सान्जेन जलबिद्युत् कम्पनीको साधारण सेयर निश्काशन हुँदै, सेयर निस्कासन तथा बिक्री प्रबन्धकमा लगानी कोष नियुक्त
काठमाडौं, २ माघ । सान्जेन जलबिद्युत् कम्पनी लिमिटेड र नागरिक लगानी कोषबीच सेयर निस्कासन सम्झौता भएको छ । आइतबार भएको सम्झौतामा सान्जेनको सेयर निस्कासन तथा बिक्री प्रबन्धकको तर्फबाट कोषका कार्यकारी निर्देशक रामकृष्ण पोखरेल र सान्जेनका तर्फबाट प्रमुख कार्यकारी अधिकृत किरणकुमार श्रेष्ठले हस्ताक्षर गरेका हुन । कम्पनीले पहिलो चरणमा समुह ‘ग’ का क्रणदाता कर्मचारीको लागि छुट्टयाइएको १ प्रतिशत तथा संस्थापक सेयरधनी संस्थाका कर्मचारीको लागि ३ दशमलव ५ प्रतिसत र समूह ‘घ’ अन्तरगतका कर्मचारी संचय कोषमा रकम जम्मा गरेका संचयकर्ता कर्मचारीलाई छुट्टयाइएको १९ दशमलव ५ प्रतिसतले हुन आउने प्रतिकित्ता सयको दरले ८७ लाख ६० हजार कित्ता सेयर निस्कासन गर्ने सम्झौता भएको कोषका सूचना अधिकृत उद्धव सिलवाले जानकारी दिए । हस्ताक्षर कार्यक्रममा कोषका कार्यकारी निर्देशक पोखरेलले आर्थिक विकासका लागि जलविद्युत् आवश्यक भएको धारणा राखे । उनले कोषले यो भन्दा अघि माथिल्लो तामाकोशी, जलविद्युत् लगानी तथा बिकास कम्पनी र नेपाल इन्भेष्टमेन्ट बैकको एफपिओ जारी गरी सकेको बताए । त्यसैगरी सान्जेनका प्रमुख कार्यकारी अधिकृत श्रेष्ठले भूकम्प, नाकाबन्दी लगायतका कारणले सेयर निस्कासनमा केही ढिलाई भएको बताएका थिए । कार्यक्रममा कोषका तर्फबाट मुख्य ब्यवस्थापक शुसिल कुमार अर्याल, सेयर शाखा प्रमुख तथा उपब्यवस्थापक रोशनजंग कार्की, कानुन अधिकृत सुमन पौडेल तथा दिपेन्द्रसिंह अधिकारी र सान्जेनको तर्फबाट प्रमुख बित्त अधिकृत सशान्त बास्तोला लगायतका प्रतिनिधि सहभागी रहेका थिए ।
भूकम्प प्रभावित क्षेत्रमा निःशुल्क स्वास्थ्य सेवा कार्यक्रम सञ्चालन गरिने
काठमाडौं, २ माघ । राष्ट्रिय पुनर्निर्माण प्राधिकरणको समन्वयमा स्वास्थ्य मन्त्रालयले भूकम्प प्रभावित क्षेत्रमा विशेष स्वास्थ्य कार्यक्रम सञ्चालन गर्ने भएको छ । राष्ट्रिय पुनर्निर्माण प्राधिकरणका प्रमुख कार्यकारी अधिकृत प्रा.डा. गोविन्दराज पोखरेल र स्वास्थ्य सचिव सेनेन्द्रराज उप्रेतीबीच आइतबार भएको बैठकले भूकम्प प्रभावितहरुलाई निःशुल्क रुपमा स्वास्थ्य सेवा प्रदान गर्न आईओएम, केयू, नाम्स र पाटन विज्ञान स्वास्थ्य प्रतिष्ठान लगायतसँग सहकार्य गरि विशेषज्ञ सहितको स्वास्थ्य शिविर सञ्चालन गर्ने निर्णय गरेको हो । प्राधिकरणका प्रमुख कार्यकारी अधिकृत डा. पोखरेलले भूकम्प प्रभावित क्षेत्रमा, जिल्लाका ग्रामीण भेगमा घुम्ती सेवामार्फत निःशुल्क स्वास्थ्य सेवा प्रदान गर्न लागेको जानकारी दिए । भूकम्प प्रभावित