काठमाडौं । प्रतिनिधिसभा सदस्य निर्वाचनको जारी मतगणनामा नयाँ शक्ति राष्ट्रिय स्वतन्त्र पार्टी (रास्वपा) ले ऐतिहासिक अग्रता कायमै राखेको छ । हालसम्म सार्वजनिक नतिजाअनुसार रास्वपा १०७ निर्वाचन क्षेत्रमा विजयी भइसकेको छ भने थप १८ क्षेत्रमा अग्रता कायम राखेको हो ।
निर्वाचन आयोगका अनुसार हालसम्म १३२ निर्वाचन क्षेत्रको मतपरिणाम सार्वजनिक भइसकेको छ। तीमध्ये नेपाली कांग्रेस ले १५ स्थानमा विजय हासिल गरेको छ भने २ स्थानमा अग्रता लिएको छ । त्यस्तै नेपाल कम्युनिष्ट पार्टी (एमाले) ७ स्थानमा विजयी हुँदा ३ क्षेत्रमा अघि रहेको छ ।
त्यसैगरी नेपाल कम्युनिस्ट पार्टी का तर्फबाट ७ उम्मेदवार विजयी भएका छन् भने २ स्थानमा अग्रता कायम छ । श्रम संस्कृति पार्टी का १ उम्मेदवार विजयी भएका छन् भने २ क्षेत्रमा अग्रता लिएका छन् । राष्ट्रिय प्रजातन्त्र पार्टी र स्वतन्त्र उम्मेदवारले पनि एक/एक स्थानमा जित हासिल गरेका छन् ।
प्रतिनिधिसभा सदस्यको २१ फागुनमा सम्पन्न समानुपातिक निर्वाचनतर्फ हालसम्म २७ लाख ६१ हजार ४२१ मत गणना सम्पन्न भएको छ । आयोगका अनुसार रास्वपा ले १३ लाख ८८ हजार ४२१ मत प्राप्त गर्दै स्पष्ट अग्रता बनाएको छ ।
त्यसपछि नेपाली कांग्रेसले ४ लाख ७१ हजार ३५५, एमाले ले ३ लाख ८० हजार ९३२ तथा नेपाल कम्युनिस्ट पार्टी ले १ लाख ८२ हजार ८३४ मत प्राप्त गरेका छन् ।
