चाँगुनारायण नगरपालिका मेयर सोमप्रसाद मिश्रको पाँचवर्षे कार्यकाल पूरा हुनै लाग्यो । कार्यकाल सकिनै लाग्दा मेयर मिश्रको दौडधुप पनि बढेको देखिन्छ । उनी निरन्तर नगरको विकासको निमित्त लागि परेका छन् । मिश्रले आफ्नो कार्यकाल पूर्वाधार विकासमा धेरै राम्रो काम भएको बताए । यो अवधिमा आफ्नो टिमले धेरै राम्रो काम गरेको र नगरवासीले दिएको धेरै जिम्मेवारी आफूले सफलताका साथ पूरा गरेको उनी दाबी गर्छन् । स्थानीय तहको निर्वाचन नजिकिँदै गर्दा मेयर मिश्रको कार्यकाल कस्तो रह्यो ?, उनले के कस्तो काम गर्न सके र मेयरको रूपमा काम गर्दाको अनुभव कस्तो रह्यो भन्नेलगायत विषयमा केन्द्रित रहेर विकासन्युजका लागि राजिव न्यौपानेले कुराकानी गरेका छन् ।
स्थानीय तहमा जनप्रतिनिधिको रूपमा निर्वाचित हुनु भएको ५ वर्ष पूरा हुनै लाग्यो । समग्रमा कार्यकाललाई कसरी लिनु भएको छ ?
चुनौती धेरै थिए । जनताको माग असीमित हुन्छ । त्यी असीमित माग, आवश्यक र नगरपालिकामा भएको स्रोत, जनशक्ति, प्रविधिमा सीमितता कारणले यो दुईबीच ग्याप हुन्छ । त्यो ग्याप ठूलो भयो धेरै असन्तुष्टि बढ्छ । यो साँगुरो हुँदै आएको असन्तुष्ट कम हुन्छ र कामहरू पनि बढी हुन्छन् । यो बीचमा सन्तुलन मिलाएर काम गर्नु नै एउटा ठूलो चुनौती हो जस्तो मलाइ लाग्छ ।
तपाईको यो कार्यकालको अनुभवका आधारमा भन्नुपर्दा स्थानीय तहसँग जनताको खास अपेक्षा के हुने रहेछ ?
जनताको अपेक्षा धेरै कुरामा हुन्छ । पहिलो कुरा रोजगारी हो । भौतिक पूर्वाधारमा खानेपानी तथा सडकको अपेक्षा छ । प्राय: यिनै कुराहरू हुन् । जनताको अपेक्षा पूरा गर्नको लागि नगरपालिका सदैव तत्पर भएर लागि परेको छ ।
यो अवधिसम्म आफ्नो नगरपालिकाभित्रका जनताले सम्झिने गरी के–के काम भएको छ ?
हामी निर्वाचित भएर आइसके पश्चात् पालिकामा भौतिक संरचना, खानेपानी, स्वास्थ्य, शिक्षा, कृषि, र पशुपालन क्षेत्रमा पालिकाले उदाहरणीय काम गरिसकेको छ । त्यस कारणले गर्दा हामीले आर्थिक, सामाजिक विकास, भौतिक पूर्वाधार, वातावरण संरक्षण आदि सबै क्षेत्रको विकास गरी नागरिकलाई कसरी सुखमय बनाउने भन्ने कुरामा जोड दिँदै आएका छौं । नगरपालिकाले हरेक क्षेत्रमा राम्रो काम गरी सकेको छ । नगरको शिक्षा क्षेत्रमा एउटा बेग्लै परिस्थिति सिर्जना गरेर कामहरू गरेका छौं ।
नगरपालिकाले बचत खात छोरीको सुरक्षा जीवन भरी कार्यक्रममार्फत नै नगरपालिकाभर छोरी जन्मेपछि उनीहरूको खातामा वार्षिक ४ हजार रुपैयाँ जम्मा गर्ने व्यवस्था गरेका छौं । सो सेवा सामुदायिक विद्यालयमा पढ्ने छोरी शिक्षा राम्रो होस् भनेर यो कार्यक्रम सञ्चालन गरेका हौं । नगरपालिकाले करिब १२ सय छोरीहरूको खातामा ४ हजारका दरले रकम जम्मा गरिदिएको छ । छोरीको शिक्षा नगरपालिकाले विशेष प्राथमिकतामा राखेको छ । शिक्षा क्षेत्रमा पनि नगरले धेरै राम्रो काम गरेको छ । यस क्षेत्र आएको सुधार देख्नको लागि केही समय कुर्नुपर्ने हुन्छ । नगरका सामुदायिक विद्यालयमा हरेक वर्ष विद्यार्थीको चाप बढ्दैछ । यो वर्ष मात्रै नगरपालिका भित्रका विभिन्न सामुदायिक विद्यालयमा ११ सय नयाँ विद्यार्थी भर्न भएका छन् । हाम्रो कार्यकालमा ४५ वटा विद्यालयको भवनहरू निर्माण भएका छन् ।
