एसबिआई बैंकले तोक्यो बुक क्लोजको मिति, २४अाैँ वार्षिक साधारणसभामा जाँदै
काठमाडौं । नेपाल एसबिआई बैंकले यही मंसिर २९ गतेदेखि आगामी पुस १९ गतेसम्म कम्पनीको बुक क्लोजको मिति तोकेको छ । बैंकले साधारणसभा प्रयोजनमा जानको लागि उक्त २० दिन कम्पनीको बुक क्लोज गर्ने निर्णय गरेको छ । कम्पनीको आगामी २४अाैँ वार्षिक साधारणसभा पुस १९ गते हुँदै छ ।
श्री इन्भेष्टमेन्ट एण्ड फाइनान्स कम्पनीको सीईओमा लिलामनी न्यौपाने नियुक्त
काठमाडौं । श्री इन्भेष्टमेन्ट एण्ड फाइनान्स कम्पनीको प्रमुख कार्यकारी अधिकृत (सीईओ)मा लिलामनी न्यौपाने नियुक्त भएका छन् । कम्पनीले उनलाई आगामी ४ वर्षको लागि नियुक्त गरेको हो । न्यौपाने यसअघि सोही फाइनान्स कम्पनीमा महाप्रबन्धक पदमा कार्यरत थिए । ३४ करोड चुक्ता पुँजी रहेको यस फाइनान्सले असोज मसान्तसम्ममा ३ अर्ब ३६ करोड निक्षेप र २ अर्ब ८० करोड रुपैयाँ कर्जा परिचालन गरेको छ ।
इक्रा नेपालको प्रमुख कार्यकारी अधिकृतमा तुलसीराम गौतम नियुक्त
काठमाडौं । इक्रा नेपाल लिमिटेडको प्रमुख कार्यकारी अधिकृतमा तुलसीराम गौतम नियुक्त भएका छन् । गौतमले गत मंगलबारदेखि नै सो कम्पनीको व्यवस्थापकीय नेतृत्व समालेका छन् । गौतम यसअघि माछापुच्छे बैंकको प्रमुख कार्यकारी अधिकृत थिए । करिब ३० वर्ष बैकिङ क्षेत्रमा बिताएका गौतमसँग जोखिम विश्लेषण र कर्जा लगानीमा राम्रो दख्खल छ । इक्रा नेपालले नेपाली कम्पनीहरुको क्रेडिट रेटिङ गर्दै आएको छ । पछिल्लो समय पब्लिक कम्पनीहरुले साधारण सेयर तथा हकप्रद सेयर निष्काशन गर्दा, एफपीओ जारी गर्दा, ऋणपत्र जारी गर्दा वा म्यूच्यल फण्ड जारी गर्दा सम्बन्धित कम्पनीले अनिवार्य क्रेडिट रेटिङ गर्नु पर्ने नीतिगत व्यवस्था भएकाले यस कम्पनीको भूमिका निकै महत्वपूर्ण रहेको छ । २०१२ देखि सञ्चालनमा आएको इक्रा नेपालको मुख्य लगानीकर्ता भारतको इक्रा कम्पनी हो । हाल क्रेडिट रेटिङ गर्ने इक्रा नेपाल एउटा मात्र कम्पनी हो भने निकट भविष्यमा नयाँ कम्पनी खुल्दैछ ।
