नागरिक लगानी कोषको साधारणसभा सम्पन्न, १३ प्रतिशत लाभांश पारित
काठमाडौं । नागरिक लगानी कोषको ३१औँ वार्षिक साधारणसभा बुधबार सम्पन्न भएको छ । कोषको साधारणसभाले गत आर्थिक वर्ष २०८१/८२ को आम्दानीबाट ५ प्रतिशत बोनस सेयर र ८ प्रतिशत नगद लाभांश (नगदसमेत) वितरणको प्रस्ताव पारित गरेको हो । कोषको गत आवको कर पछिको खुद नाफा एक अर्ब २५ करोड ६० लाख रुपैयाँ रहेको छ । जसमध्ये २५ करोड १२ लाख रुपैयाँ साधारण जगेडा कोषमा राखी बाँकी रकमबाट लाभांश वितरण गरिएको हो । कोषले सञ्चालन गरेको विभिन्न बचत कार्यक्रमबाट गत आव २०८१/८२ मा दुई खर्ब ६६ अर्ब ६५ करोड रुपैयाँ खुद कोष सङ्कलन भएकामा चालु आवको असोज मसान्तसम्ममा बचत परिचालन मौज्दात रकम दुई खर्ब ९६ अर्ब ८९ करोड रुपैयाँ पुगेको जनाएको छ । साधारणसभाले कोषको वार्षिक प्रतिवेदन, गत आव २०८१/८२ को नाफा नोक्सान हिसाब र नगद प्रवाह विवरणलगायतका वित्तीय विवरणसमेत पारित गरेको छ । साधारणसभाले सर्वसाधारण शेयरधनीका तर्फबाट नारायणप्रसाद घिमिरेलाई सर्वसम्मत चयन गरेको छ । साधारणसभामा कोषका अध्यक्ष तुलसीप्रसाद घिमिरेले गत आवको लाभांशबाट सेयरधनी सन्तुष्ट देखिनु, कोषका कर्मचारीको सेवासुविधा र वृत्तिविकासलगायत विषयमा चासो देखाउनु सकारात्मक रहेको बताए । उनले संस्थालाई व्यवस्थित बनाएर लैजान दूरदर्शी ढङ्गले काम गर्ने प्रतिबद्धता जनाए । कोषका कार्यकारी निर्देशक पर्वतकुमार कार्कीले सेयरधनीले साधारणसभामा दिएका सुझाव सम्बोधन गरिने प्रतिबद्धता जनाए । साथै संस्थालाई सुशासित संस्थाका रूपमा अघि बढाउँदै लगिएको उनले दाबी गरे । कार्यकारी निर्देशक कार्कीले कोषले नेपाल वायुसेवा निगममा गरेको कर्जा लगानीको असुलीमा जटिलता देखिएको बताए । निगमले विमान खरिदका लागि कर्जा लग्दा नेपाल सरकार ‘ग्यारेन्टी’ बसेको उल्लेख गर्दै उनले ढिलोचाँडो असुली हुने अपेक्षा व्यक्त गरे । त्यस्तै, संस्थागत सामाजिक उत्तरदायित्वअन्तर्गत कोषले शिक्षा, विपद् व्यवस्थापन तथा पुनर्निर्माणका क्षेत्रमा खर्च गरेको उनको भनाइ छ । कोषका तथ्याङ्क क्रमशः ‘डिजिटलाइज्ड’ गर्दै लगिएको र डाटा भण्डारणलाई सुरक्षित बनाउँदै लगिएको पनि कार्कीले जानकारी दिए ।
सुमन सायमी नेपाली कम्युनिष्ट पार्टीमा प्रवेश
काठमाडौं । राष्ट्रिय मुक्ति पार्टी नेपाल (एकता पक्षधर)का संयोजक सुमन सायमी नेपाली कम्युनिष्ट पार्टीमा प्रवेश गरेका छन् । बुधवार काठमाडौंमा एक कार्यक्रमका बीच नेपाली कम्युनिष्ट पार्टीका संयोजक पुष्पकमल दाहालले उनलाई पार्टीमा स्वागत गरेका हुन् । सायमी चर्चित गुठी आन्दोलनको नेता हुन् । त्यसैगरी उनले काठमाडौंमा विभिन्न खालका सामाजिक जागरण अभियानको पनि नेतृत्व गर्दै आएका छन् । राष्ट्रिय मुक्ति पार्टी नेपाल (एकता पक्षधर)सँग भ्रष्टाचार नियन्त्रण, गुठी आन्दोलन, सहकारी आन्दोलनको मर्मअनुसार अघि बढ्ने संकल्पसहितको समझदारी गरिएको नेपाली कम्युनिष्ट पार्टीले जनाएको छ ।
१२५ कम्पनीको सेयर मूल्य बढ्यो, ६ अर्बको कारोबार
