काठमाडौं-६ मा रास्वपाका शिशिर खनाल विजयी
काठमाडौं । काठमाडौं क्षेत्र नम्बर ६ मा रास्वपा उम्मेदवार शिशिर खनाल विजयी भएका छन् । उनी निर्वाचित भएको औपचारिक घोषणा हुन भने बाँकी छ । शुक्रबारको अन्तिम मतपरिणाम अनुसार ४३ हजार ८६३ मत गणना हुँदा खनालले २७ हजार ७१९ मत प्राप्त गरेका छन्। उनका निकटतम प्रतिस्पर्धी नेपाली कांग्रेसका उम्मेदवार सबुज बनियाले ६ हजार ६४७ मत प्राप्त गरेका छन् भने नेकपा एमालेका उम्मेदवार अमन मास्केले ४ हजार ३७३ मत पाएका छन्।
सबै प्रहरी कर्मचारीहरूले आफ्नो उत्कृष्ट व्यावसायिकता प्रदर्शन गर्न जरुरी छ : प्रहरी महानिरीक्षक कार्की
काठमाडौं । प्रहरी महानिरीक्षक दानबहादुर कार्कीले समाजमा शान्ति सुरक्षा कायम राख्न प्रहरी कर्मचारीहरूले निर्वाह गर्दै आइरहेको भूमिका उत्कृष्ट रहेको चर्चा गर्दै आगामी दिनमा समेत सबै प्रहरी कर्मचारीहरूले निष्ठावान, इमानदार भई अझ उच्च अनुशासन एवं व्यावसायिकता प्रदर्शन गर्न जरुरी रहेको बताएका छन् । नेपाल प्रहरी प्रधान कार्यालयबाट भर्चुअल माध्यमद्वारा प्रतिनिधि सभा सदस्य निर्वाचनको मतदानपश्चात अपनाउनुपर्ने सुरक्षा सतर्कता तथा समसामयिक विषयवस्तुमा शुक्रबार प्रहरी कर्मचारीहरूलाई निर्देशन सम्बोधनको क्रममा प्रहरी महानिरीक्षक कार्कीले उक्त कुरा बताएका हुन् । प्रहरी महानिरीक्षक कार्कीले प्रतिनिधि सभा सदस्य निर्वाचनको मतदान प्रक्रियालाई शान्तिपूर्ण, भयरहित एवं निष्पक्ष वातावरणमा सफलतापूवर्क सम्पन्न गराउन सबै प्रहरी कर्मचारीहरूले उच्च मनोबलका एवं जिम्मेवारीबोधका साथ प्रदर्शन गरेको व्यावसायिकता प्रशंसनीय रहेको बताए । सबै प्रहरी कर्मचारीहरूले सामूहिक भावनाका साथ निर्वाचनको समयमा प्राप्त आ(आफ्नो जिम्मेवारी कुशलतापूर्वक सम्पन्न गरेको समेत उनले उल्लेख गरे । प्रहरी महानिरीक्षक कार्कीले मतगणनास्थलमा देखा पर्न सक्ने सुरक्षा चुनौतीहरूलाई सम्बोधन गर्न सूचना संकलनलाई विशेष प्राथमिकतामा राखी आवश्यक सुरक्षा रणनीति सहित प्रभावकारी प्रहरी परिचालनमा विशेष सतर्कता अपनाउन निर्देशन दिए । मतगणनास्थल, मतगणनाको परिणाम एवं विजयी दलको र्याली, जुलुस लगायतका क्रियाकलापमा कुनै पनि त्रुटि नहुने गरी थप संवेदनशील भई कार्य गर्न समेत उनले जोड दिए । सामाजिक सञ्जालमा गलत सूचना तथा मिथ्या सूचना सम्प्रेषणमा संलग्नलाई कानुनी दायरामा ल्याउन थप सक्रिय रूपमा प्रस्तुत भई कार्य गर्नुपर्ने उनले बताए । प्रहरी महानिरीक्षक कार्कीले कुनै पनि अवाञ्छित गतिविधिमा संलग्नलाई तत्काल कानुनी दायरामा ल्याउन प्रहरी कर्मचारीहरू थप क्रियाशील