स्कार्पियोमा भेटियामै भेटियो पाँच सय किलो चाँदी, राजस्व कार्यालयले बुझ्न मानेन
सिन्धुली । सिन्धुली प्रहरीले ठूलो परिमाणमा चाँदी बरामद गरेको छ । इलाका प्रहरी कार्यालय खुर्कोटले बिहीबार राति चेकजाँचको क्रममा पाँच क्विन्टल चाँदी फेला पारेको हो । बिपी राजमार्ग हुँदै काठमाडौंबाट जनकपुरतर्फ आउँदै गरेको बा१६प ६४७ नम्बरको स्कार्पियो जिपमा सो परिमाणको चाँदी बरामद गरेको जिल्ला प्रहरी कार्यालय सिन्धुलीले जनाएको छ । जनकपुर उपमहानगरपालिका बस्ने अमित गुप्ताले चलाएर ल्याएको जिपमा खानतलासी गर्दा पाँच क्विन्टल चाँदी फेला परेपछि शंका लागेर नियन्त्रणमा लिएको जिल्ला प्रहरी कार्यालयका प्रमुख तथा प्रहरी उपरीक्षक उमाशंकर पंजियारले बताए । ‘यदि वैधानिक थियो भने यति ठूलो परिमाणको चाँदी ल्याउँदा हेलिकोप्टर प्रयोग गरिन्थ्यो या सडकमार्गबाट ल्याउँदा सुरक्षाविना ल्याइँदैन थियो,’ पंजियारले भने, ‘एक त यति ठूलो परिमाणको बहुमूल्य धातु, त्यसमा पनि रातको समयमा काभ्रे–सिन्धुली हुँदै जनकपुर लैजान लाग्नुले पनि आशंका पैदा भएको हो ।’ प्रहरीले नियन्त्रण लिएर अनुसन्धानका लागि आन्तरिक राजस्व कार्यालय महोत्तरीलाई बिहीबार राति नै बुझाउन लगे पनि कार्यालयले बुझ्न नमानेको प्रहरी उपरीक्षक पंजियारले बताए । आन्तरिक राजस्व कार्यालय बर्दिबासले चाँदी बुझ्न नमानेपछि प्रहरीले आन्तरिक राजस्व कार्यालय बारा पथलैया लगेको छ । तर, आन्तरिक राजस्व कार्यालय पथलैयाले पनि बुझ्न आनाकानी गरेको छ । कार्यालयले बुझ्न नमानेपछि चाँदीको सुरक्षासहित सिन्धुलीबाट गएको सुरक्षाकर्मीलाई राजस्व कार्यालयको कम्पाउन्डभित्र गाडी राखेर फोटो खिचेर ल्याउनू भन्ने आदेश दिएको प्रहरी उपरीक्षक पंजियारले बताए । चाँदीको बिल देखिए पनि राति ल्याउनु, ठूलो परिमाण देखिनु र राजस्व कार्यालयले बुझ्न नमान्नुले आशंका पैदा गरेको छ । ‘कार्यालयमा कर्मचारी छन्, तर बुझ्न र छानबिन गर्न तयार हुँदैनन्,’ पंजियारले भने । नयाँ पत्रिका दैनिकबाट ।
जाँदा जाँदै अजय सुमार्गीको पैसा खुला !
