२ कम्पनीको सेयर मूल्यमा सकारात्मक सर्किट, ५ अर्बको कारोबार
काठमाडौं । बुधबार सेयर बजार सामान्य अंकले बढेको छ । नेपाल स्टक एक्सचेन्ज (नेप्से) परिसूचक १० अंकले बढेर २६३३ बिन्दुमा पुगेको हो । नेप्सेका अनुसार १६३ कम्पनीको सेयर मूल्य बढ्दा ८९ कम्पनीको मूल्य घटेको छ । ८ कम्पनीको मूल्यमा भने कुनै परिवर्तन आएको छैन । बुधबार ३४२ कम्पनीको १ करोड कित्ता सेयर किनबेच हुँदा ५ अर्ब १३ करोड रुपैयाँको कारोबार भएको छ । जसमध्ये सबैभन्दा धेरै कारोबार ग्रीन भेन्चरको भएको छ । ग्रीन भेन्चरको १७ करोड रुपैयाँ बराबरको कारोबार भएको छ । साथै बन्दिपुर केबलकारको १५ करोड, श्रीनगर एग्रीटेकको १३ करोड, हिमालयन रिइन्स्योरेन्सको १२ करोड ९१ लाख र शिवम् सिमेन्टको १२ करोड रुपैयाँ बराबरको कारोबार भएको छ । एसवाई प्यानल र न्यादी हाइड्रोपावरको सेयर मूल्य १० प्रतिशतले बढेर सकारात्मक सर्किट लागेको छ । विन नेपाल लघुवित्तको सेयर मूल्य १० प्रतिशतले घटेर नकारात्मक सर्किट लागेको छ । बुधबारको कारोबारमा सबै समूहको उपसूचक बढेको छ । सबैभन्दा बढी उत्पादन तथा प्रशोधन समूह १.६१ प्रतिशतले बढेको छ ।
भारतबाट ६५४ मेगावाट विद्युत आयात अनुमति नविकरण
काठमाडौं । भारतले ६५४ मेगावाट विद्युत भारतीय इनर्जी एक्सचेन्ज (आईईएक्स) को प्रतिस्पर्धी दरमा आयातका लागि नेपाललाई दिइएको अनुमति नविकरण गरेको छ । भारतको विद्युत मन्त्रालयअन्तर्गतको केन्द्रीय विद्युत प्राधिकरणले आईईएक्सको डे–अहेड र रियल–टाइम मार्केटबाट ६५४ मेगावाट विद्युत चौविसै घण्टा (आरटिसी) आयात गर्न अनुमति नविकरण गरेको हो । यसअघि दिइएको अनुमतिको म्याद बुधबार सकिँदै थियो । नेपाल विद्युत प्राधिकरणले ढल्केवर–मुजफ्फरपुर ४०० केभी प्रसारण लाइनमार्फत ६०० मेगावाट टनकपुर–महेन्द्रनगरबाट ५४ मेगावाट गरी कुल ६५४ मेगावाट विद्युत प्रतिस्पर्धी दरमा आयात गर्न अनुमति पाएको हो। यो अनुमति १७ पुस ९८ गतेदेखि १७ चैत ९९ गतेसम्म (जनवरी–मार्च २०२६) लागू हुनेछ । १८ चैतदेखि १५ भदौ ९९ (अप्रिल–अगस्ट २०२६) सम्मको नविकरण पछि गरिने प्राधिकरणले जनाएको छ । ऊर्जा, जलस्रोत तथा सिंचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले मंगलबार विद्युत मन्त्रालयका अधिकारीलाई टेलिफोनमार्फत आरटिसी मोडमा विद्युत आयात गर्न अनुमति नविकरण गरिदिन आग्रह गरेका थिए । उनले आरटिसी मोडमा विद्युत आयातको अनुमति पाएकाले हिउँदको विद्युत माग र आपूर्तिको व्यवस्थापन गर्न सहज हुने बताए ।
