प्रतिनिधिसभा निर्वाचन : स्याङ्जामा पुरुष भन्दा महिला मतदाताको सङ्ख्या धेरै
वालिङ । आगामी फागुन २१ गते हुन लागिरहेको प्रतिनिधिसभा निर्वाचनमा स्याङ्जामा दुई लाख ४८ हजार मतदाता कायम भएको छ । २०८२ फागुन २० गतेसम्म १८ वर्ष उमेर पूरा भई दुई लाख ४८ हजार ८१६ जनाले आगामी प्रतिनिधिसभा निर्वाचनमा मतदान गर्न पाउने भएका हुन् । जिल्ला निर्वाचन कार्यालय स्याङ्जाका प्रमुख श्रीराम थापाका अनुसार पुरुष एक लाख २२ हजार ४६४, महिला एक लाख २६ हजार ३५१ र अन्य एक गरी कुल दुई लाख ४८ हजार ८१६ मतदाता रहेका हुन् । जिल्लामा पुरुष मतदाताभन्दा महिला मतदाताको सङ्ख्या धेरै रहेको छ । पुरुषभन्दा महिला मतदाता तीन हजार ८८७ जना धेरै रहेका छन् । दुई निर्वाचन क्षेत्र रहेको स्याङ्जामा प्रतिनिधिसभा निर्वाचन क्षेत्र नं १ मा एक लाख ३० हजार ८८६ मतदाता छन् । स्याङ्जा क्षेत्र नं २ मा एक लाख १७ हजार ९३० मतदाता छन् । क्षेत्र नं १ मा गत निर्वाचनका तुलनामा यस वर्ष तीन हजार ४७५ मतदाता थप भएका छन् । क्षेत्र नं २ मा एक हजार २५२ मतदाता थपिएका कार्यालय प्रमुख थापाले जानकारी दिए । जिल्लामा २०७९ को निर्वाचनमाभन्दा यस वर्षको निर्वाचनमा कूल चार हजार ७२७ मतदाता थपिएका हुन् । विसं २०७९ मा भएको प्रतिनिधिसभा तथा प्रदेश सभा निर्वाचनमा दुई लाख ४४ हजार ०८९ मतदाता रहेका थिए । स्याङ्जा जिल्लामा आगामी फागुन २१ गते हुने प्रतिनिधिसभा निर्वाचनका लागि १९९ मतदानस्थल कायम गरिएको छ भने ३२२ मतदान केन्द्र रहने उनले जानकारी दिए । गत निर्वाचनमा १९९ मतदानस्थल रहेको थियो भने मतदान केन्द्र ३२० कायम रहेकोमा यसपटक दुई मतदान केन्द्र थप भएका हुन् ।
ट्राफिक सचेतना कक्षा लिने चालकलाई राहत, अब दैनिक ७ वटा कक्षासँगै शनिबार पनि पढ्न पाइने
काठमाडौं । सवारी नियम उल्लंघन गरी कारबाहीमा परेका चालकहरूका लागि काठमाडौं उपत्यका ट्राफिक प्रहरी कार्यालयले सचेतना कक्षाको संख्या थप गरेको छ । सेवाग्राहीको चाप र सहजतालाई मध्यनजर गर्दै यसअघि दैनिक ५ वटा सञ्चालन हुँदै आएको कक्षालाई बढाएर ७ वटा पुर्याइएको हो । अबदेखि काठमाडौंको रामशाहपथस्थित ट्राफिक प्रहरी कार्यालयमा सार्वजनिक बिदा बाहेकका दिन बिहान ९ बजेदेखि अपराह्न ४ बजेसम्म सातवटा सत्रमा कक्षाहरू सञ्चालन हुनेछन् । शुक्रबारको हकमा भने अपरान्ह ३ बजेसम्म मात्र कक्षा सञ्चालन हुने कार्यालयले जनाएको छ । कार्यालय समयमा उपस्थित हुन नसक्ने कर्मचारी वा अन्य व्यस्त चालकहरूको सहजताका लागि ट्राफिक प्रहरीले विशेष व्यवस्था गरेको छ । अब प्रत्येक शनिबार (सार्वजनिक बिदा बाहेक) बिहान १० बजेदेखि १२ बजेसम्म दुई वटा कक्षा संचालन हुनेछन् । चालकहरूले आफ्नो अनुकूल समय मिलाएर यी कक्षाहरूमा सहभागी हुन सक्नेछन् । मादक पदार्थ सेवन (मापसे) गरी सवारी चलाउने, तीव्र गतिमा सवारी गुडाउने, रातो बत्तीको उल्लंघन गर्ने तथा सडक लेन अनुशासन पालना नगर्ने चालकहरूका लागि यो सचेतना कक्षा अनिवार्य गरिएको हो । भदौ २३ र २४ गते भएको जेनजी आन्दोलनका क्रममा ट्राफिक कार्यालयहरूमा आगजनी भएपछि झण्डै डेढ महिना यो सेवा अवरुद्ध भएको थियो । कात्तिक ११ गतेदेखि पुनः सुरु भएको यो सेवा हाल रामशाहपथमा मात्र उपलब्ध छ । ललितपुर र भक्तपुरमा भने आन्दोलनका कारण क्षतिग्रस्त भएका पूर्वाधारहरू निर्माणको चरणमा रहेकाले केही समयपछि मात्र कक्षा सुरु हुने ट्राफिक प्रहरीले जनाएको छ । ट्राफिक प्रहरीको यो कदमले जरिवाना तिरेर पनि समय अभावका कारण कक्षा लिन नपाएका चालकहरूलाई ठूलो राहत पुग्ने विश्वास गरिएको छ ।
साना तथा मझौला व्यवसायी महासंघको अध्यक्ष म नै हुँ, भ्रममा नपर्नु : ईनु पौडेल
काठमाडौं । साना तथा मझौला व्यवसायी महासंघ नेपालकी अध्यक्ष ईनु पौडेलले महासंघको नाममा भइरहेको भ्रमपूर्ण प्रचारप्रति गम्भीर ध्यानाकर्षण भएको बताएकी छन् । पत्रकार सम्मेलनमा बोल्दै अध्यक्ष पौडेलले पूर्वअध्यक्ष हरिभक्त पराजुलीले आफू अझै अध्यक्ष रहेको भन्दै भ्रम फैलाइरहेको दाबी गरिन् । उनले पूर्वअध्यक्ष पराजुलीले विभिन्न जिल्ला, प्रदेश, सरकारी तथा गैरसरकारी निकायहरूमा आफू नै अध्यक्ष भएको दाबी गर्दै पत्राचार र प्रचार गरिरहेको सूचना प्राप्त भएको उल्लेख गर्दै कसैलाई पनि भ्रममा नपर्न आग्रह गरिन् । उनले भनिन्, 'हरिभक्त पराजुली हाल साना तथा मझौला व्यवसायी महासंघ नेपालको कुनै पनि पद वा जिम्मेवारीमा रहनुभएको छैन । उहाँसँग महासंघको तर्फबाट कुनै पनि कानुनी, आर्थिक, प्रशासनिक वा संस्थागत अधिकार छैन ।' महासंघले आफ्नो विधान र प्रचलित कानुनअनुसार संस्थागत मर्यादा र पारदर्शिता कायम राख्न आफू प्रतिबद्ध रहेको जनाएको छ । विधानविपरीतका कार्यहरू जारी रहेमा सम्बन्धित व्यक्तिविरुद्ध कानुनी कारबाहीका लागि प्रक्रिया अगाडि बढाइने चेतावनीसमेत महासंघले दिएको छ । यदि पराजुलीले महासंघको लेटरहेड, छाप वा पहिचान प्रयोग गरी कुनै गतिविधि गरेमा त्यसको सम्पूर्ण जिम्मेवारी उहाँ स्वयंले लिनुपर्ने र संस्थाले त्यसको अपनत्व नलिने महासंघले स्पष्ट पारेको छ । देशको वर्तमान आर्थिक अवस्था र साना व्यवसायीको भूमिकाबारे चर्चा गर्दै अध्यक्ष पौडेलले नेपालका ८० प्रतिशतभन्दा बढी व्यवसायीहरू साना तथा मझौला क्षेत्रमा आबद्ध रहेको बताइन् । 'नेपालको अर्थतन्त्र महलले होइन, झुपडीले टिकेको छ,' उनले भनिन्, 'दुई तिहाइभन्दा बढी रोजगारी र उत्पादनको भार सम्हालिरहेका साना व्यवसायीको संरक्षण गर्नु नै देशको भविष्य सुरक्षित गर्नु हो ।' पत्रकार सम्मेलनमा महासंघका पदाधिकारी तथा केन्द्रीय सदस्यहरूको समेत उपस्थिति रहेको थियो ।