बिहीबार बसेको मन्त्रिपरिषद्को बैठकले अजय सुमार्गीको रोक्का रहेको रकम निकासा गर्न दिने निर्णय गरेको छ । सत्ताबाट बाहिरनै लाग्दा सरकारले डा. युवराज खतिवडा गभर्नर भएका बेलादेखि रोक्का रहेको ३ अर्व २९ करोड रुपैयाँ निकासा गर्न स्वीकृत दिएको मन्त्रिपरिषद् स्रोतले जानकारी दिएको छ । जाँदा जाँदै प्रचण्ड सरकारले अयज सुमार्गीलाई सो रकम निकासा गर्न बाटो खोलिदिएको छ । यस विषयमा शुक्रबार नेपाल राष्ट्र बैंकमा दिनभर चर्चा भएको छ । पैसा निकासा गर्नका लागि आवश्यक डकुमेन्ट जुटाउन नसक्दा रकम निकासा त्यतिकै रोकिएको थियो । तर, सरकारबाट आधिकारिक पत्र नआएकोले राष्ट्र बैंकले यस विषयमा बोल्न चाहेन । अजय सुमार्गीले अफसोर कम्पनीको आवरणमा नेपालमा लगानी गर्न भनेर उक्त रकम नेपाल भित्र्याएका हुन् । २०७० सालदेखि नेपाल सरकारको कुनै निकायबाट उक्त रकम नेपाल भित्र्याउन पूर्वसहमति नलिएका कारण स्रोत नखुलेको धनका रुपमा राष्ट्र बैंकले रोकिराखेको थियो । अहिले सरकार ढल्ने बेलामा प्रचण्ड र देउवाको सहमतिमा उक्त रकम निकासा गर्न स्वीकृत दिने निर्णय गरिएको हो । अजय सुमार्गीले मुक्तिश्री सिमेन्ट उद्योग दर्ता गरेका छन् । त्यसैका लागि २०७० सालमा ब्रिटिश भर्जिन आइलेण्डस्थित झोधार इन्भेष्टमेन्ट लि.बाट कर्जा लिने भनेर निवेदन दिँदा नेपालका बैंकले ऋण दिन सक्ने कि नसक्ने भन्ने खुलाउन भन्दा अजय सुमार्गीले आधार उल्लेख गर्न सकेका थिएनन् । त्यसपछि नेपाल स्याटेलाइट टेलिकम प्रालिले उद्योगका लागि साइप्रसस्थित एअरवेज सर्भिसेज लि.बाट ६५ मिलियन डलर ऋण लिन अनुमति मागियो । उद्योगको कुल पुँजीभन्दा ऋण बढी देखिएपछि किन भनेर सोध्दा अजय सुमार्गीले त्यस पत्राचारको पनि स्पष्ट पार्न सकेनन् अर्थात पुँजीको स्रोत खुल्न सकेन ।
संसद्को बजेट अधिवेशन सोमबार
काठमाडौं । राष्ट्रपति विद्यादेवी भण्डारीले नेपालको संविधानबमोजिम व्यवस्थापिका-संसद्को बजेट अधिवेशन यही जेठ ८ गते अपराह्न आह्वान गरेकी छन् । प्रधानमन्त्रीको सिफारिसमा राष्ट्रपति भण्डारीले संसद् भवन नयाँ बानेश्वरमा बस्ने गरी संसद्को अधिवेशन आह्वान गरेकी राष्ट्रपति कार्यालयका उपसचिव केशवप्रसाद घिमिरेले जानकारी दिइन् । लामो अवधिसम्म रहेको संसद्को वर्षे अधिवेशन बिहीबार मात्र अन्त्य गरिएको थियो । रासस
एलइडी बल्ब खरिद प्रक्रियामा कारण देखाउन सर्वोच्चको आदेश