सामुदायिक लघुवित्तले सेयरधनीहरुलाई लाभांश वितरण नगर्ने
काठमाडौं । सामुदायिक लघुवित्त वित्तीय संस्था लिमिटेडले गत आर्थिक वर्षको मुनाफाबाट सेयरधनीहरुलाई लाभांश वितरण नगर्ने निर्णय गरेको छ । पुस १६ गते बसेको लघुवित्तको सञ्चालक समितिको बैठकले लाभांश वितरण नगर्ने निर्णय गर्दै सोही अनुसारको वित्तीय विवरण स्वीकृतीका लागि नेपाल राष्ट्र बैंकमा पठाउने निर्णय गरेको जनाएको छ । गत वर्ष पनि लघुवित्तले लाभांश वितरण गरेको थिएन ।
नेपाल बैंकका कर्मचारी र ग्राहकलाई प्याथ ल्याबमा छुटको सुविधा
काठमाडौं । नेपाल बैंक लिमिटेडले कर्मचारीहरू र बैंकमा खाता राखेका ग्राहकहरूलाई नेशनल प्याथ ल्याब रिसर्च सेन्टर प्रालिका विभिन्न प्याथ ल्याब क्लिनिकमा उपचार गर्दा लाग्ने शुल्कमा छुट प्रदान गर्ने सम्झौतामा हस्ताक्षर गरेको छ । सम्झौताअनुसार नेपाल बैंकका कर्मचारी र ग्राहकहरूले प्याथोलोजी ल्याबको विविध सेवाहरूमा बिल रकमको १० देखि ५० प्रतिशतसम्म छुट प्राप्त गर्नेछन् । यससँगै निःशुल्क होम डेलिभरी सुविधा र विभिन्न हेल्थ प्याकेजमा पनि विशेष छुट प्रदान गरिने व्यवस्था गरिएको छ । पौष १४ गते भएको सम्झौतामा बैंकको तर्फबाट बजारीकरण तथा अनुसन्धान डिभिजनका प्रमुख निर्मल सुवेदी र नेशनल प्याथ ल्याब रिसर्च सेन्टर प्रा. लि. तर्फबाट प्रबन्ध निर्देशक पवन जोशीले हस्ताक्षर गरेका छन् । यस सम्झौताको माध्यमबाट नेपाल बैंकका कर्मचारी र ग्राहकहरूले नक्साल, महाराजगंज, ललितपुर, रुपन्देही, भैरहवा, पोखरा, चितवन, तुल्सीपुर, घोराही, धनगढी, गुल्मी, अर्घखाँची र महेन्द्रनगरमा रहेका नेशनल प्याथ ल्याब रिसर्च सेन्टरका उच्च स्तरीय उपचार सेवाबाट लाभ लिन सक्नेछन् ।
२७औँ वर्षमा पर्यटन बोर्डको रणनीतिक फड्को : नेपाल–आसियान पर्यटन वर्ष २०२६ घोषणा
काठमाडौं । नेपाल पर्यटन बोर्ड (एनटीबी) ले आफ्नो २७औँ स्थापना दिवसको अवसरमा ‘नेपाल–आसियान पर्यटन वर्ष २०२६’ मनाउने औपचारिक घोषणा गरेको छ । बोर्डका कार्यकारी प्रमुख अधिकृत दीपक राज जोशीले उद्घाटन समारोहमा आसियान मुलुकलाई नेपालको लागि उच्च सम्भावनायुक्त बजारका रूपमा प्रस्तुत गर्दै सन् २०२६ लाई लक्षित विशेष रणनीति सार्वजनिक गरेका छन् । सीईओ जोशीका अनुसार हालसम्म १ लाख ७ हजारभन्दा बढी आसियान मुलुकका पर्यटक नेपाल भित्रिसकेका छन्, जुन नेपालका लागि ठूलो र दीर्घकालीन बजार हो । उनले