सिन्धु विकास बैंकका सीईओ सुरेश देवकोटाले दिए राजीनामा
काठमाडौं । सिन्धु विकास बैंक लिमिटेडका प्रमुख कार्यकारी अधिकृत (सीईओ) सुरेश देवकोटाले राजीनामा दिएका छन् । देवकोटाले पुस ९ गते व्यक्तिगत कारण देखाउँदै राजीनामा पेश गरेका हुन् । बैंक सञ्चालक समितिको पुस १५ गते बसेको बैठकले उनको राजीनामा आगामी माघ १० गतेदेखि लागू हुने गरी स्वीकृत गरेको छ । बैंकले देवकोटाको राजीनामासँगै आवश्यक व्यवस्थापन प्रक्रिया अघि बढाइएको जनाएको छ ।
राष्ट्रिय वाणिज्य बैंक कर्मचारी संघको अध्यक्षमा चौलागाईं चयन
काठमाडौं । राष्ट्रिय वाणिज्य बैंक कर्मचारी संघ नेपालको १२औँ केन्द्रीय महाधिवेशन पुस ११ र १२ गते नेपालगञ्जमा सम्पन्न भएको छ । महाधिवेशनमा देशभरका ८ सयभन्दा बढी कर्मचारीको सहभागिता रहेको थियो । महाधिवेशनको मूल समारोहको उद्घाटन नेकपा एमालेका महासचिव शंकर पोखरेलले गरेका हुन् । उद्घाटन समारोहमा बोल्दै उनले कर्मचारी एकता, संस्थागत सुशासन र बैंकको सुदृढीकरणमा कर्मचारी संघको भूमिकाको प्रशंसा गरेका थिए । महाधिवेशनले सर्वसम्मत रूपमा नयाँ नेतृत्व चयन गरेको छ । संघको अध्यक्षमा रबिन्द्र प्रसाद चौलागाईं, वरिष्ठ उपाध्यक्षमा कबिराज बराज र महासचिवमा ऋषिराम ज्ञवाली चयन भएका छन् । उनीहरूसहित ४१ सदस्यीय केन्द्रीय समिति निर्वाचित भएको छ । नवगठित नेतृत्व र महाधिवेशनले लिएको नीतिले आम कर्मचारीको मनोबल उच्च राख्दै कर्मचारीका साझा एजेन्डामा एकताबद्ध भएर समस्याको समाधान गर्ने र राष्ट्रिय वाणिज्य बैंकको समग्र प्रगतिमा योगदान पुर्याउने विश्वास लिएको संघले जनाएको छ । आम कर्मचारीले संघप्रति देखाएको ठूलो विश्वास र भरोसालाई महाधिवेशनले केवल नेतृत्व परिवर्तनका रूपमा मात्र नभई संस्थाको हित, सुदृढीकरण र प्रगतिका लागि संघले बोकेको संकल्पको विजयका रूपमा व्याख्या गरेको छ । महाधिवेशनको पूर्वसन्ध्यामा संघले नेपालगञ्ज नगरमा प्लेकार्ड र ब्यानरसहित प्रभातफेरी समेत आयोजना गरेको थियो ।
सुनचाँदीको मूल्य घट्यो, कतिमा हुँदैछ किनबेच ?
काठमाडौं । पछिल्ला केही दिनयता स्थानीय बजारमा सुनचाँदीको मूल्य लगातार बढिरहेकामा बुधबार दुवै धातुको मूल्य घटेको छ । बुधबार सुनको मूल्य तोलामा ११ सय रुपैयाँले घटेको छ भने चाँदी तोलामा १२० रुपैयाँले घटेको हो । बुधबार छापावाल सुनको मूल्य प्रतितोला दुई लाख ६१ हजार रुपैयाँ र त्यति नै चाँदीको मोल चार हजार ४७० रुपैयाँ कायम भएको नेपाल सुनचाँदी व्यवसायी महासंघले जनाएको छ । मंगलबार छापावाल सुन प्रतितोला दुई लाख ६२ हजार १०० रुपैयाँ र त्यति नै चाँदीको मोल चार हजार ५९० रुपैयाँमा कारोबार भएको थियो ।
६ दशकपछि सीईओ पद छोड्दै वारेन बफेट, बर्कशायर हाथवे अब कसले सम्हाल्ला ?