काठमाडौं । सर्वोच्च अदालतले एलइडी बल्ब खरिद प्रक्रियामा लिखित कारण देखाउन सरकारका नाममा आदेश जारी गरेको छ । न्यायाधीश डा आनन्दमोहन भट्टराईको एकल इजलाशले शुक्रबार लिखित जवाफसहित अन्तरिम आदेशका लागि छलफलमा बोलाउने आदेश दिएको सर्वोच्च अदालतका प्रवक्ता महेन्द्र उपाध्यायले जानकारी दिए । एलइडी बल्ब खरिद प्रक्रिया कानुन विपरीत भएको उल्लेख गरी अधिवक्ता लेखनाथ भट्टराई र नारायण चौलागाईंले गत बुधबार मुद्दा दायर गरेका थिए। नेपाल विद्युत् प्राविधकरणले दुई करोड थान एलइडी बल्ब खरिद प्रक्रिया कानुनविपरीत अघि बढाइएको र त्यसलाई रोक्नका लागि अन्तरिक आदेशको माग रिट निवेदनमा गरिएको थियो । रासस
दोस्रो चरणको निर्वाचनमा रातो मसीबाट मत सङ्केत, नीलोबाट गर्दा मतगणनामा केही असहजता
काठमाडौं । निर्वाचन आयोगले स्थानीय तहको दोस्रो चरणको निर्वाचनमा रातो रङको मसी प्रयोग गरी मत सङ्केत गराउने निर्णय गरेको छ । आयोगका सचिव गोपीनाथ मैनालीले दोस्रो चरणमा स्वस्तिक छापमा रातो रङको लगाउने व्यवस्था गर्न लागिएको जानकारी दिए । पहिलो चरणमा नीलो रङको मसीको प्रयोग गरी मत सङ्केत गरिएको थियो । दोस्रो चरणको स्थानीय तहको निर्वाचन प्रदेश नं १, २, ५ र ७ का ४१ जिल्लामा यही जेठ ३१ गते हुँदैछ । नीलो मसीबाट गरिएको मत सङ्केतले मतगणनामा केही असहजता देखिएको गुनासो आएको थियो । आयोगका प्रवक्ता सूर्यप्रसाद शर्माले भने, “दोस्रो चरणको निर्वाचनका लागि मतदान हुने जिल्लामा स्ट्याम्प प्याड रातो र सोही रङको मसी प्रयोग गरी मतदान गराउनका लागि स्ट्याम्प प्याड र मसी खरिद गर्ने निर्णय गरिएको छ ।” पहिलो चरणमा देखिएका कमजोरीलाई दोहरिन नदिन आयोगले निर्वाचनमा सुरक्षा रणनीति र मतदाता शिक्षालाई अझ बढी प्रभावकारी बनाउने योजना बनाएको उनले जानकारी दिए । रासस
राष्ट्रिय खनिज नीति २०७४ पारित, खनिज सम्पदाको अधिकतम उपयोग गर्ने
काठमाडौं । शुक्रबार राष्ट्रिय खनिज नीति, २०७४ पारित गरिएको छ । देशमा उपलब्ध खनिज सम्पदाको दिगो विवेकपूर्ण र यथोचित सदुपयोग गरी अर्थतन्त्रलाई प्रतिस्पर्धात्मक, चलायमान समृद्ध र आत्मनिर्भर बनाउँदै राष्ट्रको समग्र विकासमा योगदान पुर्याउने उद्धेश्यले यो नीति पारित गरिएको हो । यस नीतिले नेपालमा निजी क्षेत्र समेतको सहभागितामा नेपालमा रहेको खनिज सम्पदाको अधिकतम उपयोग एवं विकास गर्ने वातावरण बनाएको छ । राष्ट्रिय खनिज नीति, २०७४ को मूख्य विशेषताहरु क) वर्तमान भौगर्भिक अध्ययन अनुसन्धान एवं खनिज अन्वेषण तथा विकास कार्यहरुको हालसम्मका प्रयासहरु, खनिज कार्यको वर्तमान अवस्था, मूख्य समस्याहरु, चुनौतीहरु र नीतिको औचित्यतालाई राष्ट्रिय खनिज नीति, २०७४ को प्रारम्भिक परिच्छेदमा समावेश गरिएको छ । ख) राष्ट्रको आर्थिक विकासमा खनिज क्षेत्रको महत्वपूर्ण योगदान र भूमिकालाई सार्थक रुपमा स्थापित गर्दै प्रतिस्पर्धात्मक