क्षेत्रका बासिन्दालाई लक्षित गरि निःशुल्क रुपमा सेवा उपलब्ध गराउन स्वास्थ्य मन्त्रालयले आइतबारै जिल्ला जनस्वास्थ्य कार्यालय र स्वास्थ्य कार्यालयमा पत्राचार गर्ने निर्णय गरेका छ । स्वास्थ्य मन्त्रालयले सम्बन्धित जनस्वास्थ्य प्रमुख र जिल्ला स्वास्थ्य कार्यालयका प्रमुखलाई भूकम्पबाट प्रभावित क्षेत्रमा आफ्नो स्रोत साधन परिचालन गरि निःशुल्क रुपमा विशेष स्वास्थ्य कार्यक्रम सञ्चालन गर्न निर्देशन दिएको प्राधिकरणका सहायक प्रबक्ता डा. भीष्मकुमार भूसालले जानकारी दिए ।
ग्रीन डेभलपमेन्ट बैंकले ४०० प्रतिशत हकप्रद निष्कासन गर्ने, माघ २८ गते साधारणसभा
काठमाडौं, २ माघ । ग्रीन डेभलपमेन्ट बैंकले सर्वसाधारणको लागि ४०० प्रतिशत (१ बराबर ४ को अनुपातमा) हकप्रद सेयर निष्कासन गर्ने निर्णय गरेको छ । उक्त निर्णय माघ २ गते बसेको बैंक संचालक समितिको बैठकले गरेको हो । बैंठकको निर्णयलाई राष्ट्र बैंक तथा बैंकको आगामी साधारणसभाले पारित गर्नु पर्ने छ । बैंकले आगामी साधारणसभा यही माघ २८ गते बोलाएको छ । सो प्रयोजनको लागि बैंकको माघ १२ गतेदेखि माघ २८ गते सम्म बुक क्लोज रहने छ ।
सिटिजन्स बैंक इन्टरनेसनलले जारी गर्यो इएमभीमा आधारित चिप कार्ड
काठमाडौं, २ माघ । सिटिजन्स बैक इन्टरनेसनल लिमिटेडले माघ महिनादेखि भिसा डेविट तथा क्रेडिट कार्डहरु अब इएमभीमा आधारित चिप कार्ड जारी गरेको छ । ग्राहकहरुसँग रहेको पुराना म्याद नाघेको म्यागनेटिक स्ट्रिप कार्ड नविकरण गर्दा अनिवार्य रुपमा चिप वितरण गर्ने बैंकले जनाएको छ । साथै, बैंकका अनुसार ग्राहकवर्गसँग रहेको म्याद ननाघेको म्यागनेटिक स्ट्रिप कार्ड परिवर्तन गर्न चाहेने ग्राहक वर्गको लागी न्यूनतम शुल्क लिई परिवर्तन गरि दिने व्यवस्था गरिएको छ । बैंकले हाल नेपाल र भारतमा प्रयोग गर्न सकिने डोमेस्टिक डेबिट र क्रेडिट कार्डका साथै बिश्वव्यापि रुपमा प्रयोग गर्न सकिने इन्टरनेशनल डलर डेविट एवं क्रेडिट कार्ड संचालनमा रहेको छ । चिपमा आधारित कार्डको प्रयोगवाट हुने कारोवार सुरक्षित एवं भरपर्दो हुने हुँदा डाटा चोरी एवं अनधिकृत कारोवार हुने सम्भावना न्यून रहने बैंकद्धारा जारी विज्ञप्तिमा उल्लेख छ । बैंकले आफ्नो ५८ वटा शाखा र ९७ वटा शाखारहित आधुनिक बैंकिङ्ग सेवाबाट करिब ५ लाख ग्राहाकहरुलाई सेवा प्रदान गरिरहेको छ । हाल बैंकको उपत्यका भित्र २७ र उपत्यका बाहिर २६ वटा गरी कुल ५३ वटा ए.टि.एमहरु सञ्चालनमा रहेको छ ।
गण्डकी विकास बैंक र फेवा विकास बैंकबीच मर्जर प्रस्ताव पारित
