कतार एयरवेजद्वारा निस उडान आरम्भ, भोलीदेखि सञ्चालनमा ल्याउने
कतार । कतार एयरवेजले निसलाई विश्वसँग जोड्ने उद्देश्यका साथ सन् २०१७ जुलाइ ४ का दिन (भाेली)देखि नयाँ सेवा सञ्चालनमा ल्याउने भएको छ । ४ सय भन्दा बढी बहुराष्ट्रिय कम्पनीको साझा थलो ‘हब’का रुपमा रहेको निसबाट बृहत्तर सञ्जाल सहितको एयरवेजले बिजनेश तथा लिजर यात्रुलाई नन्स्टप हवाइ सेवा प्रदान गर्ने जनाएको छ । फ्रान्सको निस प्राचिन समुद्री तट तथा फ्रेन्च रिभेराको असिमित सौन्दर्यका लागि पनि परिचित छ । कतार एयरवेजले एक विज्ञप्ति जारी गर्दै यसै हप्तादेखि आफ्नो निस उडान सञ्चालनमा ल्याउने जानकारी दिएको छ । कम्पनीका अनुसार यसै संग निसका वासिन्दाले कतार एयरवेजको चर्चित अन–बोर्ड सेवा तथा ३ हजार ओटा भिन्न मनोरञ्जनका विकल्प उपलब्ध गराउने ओरिक्स वान इन्टरटेनमेण्ट प्रणालीको मज्जा लिन सक्ने जनाएको छ । कम्पनीले नेपालमा पनि आफ्नो उपस्थिती जनाइ सकेको छ । सार्वजनिक नयाँ उडान तालिकाको हर्ष बढाईका लागि कतार एयरवेज नेपालद्वारा आयोजित कार्यक्रममा फ्रेन्च एम्बेसी र कतार एम्बेसीका प्रतिनीधिहरुको उपस्थिती रहेको थियो । नयाँ उडान तालिका सञ्चालनको खुशी आदान प्रदान गर्न आयोजित कार्यक्रममा कतारका राजदूत योसुफ बिन मोहम्मद अल हायल, फ्रान्सेली राजदूत यभ्स कारमोना र कतार एयरवेजका कन्ट्री म्यानेजर जयप्रकाश नयरको उपस्थिती रहेको थियो । यभ्स कारमोनाले नयाँ सफलताको खुशीयाली साट्दै कतार एयरवेजलाई निसमा स्वागत गर्न आफू आतुर रहेको बताए । कार्यक्रममा बोल्दै नयाँ उत्कृष्ट गन्तब्यको आरम्भले नेपालमा समेत फ्रान्सेली पर्यटकको आगमनलाई बढावा दिन तेवा पुग्ने बताउँदै कन्ट्री म्यानेजर नायरलेपनि खुसी ब्यक्त गरेका थिए । निसमा आरम्भ गरिएको नयाँ सेवाले निसलाई मिडल इष्ट, एसिया र अष्ट्रेलिया जोड्दै सिड्नी, हङकङ, मेलबर्न लगायत अन्य आकर्षक गन्तब्य सम्म सहज पहुँच बनाउन सघाउने छ । निस उडान पश्चात कतार एयरवेजले सन् २०१७ र २०१८मा अबिड्जान, आयभर कोष्ट, आक्रा, घाना, क्यानबेरा, अष्ट्रेलिया, च्याङ मेइ, थाइल्याण्ड, चिट्टागोङ, बङ्लादेश, मोम्बासा, केन्या र थाइल्याण्डको उट्पाओमा पनि आफ्नो सेवा सञ्चालनमा ल्याउने योजना बनाएको विज्ञप्ति मार्फत जानकारी दिइएको छ ।
एनसेलले ल्यायो ‘म्याजिक भ्वाइस’ सेवा, मात्र २ रुपैयाँमा सुचारु गर्न सकिने