काठमाडौं । बुधबार सेयर बजार सामान्य अंकले बढेको छ । नेपाल स्टक एक्सचेन्ज (नेप्से) परिसूचक १.५२ अंकले बढेर २६४१ बिन्दुमा पुगेको हो । नेप्सेका अनुसार १२५ कम्पनीको सेयर मूल्य बढ्दा १२४ कम्पनीको मूल्य घटेको छ । ११ कम्पनीको मूल्यमा भने कुनै परिवर्तन आएको छैन । बुधबार ३२० कम्पनीको १ करोड कित्ता सेयर किनबेच हुँदा ६ अर्ब २० करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार राधी विद्युत कम्पनीको भएको छ । राधीको २६ करोड रुपैयाँ बराबरको कारोबार भएको छ । साथै युनियन हाइड्रोको २३ करोड, एसवाई प्यानलको २२ करोड, मन्जुश्री फाइनान्सको २१ करोड र दोर्दी खोला जलविद्युतको १९ करोड रुपैयाँ बराबरको कारोबार भएको छ । आजको कारोबार फाइनान्स समूह सबैभन्दा धेरै २.५५ प्रतिशतले बढेको छ । विकास बैंक ०.०१, होटल तथा पर्यटन ०.३१, हाइड्रोपावर ०.०७, लगानी ०.११, निर्जीवन बीमा ०.३८, व्यापार ०.६७ प्रतिशतले बढेको छ । बैंकिङ ०.०८, जीवन बीमा ०.०१, उत्पादन तथा प्रशोधन ०.४१ तथा माइक्रोफाइनान्स ०.०५ तथा अन्य ०.१३ प्रतिशतले घटेको छ ।
टेलिकमको साधारण सभा सम्पन्न, सेयरधनीलाई प्रतिसेयर ३० रुपैयाँ नगद लाभांश
काठमाडौं । नेपाल दूरसञ्चार कम्पनी लिमिटेड (नेपाल टेलिकम) को १८औं वार्षिक साधारण सभा बुधबार राष्ट्रिय सभा गृह, प्रदर्शनी मार्ग, काठमाडौंमा सम्पन्न भएको छ । साधारण सभाले आर्थिक वर्ष २०८१/८२ को मुनाफाबाट सेयरधनीलाई प्रतिसेयर ३० रुपैयाँका दरले नगद लाभांश वितरण गर्ने प्रस्ताव सर्वसम्मत रूपमा पारित गरेको छ । सभामा करिब ९१.५६ प्रतिशत सेयरको प्रतिनिधित्व गर्ने सेयरधनीहरूको उपस्थिति रहेको थियो । सभाले आर्थिक वर्ष २०८१/८२ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित २०८२ असार मसान्तसम्मको वासलात, नाफा–नोक्सान हिसाब, नगद प्रवाह विवरण तथा अन्य अनुसूचीहरू पनि सर्वसम्मत रूपमा पारित गरेको छ । सो अवसरमा कम्पनीका सञ्चालक समितिका अध्यक्ष तथा सञ्चार तथा सूचना प्रविधि मन्त्रालयका सचिव राधिका अर्यालले सेयरधनीहरूलाई स्वागत गर्दै कम्पनीको १८औं वार्षिक प्रतिवेदन प्रस्तुत गरे । उनले तीव्र प्रतिस्पर्धी वातावरणका बाबजुद मुनाफाभन्दा सेवाभावलाई प्राथमिकतामा राख्दै दुर्गम तथा विकट क्षेत्रमा सेवा विस्तार, डिजिटल नेपाल बनाउने सरकारी अवधारणामा सहयोग, विद्युतीय सुशासन प्रवर्द्धन तथा अप्टिकल फाइबरमार्फत सूचना महामार्ग निर्माणमा कम्पनी केन्द्रित रहेको बताए । अध्यक्ष अर्यालले भावी दिनमा मेगा परियोजना सञ्चालनका लागि थप पुँजी आवश्यक परेमा बोनस सेयरसमेत प्रदान गरिने प्रतिबद्धता व्यक्त गरे । उनका अनुसार समीक्षा अवधिमा कम्पनीले कुल ३८ अर्ब १९ करोड रुपैयाँ आम्दानी गर्दै ६ अर्ब रुपैयाँ नाफा आर्जन गरेको छ । यस अवधिमा कर तथा शुल्कबापत १८ अर्ब ४६ करोड रुपैयाँ नेपाल सरकारलाई राजस्वका रूपमा बुझाइएको छ । उनले जोखिम न्यूनीकरणका लागि आय सुनिश्चितता, कार्यसम्पादन तथा प्राविधिक परीक्षणलाई