काठमाडौं, २ माघ । गण्डकी विकास बैंक र फेवा विकास बैंकबीच मर्जर प्रस्ताव पारित भएको छ । शनिबार सम्पन्न गण्डकी विकास बैंकको विशेष साधारणसभाले दुई संस्थाबीच एक आपसमा मर्जर गर्ने प्रस्ताव सर्वसम्मतिले पारित गरेको छ । साथै सोही दिन फेवा विकास बैंकको नबौ बार्षिक साधरण सभावाट समेत मर्जर प्रस्ताव सर्वसम्मतिले पारित भएको छ । उक्त सभाले फेवा विकास बैंकसँग मर्ज प्रयोजनको लागी शेयर स्वाप अनुपात एक बराबर एक हुने प्रस्तावलाई समेत पारित गरेको छ । सोही सभाले मर्जर पश्चात गठन हुने संचालन समितिमा प्रतिनिधित्व संचालकहरु चयन गर्ने अख्तियारी समेत संचालक समितिलाई दिने प्रस्ताव पनि पारित गरेको छ । यस पश्चात बैंकले अन्तिम स्वीकृतिको लागी राष्ट्र बैंक समक्ष निवेदन पेश गर्नेछन् र चाडै नै संयुक्त कारोवार हुनेछ । उक्त बैंक सँग मर्जर पश्चात बैंकको नाम गण्डकी विकास बैंक लिमिटेड कायम हुने छ । मर्जर पश्चात बैंकको कुल चुक्ता पुँजी १ अर्व ८४ करोड ३९ लाख रुपैयाँ मात्र पुग्ने छ । साथै, बैंकको कुल शाखा संख्या ५० र ए.टि.एम संख्या २० पुग्ने छ ।
नागार्जुन दरबार मुनी ४ लेनको सुरुङ मार्ग, हलचोकको डाडामा ७ सय मिटर लामो अर्काे सुरुङ
काठमाडौं, २ माघ । पुर्व राजा ज्ञानेन्द्र शाह बस्ने नागार्जुनको दरबार मुनी ४ लेनको सुरुङ मार्ग बन्ने भएको छ । बाहिरी चक्रपथ विकास आयोजनाले नागार्जुन दरबार मुनी ३५० मिटर लामो २५ मिटर चौँडाईको सुरुङ मार्ग बनाउन लागेको हो । यो सुरुङ मार्ग पौँयाटार/पुरानो गुहेश्वरीबाट सुरु भएर बोहराटारमा निस्कनेछ । सो सुरु मार्ग भित्र बाहिरी चक्रपथ आयोजनाको ४ लेनको सुबिधा सम्पन्न सडक रहनेछ । ‘नागार्जुन दरबार मुनी ३५० मिटर लामो सुरुङ बन्छ, त्यसमा २५ मिटर चौडाईको ४ लेन सडक रहन्छ’, बाहिरी चक्रपथ विकास आयोजनाका अधिकृत ध्रब सापकोटाले भने । बैजनी रङको बाहिरी चक्रपथ सडक र सुरुङ मार्ग बनाउने भनिएको नागार्जुन पहाड तथा हलचोक डाडा सुरुमा टोखाबाट नेपालटार, बाइपास, बालाजु हुँदै सितापाइलासम्म बाहिरी चक्रपथ लैजाने भनिएको थियो । त्यसो गर्दा बालाजुदेखि सितापाइलासम्म हालको चक्रपथ र बाहिरी चक्रपथ जोडिन्थ्यो । तर सोही क्षेत्रमा बढि सडक जाम हुने गरेको तथ्य उजागर भएपछि त्यसलाई छल्न सुरुङको अवधारणा ल्याएको हो । ‘बालाजुदेखि हलचोकसम्मको सडकमा बढि चाप देखियो, अहिलेकै चक्रपथमा बाहिरी चक्रपथ मिलाउँदा झन थेग्न मुस्किल हुने देखेपछि सुरुङको विकल्प अघि सारिएको हो ।’, सापकोटाले भने । त्यस्तै हलचौकको डाडामा पनि करिब ७०० मिटर लामो अर्काे सुरुङ मार्ग निर्माण हुने भएको छ । त्यसमा पनि २५ मिटर लामो सुरुङ भित्र ४ लेनको सडक बन्नेछ । नैकापको किट्नी डाडामा पनि करिब १५० मिटर लामो अर्काे सुरुङ निर्माण हुनेछ । बाहिरी चक्रपथ आयोजनाले सतुंलदेखि ६ दशमलब ६१८ किलोमिटर खण्डमा नापी नक्सा मिलानको काम गरिरहेको छ । त्यसमा कुल ८ हजार ९ सय ५२ रोपनी जमिन पर्छ । नापी नक्सा एकिन हुने वित्तिकै पाइलट प्रोजेक्टका रुपमा जग्गा अधिग्रहणको तयारी भैरहेको उनले बताए । आयोजनाले सो खण्डको डिपिआर स्विकृतिका लागि मन्त्रालय पठाएको छ र मन्त्रालयले क्याबिनेटमा पेश गर्नेछ । क्याबिनेटले स्विकृत गर्ने वित्तिकै काम अघि बढाउने उनले जानकारी दिए ।