यस्तै, स्वास्थ्यको कुरा गर्दा नगरको प्रत्येक वडामा एउटा एम्बुलेन्स र स्वास्थ्यचौकीको व्यवस्था गरेका छौं । ३ वटा सहरी स्वास्थ्य केन्द्रको स्थापन गरेका छौं । महामारीको दोस्रो लहरमा हामीले १७ शय्याको चाँगुनारायण अस्पतालको निर्माण गर्यौं । डेढ करोड रुपैयाँको लागतमा सो अस्पतालमा अक्सिजन प्लान्टको पनि जडान गरेका छौं । चाँगुनारायण फाउन्डेसनको ६० प्रतिशत नगरको ४० प्रतिशत लगानीमा उक्त प्लान्ट जडान भएको हो । नगरको सबै नागरिकलाई स्वास्थ्य बीमाको दायरामा ल्याउने हिसाबले त्यहाँ लाग्ने खर्चको आद्या रकम नगरले अनुदान दिने व्यवस्था गरेका छ ।
नगर भित्रका उद्यमी गर्न चाहने बेरोजगार युवालाई नगरले बैंकसँग सहकार्य गरी युवालाई ३ लाख देखि ४ लाख रुपैयाँसम्म विनाधितो विना ब्याज ऋण दिने व्यवस्था मिलाएका छ । सो ऋणको ब्याज नगरपालिकाले बैंकले तिर्छ । ऋण लिएको ५ वर्षमा सवा फिर्ता गर्नुपर्ने हुन्छ । सो ऋण उद्यमी बन्ने १०० जनाले लिएका छन् । बैंकिङ तरलताको अभावको कारण ऋण प्रवाह हाल भएको छैन ।
नगरकोटको जङ्गलमा ४० हजार बहुमूल्य जडीबुटी र फलफूलको बिरुवाहरू रोपेका छौं । पर्यटन क्षेत्रमा राम्रो काम भएको छ । पर्यटकीय क्षेत्रमा नगरले वाइफइ फ्री र शौचालयको व्यवस्थापन पनि गरेका छौं । निर्वाचित भएर आएपछि २ वटा वडाको भवनहरू निर्माण गरेका छौं । ५६ वटा सामुदायिक भवनहरू निर्माण भएका छन् ।
हाम्रो कार्यकालमा नै ३६ किलोमिटर सडकको कालोपत्रे भएको छ भने नयाँ ट्रयाक नयाँ सडकको निर्माण पनि गरेका छौं । १२ हजार घरधुरीमा एक घर एक घारा खाने पनि अभियान सञ्चालन गरी खोनेपानी पुर्याएका छौं । अझै पनि धेरै घरधुरीमा खानेपानी पुर्याउन बाँकी नै छ ।
स्थानीय तहको निर्वाचनका क्रममा तपाईंले जनतासामु गर्नुभएको प्रतिबद्धता कति प्रतिशत पूरा गर्न सफल हुनुभयो जस्तो लाग्छ ?
निर्वाचनका बेला नागरिकसँग गरेका र चुनावी प्रतिबद्धता करिब ९० प्रतिशत पूरा गर्न सफल भएका छौं ।
फेरि चुनाव नजिकिँदै छ, तपाईं अब आउने स्थानीय तहको निर्वाचनमा कुन भूमिकामा देखिनु हुन्छ ? फेरि मेयरमै चुनाव लड्नु हुन्छ कि माथि जाने सोचमा हुनुहुन्छ ?
मैले आजसम्म पार्टीलाई यो पद यो जिम्मा चाहियो भनेर भनेको छैन । पार्टीले जे आवश्यकता ठान्छ त्यसै म काम गर्छु । अहिले नै मैले केही पनि सोच बनाएको छैन ।
तपाईंको बिचारमा चाँगुनारायण नगरपालिकामा अब कस्तो उम्मेदवारी निर्वाचित हुनुपर्छ ?
नगरवासीको आवश्यकताको आधारमा दूरदृष्टि राखेर काम गर्ने मान्छे चाहिन्छ । ५ वर्षलाई हैन ५० वर्षसम्मलाई हेरेर काम गर्ने मान्छे निर्वाचित हुनपर्छ ।
तपाईं निर्वाचित भएर आइसकेपछि विकास निर्माणको सवालमा गरेको र चाहेर पनि गर्न नसकेका काम के के हुन् ?
रगवीर रङ्गशाला बनाउने भनेर सुरु गरेका छौं तर पूरा हुन सकेको छैन । एक वडा एक खेल पूर्वाधार भनेर काम गर्यौं । त्यसमा पनि हामीले गर्न खोजेका कामहरू बाँकी रह्यो । एक घर एक घारा उद्देश्य अनुरूप नगरको सबै घरधुरीमा खाने पानी पुर्याउने लक्ष्य राखेका थियौं तर महामारीका कारण केही कामहरू अपूरो रह्यो मात्र १२ हजार घरमा मात्र पानी पुर्याउन सफल भर्यौं ।
कमल विनायक नगरकोट सडक नेपाल सरकारले ८ वर्ष अगाडि निर्माणको लागि ठेक्का दिएको थियो । सो सडक छिटो निर्माण गर्नुपर्यो भने समबन्धित निकायमा धेरै दबाब दियौं, तर काम भने हुन सकेन । ठेक्कालाई बदर गरे सडक नगरलाई हस्तान्तरण गर्नुहोस् हामी बनाउँछौ भनेर हामीले प्रधानमन्त्रीलाई भन्यौं त्यो कुराको पनि सुनुवाइ हुन सकेन । यस्तो केही कामहरू गर्न नसकेका पक्कै छन् ।
