प्राविधिक सीप सिकेर शुरु गरेको व्यवसायले बिर्साइदियो इराकको मासिक १ लाख कमाइ
गलेश्वर । वैदेशिक रोजगारीका लागि सात वर्षअघि इराक गएका म्याग्दीको बेनी नगरपालिका–१ रत्नेचौर हुलाकेका नरबहादुर थापाको कमाइ राम्रै थियो । मासिक एक लाख रुपैयाँसम्म कमाइ भए पनि थापाको मन परदेशको प्रचण्ड गर्मीमा रमाउन भने सकेको थिएन । उनले सोचे, “यत्तिको दुःख आफ्नै देशको माटोमा गर्ने हो भने त कसो उभो नलागिएला र ?” त्यसपछि उनी आफ्नै देशमा फर्किए । देशमा फर्किएपछि के गर्ने भन्ने बारेमा उनलाई हुट्हुटी लाग्न थाल्यो । तर उनीसँग आफ्नै माटोका लागि उपयोगि हुने सीप थिएन । कुनै प्राविधिक ज्ञान पनि थिएन । प्राविधिक सीप सिक्नका लागि उनी लागे मुस्ताङको लेते स्थित धौलागिरि प्राविधिक शिक्षालयतर्फ । शिक्षालयमा १८ महिना पशु स्वास्थ्य प्राविधिक विषयमा अध्ययन गररे प्राविधिक ज्ञान हासिल गरेपछि थापाले गाउँ फर्केर व्यवस्थित रुपले शुरु गरेको व्यवसायिक बाख्रा पालनले अहिले उनलाई फलिफाप भएको छ । थापाले निसान बोयर बाख्रा फार्म दर्ता गरेर व्यावसायिक रुपमा उन्नत बोयर जातको बाख्रापालन शुरु गरेपछि अहिले उनको जीवनमा इराकको मरुभूमिलाई बिर्साइदिने गरी हरियाली छाएको छ । चार वर्ष अघिदेखि हुलाकेमा बोयर बाख्रा पाल्न शुरु गरेका थापा अहिले बोयर बाख्रा र बोकाको माग बढेपछि उत्साहित बनेका छन् । तनहुँ र धार्केबाट ल्याएका पाँच माउ र एक बोकाबाट थापाले स्थानीय खरी जातका बाख्रालाई क्रस बनाएर पालेका छन् । छिटो बढ्ने र धेरै तौल हुने बोयर बाख्रापालनप्रति कृषकको आकर्षणसँगै बोका र पाठापाठीको माग बढेको थापाको भनाइ छ । शान्त स्वभावका हुने भएकाले बोयर बाख्रा पाल्न सजिलो मानिन्छ । करिब रु १० लाख लगानीमा स्थापना भएको फार्ममा हाल ३५ बाख्रा र बोका छन् । फार्ममा माउ बाख्राको सङ्ख्या बढाएर ५० वटा पु¥याउने थापाको योजना छ । पाँच महिना पालेका बोयर क्रस बोका र बाख्रालाई २० हजारभन्दा बढी मूल्य लिन सकिने थापाले बताए । गत वर्ष करिब २० वटा बोका र बाख्रा बिक्री गरेर करिब १० लाख आम्दानी गरेको उनको भनाइ थियो । आधुनिक किसिमको खोर बनाएका थापाले २० रोपनी जग्गामा बहुवर्षे तथा डालेघाँस खेती पनि गरेका छन् । फार्मलाई खसीबाख्रा र बोका सङ्कलन केन्द्रको रुपमा विकास गराउन भेटेरेनरी अस्पताल तथा पशु सेवा विज्ञ केन्द्रले रु चार लाख अनुदान दिएको उनको भनाइ छ । कृषकहरुले उत्पादन गरेका खसी, बोका सङ्कलन गरेर फार्ममा ल्याउने र मागअनुसार बजार तथा कृषककहाँ पु¥याउने तयारी गरेको थापाले बताए । खसी बोका बिक्री गरेर वार्षिक रु १० देखि १५ लाखसम्म कमाउन थापा सफल भएका छन् । उनी भन्छन्, “सकेसम्म खाडी मुलुक जाने नै होइन, त्यहाँ गर्ने परिश्रम आफ्नै माटोमा गर्न सक्ने हो भने १० गुणा बढी यही कमाउन सकिन्छ ।” अहिले कोरोना सङ्कटले विदेशिन तम्तयार युवालाई अवसरको वातावरण मिलाइदिएको थापाको बुझाइ छ । थापा भन्छन्, “कोरोना कहर शुरु भएपछि युवा विदेश जान सकेका छैनन्, उनीहरुले गाउँमा नै पशुपालन, तरकारी खेती, फलफूल र कुखुरापालन शुरु गरेका छन् । यो युवा पुस्ताका लागि एउटा अवसर पनि हो । रासस
