सिन्धुली-२ मा रास्वपाका आशिष गजुरेल अगाडि
काठमाडौं । सिन्धुली-२ मा रास्वपाका उम्मेदवार आशिष गजुरेलले अग्रता कायम गरेका छन् । उनले १ हजार ६९७ मत प्राप्त गर्दै अगाडि लागेका छन् । नेपाली कांग्रेसकी उम्मेदवार सुशिला थिङले ९२६, एमालेका उम्मेदवार मनोज जंग थापा ७४५ र नेकपाका लेखनाथ दाहालले ८७८ मत प्राप्त गरेका छन । सिन्धुली-२ मा हाल ४ हजार ६२० मत गणना भइसकेको छ ।
काठमाडौँ–१० मा रास्वपाका विष्ट १० हजार मतले अगाडि
काठमाडौं । निर्वाचन आयोगबाट प्राप्त पछिल्लो मतगणनाअनुसार काठमाडौँ निर्वाचन क्षेत्र नं १० राष्ट्रिय स्वतन्त्र पार्टीका प्रदीप विष्टले निकटम प्रतिद्वन्द्वीभन्दा अग्रता लिइरहेका छन् । पछिल्लो मतगणनाअनुसार विष्ट निकटम प्रतिद्वन्द्वीभन्दा १० हजार ३१३ मतले अगाडि छन् । हालसम्मको कुल सदर २६ हजार ७४३ मतमध्ये विष्टले १६ हजार ४३० मत प्राप्त गरेका छन् भने दोस्रो स्थानमा रहेका नेपाली कांग्रेसका हिमाल कार्कीले चार हजार २१३ मत ल्याएका छन् । तेस्रो स्थानमा रहेका एमालेका विनोद श्रेष्ठले दुई हजार ६७ मत प्राप्त गरेका छन् । निर्वाचन अधिकृत अमृताकुमारी शर्माका अनुसार त्रिभुवन विश्वविद्यालय स्मृति भवनमा भइरहेको मतगणनामा अहिले कीर्तिपुर नगरपालिका–७ को मतगणना भइरहेको छ । काठमाडौँ–१० मा हालसम्म एक हजार १२७ मत बदर भएको छ । काठमाडौँ–१० मा कुल ६० हजार १५१ खसेको थियो ।
कैलाली- ५: रास्वपा उम्मेदवार आनन्दबहादुर चन्द दोब्बर मतले अघि, प्रेम आले चौथोमा
काठमाडौं । कैलाली क्षेत्र नम्बर ५ मा राष्ट्रिय स्वतन्त्र पार्टी (रास्वपा) का उम्मेदवार आनन्दबहादुर चन्द दोब्बरभन्दा बढी मतान्तरले अग्रस्थानमा छन् । चन्दले ३९४४ मत ल्याउँदा कांग्रेसका नरनारायण शाह १४७५ भोटसहित दोस्रो स्थानमा छन् । एमालेका यज्ञराज ढुङ्गानाले ८४६ मत पाउँदा प्रेम आले ७८७ भोटका साथ चौथो स्थानमा छन् ।
समानुपातिकतर्फ प्रारम्भिक मत परिणाम : रास्वपा अगाडि, कांग्रेस दोस्रो, एमाले चौथो
काठमाडौं । प्रतिनिधिसभा निर्वाचनअन्तर्गत प्रत्यक्षतर्फको मतगणना जारी रहँदा समानुपातिक प्रणालीतर्फ भने नयाँ राजनीतिक शक्तिको प्रभाव देखिन थालेको छ । पछिल्लो प्रारम्भिक मतपरिणामअनुसार राष्ट्रिय स्वतन्त्र पार्टी (रास्वपा) ले अग्रता लिँदै पुराना दलहरूलाई पछि पारिरहेको छ । निर्वाचन आयोग नेपालका अनुसार अहिलेसम्मको पछिल्लो मतगणनाको विवरणमा रास्वपाले १ हजार ९५ मत प्राप्त गर्दै अग्रता कायमै बनाएको छ । प्रारम्भिक चरणमै रास्वपाले देखाएको यो मत परिणामले सहरी तथा सचेत मतदातामाझ ‘घण्टी’ चुनाव