काठमाडौं । एनसेल प्राइभेट लिमिटेडले आफ्ना ग्राहकका लागि ‘म्याजिक भ्वाइस’ सेवा ल्याएको छ, जस अन्तर्गत एनसेलका सबै ग्राहकले आफ्ना साथीभाई तथा परिवारसँग आफ्नो मोबाइलमा कुरा गर्दा आफ्नो आवाज र ब्याकग्राउण्ड साउण्ड परिवर्तन गरी मोबाइलमा कुरा गर्न सक्नेछन् । एनसेलका सबै प्रिपेड तथा पोस्टपेड ग्राहकले एक नयाँ रोचक भ्यालु एडेड सर्भिसको मजा लिन सक्नेछन् । यो सेवा सुचारु गरे लगतै एनसेलका ग्राहकले आफ्नो आवाज परिवर्तन गरि कार्टुन क्यारेक्टर, महिला अथवा अन्य कुनै क्यारेक्टरको जस्तो आवाजमा कुरा गर्न सक्नेछन् । यसका साथ-साथै ग्राहकले कुरा गर्दा ट्राफिक जाम, एयरपोर्ट, फुटबल स्टेडिएम, बर्थडे टोन लगायतका विभिन्न ब्याकग्राउण्ड साउण्ड आफ्नो मोबाइलमा राख्न पनि सक्नेछन् । यो सेवा आईभिआरमा आधारित सेवा भएकोले कुनै पनि मोबाइल सेट प्रयोग गर्नुहुने एनसेल प्रयोगकर्ताले यो सेवा सजिलै प्रयोग गर्न सक्नेछन् । म्याजिक भ्वाइस सेवा सोमबार (असार १९) बाट लागु भएको छ । एनसेलका ग्राहकले दैनिक वा साप्ताहिक रुपमा यो सेवा एक पटक अथवा स्वतः नविकरण हुने गरी सुचारु गर्न सक्नेछन् । एनसेलका ग्राहकले कर सहित मात्र रु २ मा दैनिक म्याजिक भ्वाइस सेवा सुचारु गर्न सक्नेछन् भने साप्ताहिक रुपमा यो सेवा सुचारु गर्न कर सहित मात्र रु १० लाग्नेछ । मनोरञ्जनले भरिपुर्ण यो सेवा सुचारु गर्न चाहने ग्राहकले एस्ट्रिक्स१७१३५ह्यास डायल गरी अथवा १७१३५ डायल गरि यो सेवा निःशुल्क सुचारु गर्न सक्नेछन् । ग्राहकले एसएमएस मार्फत पनि यो सेवा सुचारु गर्न सक्नेछन् । दैनिक सेवा सुचारु गर्नका लागि अङ्ग्रेजी ठूलो अक्षरमा ‘एमभि१’ र स्वतः नविकरण हुने दैनिक सेवाको लागि अङग्रेजी ठूलो अक्षरमा ‘एमभि’ लेखि १७१३५ मा एसएमएस पठाउनु पर्नेछ । त्यस्तै स्वतः नविकरण हुने साप्ताहिक सेवाको लागि अङग्रेजी ठूलो अक्षरमा ‘७एमभि’ र साप्ताहिक सेवा सुचारु गर्नका लागि अङ्ग्रेजी ठूलो अक्षरमा ‘७एमभि१’ टाइप गरी १७१३५ मा एसएमएस पठाउनु पर्नेछ । सेवा सुचारु गरेपछि एनसेलका ग्राहकले १७१३५ डायल गरि आफुले कुरा गर्न खोजेको नम्बर डायल गरी निर्देशन अनुसार १, २ वा ३ प्रेस गरी कुनै पनि आवाज छान्न सक्नेछन् भने ४, ५, ६ वा ७ प्रेस गरी आफुले चाहेको ब्याकग्राउण्ड साउण्ड छनोट गरी सेवाको मजा लिन सक्नेछन् । यो सेवा अन्तर्गतको म्याजिक भ्वाइस तथा ब्याकग्राउण्ड साउण्डमा कुरा गरीरहेको बेलामा डायल प्याडबाट ‘०’ पे्रस गरी प्रयोगकर्ताहरु आफ्नै आवाजमा फर्कन सक्छन् । म्याजिक भ्वाइसबाट कुरा गर्दा भ्वाइस सेवा अन्तर्गतको विद्यमान् शुल्क लाग्ने छ । ‘‘यो रोचक सेवा ग्राहकमाझ ल्याउन पाउँदा हामी निकै हर्षित छौ । हामीलाई विश्वास छ यसले ग्राहकलाई थप मुल्य प्रदान गर्ने छ र सेवा प्रयोगको अनुभव अभिवृद्घिमा योगदान गर्नेछ । साथै यो सेवामा हामी मासिक रुपमा थप विभिन्न क्यारेक्टरहरुको आवाज र ब्याकग्राउण्ड साउण्डहरु थप्दै लग्ने छौ,’’ एनसेलका कर्पोरेट संवाद विज्ञ मिलन शर्माले भने । यो सेवा सुचारु गर्नुहुने ग्राहकले सेवा निष्कृय गर्न अङ्ग्रेजीमा ‘युएनएसयुबि एमभि’ (सुरुको यु र एमभि ठूलो अक्षरमा) लेखि १७१३५ मा एसएमएस पठाउन सक्नेछन् ।