ग्लोबल आइएमई बैंकलाई आस्वा प्रणालीमा सहभागी हुन धितोपत्र बोर्डको अनुमति
काठमाडौं, २ माघ । ग्लोबल आइएमई बैंकले नेपाल धितोपत्र बोर्डबाट आस्वा (एप्लिकेशन सपोर्टेड बाइ ब्लक्ड एमाउण्ट) प्रणालीको अनुमति प्राप्त गरेको छ । सार्वजनिक रुपमा निष्काशन गर्ने साधारण धितोपत्र (आइपिओ) तथा थप धितोपत्र (एफपिओ) को निष्काशनको समयमा लगानीकर्ताबाट दरखास्त फारम संकलन तथा त्यस सम्बन्धि अन्य कार्य गर्नका लागि नेपाल धितोपत्र बोर्डले ग्लोबल आइएमई बैंकलाई अनुमति दिएको हो । उक्त अनुमति पश्चात नेपाल धितोपत्र बोर्डले लागू गरेको आस्वा प्रणाली मार्फत सेयर लगानीकर्ताले माग गरेको सेयर बापत हुन आउने रकम लगानीकर्ताको बैंक खातामा रोक्का हुनेछ । यस प्रणालीमा लगानीकर्ताले माग गरेको सेयर बराबरको रकम मात्र खातामा रोक्का भई सेयर बाँडफाँडमा परेको रकम कटौती गरि बाँकी रकम खातामा नै सुरक्षित रहिरहने सुविधा लगानीकर्ताले पाउनेछन् । छिटोछरितो र झन्झटमुक्त सेवामा विश्वास गर्दै आएको ग्लोबल आइएमई बैंकले आफ्ना ग्राहकहरुको सुविधालाई मध्यनजर गर्दै आस्वा प्रणालीमा आवद्ध भएको बैंकले जनाएको छ ।
प्रोफेशनल दियालो विकास बैंक प्राप्ति पछि लक्ष्मी बैंकद्धारा एकिकृत कारोबार शुरु
काठमाडौं, २ माघ । लक्ष्मी बैंक लिमिटेडले प्रोफेशनल दियालो विकास बैंक लिमिटेडलाई प्राप्ति (एक्विजिशन) पश्चात आइतबारदेखि एकिकृत कारोबार शुरु गरेको छ । बैंकले लक्ष्मी बैंक लिमिटेडको नामबाट नै एकिकृत कारोबार शुभारम्भ गरेको छ । लक्ष्मी बैंकको चुक्ता पूँजी तीन अर्ब तीन करोड रुपैयाँ रहेको छ । २४ करोड चुक्ता पूँजी रहेको प्रोफेसनललाई एक्वायर पश्चात लक्ष्मी बैंकको चुक्ता पूँजी ३ अर्ब २७ करोड रुपैंयाँ पुग्नेछ । बैंकले एक्वायर पश्चात कायम पूँजीबाट शतप्रतिशत हकप्रद निष्कासन गर्ने बताएको छ । प्रोफेशनल दियालो प्राप्ति पश्चात लक्ष्मी बैंकको ५ वटा नयाँ शाखा काभ्रेमा पाचँखाल र भकुन्डेबेसी, सिन्धुपाल, भरतपुर चितवन र पोखरा, कास्कीमा चिप्लेढुङ्गामा थपिने बैंकले जनाएको छ । बैंकले हाल ६४ वटा शाखा, २ विस्तार काउन्टर अनि ८० एटिएम मार्फत ग्राहकलाई बैंकिङ् सेवा दिदै आइरहेको छ । केन्द्रिय कार्यालय लक्ष्मी बैंक लिमिटेडको हाल रहेको स्थान हात्तीसार, काठमाडौं नै कायम रहनेछ ।