काठमाडौं । बर्कशायर हाथवेका प्रमुख कार्यकारी अधिकृत (सीईओ) वारेन बफेटले ३१ डिसेम्बरमा आफ्नो पद छोड्दै छन् । यो अवकाशको घोषणा बर्कशायरको वार्षिक सेयरधनीको बैठकमा गरिएको हो । सन् २०२६ जनवरी १ देखि कम्पनीका उपाध्यक्ष ग्रेग एबेलले बर्कशायरको कार्यभार सम्हाल्नेछन् । ९५ वर्षीय बफेटले आफू नियमित रूपमा कार्यालय आउने र बोर्डका अध्यक्षको रूपमा कायम रहने बताएका छन् । तर, दैनिक कार्यसञ्चालनबाट उनको बिदाइ हुनु छ दशक लामो एउटा युगको अन्त्य हो । जसले अमेरिकी पुँजीवादलाई नयाँ रूप दियो र संघर्षरत एउटा टेक्सटाइल कम्पनीलाई विशाल वित्तीय साम्राज्यमा रूपान्तरण गर्यो । आज बर्कशायर अमेरिकाको नवौं सबैभन्दा मूल्यवान कम्पनी हो । यो देशको दोस्रो ठूलो प्रोपर्टी तथा दायित्व बीमा कम्पनीसमेत हो, जसको स्वामित्वमा करिब ७०० अर्ब डलर बराबरका कारोबारयोग्य सेयर, बन्ड र नगद छन् । दशकौंसम्म बर्कशायरले एसएन्डपी ५०० सूचकांकलाई निरन्तर पछाडि पारेको छ । यस अवधिमा बफेटले गीको र नेशनल इन्डेम्निटीजस्ता बीमा कम्पनीहरू, इस्कर मेटलवर्किङजस्ता उत्पादन कम्पनीहरू, डेरी क्वीनजस्ता खुद्रा ब्रान्ड, ठूला युटिलिटी कम्पनीहरू तथा अमेरिकाका सबैभन्दा ठूला रेलमार्गमध्ये एक बीएनएसएफसमेत अधिग्रहण गरे । उनले सयौं अर्ब डलर बराबरका सेयर खरिद–बिक्री गरे र अमेरिकन एक्सप्रेस, कोका–कोला र एप्पलजस्ता कम्पनीहरूमा दीर्घकालीन लगानीबाट ठूलो नाफा कमाए । वारेन बफेटलाई संसारकै महान् लगानीकर्तामध्ये एक मानिन्छ । उनले बर्कशायरलाई सानो टेक्सटाइल मिलबाट विशाल बहुराष्ट्रिय कम्पनीमा रूपान्तरण गरे । सन् १९६२ मा उनले यो मिल प्रतिसेयर ७.६० डलरको दरमा किन्न सुरु गरेका थिए । आज बर्कशायरको एक सेयरको मूल्य ७ लाख ५० हजार डलरभन्दा बढी छ । बफेटको कुल सम्पत्तिमध्ये करिब १५० अर्ब डलर बराबरको हिस्सा बर्कशायरका सेयरमै रहेको छ । उनले पछिल्ला २० वर्षमा मात्र ६० अर्ब डलरभन्दा बढी दान गरिसकेका छन् । उत्तराधिकारीका रूपमा ग्रेग एबेलमाथि सबैको नजर रहने जनाइएको छ । बफेटजस्तो स्टक पिकिङका लागि एबेल परिचित छैनन् । उनले वर्कशायरको ऊर्जा व्यवसायबाट उचाइ हासिल गरेका हुन् । यस्तो अवस्थामा बफेटका प्रमुख लगानी सहायकमध्ये एक टोड कम्ब्स जेपीमोर्गन चेसतर्फ जानु केही लगानीकर्ताका लागि चिन्ताको विषय बनेको छ। एबेलले अब छिट्टै कठिन पूँजी बाँडफाँडसम्बन्धी निर्णय लिनुपर्नेछ । ब्याजदर घट्दै जाँदा बर्कशायरको ३८० अर्ब डलरको नगद भण्डारको अवसर लागत बढ्दै गएको छ । कम्पनीले सम्भवतः बीमा क्षेत्रमा अर्को ठूलो अधिग्रहण गर्न सक्छ, जहाँ बर्कशायरको चब्बमा पहिले नै ८ प्रतिशत हिस्सा रहेको छ । ग्रेग एबेलले बर्कशायरको दिशामा के परिवर्तन ल्याउँछन् भन्ने कुरामा लगानीकर्ताहरूले सूक्ष्म रूपमा नजर राख्नेछन् । तर, कुनै ठूलो उलटफेर हुने अपेक्षा गरिएको छैन । एबेलले सन् २०१८ देखि बर्कशायरका सबै गैरबीमा व्यवसायहरूको जिम्मेवारी सम्हाल्दै आएका छन् । बफेट बोर्डका अध्यक्षकै रूपमा रहनेछन् र हरेक दिन कार्यालय आउनेछन् । नयाँ लगानी अवसर पहिचान गर्न र एबेललाई सल्लाह दिन उनी सक्रिय रहनेछन् ।
४ दशक पुरानो अशोक स्टीलको आम्दानी २१ प्रतिशत बढ्यो, बैंक ऋण साढे ३ अर्ब रुपैयाँ
काठमाडौं । अशोक स्टील इन्डस्ट्रिज प्रालिको यस वर्ष आम्दानी बढाएको छ । अघिल्लो वर्षको तुलनामा गत वर्ष अशोक स्टील इन्डस्ट्रिजको आम्दानी २१.२२ प्रतिशत अर्थात् ७६ करोड १० लाख रुपैयाँ बढेको हो । कम्पनीले सन् २०२४ मा ३ अर्ब ५८ करोड ६० लाख रुपैयाँ आम्दानी गरेको थियो । सन् २०२५ मा उक्त आम्दानी बढेर ४ अर्ब ३४ करोड ७० लाख रुपैयाँ गरेको हो । सन् २०२३ को तुलनामा भने आम्दानी कम हो । सन् २०२३ मा कम्पनीले ६ अर्ब ६६ करोड २० लाख रुपैयाँको कारोबार गरेको थियो । सन् २०२३ को तुलनामा यस वर्ष कम्पनीको आम्दानी ३४.७२ प्रतिशत कम हो । यसैगरी, कम्पनीले सन् २०२१ मा ४ अर्ब ५२ करोड २० लाख रुपैयाँ र सन् २०२२ मा ६ अर्ब ८८ करोड १० लाख रुपैयाँ सञ्चालन आम्दानी गरेको थियो । यस्तै, कम्पनीले सन् २०२० मा २ अर्ब २६ करोड १० लाख रुपैयाँ, सन् २०१९ मा ३ अर्ब ३५ करोड ४० लाख रुपैयाँ, सन् २०१८ मा ३ अर्ब ५९ करोड ४० लाख रुपैयाँ, सन् २०१७ मा १ अर्ब ३५ करोड ८० लाख रुपैयाँ र सन् २०१६ मा ९३ करोड ४० लाख रुपैयाँको स्टीलको व्यापार गरेको थियो । सन् १९८४ मा स्थापित अशोक स्टीलले स्पञ्ज आइरन, पिग आइरन र स्क्राइब कच्चा पदार्थ प्रयोग गरी एमएस ब्लेड उत्पादन गरिरहेको छ । गढीमाई बारामा उद्योग रहेको यस कम्पनीले वार्षिक १ लाख मेट्रिक टन टीएमटी उत्पादन गर्दै आएको छ । चार दशकदेखि नेपाली बजारमा रहेको अशोक स्टीलको अध्यक्ष तथा प्रबन्ध निर्देशक पूनमचन्द अग्रवाल हुन् । उनीसँग स्टील उत्पादन उद्योगमा ३० वर्षभन्दा बढीको अनुभव छ । कम्पनीको प्रमुख कार्यकारी अधिकृत (सीईओ) अभिषेक तुलसियान हुन् । कम्पनीको देशभर २५० बढी डिलर र ५ सय बढी खुद्रा बिक्रेता छन् । कम्पनीले बैंकको ऋण बढाएको छ । सन् २०२५ मा कम्पनीले ३ अर्ब ४३ करोड रुपैयाँ ऋण लिएको छ । जबकि सन् २०२४ कम्पनीले ३ अर्ब ३ करोड रुपैयाँ मात्रै ऋण लिएको थियो । कुल ऋणमा १ अर्ब ७९ करोड २३ लाख रुपैयाँ दीर्घकालीन र १ अर्ब ६३ करोड ७७ लाख रुपैयाँ अल्पकालीन ऋण लिएको कम्पनीले जनाएको छ ।
