काठमाडौं-१ मा एमालेसहित २६ उम्मेदवारको जमानत जफत हुने, शाहीको शून्य मत
काठमाडौं । काठमाडौं क्षेत्र नम्बर-१ मा नेकपा (एमाले)का उम्मेदवारसहित २६ जना उम्मेदवारको जमानत जफत हुने भएको छ । खसेको सदर मतको १० प्रतिशतभन्दा कम मत प्राप्त गर्ने उम्मेदवारको धरौटी जफत हुने कानुनी व्यवस्थाअनुसार उनीहरूको जमानत जफत हुने भएको हो । प्रतिनिधिसभा सदस्य निर्वाचन निर्देशिका-२०८२ को दफा ६४ अनुसार पहिलो हुने निर्वाचित हुने निर्वाचन प्रणालीमा खसेको कुल सदर मतको १० प्रतिशतभन्दा कम मत पाउने उम्मेदवारको धरौटी जफत हुने प्रावधान रहेको छ । प्रतिनिधिसभा सदस्यका उम्मेदवारले १० हजार रुपैयाँ धरौटी जम्मा गर्नुपर्ने व्यवस्था छ । यस क्षेत्रमा राष्ट्रिय स्वतन्त्र पार्टीकी रञ्जु दर्शना न्यौपाने १५ हजार ४५५ मत प्राप्त गर्दै विजयी भइसकेकी छन् । उनका निकटतम प्रतिस्पर्धी नेपाली कांग्रेसका प्रबल थापाले ६ हजार ३६४ मत प्राप्त गरेका छन् । त्यस्तै राष्ट्रिय प्रजातन्त्र पार्टीका रवीन्द्र मिश्र ले ३ हजार ९७२ मत पाएका छन् । क्षेत्र नम्बर १ मा ४८ हजार ४८९ मतदाता रहेकोमा २८ हजार मत खसेको थियो । १० प्रतिशत मत ल्याउनका लागि कम्तीमा २ हजार ८०० मत आवश्यक थियो । तर नेकपा (एमाले) का उम्मेदवार मोहनराज रेग्मीले १ हजार ६१८ मत मात्र प्राप्त गरेपछि उनको पनि जमानत जफत हुने भएको छ । यसैगरी उज्यालो नेपाल पार्टी का मोहनराज रेग्मी, श्रम संस्कृति पार्टीका समीर तामाङ लामा र नेपाल कम्युनिस्ट पार्टीकी मेनुका भण्डारीको जमानत पनि जफत हुने देखिएको छ । यसैबीच नेपाल जनसेवा पार्टीबाट उम्मेदवार बनेका अर्जुनबहादुर शाहीले शून्य मत प्राप्त गरेका छन् । यस्तै, राजु भुजेल, शान्ति श्रेष्ठ, संगीत बम्मले एक मत मात्र प्राप्त गरेका छन् । राजकुमार लिम्बु, कमल सुवेदी, किरण शाह र रमेशप्रसाद जोशीले २ मत पाएका छन् ।
रसुवामा कांग्रेसको अग्रता कायमै
काठमाडौं । प्रतिनिधिसभा सदस्य निर्वाचनअन्तर्गत रसुवामा नेपाली कांग्रेसका उम्मेदवार मोहन आचार्य ५ हजार ३११ मतसहित अग्रस्थानमा रहेका छन् । ताजा मत परिणामअनुसार १२ हजार ४२९ मत गणना हुँदा रास्वपाका वसन्त भट्टले २ हजार ९८३, नेकपा एमालेका प्रेमबहादुर तामाङले २ हजार २५६ मत प्राप्त गरेका छन् । यहाँ कुल ४१ हजार ४७१ मतदाता रहेकामा २५ हजार ४५८ ले मतदान गरेका थिए ।
म्याग्दीमा महावीर पुनको अग्रता कायमै
काठमाडौं । प्रतिनिधिसभा क्षेत्र नम्बर १ को मतगणना अनुसार स्वतन्त्र उम्मेदवार महावीर पुन अग्रस्थानमा देखिएका छन् । उनले हालसम्म १ हजार ६६ मत प्राप्त गरेका छन् । नेकपा एमालेका उम्मेदवार हरिकृष्ण श्रेष्ठ दोस्रो स्थानमा छन् । उनले ६१२ मत पाएका छन् । नेपाली कम्युनिष्ट पार्टीका उम्मेदवार अर्जुन बहादुर थापाले ४७२ मत प्राप्त गरे भने कांग्रेसका कर्णबहादुर भण्डारी ३९५ मतसहित पछ्याइरहेका छन् । यसैगरी राष्ट्रिय स्वतन्त्र पार्टी पछाडि परेको छ भने रास्वपा उम्मेदवार युवराज रोकाले जम्मा ५ मत पाएका छन् । मतगणना जारी छ ।
मोरङमा रास्वपाका नेता रेग्मीको निधन