अण्डा रहित पाउरोटी नेपाली बजारमा
चितवन । चितवनको सनातन स्विट्स एण्ड बेकर्सले शुद्ध शाकाहारी पारखीहरुलाई लक्षित गरेर अण्डारहित पाउरोटी (एगलेस मिल्क ब्रेड) बजारमा ल्याएको छ । सनातन हस्पिटालिटी म्यानेजमेन्ट प्रा.लि.द्धारा संचालित उक्त बेकर्सले शुद्ध शाकाहारी पारखीहरुलाई लक्षित गरेर आइतबारदेखि अण्डारहित पाउरोटी बजारमा ल्याएको हो । सनातन स्विट्स एण्ड बेकर्सका अध्यक्ष मनिष सापकोटाले सोमबार एक कार्यक्रमका बिच दैनिक उपभोग्य वस्तुको रुपमा रहेको पाउरोटी आममानिस समक्ष पुर्याउन र सनातनसंगको सामिप्यता जोड्ने पुलको रुपमा रहेको बताए । भारतबाट ल्याइएको अत्याधुनिक प्रविधिबाट उत्पादित सनातन पाउरोटी गुणस्तरमा कुनै कमी नरहेको बताउँदै सापकोटाले पाउरोटीमा अण्डा मिसाईएको भनेर धेरैले पाउरोटी उपभोग गर्न छाडेकाले त्यस्तो व्यक्तिहरुलाई सनातन संग जोड्न पाउरोटी उपयुक्त हुने बिश्वास समेत ब्यक्त गरे । गतवर्षको माघ महिनाबाट संचालनमा आएको सनातन स्विट्स एण्ड बेकर्स छोटो समयमै ग्राहकले मन जित्न सफल भएका छन् । सनातन स्विट्स एण्ड बेकर्सले हाल चिनीरहित मिठाई, विस्कुट समेत उत्पादन गर्दै आईरहेको छ । ग्राहकले उक्त पाउरोटी खुद्रा मूल्य २५ रुपैयाँमा किन्न सकिने गरि बजारमा ल्याईएको हो ।
सिभिल बैंक, हामा मर्चेन्ट र यूनिक फाईनान्सबीच एकिकृत कारोबार शुरु
काठमाडौं । सिभिल बैंक लिमिटेडले हामा मर्चेन्ट एण्ड फाईनान्स लिमिटेड र युनिक फाईनान्स लिमिटेडलाई प्राप्त गरी एकीकृत कारोबार शुरु गरेको छ । उक्त एकिकृत कारोबारको उद्घाटन आइतबार एक कार्यक्रमबीच नेपाल राष्ट्र बैंकका गभर्नर डा. चिरन्जीबी नेपालले गरेका छन् । दुई बैंक प्राप्ती पश्चात सिभिल बैंककोे चुक्ता पूँजी ५ अर्ब १८ करोड रुपैयाँ पुगेको छ । साथै, बैंककोे निक्षेप ३४ अर्ब ९७ करोड रुपैयाँ र कुल कर्जा ३१ अर्ब २२ करोड रुपैयाँ रहेको छ । छैठौं वार्षिक साधारणसभाले निर्णय गरे बमोजिम ४० प्रतिशत हकप्रद शेयर निकट भविष्यमा निष्काशन गरी नेपाल राष्ट्र बैंकले तोकेकोे चुक्ता पुँजी ८ अर्ब रुपैयाँ पुर्याउने बैंकले जनाएको छ । यस प्राप्तीबाट बैंकको व्यवसाय गर्ने क्षमता वृद्धि भई केहि ठूला परियोजनाहरु लगायत उद्योग व्यवसायमा थप लगानी गर्न सहज हुने बैंकका का.मु. प्रमुख कार्यकारी अधिकृत गोबिन्द गुरुङ्गले बताए ।
के तपाई गेष्ट हाउस वा क्याफे चलाउँदै हुनुहुन्छ ? जुनसुकै बेला भ्याटले समाउन सक्छ