बौद्ध तथा आध्यात्मिक पर्यटन, प्रकृति र साहसिक पर्यटन, वेलनेस र आयुर्वेद, संस्कृति तथा समुदायमा आधारित पर्यटनमार्फत आसियान बजारमा नेपाललाई सशक्त रूपमा स्थापित गरिने जानकारी दिएका छन् । कार्यक्रम संस्कृति, पर्यटन तथा नागरिक उड्डयन मन्त्रालयका सचिव मुकुन्द निरौलाको अध्यक्षतामा सम्पन्न भएको थियो । उद्घाटन समारोहका प्रमुख अतिथि संस्कृति, पर्यटन तथा नागरिक उड्डयन मन्त्री अनिल कुमार सिन्हा र विशिष्ट अतिथि महिला, बालबालिका तथा ज्येष्ठ नागरिक मन्त्री श्रद्धा श्रेष्ठ थिए । जोशीले सन् २०२५ मा ११ लाख ६० हजार पर्यटक नेपाल भित्रिने अनुमान प्रस्तुत गर्दै यो संख्या गत वर्षको तुलनामा करिब ३ प्रतिशतले वृद्धि भएको बताएका छन् । उनका अनुसार सन् २०२५ भित्र ३१ वटा टुरिजम मार्ट, १२ वटा ब्रान्डिङ तथा कर्पोरेट गतिविधि, २० भन्दा बढी माइस कार्यक्रम सम्पन्न भएका छन् । उनीले जेन्जी आन्दोलनपछिको अवधिमा ८ वटा मुख्य पर्यटकीय गन्तव्यबाट लाइभ प्रसारणमार्फत पर्यटन प्रवर्द्धन, ९ भाषामा यात्रा सूचना प्रकाशन, ६९ वटा पर्यटन पूर्वाधार विकास, र पूर्वदेखि सुदूरपश्चिमसम्म ४१ वटा कार्यक्रम तथा विकास गतिविधि सञ्चालन गरिएको जानकारी दिएका छन् । एनटीबीले सन् २०२६ लाई परिभाषित गर्ने ७ प्रमुख यात्रा प्रवृत्ति पनि सार्वजनिक गरेको छ । शोरभन्दा शान्ति, प्रशासनमा जेन–एआई, छनोटभन्दा विश्वास, हवाईमार्गभन्दा सडक, एकै ढाँचाभन्दा अत्यधिक व्यक्तिगत अनुभव, परीक्षण गरिएकाभन्दा अफ–ग्रिड गन्तव्य, र संस्कृति प्राथमिकतामा रहने छ। जोशीले आगामी २०२६–२०३५ को रणनीतिक कार्ययोजना प्रस्तुत गर्दै सहभागितामूलक दृष्टिकोण, डिजिटल–प्रेरित व्यावसायिकता, नवप्रवर्तनशील नीति र अभ्यासको समन्वय, स्थानीय र वैश्विक अनुभवको मिश्रण, अनुत्पादक कार्यक्रम हटाउने तथा उच्च मूल्य पर्यटनमा केन्द्रित हुने स्पष्ट गरेका छन् । बोर्डका उपाध्यक्ष रामप्रसाद सापकोटाले निजी क्षेत्र र सरकारसँग समन्वय गरी कार्यक्रमहरू केन्द्रित गरिएको जानकारी दिए भने कर्मचारी संगठनका अध्यक्ष सन्तोष विक्रम थापाले कर्मचारीको वृत्ति विकास, आर्थिक विनियमावलीमा सुधार र कर्मचारी पदपूर्तिमा ध्यान दिन आवश्यक रहेको बताए । कार्यक्रममा पाटा सीईओ नुर अहमद हमिद, वर्ल्ड टुरिजम नेटवर्क र यूएन टुरिजमबाट भिडियो सन्देश प्रस्तुत गरिएको थियो । यस अवसरमा बोर्डको वार्षिक प्रकाशन ‘इन(फोकस)’ पनि विमोचन गरिएको छ ।
