यामाहाको सडक सुरक्षा सचेतनामा मिस नेपाल प्रतियोगी, ‘फेस अफ फेसिनो’ को भोटिङ खुला
काठमाडौं । मिस नेपाल २०१७ का प्रतियोगीहरुले शनिबार यामाहाद्वारा आयोजित सडक सुरक्षा सचेतना कार्यक्रममा सहभागिता जनाएका छन् । उनीहरुलाई नेपाल प्रहरी, सडक सुरक्षा समाज नेपाल र एमएडब्लुका तालिमप्राप्त प्रशिक्षकले सडक दुर्घटनाको कारण, यसको न्यूनीकरण र रोकथामबारे जानकारी गराएका थिए । प्रतियोगीहरुलाई नेपाल प्रहरी अन्तर्गत सडक सुरक्षा युनिटका प्रहरी नायब उपरीक्षक सविन प्रधान,सडक सुरक्षा समाज नेपालका निरज धौभडेल र यामाहाका सर्टिफाइड प्रशिक्षक जीना गुरुङले सवारी हाँक्दा र यात्रा गर्दा अपनाउनुपर्ने सावधानी र दुर्घटनाबाट बच्ने उपायहरुबारे जानकारी दिएका थिए । कार्यशालापछि उनीहरुलाई यामाहा सेफ राइडिङ साइन्स (वाइएसआरएस) कार्यक्रममा प्रयोगात्मक अभ्याससमेत गराइएको थियो । मिस नेपालका प्रतियोगीहरु शनिबार नै यामाहाको सामाजिक अभियानमा सहभागिता जनाए । उनीहरुले काठमाडौंका चार व्यस्त चोकमा पुगेर सवारीचालक र पैदलयात्रीलाई सडक सुरक्षा र ट्राफिक नियमबारे सन्देश दिएका थिए । साथै, उनीहरुले पैदलयात्रीलाई वायु प्रदुषणको प्रभावबाट बच्न मास्क वितरण गरेका थिए । महिला सशक्तिकरणबारे कार्यशाला त्यसअघि मिस नेपाल प्रतियोगीहरुलाईबैंकर मेघा बैंकका चिफ अपरेटिङ अफिसर डा. रविना देशराज श्रेष्ठले महिला सशक्तिकरणबारे ओरियन्टेसन दिएकी थिइन् । उनले मिस नेपालको अन्तिम प्रतियोगितामा छानिनु आफैंमा ठूलो उपलब्धी भएको र यो उपलब्धीलाई समाज परिवर्तनमा प्रयोग गर्नुपर्ने बताइन् । ‘मानिसहरुले चिनिने बन्नु भनेको आफ्नो लागि होइन । तपाईंहरु देशमा चिनिनु भनेको तपाईंहरुको विश्वसनीयता बढ्नु हो,’ उनले भनिन्, ‘सामान्य मानिसले भनेको भन्दा पनि परिचित अनुहारले भनेको कुरालाई समाजले विश्वास गर्छ । त्यसैले तपाईंहरुको परिचय समाजको हित हुने काममा प्रयोग गर्नुहोस् किनभने समाजले तपाईं भनेको कुरालाई बढी विश्वास गर्छ ।’यसै सेसनमा मिस नेपाल प्रतियोगीहरुले स्कुटरले महिला सशक्तिकरणमा निभाएको भूमिकाबारे आफ्नो मत राखेका थिए । ‘फेस अफ फेसिनो’ कन्टेस्टको सुरुवात शनिबार नै‘फेस अफ फेसिनो’ कन्टेस्टको औपचारिक सुरुवात गरिएको छ । यामाहाले मिस नेपाल २०१७ मा अघिल्लो वर्षमा झै टुह्विलर पार्टनरको भूमिका निभाएको छ । मिस नेपालका १९ प्रतियोगीमध्ये एक जनालाई ‘फेस अफ फेसिनो’ टाइटल प्रदान गरिनेछ । यो टाइटलको विजेताको छनोट डा. रविना देशराज श्रेष्ठ, निलम चन्द र ओसिमा बानुको निर्णायक टोली र फेसबुक तथा देशभरका यामाहा सोरुमबाट हुने पब्लिक भोटिङमार्फत् हुनेछ । पब्लिक भोटिङ ५ जेठबाट १९ जेठ अपरान्ह ३ बजेसम्म खुल्ला रहनेछ । साथै, ‘फेस अफ फेसिनो’को लागि भोटिङ गर्नेमध्ये एक जना भाग्यशाली भोटरले सामसुङको लेटेस्ट मोडेल एस८ मोबाइल जित्न सक्नेछन् । यामाहाले मिस नेपाल २०१७ का विजेता र ‘फेस अफ फेसिनो’ का विजेतालाई एउटा एउटा फेसिनो स्कुटर उपहारमा दिनेछ ।