चिन्हप्रति आकर्षण बढेको संकेत दिएको छ । समानुपातिकको दौडमा नेपाली कांग्रेस ३७३ मतका साथ दोस्रो स्थानमा देखिएको छ । तर, रास्वपासँग कांग्रेसको मतान्तर ७२२ पुगेको छ, जसले प्रारम्भिक नतिजामै नयाँ दलको प्रभाव देखिएको विश्लेषण भइरहेको छ । त्यस्तै, समानुपातिकमा परम्परागत रूपमा बलियो मानिने नेपाल कम्युनिस्ट पार्टी (एमाले) भने सुरुआती गणनामै चौथो स्थानमा देखिएको छ। एमालेलाई उछिन्दै राष्ट्रिय प्रजातन्त्र पार्टी (राप्रपा) तेस्रो स्थानमा उक्लिएको छ । राप्रपाले १४७ मत पाउँदा एमालेले १०८ मत मात्र प्राप्त गरेको छ ।
काभ्रे २ मा रास्वपाका बदनले एमालेका उम्मेदवारलाई धेरै पछि पारे
काठमाडौं । काभ्रे २ मा रास्वपाका उम्मेदवार बदन भण्डारीले आफ्नो अग्रता कायमै राखेका छन् । उनले ८ हजार ५५१ मत प्राप्त गरेका छन् । नेपाली कांग्रेसका मधु आचार्यले २ हजार १६२, नेकपा एमालेका अशोक ब्यन्जुले ३ हजार ६१८ र तारा चिन्हका उम्मेदवार बसुन्धारा हुमागाईंले ७२५ मत प्राप्त गरेकी छन्।
ताप्लेजुङमा कांग्रेसका उम्मेदवार तुम्याहाङ अगाडि, थेवे तेस्रो स्थानमा
काठमाडौं । ताप्लेजुङमा अहिले नेपाली कांग्रेसका उम्मेदवार गजेन्द्र तुम्याहाङले अग्रता लिएका छन् । पछिल्लो विवरण अनुसार तुम्याहाङले ५ सय ८० मत प्राप्त गर्दै आफ्नो प्रतिस्पर्धीलाई पछाडि पारेका हुन् । उनलाई तारा चिन्ह भएका नेपाली कम्युनिष्ट पार्टीका खेलप्रसाद बुडाक्षेत्रीले ४ सय ४२ मतका साथ पछ्याइरहेका छन् । यसैगरी, सूर्य चिन्ह लिएर चुनावी मैदानमा उत्रिएका नेकपा एमालेका थेबेले हालसम्म २ सय ९३ मत प्राप्त गरेका छन् भने घण्टी चिन्ह भएका राष्ट्रिय स्वतन्त्र पार्टी (रास्वपा) का वीरेन्द्र श्रेष्ठ ९७ मतका साथ चौथो स्थानमा रहेका छन् ।
हिमाली क्षेत्रका तीन जिल्लाको मतपत्र ढुवानी हुन बाँकी
काठमाडौं । हिमाली क्षेत्रका १५ जिल्लामध्ये तीन जिल्लाको मतपत्र ढुवानी गर्न बाँकी रहेको छ । मौसमका कारण अहिलेसम्म सङ्खुवासभा, डोल्पा र गोरखाको मतपत्र ढुवानी हुन बाँकी रहेको छ । तीन जिल्लाका हिमाली भेगका मतदान केन्द्रका मतपत्र हेलिकप्टरबाट ढुवानी गर्नुपर्नेमा बिहीबार बेलुकीदेखि नै मौसमका कारण सम्भव हुन नसकेको जानकारी प्राप्त भएको आयोगका सहायक प्रवक्ता कुलबहादुर जिसीले राससलाई बताए । मौसमले साथ दिएसम्म तीनवटै जिल्लाको मतपत्र आजै निर्वाचन अधिकृतको कार्यालयमा लैजाने गरी तयारी भइरहेको छ । मतपत्र ढुवानी भइसकेपछि तीनैवटा जिल्लाको मतगणना सुरु हुनेछ । यसैगरी, रसुवा, दोलखा, रुकुम (पूर्वी