काठमाडौं । त्रिवि शिक्षण अस्पतालमा उपचाररत ६ वर्षीया बालिकालाई कोरोना भाइरस संक्रमण पुष्टि भएपछि उनको सम्पर्कमा आएका व्यक्तिलाई १४ दिन अर्थात दुई हप्ता क्वारेन्टाइनमा राखिने भएकाे छ ।
बालिकाको प्राइमरी सम्पर्कमा आएका व्यक्तिको पीसीआर परीक्षण गर्ने र १४ दिन क्वारेन्टाइन र सेल्फ क्वारेन्टाइनमा राख्ने अस्पतालले जनाएकाे छ ।
अस्पतालका प्रा.डा. प्रेम कुमार खड्गाका अनुसार संक्रमित बालिकालाई गणेशमान भवनको आइसोलेसन क्याविनमा सारी उपचार भइरहेको छ ।
अस्पतालको अन्य काम नियमित गर्न र प्राइमरी सम्पर्कमा आएका व्यक्तिमा कोरोना पोजेटिभ आएमा फेरि सेकेन्डरी सम्पर्कमा कन्ट्याक्ट ट्रेसिङ पीसीआर परीक्षण गरिने पनि अस्पतालले विज्ञप्ति मार्फत जनाएको छ।
अस्पतालले हाललाई इलेक्टिभ सर्जरी नगर्ने समेत जनाएको छ । साथै, आकस्मिक शल्यक्रिया गर्दा आवश्यक पीपीई लगाएर गर्न समेत अस्पतालले अनुरोध गरेको छ।
सम्बन्धित समाचारः
शिक्षण अस्पतालका चिकित्सकसहित ३८ जना क्वारेन्टाइनमा
घरभित्रै बसेकी बालिकालाई कसरी लाग्यो कोरोना ?