तीन दिनदेखि अवरुद्ध दाउन्ने खण्ड अझै सहज हुन सकेन
मध्यविन्दु । गत सोमबारदेखि अवरुद्ध रहेको नारायणगढ–बुटवल सडकखण्डअन्तर्गत दाउन्ने क्षेत्र अझै सहज हुन सकेको छैन । शीतलहरले दाउन्ने सडक चिप्लो हुँदा सवारीसाधन सञ्चालन हुन नसकेर अवरुद्ध भएको सडक अझ सहज हुन नसकेको हो । दाउन्नेस्थित खुर्सानी खोला आसपासको सडकमा सवारीसाधन चिप्लिने र उकालो चढ्न नसक्ने समस्या देखिएपछि सोमबार बिहानदेखि यो खण्ड अस्तव्यस्त बनेको जिल्ला प्रहरी कार्यालय नवलपरासी (बर्दघाट सुस्तापूर्व)का प्रहरी उपरीक्षक युवराज खड्काले बताए । 'अहिलेको समस्या दाउन्नेको पश्चिम खण्डमा शीतलहरका कारण सडक चिप्लो र हिलो हुँदा सवारीसाधन उकालो चढ्न तथा ओरालो झर्न नसकेर सडक अवरुद्ध भएको हो', उनले भने, 'विस्तारै सवारी पास गराउने काम भइरहेको छ, तर तीन दिनदेखि रोकिएका सवारीसाधन व्यवस्थापन गर्न कठिन भइरहेको छ ।' दाउन्नेमा बाक्लो हुस्सु र चिप्लो सडकका कारण सवारीसाधन सञ्चालनमा अत्यधिक कठिनाइ भइरहेको जिल्ला ट्राफिक प्रहरी कार्यालय नवलपरासी (बर्दघाट सुस्तापूर्व)का सूचना अधिकारी प्रहरी वरिष्ठ नायब निरीक्षक विनोद जोशीले बताए । 'अहिले पनि दुम्कीवास बजारदेखि नै सवारीसाधनको जाम कायम रहेको छ', उनले भने, 'सडक निर्माणका कारण एकतर्फी रहेको राजमार्गमा लामो समय सवारी जाम हुँदा सञ्चालन गराउन निकै समस्या भएको छ ।' नारायणगढ–बुटवल सडक योजना पश्चिम खण्डका सूचना अधिकारी इन्जिनियर विकास खनालले निर्माणाधीन क्षेत्रमा शीतलहरको प्रभाव कायम रहेकाले पश्चिम खण्डमा अझ धेरै सवारी चाप रहेको बताए । 'हाल खुर्सानी खोला क्षेत्रमा ग्राभेल हाल्ने काम भइरहेको र अवस्था सहज नहुँदासम्म मालवाहक सवारीसाधनलाई बर्दघाट र भुताहा क्षेत्रमा रोकेर राखिएको छ', उनले भने । तीन दिनदेखि जारी सवारी जामका कारण सयौँ यात्रु अलपत्र परेका छन् । नारायणगढ–बुटवल सडक योजना (पश्चिम खण्ड)ले सूचना जारी गर्दै अत्यावश्यकबाहेकका सवारीसाधनलाई वैकल्पिक सडक प्रयोग गर्न अनुरोध गरेको छ । दाउन्ने खण्डमा एकातिर सडक निर्माण र मर्मतको काम, अर्कोतिर शीतलहरले सडक हिलाम्य बनेपछि सवारीसाधन सञ्चालनमा गम्भीर समस्या देखिएको आयोजनाले जनाएको छ । रासस
न्युयोर्कको मेयर जोहरान ममदानी बुधबार पदभार ग्रहण गर्दै