१३६ गाउँका २५ सय परिवार भूकम्प पीडितलाई अन्तै सार्नु पर्ने
काठमाडौं । २०७२ बैशाख १२ गतेको महाभूकम्पका कारण बस्ती नै जोखिममा परेका १३६ गाउँका २५ सय परिवारलाई अन्तै सार्नुपर्ने देखिएको छ । राष्ट्रिय पुननिर्माण प्राधिकरणले तयार पारेको बस्ती स्थानान्तरण सम्बन्धी अध्ययनले १७ जिल्लाका १३६ बस्तीबाट २५ सय परिवारलाई नयाँ स्थानमा सार्नुपर्ने देखाएको हो । ‘खानी बिभाग र हाम्रो पटक पटकको अध्ययनले २५ सय परिवारलाई नयाँ स्थानमा सार्नै पर्ने निष्कर्ष निकालेको छ, यो रिपोर्ट प्राधिकरणको कार्यकारी समितिमा पुगिसकेको छ, त्यहाँबाट पास भएपछि कार्यान्वयनमा जान्छौं’, राष्ट्रिय पुननिर्माण प्राधिकरणका प्रमुख नापी अधिकृत कमल घिमिरेले विकासन्युजसँग भने । घिमिरेका अनुसार प्राधिकरणले नयाँ स्थानमा बसोबासका लागि प्रति परिवार न्युनतम २ आना पाँच पैसा देखि अधिकतम १० आनासम्म जमिन उपलब्ध गराउने भनेको छ । नागरिकले आफैं घडेरी खरिद गर्ने भनेको अवस्थामा निजी आवास निर्माणका लागि उपलब्ध गराउने ३ लाखसँगै थप २ लाख रुपैंयाँ उपलब्ध गराउनेछ । गोरखाको लाप्राकका ५७२ परिवार, गोरखाकै करौजाको ३०० परिवार, रसुवाको गोगनेका २०० परिवारलाई सार्ने पर्ने देखिएको उनले बताए । घिमिरेका अनुसार २० परिवार भन्दा बढिलाई स्थानान्तरण गर्नुपर्ने ५० वटा गाउँ छन भने १० देखि २० परिवारलाई सार्नै पर्ने देखिएका २० वटा बस्ती रहेका छन् । त्यस्तै, १० भन्दा कम परिवारलाई सार्नै पर्ने देखिएका बस्तीहरुको संख्या ६६ वटा रहेको छ । गोरखाको लाप्राकबाट विस्थापित बनेका भूकम्प पीडितलाई भने गैर आवासिय नेपाली संघ(एनआरएन)ले गुप्सी पाखामा एकिकृत नमुना बस्तीको निर्माण गरिरहेको छ ।
प्रज्ञान सेक्युरिटिजको कारोवार रोक्का
काठमाडौं । प्रज्ञान सेक्युरिटिज प्रा. लि. को कारोबार रोक्का भएको छ । विराटनगर स्थित कार्यालयबाट सिभिल बैंक लि. ले जारी गर्न लागेको हकप्रद शेयरको सम्वन्धमा सार्वजनिक नभएको सूचना केही व्यक्तिहरुलाई दिएको जानकारी प्राप्त भएकोले उक्त सेक्युरिटिजको कारोबार रोक्का भएको हो । यस विषयमा बोर्डले आवश्यक छानविन कार्य अगाडि बढाएको छ । साथै, उक्त छानबिन कार्य सम्पन्न नभइन्जेलसम्मको लागि प्रज्ञान सेक्युरिटिजलाई जेठ ८ गतेदेखि निलम्बन गरी धितोपत्र कारोवार गर्न रोक लगाइएको बोर्डले जनाएको छ ।
स्वदेशी लघुवित्तको आइपीओ बाँडफाँड, कसले कति कित्ता पाए ?