क्षमताको अभिवृद्धि र समृद्ध मुलुक निर्माण गर्नको लागि राष्ट्रिय खनिज नीति, २०७४ तर्जुमा गरिएको छ । ग) विगतमा नेपालमा खनिज सम्पदाको विकास नहुनुमा समय सान्दर्भिक नीति, ऐन, नियम तयार नहुनु, यथेष्ट लगानी नहुनु र निजी क्षेत्रलाई आकर्षित गर्न नसकिनु, दक्ष जनशक्तिको अभाव र नयाँ प्रविधिको समुचित उपयोग नहुनु पनि समस्याको रुपमा देखिएको छ । घ) खनिजको अन्वेषण, विकास र उत्पादन कार्यलाई अगाडि बढाउन आगामी दिनमा यसलाई राष्ट्रिय प्राथमिकतामा राख्नु, यसमा स्वदेशी तथा विदेशी लगानी आकर्षण गर्नु, विभिन्न क्षेत्रगत नीतिमा एकरुपता र समन्वय ल्याउनु र यसमा नेपाल सरकारको लगानीलाई उच्च तुल्याउनु समेत चुनौतिका रुपमा रहेका छन्। ङ) खनिज सम्पदाको वैज्ञानिक र अधिकतम उपयोग मार्पmत दोहारो अङ्क सहितको समतामूलक आर्थिक वृद्धि कायम गर्दै अति कम विकसित राष्ट्रबाट विश्वको मध्यम आय भएको राष्ट्रमा स्तरोन्नति गर्ने गरी मुलुकले आत्मसात् गरेको सङ्कल्पलाई मूर्तरुप प्रदान गर्न समेत राष्ट्रिय खनिज नीति, २०७४ को तर्जुमा र कार्यान्वयन अपरिहार्य हुन गएको । ५. रसुवा जिल्लामा रहेको जस्ता र सीसा खानी उद्योग लामो समयसम्म संचालन हुन नसकेकोमा यस उद्योगको संचालन गर्ने कम्पनी नेपाल मेटल कम्पनी लि. मा बैदेशिक लगानी आकर्षित गरी यस उद्योगलाई संचालनमा ल्याउने तयारी गरिएको छ । यसका लागि इच्छुक लगानीकर्ताको लगानी सुनिश्चितताको लागि वाणिज्य मन्त्रालय, अर्थ मन्त्रालय तथा अन्य सरोकारवालाहरु निकायका प्रतिनिधि समेत राखी तयारी कार्य असारको पहिलो हप्ता भित्र वैदेशिक लगानी भित्राई सक्ने । ६. उद्योग क्षेत्रको विकास र प्रवद्र्धनका लागि पर्यटन र जलविद्युतका साथै पाँचवटा प्राथमिकता निर्धारण गरी अर्थतन्त्रमा यस क्षेत्रको योगदान बढाउने उद्देश्यका साथ कार्यक्रम संचालन गर्न आगामी आ.व. ०७४/७५ लाई आँखाको लेन्स उत्पादन बर्ष, आ.व. ०७५/७६ लाई छाला तथा गार्मेन्ट बर्ष, आ.व. ०७६/७७ लाई इलेक्ट्रिक भेइकल बर्ष, आ.व. ०७७/७८ लाई कृषि तथा वन्यजन्य उत्पादन तथा बजारिकण आ.व. ०७८/७९ लाई खानी तथा खनिज बर्र्ष घोषणा गरी तत् तत् क्षेत्रमा विशेष कार्यक्रम कार्यान्वयन गर्न कार्ययोजना तयार गरिएको । ७. राष्ट्रिय उत्पादकत्व तथा आर्थिक विकास केन्द्रलाई प्रभावकारी बनाउने र औद्योगिक क्षेत्र व्यवस्थापन लि. सँग गाभ्ने प्रक्रिया यही साउन १ गते देखि अगाडि बढाइनेछ । ८. कुनै विशेष उद्योगहरुले विशेष औद्योगिक क्षेत्र स्थापना गर्न खोजेमा सो क्षेत्रमा जाने सार्वजनिक पूर्वाधारमा नेपाल सरकारबाट उद्योगको प्रकृति र लगानी, रोजगारीको स्थिति हेरी लगानी