भाग), बाजुरा, बझाङ, हुम्ला, ताप्लेजुङ, मनाङ, मुस्ताङ, रुकुम (पश्चिमी भाग), सोलुखुम्बु र मुगुका हिमाली भेगका मतदान केन्द्रका मतपत्र भने जिल्ला निर्वाचन अधिकृतको कार्यालयमा लगी सकिएको पनि उनले बताए । यस्तै, स्याङ्जा, दोलखा र धनुषा जिल्ला निर्वाचन क्षेत्र नं १ को मतगणना कानुनअनुसार गर्न पनि आयोगले निर्देशन दिएको जनाइएको छ । धनुषा जिल्ला निर्वाचन क्षेत्र नं १ मा घण्टीमा खसेको मत छुट्याएर राखी मतगणना गर्न आयोगले मुख्य निर्वाचन अधिकृतको कार्यालयलाई निर्देशन दिएको छ ।
तेस्रो स्थानका लागि संघर्ष गर्दै एमाले र नेकपा
काठमाडौं । प्रतिनिधि सभाका लागि प्रत्यक्षतर्फको निर्वाचनमा नेपाली कम्यूनिष्ट पार्टी (नेकपा) र नेपाल कम्यूनिष्ट पार्टी (एमाले)बीच प्रतिस्पर्धा देखिएको छ । निर्वाचन आयोगले सार्वजनिक गरेको पछिल्लो मतगणना अनुसार नेकपाले ९ वटा निर्वाचन क्षेत्रमा अग्रता कायम गरेको छ भने एमालेले ९ वटा निर्वाचन क्षेत्रमा अग्रता कायम गरेको छ । नेकपाका अध्यक्ष पुष्पकमल दाहाल प्रचण्ड रुकूम पूर्वबाट विजयी हुने सम्भावना बढी देखिन्छ । एमालेका लिलामणि गौतमले २ हजार ७५६ मत पाउँदा प्रचण्डले ६ हजार ८२० मत पाएका छन् । नेकपाका उम्मेदवार वर्षामान पुन (रोल्पा–१), महेन्द्रबहादुर शाही (कालिकोट १), वृजेश कुमार गुम्ता (कपिलबस्तु–२), बीरमान चौधरी (कैलाली–३), नन्दबहादुर साउद (कैलाली–२), भीम बहादुर रावल (अछाम–१), रमेशकुमार मल्ल (सल्लान–१) र दीनानाथ गौतम (काभ्रे–२) को मतगणनामा अगाडि रहेका छन् । एमालेका अध्यक्ष केपी शर्मा ओलीले प्रतिस्पर्धी बालेन्द्र शाहको भन्दा कम मत पाइरहेका छन् । एमालेका दीपकबहादुर धामी (डोटी–१), मोहम्मद इश्तियाक राई (बाँके–२), कुलमणि देवकोटा (सुर्खेत–२), लक्ष्मी प्रसाद पोखरेल (दैलेख–२), प्रमोद कुमार यादव (रुपन्देही–४), राजेन्द्र कुमार राई (धनकुटा–१) र भानुभक्त ढकाल (तेह्रथुम–१)मा र सुहाङ नेम्वाङ इलाम–२ मा अगाडि रहेका छन् । शुक्रबार मध्यान्नसम्ममा राष्ट्रिय स्वतन्त्र पार्टीले १ स्थानमा विजय हासिल गर्दै ९२ स्थानमा अग्रता लिइरहेको छ भने नेपाली कांग्रेसले एक स्थानमा विजयीसहित ११ स्थानमा अग्रता हासिल गरिरहेको निर्वाचन आयोगले जनाएको छ । जुम्लाबाट राष्ट्रिय प्रजातन्त्र पार्टीका ज्ञानेन्द्र बहादुर शाही अग्रस्थानमा छन् भने म्याग्दीबाट स्वतन्त्र उम्मेदवार महाबीर पुन अग्रस्थानमा छन् । बाँकी ४१ वटा निर्वाचन क्षेत्रमा मत गणनाको तयारीका काम भइरहेको निर्वाचन आयोगले जनाएको छ । हालसम्म रास्वपा एक जितसहित ९२ र कांग्रेस एक जितसहित ११ ठाउँमा अगाडि छ ।