प्राथमिकताका साथ अघि बढाइएको जानकारी दिँदै वातावरण संरक्षण, स्वास्थ्य, शिक्षा र खेलकुदलगायत क्षेत्रमा संस्थागत सामाजिक उत्तरदायित्वअन्तर्गत सहयोग निरन्तर रहेको बताए । नेपाल टेलिकमले निकट भविष्यमा राजधानीसहित ठूला सहरहरूबाट ५जी सेवा सञ्चालन गर्ने तयारी गरेको जनाएको छ । साथै, देशभर फोरजी र फाइबर सेवाको पहुँच विस्तार गर्दै २०८२ असोज मसान्तसम्म सातै प्रदेशका ७७ जिल्लाका ७४९ स्थानीय तहमा अत्याधुनिक दूरसञ्चार सेवा विस्तार भइसकेको कम्पनीले जनाएको छ ।
नबिल बैंकका अध्यक्ष निर्वाण कुमार चौधरीले लिए शपथ
काठमाडौं । नबिल बैंक लिमिटेडका नवनियुक्त सञ्चालक समितिका अध्यक्ष निर्वाण कुमार चौधरीले नेपाल राष्ट्र बैंकका गर्भनर प्रा.डा. विश्वनाथ पौडेलबाट पद तथा गोपनीयताको शपथ ग्रहण गरेका छन् । नेपाल राष्ट्र बैंकमा बुधबार आयोजित एक कार्यक्रममा बैंकका नवनियुक्त अध्यक्ष चौधरीले शपथ लिएका हुन् । बैंक सञ्चालक समितिको गत पुस २८ गते सम्पन्न ६९९औँ बैठकले चौधरीलाई सर्वसम्मतिले अध्यक्षमा चयन गरेको थियो । व्यावसायिक घराना चौधरी ग्रुपका प्रबन्ध सञ्चालक रहेका उनी चौधरी समूहका विभिन्न कम्पनीमा सञ्चालकका रुपमा जिम्मेवारी वहन गर्दै आएका छन् । समाज सेवामा पनि रुचि राख्ने उनी चौधरी फाउण्डेशनको उपाध्यक्ष तथा नेपाल उद्योग परिसंघ (सीएनआई) को वरिष्ठ उपाध्यक्ष पनि हुन् । शपथ ग्रहण कार्यक्रममा नेपाल राष्ट्र बैंकबाट डेपुटी गभर्नरद्वय डा. नीलम ढुङ्गाना तिम्सिना र बमबहादुर मिश्र, कार्यकारी निर्देशकहरु रामु पौडेल, गुरुप्रसाद पौडेल, दयाराम शर्मा तथा दीर्घबहादुर रावल, निर्देशक निरा ताल्चाभडेल र सञ्चालक समितिका सचिव तथा निर्देशक शरणकुमार अधिकारी तथा नबिल बैंकबाट बैंकका सञ्चालकहरू मलय मुखर्जी, अनन्त पौड्याल, प्रविन टिवडेवाला, सरिता भट्ट अधिकारी, अनिल केशरी शाह, प्रमुख कार्यकारी अधिकृत मनोजकुमार ज्ञवाली, नायब प्रमुख कार्यकारी अधिकृत भुपेन्द्र पाण्डे र कम्पनी सचिव भिष्म नेउपाने लगायतको उपस्थिति थियो ।
लुम्बिनी विकास बैंकको १८औं वार्षिक साधारण सभा सम्पन्न, वार्षिक प्रतिवेदन पारित
काठमाडौं । लुम्बिनी विकास बैंक लिमिटेडले बुधबार १८औं वार्षिक साधारण सभा सम्पन्न गरेको छ। सभाले आर्थिक वर्ष २०८२/८३ को वार्षिक प्रतिवेदन पारित गर्दै लेखापरीक्षकको नियुक्ति लगायतका प्रस्तावहरू पनि पारित गरेको छ। बैंकका सञ्चालक समितिका अध्यक्ष चिन्तामणी भट्टराईको अध्यक्षतामा सम्पन्न सभामा सहभागी सेयरधनीहरूले राखेका जिज्ञासाहरूको प्रमुख कार्यकारी अधिकृत नरेश सिंह बोहराले स्पष्ट जवाफ दिएका थिए । देशका ७ वटै प्रदेशमा शाखा सञ्चालन गर्दै आएको लुम्बिनी विकास बैंक लिमिटेडको हाल ८९ शाखा कार्यालय र एक विस्तारित शाखा (एक्सटेन्सन काउन्टर) रहेको छ । बैंकले 'निरन्तर सहयात्रा' नारासहित उच्चस्तरीय, आधुनिक र सुरक्षित बैंकिङ्ग सेवा प्रदान गर्दै आएको जनाएको छ ।
विशेष महाधिवेशन पक्षका ८ प्रस्ताव, मान्लान् त सभापति देउवाले ?