हुन निर्देशन दिए । साथै सम्पूर्ण प्रहरी कर्मचारीहरूले सामाजिक सञ्जालको प्रयोग एवं प्राप्त जिम्मेवारी निर्वाह गर्ने क्रममा समेत आफ्नो उच्च व्यावसायिकता प्रदर्शन गर्दै तटस्थ, इमानदार तथा प्रतिवद्ध भई कार्यसम्पादन गर्न उनले निर्देशन दिए । निर्वाचन प्रहरीप्रति सबै प्रहरी कर्मचारीहरूले अझ उत्कृष्ट आचरण एवं व्यवहार प्रस्तुत गर्नुपर्ने बताउँदै उनीहरूको उचित व्यवस्थापन तथा प्राप्त गर्ने सेवा सुविधामा कुनै पनि कमी/कमजोरी नहुने गरी कार्य गर्न समेत उनले आग्रह गरे । कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, वरिष्ठ प्रहरी अधिकृतहरू लगायतको उपस्थितिको साथै काठमाडौं उपत्यका प्रहरी कार्यालय, ७ वटै प्रदेश प्रहरी कार्यालयहरू, नेपाल प्रहरी प्रदेश कार्यालयहरू, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयहरू, प्रदेश प्रहरी तालिम केन्द्रहरू, नेपाल प्रहरी विशेष सुरक्षा गण तथा प्रदेश प्रहरी गणहरू, जिल्ला प्रहरी परिसरहरू र जिल्ला प्रहरी कार्यालयहरू, सबै जिल्ला प्रहरी कार्यालयसम्मका निर्वाचन सेलका प्रमुख तथा प्रतिनिधिहरू एवम् थप मद्दतका रूपमा खटिएका प्रहरी वरिष्ठ उपरीक्षक लगायत अन्य प्रहरी अधिकृतहरूको भर्चुअल उपस्थिति रहेको थियो ।
अछाम-१ मा नेकपाका भीम रावल अग्र स्थानमा, रास्वपा चौथो
काठमाडौं । प्रतिनिधिसभा निर्वाचनअन्तर्गत अछाम-१ मा जारी मतगणनाको प्रारम्भिक परिणामले नेकपाकालाई अग्रता दिलाएको छ । सार्वजनिक भएको प्रारम्भिक मतपरिणामअनुसार नेकपाका भीम रावलले ९५२ मत ल्याएका छन् । उनका निकटतम प्रतिद्वन्द्वी नेकपा एमालेका दिपक बहादुर साउदले ७१३ मत ल्याएका छन् भने नेपाली कांग्रेसका भरतकुमार स्वाँरले ७३२ मत ल्याएका छन् । यसैगरी रास्वपाका ओमप्रकाश रावलले १०७ मत ल्याएका छन् । मतगणना जारी छ ।
एक जितसहित रास्वपाको १०३ ठाउँमा अग्रता, दोस्रो स्थानमा भएको ठाउँमा पनि झिनो मतान्तर
काठमाडौं । प्रतिनिधि सभाका लागि प्रत्यक्षतर्फको निर्वाचनमा राष्ट्रिय स्वतन्त्र पार्टी (रास्वपा) एक जितसहित १०३ ठाउँमा अगाडि देखिएको छ । निर्वाचन आयोगका अनुसार रास्वपा देशका विभिन्न निर्वाचन क्षेत्रमा भइरहेको मतगणनामा १०३ ठाउँमा अगाडि देखिएको हो । त्यहाँ नेपाली कांग्रे, नेकपा एमाले र नेपाली कम्युनिष्ट पार्टी( नेकपा)ले पछ्याइरहेका छन् । पछिल्लो मतगणना अनुसार नेपाली कांग्रेस ११ ठाउँमा अगाडि देखिएको छ भने नेकपा नेकपा १० र नेकपा ९ ठाउँमा अगाडि छ । यी ठाउँमा पनि रास्वपा झिनो मतान्तरसहित दोस्रो स्थानमा प्रतिस्पर्धा गरिरहेको छ ।
