नेको इन्स्योरेन्सले सेयरधनीलाई १२ प्रतिशत बोनश सेयर दिने
काठमाडौँ । नेको इन्स्योरेन्स लिमिटेडले सेयरधनीहरुलाई १२ प्रतिशत बोनश सेयर दिने भएको छ । कम्पनी सञ्चालक समितिको मंगलबार बसेको बैठकले आर्थिक वर्ष २०७४/०७५ को नाफाबाट १४ करोड ११ लाख ५३ हजार ४०८ रुपैयाँ बराबरको अर्थात १२ प्रतिशत बोनश सेयर र कर प्रयोजनको लागि ०.६३ प्रतिशत नगद लाभांश प्रस्ताव गर्ने निर्णय गरेको हो । कम्पनी सञ्चालक समितिको प्रस्ताव बीमा समितिको स्वीकृति र आगामी साधारण सभाबाट पारित भएपछि बोनश सेयर वितरण गरिने कम्पनी सचिव विष्णुप्रसाद धितालले जनाएका छन् ।
आरएमडीसीले दियो ३२ वटा सहकारीलाई आन्तरिक लेखा परीक्षण तालिम
काठमाडौँ । आरएमडीसी लघुबित्त बित्तीय संस्था लि. शाखा कार्यालय, इटहरीको आयोजनामा आन्तरिक लेखा परीक्षण सम्बन्धी २ दिवसीय तालिम गोकर्ण रिसोर्ट सुन्दरहरैँचा, मोरङ्गमा सम्पन्न भएको छ । उक्त तालिम असार १६ र १७ गते सम्पन्न भएको हो । तालिममा आरएमडीसीे इटहरी शाखाको कार्यक्षेत्र भित्र रहेका ३२ वटा सहकारी संस्थाहरुका लेखा समितिका पदाधिकारी तथा सञ्चालक समितिका ३२ जना प्रतिनिधिहरुकोे सहभागिता रहेको थियो । उक्त तालिम कार्यक्रमको संचालन तथा संयोजकत्व आरएमडीसी ईटहरीका शाखा प्रबन्धक गोविन्दप्रसाद पौडेलले गरेका थिए । तालिमको उद्घाटन सत्रको क्रममा तालिमका संयोजक पौडेलले तालिमको उद्देश्य तथा महत्वबारे प्रष्ट पार्दै सहभागीहरुलाई कार्यक्रममा स्वागत गरेका थिए । उक्त तालिम कार्यक्रमको सहजकर्ताको भूमिका प्रबन्धक बासुदेब लामिछानेले निर्वाह गरेका थिए ।
हिमाल दोलखाकोे आइपीओ असार २५ गतेदेखि, १ लाख कित्तासम्म भर्न पाइने
काठमाडौँ । हिमाल दोलखा हाइड्रोपावर कम्पनी लिमिटेडको साधारण सेयर(आइपीओ) असार २५ गतेदेखि खुल्ने भएको छ । हिमाल दोलखाको ७६ लाख ७२ हजार २ सय १० कित्ता सेयर खुल्न लागेको हो । जसमध्ये ७४ लाख ९३ हजार ७ सय ६६ कित्ता सर्वसाधारणलाई, १ लाख ५३ हजार ४ सय ४४ कित्ता कम्पनीका कर्मचारीलाई र २५ हजार कित्ता सामुहिक लगानी कोषलाई दिइने छ । उक्त सेयरका लागि न्यूनतम १० कित्तादेखि १ लाख कित्तासम्म आवेदन दिन सकिने छ । असार २५ गतेदेखि खुल्ने सेयर छिटोमा असार २९ गते र ढिलोमा साउन २४ गते बन्द हुने धितोपत्र निष्काशन तथा बिक्री प्रबन्धक ग्लोबल आइएमई क्यापिटल लिमिटेडले जनाएको छ । यस कम्पनीको जलविद्युत उत्पादन केन्द्रहरु इलाम जिल्लाको इलाम नगरपालिका वडा नम्बर ९ र १० तथा माइ नगरपालिका वडा नम्बर ९ मा रहेको छ ।
