फेरि दुई जनामा देखियो कोरोना, संक्रमितकाे संख्या ५१ पुग्यो
काठमाडौं । नेपालमा फेरि दुई जनामा कोरोना भाइरस देखिएको छ । आइतबार दुई जनामा कोरोना भाइरस पोजेटिभ देखिएको पुष्टी भएकाे हाे । याे सँगै हालको अध्यावधिक विवरण अनुसार कोभिङ – १९ का पुष्टी भएकाहरूको जम्मा संख्या ५१ पुगेको छ । आज राष्ट्रिय जनस्वास्थ्य प्रयोगशालामा भएको परीक्षणको नतिजा अनुसार नयाँ पुष्टी भएको संख्या दुई छ । उनीहरू दुवै पर्सा , बीरगंज निवासी ५० बर्षीय पुरुषहरू हुन्। हाल सम्म प्राप्त विवरण अनुसार निजहरू आइसोलेशनमा अस्पतालमा छन् र स्वास्थ्य अवस्था सामान्य रहेको छ । । हाल सम्म पुष्टी भइ विभिन्न अस्पतालमा उपचाररत रहेका मध्ये १२ जना निको भई डिस्चार्ज भएका छन् ।
दुई संक्रमणमुक्त भएसँगैै बागलुङमा कोरोना जोखिम टर्दै
काठमाडाैं । कोरोनाको उच्च जोखिममा रहेको पुष्टि भएका दुई संक्रमित कोरोनामुक्त भएर घर फर्केपछि बागलुङमा कोरोनाको जोखिम टर्दै गएको छ । भेटिएका संक्रमति उपचारपछि निको भएर जानु र नयाँ सङ्क्रमण फेला नपर्नुले बागलुङमा कोरोनाको जोखिम हटेर गएको सर्वसाधारणले महसुस गर्न थालेका छन् । बागलुङ नगरपालिका–४ कुँडलेकी १९ वर्षीया अंशु सापकोटा र बागलुङ नगरपालिका–३ गौडाकोटकी ६५ वर्षीया मनकुमारी पौडेल अस्पतालबाट कोरोनामुक्त भएर घर फर्कनु र नयाँ संक्रमित फेला नपरेका कारण कोरोनाको जोखिम टर्दै गएको दुई कोरोना सङ्क्रमितको सफलतापूर्वक उपचार गराइसकेको धौलागिरी अञ्चल अस्पताल बागलुङका मेडिकल सुपरिटेन्डेन्ट डा. शैलेन्द्र बी पोखरेलले जानकारी दिए । पोखरेलले बागलुङमा थप कोरोना संक्रमित पुष्टि नहुनु र भइसकेका डिस्चार्ज हुनुले जोखिम हट्दै गए पनि उद्धारका नाममा बागलुङ भित्रिएकाले चुनौती सिर्जना गर्न थालेको गुनासो गरे । “अब बागलुङमा कोरोनाको जोखिम टर्दै गएको हो”, डा पोखरेलले भने, “उद्धारका नाममा बागलुङ भित्रिएकाबाहेक अरुमा कोरोना सङ्क्रमण नहुन सक्छ, किनकि धेरै एक महिना अगाडि नै बागलुङ आएका थिए ।” पोखरेलका अनुसार लकडाउनपूर्व आएकाको सबैको द्रुत परीक्षण गर्नु र होम क्वारेन्टाइनमा बस्दा कोरोना सर्ने जोखिम कम भएको थियो । हालसम्म एक हजार ३० जनामा कोरोनाको द्रुत परीक्षण र १०० बढीको स्वाब परीक्षण सम्पन्न गर्दा दुई जनाबाहेक कसैलाई पनि कोरोना पुष्टि हुन नसकेको स्वास्थ्य कार्यालय बागलुङका प्रमुख सुरज गुरौंले जानकारी दिए । दुईबाहेक थप सङ्क्रमितको पुष्टि हुन नसकेको अवस्था र संक्रमितका परिवारलाई समेत कोरोना नसरेको अवस्थामा बागलुङ ‘सेफल्यान्डिङ’तर्फ गइरहेको बागलुङमा कार्यरत स्वास्थ्यकर्मी बताउँछन् । कोरोनाको जोखिम हट्दै गएको सन्दर्भमा विभिन्न व्यक्तिले उद्धारका नाममा काठमाडौँ, पोखरा तथा भैरहवादेखि मानिस बागलुङ भित्र्याउन थालेपछि कोरोनाको जोखिम हट्दै गएको बागलुङमा थप समस्या पैदा हुनसक्ने डा पोखरेलको भनाइ छ । बागलुङमा पछिल्लो एक हप्तामा झण्डै एक हजार ६०० मानिस भित्रिएका छन् । सत्र दिनको अस्पताल बसाइपछि मनकुमारी पौडेल र २८ दिनको बसाइपछि अंशु सापकोटा कोरोनामुक्त भएर घर फर्केसँगै बागलुङका नागरिकलाई राहत मिलेको छ । नेपालमै पाँचौँ र छैटौँ सङ्क्रमित बागलुङमा पुष्टि हुँदा निकै भयानक स्थिति पैदा हुने आशङ्का गरे पनि दोस्रो व्यक्तिमा कोरोना सर्न नपाएका कारण थप जोखिम बढ्न नपाएको हो । गत चैत ४ गते बेल्जियमबाट कतार एयरवेजको विमान हुँदै नेपाल आउनुभएका बागलुङका दुई संक्रमितमध्ये चैत १५ गते सापकोटा र चैत २० गते पौडेलमा कोरोना पुष्टि भएको थियो । उनीहरुले आत्मबलका कारण कोरोना जितेर घर फर्केको प्रतिक्रिया दिएका छन् । दुई कोरोना संक्रमित अस्पतालबाट सकुशल घर फर्कनु र थप संक्रमितको पुष्टि नहुनुले बागलुङमा कोरोनाको जोखिम हट्दै गएको हो । रासस
कोरोना संक्रमणबाट निको हुनेको संख्या साढे ८ लाख, संक्रमित भने ३० लाख नजिक
काठमाडौं । नेपाली समय अनुसार अहिले विहान ८ बजसम्ममा संसारभरीमा कोरोना भाइरस संक्रमितको संख्या २९ लाख २० हजार ८ सय ७७ पुगेको छ । कोरोना भाइरसबाट अहिलेसम्म २ लाख ३ हजार २ सय ७२ जनाको मृत्यु भइसकेको छ भने ८ लाख ३६ हजार ९ सय ४१ जना निको भएर घर फर्किसकेका छन् । कोरोनाबाट सबैभन्दा बढि शिकार अमेरिकाका जनता भएका छन् । जहाँ ५४ हजार २ सय ५६ जनाको मृत्यु भइसकेको छ । त्यहाँको कूल संक्रमित संख्या भने ९ लाख ६० हजार ६ सय ५१ रहेको छ । त्यसैगरी छिमेकी मुलुक भारतमा कूल संक्रमितको संख्या २६ हजार २ सय ८३ पुगेको छ भने अहिलेसम्म ८२५ जनाको मृत्यु भइसकेको छ । नेपालमा अहिलेसम्म ४९ जना संक्रमित भएका छन् भने १२ जना चाहिँ निको भएर घर फर्किसकेका छन् । (तथ्यांक साभारः वल्डोमिटर)