काठमाडौं । स्वदेशी लघुवित्त वित्तीय संस्थाले केही समय अगाडि निष्काशन गरेको साधारण सेयर अर्थात आइपीओको आइतबार बाँडफाँड भएको छ । बिक्री प्रबन्धक एनएमबी क्यापिटलका अनुसार ५० कित्तादेखि ११२० कित्तासम्म आबेदन गर्नेलाई चिठ्ठा प्रथाबाट १० कित्ता सेयर बाँडफाँड गरिएको छ । त्यस्तै, ११३० कित्तादेखि १२८० कित्ता सम्म आवेदन गर्नेले कम्तिमा १० कित्ता पाएका छन् । १२९० कित्ता देखि १३९० कित्तासम्म आवेदन गर्नेले ११ कित्ताका दरले र १५ सय कित्तासम्म आवेदन गर्नेले १२ कित्ताका दरले सेयर पाएका एनएमबी क्यापिटलले जनाएको छ । कम्पनीको तीन लाख कित्ता सेयरको लागि ९२ हजार जनाले आवेदन दिएका थिए । जस मध्ये २५३० जनालाई मात्र सेयर बाँडफाँड गरिएको छ । त्यस्तै, कुल आवेदन परेको मध्ये १२०२ जनाको आवेदन रद्द भएको बिक्री प्रवन्धकले जनाएको छ ।
टीकापुर घट्नाका आरोपीहरुको मुद्धा फिर्ता लिने निर्णय विरुद्ध सर्वाेच्च अदालतमा रिट
काठमाडौं । कैलालीको टिकापुर घट्नाका आरोपीहरुको मुद्धा फिर्ता लिने सरकारको निर्णय विरुद्ध सर्वाेच्च अदालतमा मुद्धा दायर भएको छ । अधिवक्ता कपिलदेव ढकाल, नेपाल सरकारका पू्र्व सचिव द्धारिकानाथ ढुंगेल र डा. जगदिश चन्द्र बरालले सर्वाेच्च अदालतमा उत्प्रेषण ,प्रतिषेधको रिट निवेदन दर्ता गरेका हुन । रिटमाथी भोली नै पेशी तोकिएको छ । सरकारले कैलालीको टिकापुरमा प्रहरी र नाबालकको हत्या आरोपमा मुद्धा दायर गरिएकोहरुको मुद्धा फिर्ता लिने निर्णय गरेको थियो ।
आइएमएसले मनायो २५औं ‘आइएमएस दिवस’
काठमाडौं । सामसङ स्मार्टफोन तथा कोरियन लक्जरी ब्राण्ड साङयङ मोटर्स्का आधिकारिक वितरक आइएमएस ग्रुपले आफ्नो २५औं वार्षिकोत्सव सम्पन्न गरेको छ । कम्पनीले गत बैशाख २९ गतेका दिन नै वार्षिकोत्सवको अवसरमा २५औं आइएमएस दिवसको आयोजना गरेको थियो । होटल र्याडिशन, लाजिम्पाटमा ग्रुप चेयरम्यान दिपक मल्होत्रा, कम्पनीका प्रेसिडेन्ट तथा सिइओ. दिकेश मल्होत्रा तथा केही अन्य अतिथिहरु लगायत कम्पनीका ३५० भन्दा बढि कर्मचारीहरुको उपस्थितिमा सो कार्यक्रम भएको थियो । यस २५औं माइलस्टोनको उपलक्ष्यमा कम्पनीले सबै कर्मचारीहरुलाई सौगात स्वरुप चाँदीको सिक्का समेत वितरण गरेको थियो । साथै कार्यक्रममा कर्मचारीहरुकै सहभागीतामा विभिन्न रमाइला ट्यालेन्ट शो, खेल, क्विज् तथा अन्य कार्यक्रमका साथै पुरस्कार वितरण पनि भएको थियो । छनौट गरिएका केही कर्मचारीहरुलाई विभिन्न मेडल तथा नगद उपहारहरुले “वर्षकै सर्वाेत्कृष्ट कर्मचारी”, “सर्वाेत्कृष्ट डिपार्टमेन्ट”, तथा “सबैभन्दा लामो सेवा अवधि” का रुपमा सम्मानीत पनि गरिएको थियो । आइएमएस ग्रुप विगत २४ वर्षमा क्रमिक रुपमा विकसित हुँदै र झनै विस्तारित हुँदै आएको छ जुन कम्पनीको ब्यानरमा रहेका विभिन्न उत्कृष्ट कम्पनीहरुबाट स्पष्ट हुन्छ । विगत ५ वर्षमा ग्रुप आयको अधारमा ५ गुणाले वृद्धि हुँदै देशभरमा आफ्नो उपस्थिति बढाउन पनि सफल भएको छ । हाल यस अन्तर्गत कुल १२ वटा कम्पनीहरु रहेका छन् । टेक्नोलोजी र आर्थिक पक्षहरुमा सकारात्मक परिवर्तन ल्याई देशको उत्पादकत्व बढाउनतथा रोजगारीका अवसरहरु सिर्जना गर्न कम्पनी सधैं नै केन्द्रित छ ।
