मंसिर ७ देखि माउन्ट मकालु डेभलपमेन्ट बैंकको हकप्रद सेयर आउने
काठमाडौं । पुँजी बढाउन माउन्ट मकालु डेभलपमेन्ट बैंकले हकप्रद सेयर निष्कासन गर्ने भएको छ । बैंकले मंसिर ७ गतेदेखि ३ करोड ४५ लाख ८० हजार रुपैयाँ बराबरको ३ लाख ४५ हजार ८ सय कित्ता हकप्रद सेयर निष्कासन गर्न लागेको हो । हकप्रद निष्कासनपछि बैंकको चुक्तापुँजी १० करोड ३७ लाख रुपैयाँ पुग्ने बैंकले जनाएको छ । हाल बैंकको पुँजी ६ करोड ९१ लाख ६० हजार रुपैयाँ छ ।
राष्ट्रिय वाणिज्यकाे बढ्दा कृषि विकास बैंकको नाफा ह्वातै घट्यो
काठमाडौं । राष्ट्रिय वाणिज्य बैंकको नाफा बढ्दा सरकार स्वामित्वको कृषि विकास बैंकको खुदनाफा ह्वातै घटेको छ ।चालु आर्थिक वर्षको पहिलो त्रैमाशमा बैंकको खुदनाफा ६ करोड रुपैयाँ घटेर ३६ करोड ३९ लाख रुपैयाँमा सीमित भएको छ । गत आवको सोही अवधिमा बैंकले ४२ करोड २३ लाख रुपैयाँ खुदनाफा गरेको थियो । गत असारको तुलनामा असोजसम्म बैंकको प्रतिसेयर आम्दानी (ईपीएस) ह्वातै घटेर १५ रुपैयाँ ९४ पैसामा सीमित भएको छ । गत असारमा बैंकको ईपीएस ३४ रुपैयाँ ५८ पैसा थियो । चालु आवमा बैंकको निष्क्रिय कर्जा पनि बढेर ३.५४ प्रतिशत पुगेको छ । गत आवमा यस्तो कर्जा अनुपात २.९७ प्रतिशत थियो । बैंकको पुँजीगत लागत बढेर ७.२ प्रतिशत पुगेको छ । गत असारमा ५.७४ प्रतिशत थियो । कर्जा निक्षेप अनुपात ७७.३४, आधार ब्याज दर ११.९७ औसत ब्याज अन्तर ४.६५ प्रतिशत रहेको छ । संस्थागत निक्षेप बाहिरिएपछि बैंकको निक्षेप परिचालन घटेर ९९ अर्ब ३० करोड रुपैयाँमा सीमित भएको छ । गत असारमा बैंकको निक्षेप ९९ अर्ब ९५ करोड रुपैयाँ थियो । कर्जा लगानी पनि घटेर ८८ अर्ब २० करोड रुपैयाँमा सीमित भएको छ । गत असारमा यस्तो लगानी ८८ अर्ब २९ करोड रुपैयाँ थियो । जगेडा कोष बढेर १० अर्ब २३ करोड रुपैयाँ पुगेको बैंकले जनाएको छ ।
नेपाल बंगलादेश बैंकको नाफा ७ करोड र ईपीएस २० रुपैयाँ घट्यो
काठमाडौं । चालु आर्थिक वर्षको ३ महिनामा नेपाल बंगलादेश बैंकको नाफा ७ करोड रुपैयाँ घटेको छ । चालु आर्थिक वर्षको पहिलो त्रैमाशमा बैंकले १५ करोड ४० लाख रुपैयाँ मात्र खुदनाफा गरेको छ । अघिल्लो वर्षको सोही अवधिमा बैंकले २२ करोड ५० लाख रुपैयाँ खुदनाफा गरेको थियो । बैंकले सोमबार सार्वजनिक गरेको चालु आवको पहिलो त्रैमाशिक वित्तीय विवरणमा वित्तीय अवस्था सन्तोषजनक देखिएको छैन् । नाफा घटेर पु्ँजी बढेपछि प्रतिसेयर आम्दानी (ईपीएस) २० रुपैयाँ घटेर ८ रुपैयाँमा सीमित भएको छ । गत असारमा बैंकको ईपीएस २८ रुपैयाँ थियो । समीक्षा अवधिमा बैंकको खराब कर्जा ०.७३ प्रतिशत मात्र छ । बैंकको पुँजीगत लागत बढेर ७.९६, कर्जा निक्षेप ब्याज अन्तर ७४, आधार दर ११.३९ र कर्जा र निक्षेपबीचको ब्याजदर अन्तर ३.४० प्रतिशत रहेको बैंकले जनाएको छ । गत असारको तुलनामा बैंकको निक्षेप परिचालन घटेर ४२ अर्ब २२ करोड रुपैयाँमा सीमित भएको छ । गत असारमा निक्षेप ४३ अर्ब ३७ करोड रुपैयाँ थियो । यस्तै कर्जा लगानी सामान्य बढेर ३८ अर्ब ७१ करोड रुपैयाँ पुगेको छ । असारमा कर्जा ३७ अर्ब ४६ करोड रुपैयाँ थियो । बैंकको संचित कोषमा २ अर्ब ५० करोड रुपैयाँ छ । चुक्तापुजी ८ अर्ब ८ करोड रुपैयाँ छ ।