काठमाडौं । अब गेष्ट हाउस र क्याफेहरु पनि भ्याटमा दर्ता हुनुपर्ने भएको छ । यस अघि होटल र रेष्टुरेण्ट मात्रै भ्याटमा दर्ता हुुुँदै आएका थिए । अब बार्षिक ५० लाख भन्दा बढि कारोबार गर्ने गेष्ट हाउस र क्याफे पनि भ्याटमा अनिवार्य रुपमा दर्ता हुनुपर्ने भएको हो । मूल्य अभिवृद्धि कर ऐन २०४२ को अनुसूचि १ मा गेष्ट हाउस र क्याफेलाई पनि भ्याटका दायरामा ल्याउनुपर्ने उल्लेख गरिएको छ । ५० लाख भन्दा बढिको कारोबार गरेर पनि भ्याटमा दर्ता नभएको फेला परेमा कर कार्यालयले जुकसुकै समयमा भ्याट असुल्न सक्छ । ठुलो कारोबार गरेर पनि भ्याट नतिरेका काठमाडौं, भक्तपुर र ललितपुरका ६ वटा विद्यालयका क्याण्टिन र एउटा प्राधिकरण सञ्चालन गरेको हवाई क्याटरिङ र ह्याण्डलिङमा भ्याट नतिरेपछि अब फन्दामा पर्ने भएका छन् । ती ७ वटै संस्थासँग ३ करोड ७७ लाख भ्याट असुल्न महालेखा परिक्षकको कार्यालयले निर्देशन दिईसकेको छ । महालेखाले ५० लाख भन्दा बढि कारोबार गर्ने गेष्ट हाउस र क्याफेलाई कर अधिकृत कर निर्धारण गरेर पुरानो कारोबारमा समेत भ्याट असुल्न भनेको छ । देशभर हजारौं गेष्टहाउस सञ्चालनमा छन् । काठमाडौं उपत्यका भित्र सञ्चालनमा रहेका अधिकांश गेष्ट हाउसहरुले बार्षिक ५० लाख भन्दा धेरैको कारोबार गर्दै आएका छन् । त्यस्तै, सैंयौं क्याफेहरुले पनि बार्षिक ५० लाख भन्दा धेरैको कारोबार गरिरहेका छन् । त्यस्ता गेष्ट हाउस र क्याफे तथा क्याण्टिनहरुलाई जुनसुकै समयमा कर अधिकृतले भ्याट निर्धारण गरेर पत्र काट्न सक्नेछन् ।
मंगलबारदेखि बजेटमाथि छलफल हुने
काठमाडौं । व्यवस्थापिका-संसद्को आजको दोस्रो बैठकले विनियोजन विधेयक, २०७४ माथि विचार गरियोस् भन्ने प्रस्ताव बहुमतले स्वीकृत गर्यो । उक्त विधेयकमाथिको सैद्धान्तिक छलफलमा भाग लिँदै सांसद प्रेम सुवालले मूल्य अभिवृद्धि कर (भ्याट) छल्ने गरी व्यापारी तथा व्यवसायीले आर्थिक अपराध गरिरहेकाले उनीहरुलाई कारबाही गर्नुपर्ने र त्यसका लागि सरकारले आवश्यक निर्णय गर्नुपर्ने माग गरे । सांसद सुवालको प्रश्नको जवाफ दिँदै अर्थमन्त्री कार्कीले कानुन, नियमअनुसार कर तिर्नुपर्ने, कर तिर्नु नागरिकको दायित्व भएकाले सरकार कोही कसैलाई पनि छुट दिने पक्षमा नरहेको बताए । त्यसअघि अर्थमन्त्री कार्कीले ‘विनियोजन विधेयक, २०७४’ र राष्ट्र ऋण उठाउने विधेयक, २०७४ सदनमा प्रस्तुत गरेका थिए । विनियोजन विधेयक, २०७४ माथि असार २० देखि २७ गतेसम्म छलफल हुने गरी समय निर्धारण गरिएको सभामुख ओनसरी घर्तीले जानकारी गराए । व्यवस्थापिका-संसद्को अर्को बैठक मङ्गलबार बिहान ११ः०० बजे बस्नेछ ।
साउन १ गतेदेखि सेयर कारोबारमा भ्याट