बैतडीमा रास्वपाका हरिमोहन भण्डारी अग्रस्थानमा, दामोदर भण्डारी तेस्रो
काठमाडौं । प्रतिनिधिसभा निर्वाचनअन्तर्गत बैतडीमा जारी मतगणनाको प्रारम्भिक परिणामले राष्ट्रिय स्वतन्त्र पार्टी (रास्वपा) लाई अग्रता दिलाएको छ । सार्वजनिक भएको प्रारम्भिक मतपरिणामअनुसार रास्वपाका उम्मेदवार हरिमोहन भण्डारी ३६८ मतसहित पहिलो स्थानमा रहेका छन् । उनका निकटतम प्रतिद्वन्द्वी नेपाली कांग्रेसका चतुरबहादुर चन्द २५८ मतसहित दोस्रो स्थानमा छन् भने नेकपा एमालेका दामोदर भण्डारी १८७ मतसहित तेस्रो स्थानमा रहेका छन् । यस्तै, नेकपाका परमानन्द भट्टले ११४ मत प्राप्त गरेका छन् । राप्रपाका भुपेन चन्दले १० मत प्राप्त ल्याएका छन् । यसैगरी, नेपाल मजदुर किसान पार्टीका नवराज कोइरालाले २, श्रम संस्कृत पार्टीका गजेन्द्रराज पाण्डेयले १, नेकपा (माओवादी) का रामबहादुर कुँवरले ९, र स्वतन्त्र उम्मेदवार जयप्रकाश पन्तले १ मत ल्याएका छन् । अहिलेसम्म ७५ मत बदर भएका छन् । मतगणना जारी रहेकाले परिणाममा फेरबदल हुन सक्ने सम्भावना रहेको निर्वाचन अधिकृतको कार्यालयले जनाएको छ । बिहीबार सम्पन्न मतदानमा बैतडीमा कुल ७३ हजार १४८ मत खसेको थियो। प्रतिनिधिसभाका लागि एक मात्र निर्वाचन क्षेत्र रहेको बैतडीमा यसपटक ११ जना उम्मेदवार चुनावी मैदानमा छन् । प्रारम्भिक मतगणनाले जिल्लाको चुनावी प्रतिस्पर्धा निकै रोचक बन्दै गएको संकेत गरेको छ ।
धनुषा–३ मा रास्वपाका मनिष झा अग्रस्थानमा
जनकपुर । धनुषा प्रतिनिधिसभा निर्वाचन क्षेत्र नं ३ मा राष्ट्रिय स्वतन्त्र पार्टी (रास्वपा) का मनिष झाले अग्रता कायमै गरेका छन् । मुख्य निर्वाचन अधिकृतको कार्यालयका अनुसार हालसम्म ३२ हजार मतगणना हुँदा झाले १९ हजार ९९८ मत प्राप्त गरेका छन् । नेपाली कांग्रेसका बिमलेन्द्र निधिले नौ हजार ६४ मत ल्याएका छन् । त्यस्तै नेकपा (एमाले) का जुलिकुमारी महतोले दुई हजार ३९९ मत प्राप्त गरेकी छन् ।
गोरखा-२ मा कबिन्द्र बुर्लाकोटी अग्र स्थानमा, चक्रे मिलन ४ मतसहित चौथोमा
काठमाडौं । गोरखा २ मा प्रारम्भिक मत परिणामअनुसार राष्ट्रिय स्वतन्त्र पार्टी (रास्वपा) का कबिन्द्र बुर्लाकोटीले ७३ मतका साथ अग्रता लिएका छन् । उनका निकटतम प्रतिद्वन्द्वी नेपाली कम्युनिस्ट पार्टीका लेखनाथ न्यौपानेले १३ मत ल्याएका छन् भने नेपाली कांग्रेसका प्रकाशचन्द्र दवाडीले १० मत ल्याएका छन् । यस्तै, नेकपा एमाले चक्रे मिलन गुरुङले ४ मत मात्र प्राप्त गरेका छन् ।
पूर्वअर्थमन्त्री: रेड जोनमा पौडेल र महत, मतान्तर बढाउँदै वर्षमान र जनार्दन