न्युयोर्क । अमेरिकी वामपन्थी युवा अग्रगामी जोहरान ममदानीले बुधबार न्युयोर्कको मेयर पदभार ग्रहण गर्न लागेका छन् । सन् २०२६ को मध्यरातमा ममदानीले संयुक्त राज्य अमेरिकाको सबैभन्दा ठूलो सहरको नेतृत्व गर्दै एक परित्यक्त सबवे स्टपमा शपथ लिनेछन् । उनी न्युयोर्कको पहिलो मुस्लिम मेयर बन्नेछन् । ३४ वर्षीय डेमोक्रेट ममदानीले जीवनयापनको बढ्दो लागत, भाडा नियन्त्रण, विश्वव्यापी बाल हेरचाह र निःशुल्क सार्वजनिक यातायात जस्ता मुद्दामा सुधार गर्ने वाचा गर्दै अभियान चलाएका थिए । तर, एक वर्षअघि लगभग अज्ञात रहेका उनले कसरी आफ्नो महत्त्वाकांक्षी एजेन्डा पूरा गर्न सक्छन् भन्ने कुरा हेर्न बाँकी छ । न्युयोर्क विश्वविद्यालयका प्राध्यापक जोन केनले भने, 'प्रतीकात्मकता मतदातासँग मात्र जान्छ, नतिजा अझ महत्त्वपूर्ण हुन्छ ।' राष्ट्रपति डोनाल्ड ट्रम्पले ममदानीको आलोचना गर्दै ‘कम्युनिस्ट पागल’ भनेका थिए । तर नोभेम्बरमा ह्वाइट हाउसमा दुवैबीच आश्चर्यजनक रूपमा सौहार्दपूर्ण वार्ता भएको थियो । राजनीतिक विश्लेषक र कोलम्बिया विश्वविद्यालयका प्राध्यापक लिङ्कन मिचेलले भेटलाई ‘ममदानीको दृष्टिकोणबाट उत्कृष्ट’ भनेका छन् । तर, आप्रवासी छापाहरू र ट्रम्पको बढ्दो दमनले चुनौती सिर्जना गर्न सक्छ । ममदानीले आप्रवासी अधिकारको रक्षा गर्ने वाचा गरेका छन् र ट्रम्पको नीतिसँग भिडन्तमा तयार छन् । न्युयोर्कका महान्यायाधिवक्ता लेटिटिया जेम्सले ममदानीको निजी शपथ ग्रहण गराउनेछन्। बिहीबार हुने औपचारिक उद्घाटन कार्यक्रममा वामपन्थी सहयोगी सिनेटर बर्नी स्यान्डर्स र सांसद अलेक्जान्ड्रिया ओकासियो–कोर्टेजले भाषण दिनेछन्। सिटी हल बाहिर लगभग चार हजार पाहुना उपस्थित हुने अपेक्षा गरिएको छ । ममदानीको टोलीले ब्लक पार्टी आयोजना गरेको छ, जसले हजारौँ न्युयोर्कवासीलाई सडक दृश्य क्षेत्रबाट समारोह हेर्न सक्षम बनाउनेछ । मेयर निर्वाचित भएपछि उनी क्विन्सको भाडा–नियन्त्रित अपार्टमेन्टबाट म्यानहट्टनको आधिकारिक हवेलीमा सर्नेछन्, जुन मुख्यतः सुरक्षा कारणले गरिएको छ । युगान्डामा भारतीय मूलको परिवारमा जन्मेका ममदानी सात वर्षको उमेरमा न्युयोर्क आएका हुन् । छोटो राजनीतिक कार्यकाल भए पनि उनी राज्य सभाको सदस्य रहिसकेका छन् । अनुभवहीनतालाई पूर्ति गर्न उनले विगतका मेयर कार्यालय र पूर्वराष्ट्रपति जो बाइडेन प्रशासनका अनुभवी सहयोगीहरूसँग आफूलाई घेरेका छन् । व्यापारिक नेताहरूसँग संवाद खुला राख्दै उनले आफ्नो नीतिले धनी न्युयोर्कवासीको पलायनको भविष्यवाणी गर्ने दाबीहरूको खण्डन गरे । प्यालेस्टिनी अधिकारको रक्षकका रूपमा उनले यहुदी समुदायलाई समावेशी नेतृत्वको आश्वासन दिनेछन् । हालै वर्षौंअघि यहुदी विरोधी ट्वीटहरू सार्वजनिक भएपछि उनका केही कर्मचारीले राजीनामा दिएका थिए । ममदानीले आफ्नो नेतृत्वमा न्युयोर्कलाई समावेशी र न्यायोचित सहर बनाउन प्रतिबद्धता व्यक्त गरेका छन् । रासस