प्रतिस्पर्धी कम्पनीलाई टक्कर दिन शिवम् शिमेन्टले भित्र्यायाे विदेशी सीईओ, टाटा र विर्ला ग्रुपमा काम गरेकाे अनुभव
काठमाडौं । शिवम् शिमेन्ट लिमिटेडको प्रमुख कार्यकारी अधिकृत (सीईओ)मा देवेन्द्र सिन्हा नियुक्त भएका छन् । कम्पनीको सञ्चालक समितिले भदौ ३१ गतेदेखि लागू हुने गरी उनलाई नियुक्त गरेको हो । उनी भारतीय नागरिक हुन् । कम्पनीले श्रम तथा व्यवसाय जन्य सुरक्षा विभागको स्वीकृति लिएर उनलाई नियुक्त गरिएको जनाएको छ । प्रमुख कार्यकारी अधिकृतको दरखास्त माग गर्दै पत्रपत्रिकामा सूचना प्रकाशित गरेको तर कम्पनीले चाहे जस्ताे व्यक्तिबाट आवदेन नपरेपछि विदेशी नागरिकलाई प्रमुख कार्यकारी अधिकृत नियुक्त गरिएको कम्पनीका अध्यक्ष सुरेन्द्र कुमार गोयलले बताए । सिमेन्ट उद्योगमा तीन दशक लामो काम गरेको, कम्पनीको वित्त व्यवस्थापन, गुणस्तर र प्रविधि सबै पक्षमा राम्रो ज्ञान र अनुभव भएका व्यक्ति प्रमुख कार्यकारी अधिकृतमा नियुक्त गरिएको उनले विकासन्युजसँग बताए । ‘उहाँको नेतृत्वमा कम्पनीको व्यवसाय हिजो भन्दा राम्रो हुनेछ । कम्पनीले पहिला भन्दा बढी नाफा गर्नेछ । कम्पनीको ब्राण्ड इमेज माथि जानेछ’ उनीबाट कम्पनीले गरेको अपेक्षाबारे गोयलले बताए । शिमेन्ट बजारमा चर्को प्रतिस्पर्धा रहेको र कोभिड महामारी पछिको चुनौति पार लगाउँदै कम्पनीलाई अगाडि बढाउन अनुभवी व्यक्तिलाई प्रमुख कार्यकारी अधिकृतको जिम्मेवारी दिएको गोयलको भनाई छ । नयाँ सीईओ विजनेश एडमिनिस्ट्रेशन र टोटल क्वालिटी म्यानेजमेन्ट विषयमा मास्टर डिग्री गरेका छन् भने साइन्स र टेक्नोलोजि विषयमा डिप्लोमा गरेका छन् । उनी सन् २०१७ पछि जिंदल पैंन्थर सिमेन्टको प्रमुख कार्यकारी अधिकृत थिए । त्यसअघि उनी टाटा कन्सल्टिङ इन्जिनियर्स कम्पनीमा सिनियर जनरल म्यानेजरको रुपमा ११ वर्ष काम गरेका थिए । त्यस्तै उनले भारत कै इरकम कन्सल्टिङ इन्जियर प्रालिमा दुई वर्ष जनरल म्यानेजर थिए भने त्यसअघि विर्ला कर्पोरेशनमा २१ वर्ष काम गरेका थिए । शिवम् सिमेन्ट कम्पनी नेपाली बजारमा नेतृत्वदायी कम्पनी भएको र यस कम्पनीप्रति सर्वसाधारण लगानीकर्ताको पनि अपेक्षा धेरै भएकोले लगानीकर्तालाई आकर्षक प्रतिफल दिन चाहेको अध्यक्ष गाेयलले बताए । ४ अर्ब ४० करोड चुक्ता पुँजी भएको यस कम्पनीले गत वर्ष सर्वसाधारणमा सेयर निष्काशन गरेको थियो । यसको सेयर मूल्य प्रतिकित्ता ७३८ रुपैयाँमा कारोबार भएको छ ।
शिवम् सिमेन्ट्सको सीईओमा भारतीय नागरिक सिन्हा नियुक्त
काठमाडौं । शिवम् सिमेन्ट्सको प्रमुख कार्यकारी अधिकृत(सीईओ)मा देवेन्द्र सिन्हा नियुक्त भएका छन् । भदौ ३१ गते बसेको कम्पनी सञ्चालक समितिको बैठकले सीईओ पदमा सिन्हालाई नियुक्त गर्ने निर्णय गरेको हो । समितिले नेपाल सरकार श्रम तथा व्यवसायजन्य सुरक्षा विभागको स्वीकृतिमा भारतीय नागरिक देवेन्द्र सिन्हालाई सीईओको कार्यभार सम्हाल्ने जिम्मेवारी दिएको हो । यससँगै उनले आफ्नो कार्यकालसम्म शिवम् सिमेन्ट्सको सीईओ पदको कार्यभार सम्हाल्ने छन् ।