काठमाडौं । राष्ट्रिय स्वतन्त्र पार्टी (रास्वपा) का मोरङ जिल्ला सदस्य दुर्गाप्रसाद रेग्मीको निधन भएको छ। २ नम्बर क्षेत्रका प्रतिनिधिसमेत रहेका उनको मतगणनास्थल नजिकै खाजा खाने समयमा आकस्मिक निधन भएको मोरङ जिल्ला प्रहरी कार्यालयका सूचना अधिकारी हरिनन्दन चौधरीले जानकारी दिए । रेग्मी ५० वर्षका थिए ।
नवलपरासी-१ मा रास्वपाका विक्रम खनाल अघि, कांग्रेसका विनोद चौधरी ११ सय मतले पछि
काठमाडौं । नवलपरासी निर्वाचन क्षेत्र नम्बर १ मा राष्ट्रिय स्वतन्त्र पार्टी (रास्वपा) का उम्मेदवार विक्रम खनाल अग्रस्थानमा छन् भने नेपाली कांग्रेसका विनोद चौधरी पछाडि रहेका छन् । पछिल्लो मतगणनाअनुसार चौधरी खनालभन्दा करिब १ हजार ९९ मतले पछि छन् । यसैगरी अहिलेसम्म २ हजार ५९३ मत गणना हुँदा खनालले ३ हजार ६९२ मत प्राप्त गरेका छन् । एमालेका उम्मेदवारले २७९ मत पाएका छन् । खनालले १ हजार ५०० मत प्राप्त गर्दा चौधरीले ४०१ मत पाएका छन् ।
१०९ क्षेत्रमा मत गणना हुँदा रास्वपा ८४ ठाउँमा अगाडि, कांग्रेस र नेकपाबीच दोस्रो हुने प्रतिस्वपर्धा
काठमाडौं । प्रतिनिधि सभा निर्वाचनमा राष्ट्रिय स्वतन्त्र पार्टीले ८३ ठाउँमा अग्रता लिएको छ । विभिन्न निर्वाचन क्षेत्रमा भइरहेको मतगणनाको पछिल्लो अपडेट अनुसार रास्वपा ८३ वटा ठाउँमा अग्रता लिएको छ । हालसम्म रास्वपाले एक ठाउँमा विजय हासिल गरिसकेको छ । काठमाडौं क्षेत्र १ का उम्मेदवार रञ्जु दर्शना विजयी भइसकेकी छन् । यस्तै, नेपाली कांग्रेस र नेपाली कम्युनिष्ट पार्टीबीच प्रतिस्पर्धा भइरहेको छ । नेपाली कांग्रेसले पनि एक ठाउँमा विजयको खाता खोलिसकेको छ । मुस्ताङ–१ बाट कांग्रेसका योगेश गौचन थकाली विजयी भइसकेका छन् । कांग्रेस र नेकपा दुवै पार्टी ८ वटा ठाउँमा अगाडि छन् भने नेकपा एमाले ७ ठाउँमा अगाडि छ । हाल १०७ ठाउँमा मतगणना भइरहेको छ । दुई ठाउँको नतिजा आइसकेको छ ।
पर्सा -२ मा रास्वपाका कानु १ हजार मतसहित अगाडि
वीरगञ्ज । पर्सा प्रतिनिधिसभा सदस्य निर्वाचन क्षेत्र नं २ मा राष्ट्रिय स्वतन्त्र पार्टी (रास्वपा) का उम्मेदवार सुशीलकुमार कानुले १ हजार ७७ मतसहित अग्रता लिएका छन् । निर्वाचन अधिकृत मधुसुदन आचार्यका अनुसार २३ सय ४७ मतगणना हुँदा नेकपा एमालेका उम्मेदवार रिमा यादवले ७ सय ४३, नेपाली कांग्रेसका अजयकुमार चौरसियाले ३३० मत प्राप्त गरेका छन् । पर्सा-२ मा विभिन्न दलका १७ र स्वतन्त्र १२ जना गरी ३१ जना उम्मेदवार प्रतिस्पर्धामा छन् । यसैगरी, ९५ हजार १२० जना मतदाता रहेकामा यहाँ प्रत्यक्षतर्फ ६६ हजार ५७ र समानुपातिकतर्फ ६७ हजार ५७ मत खसेको छ ।
बैतडीमा मतगणना सुरु
काठमाडौं । बैतडी जिल्लामा सम्पन्न निर्वाचनको मतगणना सुरु गरिएको छ । मतदान केन्द्रबाट संकलित मतपेटिका कडा सुरक्षा व्यवस्थाका बीच जिल्ला सदरमुकाम गढीस्थित मुख्य निर्वाचन अधिकृतको कार्यालयमा ल्याइएपछि मतगणना प्रक्रिया थालिएको हो । मतगणना सिगास गाउँपालिकाबाट सुरु भएको बताइएको छ । बिहीबार भएको मतदानमा ७३ हजार १४८ मत मत खसेको थियो । प्रतिनिधि सभाका लागि एक मात्रै निर्वाचन क्षेत्र रहेको बैतडीमा ११ जना चुनावी मैदानमा रहेका छन् ।