काठमाडौं । नेपाली कांग्रेसको विशेष महाधिवेशन पक्षले सहमतिका लागि ८ बुँदे प्रस्ताव पठाएको छ । उक्त पक्षले पार्टी सुधार, नेतृत्व पुनर्संरचना र आगामी निर्वाचनको रणनीतिलाई केन्द्रमा राख्दै आठ बुँदे प्रस्ताव अघि सारेको हो । विशेष महाधिवेशनको छलफलका क्रममा उठाइएका यी प्रस्तावले पार्टीलाई संस्थागत ढंगले अघि बढाउने र निर्वाचनमा केन्द्रित बनाउने उद्देश्य राखेको विशेष महाधिवेशन पक्षीय नेता जगदिश्वर नरसिंह केसीले जानकारी दिए । प्रस्तावको पहिलो माग पार्टी सभापति शेरबहादुर देउवाले कार्यकारी भूमिकाबाट बाहिरिनुपर्ने माग गरिएको छ । यस्तै, दोस्रो महत्त्वपूर्ण प्रस्तावमा नेतृत्वलाई संस्थागत बनाउँदै विशेष महाधिवेशनको स्वामित्व सम्पूर्ण पार्टीले लिनुपर्नेमा जोड दिइएको छ । आगामी निर्वाचनअघि नै पार्टीको तर्फबाट प्रधानमन्त्रीको उम्मेदवार तय गरेर जनतामाझ जाने प्रस्ताव गरिएको नेता केसीले जानकारी दिए । निर्वाचन रणनीतिमा कांग्रेसले कुनै पनि दलसँग चुनावी गठबन्धन नगरी एक्लै प्रतिस्पर्धा गर्नुपर्ने प्रस्ताव गरिएको छ । यसले पार्टीको वैचारिक स्पष्टता र संगठनात्मक आत्मविश्वास बढाउने तर्क प्रस्तावकर्ताहरूको रहेको केसीले बताए । टिकट वितरणलाई विवादरहित र सर्वस्वीकार्य बनाउन स्वतन्त्र र विश्वसनीय संसदीय बोर्ड गठन गर्नुपर्ने प्रस्तावसमेत गरिएको छ । त्यस्तै, निर्वाचनमा केन्द्रित भई पार्टी संगठनलाई सक्रिय बनाउन पाँच सदस्यीय उच्चस्तरीय संयन्त्र गठन गर्नुपर्ने प्रस्तावमा उल्लेख गरिएको छ । प्रस्तावमा उम्मेदवारको टिकटमा सभापति देउवाले हस्ताक्षर गर्न नपाउने व्यवस्था गर्नुपर्ने मागसमेत समेटिएको छ । यसले व्यक्तिकेन्द्रित निर्णय प्रक्रियाको अन्त्य गर्दै सामूहिक नेतृत्व प्रणाली बलियो बनाउने नेता केसीको विश्वास रहेको छ । यसबाहेक विशेष महाधिवेशनमा पेस भएका प्रतिवेदनहरूलाई पार्टीको दीर्घकालीन पुँजीका रूपमा ग्रहण गर्दै कार्यान्वयनमा लैजानुपर्ने प्रस्तावमा उल्लेख छ । कांग्रेसभित्र देखिएको असन्तोष र सुधारको मागलाई सम्बोधन गर्दै पार्टीलाई निर्वाचनमुखी बनाउने दिशामा यी प्रस्तावलाई महत्वपूर्ण रूपमा हेरिएको छ ।
काठमाडौंबाट चुनावी अभियान सुरु गर्दै एमाले
काठमाडौं । नेपाल कम्युनिष्ट पार्टी (एमाले) ले काठमाडौंबाट चुनावी अभियान सुरु गर्दैछ । एमालेको बागमती प्रदेश कमिटीले आगामी माघ ४ गते काठमाडौंमा जनप्रदर्शनसहित विशेष चुनावी अभियानको थालनी गर्न लागेको सो पार्टीका सचिव एवं प्रदेशका इञ्चार्ज महेश बस्नेतले जानकारी दिए । यस्तै एमालेको संशोसधत विधानअनुसार गठित राजधानी विशेष कमिटीको घोषणा र चुनावी अभियान आगामी माघ २ गते काठमाडौंमा हुने पार्टीका सचिव एवं राजधानी विशेष कमिटीका इञ्चार्ज डा. राजन भट्टराईले बताए । एमालेको यही पुस २६ गते बसेको केन्द्रीय कमिटीको बैठकले आगामी फागुन २१ गते हुने तोकिएको प्रतिनिधिसभा सदस्य निर्वाचनका लागि देशव्यापी रूपमा अभियान सुरु गर्ने निर्णय गरेको थियो ।