गरिनेछ । हाल छाला जुत्ताका व्यवसायी उद्योगले यस सम्बन्धी विशेष औद्योगिक क्षेत्र स्थापना गर्न इच्छा देखाएको छ । यसका लागि उक्त क्षेत्रमा पुग्ने पहुँच मार्ग निर्माणका लागि अर्थ मन्त्रालयसँग पहल भैरहेको । ९. ७५ वटै जिल्लाबाट प्रत्येक जिल्लाका एक–एक जना पर्ने गरी उत्कृष्ट महिला उद्यमी छान्ने कार्य अन्तिम चरणमा रहेको र यसै महिनाको अन्त सम्ममा एक समारोह आयोजना गरी पुरस्कार वितरण तथा सम्मान गरिनेछ । १०. नवलपरासीको धौवादी क्षेत्रमा रहेको फलाम खानीको उत्खनन्का लागि निजी क्षेत्रको सहभागितामा उत्खनन् सुरु गर्ने कार्यलाई अगाडी बढाईने । ११. नेपाल र चीन सरकारबीच क्रस बोडर सेज स्थापनाको समझदारी पत्रमा हस्ताक्षर भएको । नेपाल सरकारले हिमाल, तराई र उपत्यकामा विशेष आर्थिक क्षेत्र निर्माणको सन्दर्भ उठाएको ।
देवः र कैलाश विकास बैंकको टेण्डर सेयर बाँडफाँड, बजारमा २७०मा पाईने सेयरलाई ग्लोबल आईएमईले ३१६ रुपैयाँ हालेपछि खैलाबैला
काठमाडौं । देवः विकास बैंक र कैलाश विकास बैंक बढाबढ मूल्यमा बिक्री आह्वान गरेको सेयर शुक्रबार बाँडफाँड भएको छ । देव: विकास बैंकको सेयरका लागि प्रतिकित्ता २३४ रुपैयाँ बुझाउनेले सेयर पाएका छन् भने कैलाश विकास बैंकको सेयरका लागि प्रतिकित्ता ३३५ रुपैयाँ हाल्नेले पाएका छन् । देवः मा २३३ रुपैयाँमा आवेदन गर्नेले दामासाही सेयर पाउने छन् भने कैशालमा ३४४ रुपैयाँमा आवेदन गर्नेले दामासाही पाउने भएका छन् । देव: विकास बैंकको सेयरका लागि बढी हाल्नेले ३१६ रुपैयाँ ७१ पैसा सम्म हालेको छ । ग्लोवल आईएमई क्यापिटलले प्रतिकित्ता ३१६ रुपैयाँ ७१ पैसाको दरले ५ हजार कित्ता सेयर हालेको छ । यो बैंकको सेयर २५५ देखि २७० को बीचमा कारोबार भईरहेको छ । बजार मूल्य भन्दा प्रतिकित्ता ५० रुपैयाँ बढी किन हालियो ? टेण्डर खोल्ने एनआईवीएल क्यापिटल मार्केट्सको हलमा खचाखच मानिसहरुले जिब्रो टोक्दै प्रश्न गरे । ग्लोबल आईएमई म्यूचल फण्डको पैसा दुरुपयोग भएको आशंका समेत केहीले गरे । तर ग्लोबल आईएमई क्यापिटलका प्रमुख कार्यकारी अधिकृत पारशमणि ढकालले उक्त टेण्डर म्यूचल फण्डको पैसा नभई ग्लोबल आईएमई क्यापिटलको पेसा हालेकाे बताए । ‘कम्पनीले केही परिसूचक देखेर नै सो मूल्य हालेको हो । त्यसको कारण बताउन मिल्दैन’ ढकालले विकासन्युजसँग कुरा गर्दै भने । ग्लोबल आईएमई क्यापिटल ग्लोबल आईएमई बैंकको सहयाक कम्पनी हो ।
कागज बनाउन यसरी ढुवानी गरिँदै छ अम्रिसोको सिठा
काठमाडौं । इलामको इरौंटारबाट कागज बनाउनका लागि झापातर्फ अम्रिसोको सिठा ढुवानी गरिँदै । अम्रिसोको सिठा, फूल र घाँससमेत उपयोगी छ । रासस