काठमाडौं । प्रतिनिधिसभा सदस्य निर्वाचनमा चार पूर्वअर्थमन्त्री र एक पूर्वअर्थराज्यमन्त्री संघीय संसदमा पुग्न प्रतिस्पर्धामा रहेका छन् । प्रत्यक्षतर्फ उम्मेदवारी दिएका पूर्वअर्थमन्त्रीहरूमा विष्णुप्रसाद पौडेल, वर्षमान पुन, जनार्दन शर्मा, ज्ञानेन्द्रबहादुर कार्की र प्रकाशशरण महत रहेका छन् । त्यस्तै, पूर्वअर्थराज्यमन्त्री उदयशम्शेर जबरा पनि प्रत्यक्ष निर्वाचनबाट उम्मेदवार बनेका छन् । उनीहरू उम्मेदवार रहेका विभिन्न क्षेत्रमा मतगणना जारी छ । रुपन्देही-२ को पछिल्लो मतपरिणाम अनुसार राष्ट्रिय स्वतन्त्र पार्टीका सुलभ खरेल १८ हजार ५३९ मतसहित फराकिलो अग्रतामा रहेका छन् । नेकपा एमालेका उपाध्यक्षसमेत रहेका पूर्वअर्थमन्त्री विष्णुप्रसाद पौडेलले ३ हजार ९९६ मत प्राप्त गरेका छन् भने नेपाली कांग्रेसका चुन्नप्रसाद शर्मा पौडेलले २ हजार ४५० मत पाएका छन् । नेकपाका सुभाष पाण्डे (विश्वदीप)ले ४९८ मत र श्रम संस्कृति पार्टीका भीमबहादुर गौतमले ४४३ मत प्राप्त गरेका छन् । रुकुम पश्चिममा प्रगतिशील लोकतान्त्रिक पार्टीका उम्मेदवार जनार्दन शर्मा १ हजार १७२ मतसहित अग्रस्थानमा छन् । नेपाल कम्युनिस्ट पार्टीका गोपाल शर्माले ८६४ मत र नेपाली कांग्रेसका राजु केसीले ५१३ मत प्राप्त गरेका छन् । रोल्पाको पछिल्लो मतपरिणाम अनुसार नेपाली कम्युनिष्ट पार्टी (नेकपा) का उम्मेदवार वर्षमान पुन १ हजार ४२१ मतसहित अग्रतामा छन् । नेपाल कम्युनिस्ट पार्टी (माओवादी) का चुडामणी वलीले ५५७ मत, नेकपा एमालेका गोकुल प्रसाद घर्तीले २११ मत, नेपाली कांग्रेसका सुदन कुमार वलीले १५६ मत, राष्ट्रिय स्वतन्त्र पार्टीका बलराम थापाले ७७ मत र मंगोल नेशनल अर्गनाइजेशनका कुमार घर्ती मगरले ४१ मत प्राप्त गरेका छन् । नुवाकोट-१ मा राष्ट्रिय स्वतन्त्र पार्टीका विक्रम तिमिल्सिना ५७९ मतसहित अग्रस्थानमा छन् । नेकपा (एमाले) का बद्री मैनालीले ५१५ मत प्राप्त गरेका छन् भने नेपाली कांग्रेसका प्रकाश शरण महतले ३७९ मत पाएका छन् । नेपाल कम्युनिस्ट पार्टीका हितबहादुर तामाङले ३३८ मत प्राप्त गरेका छन् । यता पूर्वअर्थमन्त्री ज्ञानेन्द्रबहादुर कार्की उम्मेदवार रहेको सुनसरी-४ मा भने मतगणना सुरु हुन बाँकी रहेको जनाइएको छ । यसैबीच ललितपुर-१ मा नेपाली कांग्रेसका उम्मेदवार उदयशम्शेर जबराले अग्रता लिएका छन् । पछिल्लो मतपरिणाम अनुसार उनले ५ हजार ४ मत प्राप्त गरेका छन् भने राष्ट्रिय स्वतन्त्र पार्टीका बुद्धरत्न महर्जनले ३ हजार २४३ मत ल्याएर उनलाई पछ्याइरहेका छन् । यस्तै, नेकपा एमालेका चेतनाथ सञ्जेलले २ हजार ९२२ मत, उज्यालो नेपाल पार्टीका पदम कुमार लामाले ७९२ मत ल्याएका छन् ।