साझा यातायातको बन्द सेवा पुनः सुचारु
काठमाडौं । तलब तथा सुविधाको विषयलाई लिएर कर्मचारीहरूले काम रोक्दा बुधबार बिहानदेखि प्रभावित भएको साझा यातायातको बस सेवा पुनः सुचारु भएको छ । कर्मचारीहरूसँगको छलफलपछि सहमति जुटेको र सबै रुटमा गाडी चल्न थालेको साझा यातायातका प्रमुख कार्यकारी अधिकृत (सीईओ) भूपेन्द्र अर्यालले जानकारी दिए । उनका अनुसार यो कुनै आन्दोलन नभई कर्मचारीहरूको तलब-सुविधा सम्बन्धी केही अस्पष्टता हटाउन गरिएको आन्तरिक छलफल थियो । ‘यो आन्दोलन होइन, हाम्रा कर्मचारीहरूको तलब-सुविधा र नियमसम्मतका केही विषयमा जिज्ञासा थिए, त्यसैलाई स्पष्ट पार्न हामीले छलफल गरेका हौं’, अर्यालले विकासन्युजसँग भने । साझाले अधिकांश कर्मचारी आउटसोर्सिङ मार्फत लिएको र उनीहरूले आफूले पाउनुपर्ने सुविधाबारे केही भ्रम र जिज्ञासा राखेका थिए । सीईओ अर्यालले भने, ‘आउटसोर्सिङमार्फत आउनुभएका कर्मचारीहरूलाई हामीले पठाएको तलब र सुविधा सही तरिकाले पुगेको छ कि छैन भन्नेमा केही अस्पष्टता रहेछ। हामीले त्यसलाई क्लियर गर्ने प्रयास गर्यौं । ’ कर्मचारीहरूका माग श्रम ऐन अनुसार नै सम्बोधन गरिनेमा सहमति भएको छ । ‘श्रम ऐनले दिएको सुविधा दिन हामी तयार छौं, तर ऐनभन्दा बाहिर गएर सुविधा दिन मिल्दैन,’ अर्यालले भने, ‘अहिलेको सम्झौता चैतसम्म भएकाले त्यसलाई तोड्न मिल्दैन। चैतपछि फेरि बसेर सबैको हित हुने गरी नयाँ निर्णय लिइने मौखिक सहमति भएको छ । ’ कर्मचारीहरूले साझाले नै सिधै रोजगारी दिनुपर्ने माग राखेको विषयमा पनि आगामी दिनहरूमा छलफल गर्न सकिने उनले बताए । ‘यो ठूलो मुद्दा नभई सामान्य आन्तरिक छलफल हो, जुन हरेक कार्यालयमा हुन्छ,’ अर्यालले थपे, ‘केही तत्वहरूले उक्साउन खोजे पनि हामीले छलफलबाटै समस्या समाधान गरेका छौं । अब सबै समस्या हल भइसकेको छ र सेवा पूर्ण रूपमा सञ्चालनमा छ ।’ बिहान करिब ७ बजेदेखि कर्मचारीहरूले बस चलाउन रोकेका थिए । जसका कारण उपत्यकाका यात्रुहरूले सास्ती खेप्नुपरेको थियो । छलफलमा सहमति जुटेसँगै अहिले सबै रुटमा साझाका बसहरू गुड्न थालेका छन् ।
