बिहिबार तीन हजार ६३७ काेराेना संक्रमित थपिए, २१ जनाकाे मृत्यु
काठमाडाैं । पछिल्लो २४ घन्टामा नेपालमा थप तीन हजार ६३७ जनामा कोरोना भाइरस संक्रमण भएकाे छ । स्वास्थ्य तथा जनसंख्या मन्त्रालयका प्रवक्ता प्राडा. जागेश्वर गौतमले २४ घन्टामा नेपालमा थप तीन हजार ६३७ जनामा काेराेना भेटिएकाे जानकारी दिए । यो सहित नेपालमा कोरोना संक्रमित हुनेको संख्या १ लाख ४८ हजार ५०९ जना पुगेको छ भने सक्रिय संक्रमितकाे संख्या ४४ हजार ८ सय ७७ पुगेकाे छ । नेपालमा आजसम्म १३ लाख ५० हजार १५२ जनाको पीसीआर विधिबाट परीक्षण भएको छ । यस्तै आज ३२१५ जना निकाे भएसँगैं हालसम्म १ लाख २ हजार ८२० जना निकाे भएर घर गइसकेका छन । पछिल्लाे २४ घण्टामा २१ जनाकाे मृत्यु भएसँगै नेपालमा मृत्यु हुनेकाे संख्या ८१३ पुगेकाे छ ।
गाेकुल बास्काेटा दम्पतिलाई काेराेना संक्रमण
काठमाडाैं । पुर्वमन्त्री गाेकुल बास्काेटा दम्पतिलाई पनि कोरोना भाइरसको संक्रमण देखिएकाे छ । बास्काेटाले सामाजिक संजाल मार्फत आफुहरुलाई संक्रमण देखिएकाे जानकारी दिएका हुन् । बास्काेटाले बिहिबार दिउँसाे साढे ३ बजेतिर फेसबुक मार्फत आफुलाई कुनै पनि प्रकारकाे लक्षण नदेखिएकाे तर श्रीमती तारा मानन्धरलाई भने लक्षणसहितकाे काेराेना देखिएकाे जानकारी दिए । उनले १० दिनयता कसैलाई नभेटेकाे जानकारी दिए ।
काभ्रेमा कोरोना सङ्क्रमणमुक्त हुनेको सङ्ख्या दोब्बर
काठमाडाैं । जिल्लामा पछिल्लो २४ घण्टामा कोरोना सङ्क्रमितको तुलनामा सङ्क्रमणमुक्त हुनेको सङ्ख्या दोब्बर भएका छन् । काभे्रपलाञ्चोकमा बुधबार ३१ सङ्क्रमित थपिए भने त्यसको दोब्बर अर्थात् ६२ जना सङ्क्रमणमुक्त भएका हुन् । तीमध्ये २६ महिला रहेको जिल्लास्थित कोभिड–१९ रोकथाम तथा नियन्त्रण कमाण्ड पोष्ट जनाएको छ । मङ्गलबार ७१, सोमबार १६ र आइतबार २३ जना कोरोना सङ्क्रमणमुक्त भएका थिए । पोष्टका अनुसार बुधबार १७ महिलासहित ३१ जनामा कोरोना सङ्क्रमण पुष्टि भएको थियो । तीमध्ये बनेपाका १५, मण्डनदेउपुरका सात, धुलिखेलका सात र नमोबुद्ध नगरपालिकाका एक तथा बेथानचोक गाउँपालिकाका एक छन् । “एकै दिन दोब्बर सङ्ख्यामा सङ्क्रमणमुक्त भएको यो पहिलोपटक हो”, पोष्टका सदस्यसचिव एवं जिल्ला स्वास्थ्य कार्यालय प्रमुख डा नरेन्द्र झाले भने । उनका अनुसार जिल्लामा हालसम्म ५१५ महिलासहित एक हजार ३४६ जनामा कोरोना सङ्क्रमण देखिएको छ । कूल सङ्क्रमितमध्ये ६३ प्रतिशत अर्थात् ८३५ सङ्क्रमणमुक्त भएका हुन् । हालसम्म कोरोना सङ्क्रमणबाट जिल्लामा आठ पुरुष र सात महिला गरी १५ जनाको मृत्यु भइसकेको छ । गत असार २ गते काभ्रेपलाञ्चोकमा पहिलो सङ्क्रमण देखिएको थियो । कोरोना सङ्क्रमितमध्ये ४० प्रतिशत अर्थात् ५२६ बनेपा नगरपालिकाका छन् । तीमध्ये ३०४ पुरुष र २२२ महिला छन् । हालसम्म २३४ पुरुष र १४९ महिला गरी कूल ३८३ जना सङ्क्रमणमुक्त भएको बनेपा नगरपालिकाले जनाएको छ । नगरपालिकाका अनुसार अहिलेसम्म कोरोना सङ्क्रमणबाट चार जनाको मृत्यु भइसकेको छ । काभ्रेपलाञ्चोकको १३ स्थानीय तहमध्ये चार गाउँपालिका तेमाल, महाभारत, खानीखोला र चौँरीदेउराली कोरोनामुक्त भएका छन् । कूल सङ्क्रमितमध्ये ६२ प्रतिशत पुरुष हुन् । हाल सक्रिय सङ्क्रमितमध्ये ९३ अस्पतालको आइसोलेसन र ४०४ होम आइसोलेसनमा उपचाररत छन् । रासस