यूनाइटेड मोदीको एक करोड १५ लाख कित्ता साधारण सेयर नेप्सेमा सूचिकृत
काठमाडौं । यूनाइटेड मोदी हाइड्रोपावर डेभलपमेन्ट लिमिटेडको एक करोड १५ लाख कित्ता साधारण सेयर सूचिकृत भएको छ । आइतबार मात्रै कम्पनीको सो मात्राको सेयर नेपाल स्टक एक्स्चेञ्जमा सूचिकृत भएको हो । हाल कम्पनीको केन्द्रिय कार्यालय काठमाडौंको कमलादीमा रहेको छ ।
सेयर आपूर्ति बढ्दा मूल्य दोहोरो अंकले घट्यो, एक सातामा नै ३ अर्ब रुपैयाँको सेयर थपियो
काठमाडौं । आइतबार नेप्से परिसूचक १६ दशमलब ६३ अंकले घटेर १६२७ दशमलब २४ अंकमा झरेको छ । सो दिन ६८ करोड रुपैयाँ बराबरको सेयर करोबार भएको छ । जुन रकम अघिल्लो कारोबार(बिहीबार) को तुलनामा ७ करोड रुपैयाँले बढी हो । बजारमा सेयर आपूर्ति वृद्धि हुनु तर निक्षेप तथा कर्जाको व्याजदर नघट्नुले बजारमा गिरावट आएको जानकारहरु बताउँछन् । सरकार परिवर्तन र तराईका क्षेत्रीय दलहरुको बढ्दो असन्तुष्टि पनि बजार घट्नुको कारण मानिएको छ । गत साता मात्र नेपाल स्टक एक्सचेञ्जमा ३ अर्ब रुपैयाँ बराबरको अंकित मूल्यको सेयर सूचिकृत भएको छ । १४ वटा कम्पनीको हकप्रद सेयर, बोनस सेयर र साधारण सेयर गरी उक्त मात्रामा सेयर सूचिकृत भएको हो । सेयर आपूर्तिको क्रम बढ्दो रहेकोले मूल्यमा प्रेसर परेको बताईन्छ । बजार दोहोरो अंकले घट्दा पनि सेयर बजारमा दुई कम्पनीको सेयर मूल्य १० प्रतिशतले बढेको छ । सो दिन एनबी इन्स्योरेन्स कम्पनी र बोटलर्स नेपाल(तराई) लिमिटेडको सेयर मूल्य १० प्रतिशतले बढेको छ । आइतबार यी दुई कम्पनीको सेयर मूल्य क्रमशः १२१० र ६६४४ रुपैयाँ रहेको छ । त्यस्तै, सिनर्जी पावर डेभलपमेन्ट, हिमालयन डिस्टीलरी र मेरो माइक्रोफाइनान्स वित्तीय संस्थाको सेयर मूल्य क्रमशः ९.९७, ९.९७ र ९.९६ प्रतिशतले बढेको छ । सो दिन सबैभन्दा बढी जनता बैंक नेपालको सेयर मूल्य ६.२७ प्रतिशतले घटेको छ । बजारमा सबैभन्दा बढी नेपाल इन्स्योरेन्स कम्पनीको सेयर कारोबार भएको छ । एकैदिन कम्पनीको ४ करोड १५ लाख रुपैयाँ माथिको सेयर किनबेच भएको छ । सो दिन इन्स्योरेन्सको सेयर मूल्य प्रतिकित्ता १५२० रुपैयाँ रहेको छ । आइतबार कारोबार भएका दुई समूहको परिसूचक उकालो लागेका छन् भने बाँकी ६ समूहको परिसूचक ओरालो लागेका छन् । सबैभन्दा बढी बीमा समूहको परिसूचक १०४ अंकले ओरालो लागेको छ । त्यस्तै, होटल, हाइड्रोपावर, बैंकिङ र विकास बैंकको परिसूचक क्रमशः ४९, २२, १८ र १५ अंकले ओरालो लागेका छन् । उत्पादनमूलक र अन्य समूहको परिसूचक क्रमशः ५४ र ०.८७ अंकले उकालो लागेका छन् ।