काठमाडौं । आन्तरिक राजस्व विभागले नयाँ आर्थिक वर्षदेखि सबै सेयर ब्रोकरले पाउने कमिशनमा मूल्य अभिवृद्धि कर (भ्याट) लगाउने प्रस्ताव गरेको छ । विभागले ब्रोकर एसोसिएशनका पदाधिकारीहरूसँगको छलफलमा भ्याटको दायरामा आउन आग्रह गरिएको विभागका उपमहानिर्देशक चन्द्रकला पौडेलले जानकारी दिए । ‘उहाँहरू भ्याटमा त अहिले देखि आउन सक्नु हुन्छ, विभाग यसको लागि स्वागत आव्हान पनि गर्छ,’ उनले भने ‘तर, व्यवहारिक कठिनाइलाई सहजीकरण गर्दै आगामी आवबाट आएनलाई पनि विभागले छुट दिएको छ ।’ अब ब्रोकरहरू लिने कमिशनमा १३ प्रतिशत भ्याट पनि जोडेर लिने भएका छन् । ब्रोकरहरुले ब्रोकर कमिशनमा लाग्ने भ्याट लगानीकर्ताहरुले नै तिर्नपर्ने तर्क राख्दै आएका छन् र आन्तरिक राजस्व विभागले दुईवटा ब्रोकर कम्पनीलाई भ्याट तिर्न पत्र काटेपछि गत बिहीबार सेयर बजारको कारोबार नै बन्द गरेको थिए । उनीहरूले कानुनको परिपालन गर्नु पर्छ, ’ उनले भने । ‘सफ्ट वेयर अपडेट गुर्नपर्नेदेखि खरिद तथा विक्री बिलको व्यवस्थापन गर्नु पर्ने भएको वाँकी आठ/दश दिनको समयमा राखिएको हो, उहाँहरू भ्याटमा दर्ता त हुनै पर्छ । विभाग पनि अहिले सोही प्रक्रियाको लागि आन्तरिक तयारीमा जुटेको छ भने ब्रोकरहरू पनि यसमा सहमति हुनुभएको छ,’ पौडेलले भने । यसको नियामक निकाय अर्कै भएकोले नेपाल धितोपत्र बोर्ड र अर्थ मन्त्रालयसाग पनि छलफल भइरहेको उनले बताए । सरकारको अहिलेसम्म ब्रोकरले कमिनश वापतको प्राप्त गर्ने रकममा भ्याटलागएको थिएन, आयकरमात्र तिरे पुग्ने थियो । अब भने सो करका साथै भ्याट पनि थपिने भएको छ । पुरानो करका लागि पनि कुन मोडालिटीमा जाने पनि छलफल हुँदै गरेको पौडेलले बताइन् । ‘अगाडिको मुद्दालाई पनि समायोजन गर्दै जानुपर्छ उनले भनिन् । ब्रोकरहरुले शुक्रबार साँझ अर्थमन्त्री ज्ञानेन्द्रबहादुर कार्कीलाई भेटेर आफूहरु मर्कामा परेको भन्दै समस्या समाधानका गर्नका लागि आग्रह गरेका छन् ।
बौद्धनाथ क्षेत्रलाई आठ करोड ६१ लाखको बजेट सार्वजनिक
काठमाडौं । बौद्धनाथ क्षेत्र विकास समितिले आव २०७४/७५ का लागि आठ करोड ६१ लाख ८० हजार रुपैयाँको बजेट सार्वजनिक गरेको छ । समितिले चालु खर्चतर्फ रु तीन करोड ९५ लाख ८० हजार तथा पुँजीगत खर्चतर्फ चार करोड ६६ लाख रुपैयाँ विनियोजन गरेको छ । गत वर्षको मौज्दात दुई करोड रुपैयाँ रहेको र टिकट बिक्रीबाट मात्र छ करोड ५० लाख रुपैयाँ आम्दानी हुने तथा सटर बहालबाट चार लाख ८० हजार रुपैयाँ आम्दानी हुने अनुमान गरिएको छ । पुरातात्विक, धार्मिक बौद्ध साहित्यसम्बन्धी कृति प्रकाशन, ज्येष्ठ नागरिकलाई भ्रमणलगायत शीर्षकमा रु १८ लाख छुट्याइएको छ । बौद्धनाथ क्षेत्र तथा त्यस वरपरका सम्पदाका साथै स्थानीय पूर्वाधार विकास निर्माणका कार्यमा समेत विनियोजित खर्च मध्येबाट केही रकम खर्च गरिने समितिका कार्यकारी निर्देशक फुबुयाङ्जी लामाले जानकारी दिए। राष्ट्रिय तथा अन्तर्राष्ट्रिय तहमा मनाइने बौद्ध धर्मका विभिन्न दिवस तथा सामाजिक कार्यमा पनि समितिले सहयोग उपलब्ध गराउँदै आएको छ । रासस
