ब ८३ करोड ७० लाख रुपैयाँ सञ्चालन आम्दानी गरेको छ, जुन अघिल्लो वर्षको तुलनामा १.६३ प्रतिशत अर्थात् करिब ३ करोड रुपैयाँले कम हो । कम्पनीले सन् २०२४ मा १ अर्ब ८६ करोड ७० लाख रुपैयाँ आम्दानी गरेको थियो । पछिल्ला वर्षहरूमा कम्पनीको आम्दानी संरचना हेर्दा निर्माण सामग्रीतर्फको योगदान उच्च देखिन्छ, जहाँ कुल आम्दानीको करिब ६२ प्रतिशत हिस्सा यसै क्षेत्रबाट आउने गरेको छ भने बाँकी करिब ३७ प्रतिशत आम्दानी निर्माण उपकरण बिक्रीबाट प्राप्त हुने गरेको छ । कम्पनीको आम्दानी विगतका वर्षहरूमा क्रमशः बढ्दो प्रवृत्तिमा देखिए पनि पछिल्लो वर्ष सामान्य गिरावट आएको छ । सन् २०२३ मा कम्पनीले १ अर्ब ७६ करोड २० लाख रुपैयाँ, सन् २०२२ मा १ अर्ब ३६ करोड २० लाख रुपैयाँ र सन् २०२१ मा १ अर्ब २६ करोड ९० लाख रुपैयाँ सञ्चालन आम्दानी गरेको थियो । सन् २००९ जुनमा स्थापना भएको कम्पनीले नेपालमा निर्माण उपकरण आयात तथा बिक्री वितरण गर्दै आएको छ । कम्पनीले कोबेल्को, हुन्डाई, शान्तुई र डायनाप्याक जस्ता अन्तर्राष्ट्रिय ब्रान्डका उपकरण आयात गरी बजारमा उपलब्ध गराउँदै आएको छ । यद्यपि, कम्पनीले हालसम्म कुनै पनि निर्माण उपकरण ब्रान्डको अधिकृत डिलरशिप भने प्राप्त गर्न सकेको छैन । कम्पनीका संस्थापक तथा प्रबन्ध निर्देशक श्रवण कुमार गोयल हुन्, जसले उत्पादन तथा व्यापार क्षेत्रमा लामो अनुभव हासिल गरेका छन् । कम्पनीको केन्द्रीय कार्यालय काठमाडौंको बत्तिसपुतलीमा अवस्थित रहेको छ । यसले भारत, अमेरिका र इन्डोनेसियाबाट निर्माण सामग्रीसमेत आयात गर्दै आएको छ । कम्पनीले विभिन्न बैंक तथा वित्तीय संस्थाहरूबाट ७६ करोड २० लाख रुपैयाँ दीर्घकालीन र १ अर्ब ७० करोड ७० लाख रुपैयाँ अल्पकालीन गरी कुल २ अर्ब ४६ करोड ९० लाख रुपैयाँ ऋण लिएको छ । जबकि यसअघि कम्पनीले १ अर्ब ६ करोड ८० लाख रुपैयाँ मात्रै ऋण लिएको थियो । वित्तीय पक्षमा भने कम्पनीको ऋण भार उल्लेखनीय रूपमा बढेको देखिन्छ । कम्पनीले विभिन्न बैंक तथा वित्तीय संस्थाबाट ७६ करोड २० लाख रुपैयाँ दीर्घकालीन र १ अर्ब ७० करोड ७० लाख रुपैयाँ अल्पकालीन गरी कुल २ अर्ब ४६ करोड ९० लाख रुपैयाँ ऋण लिएको छ । जबकि अघिल्लो वर्ष १ अर्ब ६ करोड ८० लाख रुपैयाँ मात्रै बैंकबाट ऋण लिएको थियो ।
लन्च भएको सातामै सकियो यामाहाको हाइब्रिड बाइक, बजारमा उत्साहजनक प्रतिक्रिया
काठमाडौं । यामाहा नेपालले हालै सार्वजनिक गरेको नेपालको पहिलो हाइब्रिड मोटरसाइकल यामाहा एफजेट–एस एफआई हाइब्रिड ग्राहकबाट अत्यन्त सकारात्मक प्रतिक्रिया पाएपछि आधिकारिक लन्च भएको एक हप्तामै सोल्ड आउट भएको छ । कम्पनीका अनुसार नयाँ पुस्ताको हाई–टेक प्रविधिसहित ल्याइएको उक्त मोटरसाइकलले नेपाली बजारमा आधुनिक मोटरसाइकलिङको नयाँ अध्याय सुरु गरेको छ । प्रदर्शन र इन्धन दक्षतालाई सन्तुलनमा राख्दै तयार गरिएको यो मोडललाई भविष्यतर्फ उन्मुख प्रविधिमैत्री सवारीका रूपमा हेरिएको छ । एफजेट–एसको स्थापित लिगेसीमा आधारित यस हाइब्रिड मोडललाई उच्च पावर, सुधारिएको इन्धन दक्षता तथा कम उत्सर्जन सुनिश्चित गर्ने गरी डिजाइन गरिएको कम्पनीले जनाएको छ । बढ्दो इन्धन मूल्य र शहरी ट्राफिक व्यवस्थापनजस्ता चुनौतीलाई ध्यानमा राख्दै विकास गरिएको यो मोटरसाइकलले उत्कृष्ट माइलेज प्रदान गर्ने दाबी गरिएको छ । उन्नत प्रविधि, स्मार्ट फिचर र प्रभावकारी इन्धन खपतका कारण छोटो समयमै बजारबाट उत्साहजनक प्रतिक्रिया प्राप्त भएको कम्पनीले जनाएको छ । राइडरहरूको माइलेज आवश्यकतालाई सम्बोधन गर्न सकेकाले यो मोडलले बलियो बजार स्वीकार्यता हासिल गरेको कम्पनीको भनाइ छ । उच्च मागलाई मध्यनजर गर्दै यामाहा नेपालले मोटरसाइकलको अर्को ब्याचका लागि प्रि–बुकिङ खुला गरेको घोषणा गरेको छ । ग्राहकहरूले प्रि–बुकिङसम्बन्धी जानकारी यामाहाका आधिकारिक सामाजिक सञ्जाल तथा देशभरका अधिकृत डिलरमार्फत प्राप्त गर्न सक्नेछन् । कम्पनीले नयाँ स्टक चाँडै उपलब्ध गराई समयमै डेलिभरी सुनिश्चित गर्ने जनाएको छ । यस उपलब्धिबारे यामाहा नेपालका कार्यकारी निर्देशक तथा प्रमुख कार्यकारी अधिकृत दीपक कुमार अग्रवालले प्रविधि र माइलेजप्रति बढ्दो ग्राहक आकर्षणले उत्साहजनक प्रतिक्रिया प्राप्त भएको बताए । उनले ग्राहकको विश्वासप्रति आभार व्यक्त गर्दै नेपाली राइडरहरूको बदलिँदो आवश्यकता अनुसार नवीन तथा व्यवहारिक यातायात समाधान ल्याउन कम्पनी प्रतिबद्ध रहेको उल्लेख गरे । कम्पनीका अनुसार एफजेट–एस एफआई हाइब्रिडको सफल लन्चसँगै नेपाली बजार स्मार्ट र दक्ष मोटरसाइकलिङतर्फ अघि बढिरहेको संकेत देखिएको छ ।
