तीन पूर्वप्रधानमन्त्री: ओली र नेपाल रेड जोनमा, अग्रता लिँदै प्रचण्ड
काठमाडौं । प्रतिनिधिसभा सदस्यका उम्मेदवार रहेका तीन पूर्वप्रधानमन्त्रीमध्ये पुष्पकमल दाहाल ‘प्रचण्ड’ ले अग्रता कायम गरेका छन् भने केपी शर्मा ओली र माधवकुमार नेपाल पछि परेका छन् । तीन पूर्वप्रधानमन्त्रीमध्ये ओली झापा जिल्ला क्षेत्र नम्बर-५, प्रचण्ड रुकुम पूर्व जिल्ला र नेपाल रौतहट जिल्ला क्षेत्र नम्बर-१ बाट उम्मेदवार छन् । यी क्षेत्रमा अहिले मतगणना जारी रहेको छ। पछिल्लो मतपरिणाम अनुसार नेपाल कम्युनिस्ट पार्टी (नेकपा) का संयोजकसमेत रहेका प्रचण्डले रुकुम पूर्वमा ५ हजार ९२४ मत प्राप्त गर्दै अग्रता कायम गरेका छन् । नेकपा (एमाले) का उम्मेदवार लीलामणि गौतमले २ हजार ९१ मत प्राप्त गरेका छन् भने नेपाली कांग्रेसकी कुसुमदेवी थापाले १ हजार ७०९ मत प्राप्त गरेकी छन् । त्यस्तै झापा-५ मा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह अग्रस्थानमा रहेका छन् । ७ हजार ६५१ मत गणना हुँदा साहले ५ हजार २५४ मत प्राप्त गरेका छन् भने नेकपा एमाले का अध्यक्ष ओलीले १ हजार २४८ मत पाएका छन् । यसैगरी रौतहट जिल्ला क्षेत्र नम्बर-१ मा पनि रास्वपाका राजेश चौधरी अग्रस्थानमा रहेका छन् । गरुडा-१ जगनगरमा ३ हजार ३६१ मतगणना हुँदा चौधरीले १ हजार ४९९ मत प्राप्त गरेका छन् । जनता समाजवादी पार्टीका योगेन्द्र यादव ले ६३१ मत, नेपाली कांग्रेस का अनिल कुमार झाले ३६६ मत प्राप्त गरेका छन् भने पूर्वप्रधानमन्त्री नेपालले ३२० मत प्राप्त गरेका छन् ।
रौतहट-१ मा माधव नेपाललाई चुनौती, मतगणनामा पाँचौं स्थानमा
काठमाडौं । प्रतिनिधिसभा निर्वाचन रौतहट क्षेत्र नम्बर १ को मतगणनाको प्रारम्भिक चरणमा नेपाली कम्युनिष्ट पार्टीका उम्मेदवार माधवकुमार नेपाललाई चुनौती देखिएको छ । त्यहाँ उनी पाँचौ स्थानमा छन् । रास्वपा उम्मेदवार राजेश चौधरीले अग्रता लिएका छन् । गौरको जुद्ध माध्यमिक विद्यालयमा रहेको मतगणना केन्द्रमा गरुडा १ जयनगरको मतगणना हुँदा उनले २२० मत प्राप्त गरेका छन् । रास्वपाका चौधरीको पक्षमा ७०६ मत आउँदा जसपा उम्मेदवार योगेन्द्र यादवले ५५७ र नेपाली काँग्रेस उम्मेदवार अनिलकुमार झाले ३१२ मत प्राप्त गरेका छन् । यसैगरी नेकपा एमालेका अजयकुमार गुप्ताले २८८ मत पाएका छन् । राजनीतिक जीवनकै जोखिमपूर्ण चुनावमा माधव नेपाल
धादिङ–१ मा आशिका दोब्बर मतले अगाडि
धादिङ । धादिङ- १ मा राष्ट्रिय स्वतन्त्र पार्टी (रास्वपा)का आशिका तामाङ दोब्बर मतले अगाडि छिन् । पछिल्लो मत परिणामअनुसार उनी २ हजार २२३ मतले अगाडि छिन् । उनले हालसम्म कुल ४ हजार ३१७ मत प्राप्त गरेकी छिन् । निर्वाचन अधिकृतको कार्यालयका अनुसार नेकपा एमालेका भूमि त्रिपाठीले दुई हजार ९४ मत ल्याएका छन् । तेस्रोमा नेपाली कांग्रेसका कृष्ण रिजालले एक हजार १८६ र नेपाली कम्युनिष्ट पार्टीका राजेन्द्र पाण्डेले एक हजार १२४ मत प्राप्त गरेका छन् ।
मन्त्री छोडेर चुनावी मैदानमा गएका चार मन्त्री : खरेल र पुन अगाडि, घिसिङ दबाबमा
काठमाडौं । सुशीला कार्की नेतृत्वको अन्तरिम सरकारका ४ मन्त्रीहरूले पदबाट राजीनामा दिएर प्रतिनिधिसभा निर्वाचनमा प्रतिस्पर्धा गरेका छन् । ऊर्जा मन्त्री कुलमान घिसिङ, सञ्चारमन्त्री जगदिश खरेल, शिक्षामन्त्री महावीर पुन र खेलकुद मन्त्री बब्लु गुप्ता चुनावी मैदानमा उत्रिएका हुन् । चारैमध्ये सञ्चारमन्त्री जगदिश खरेल र खेलकुद मन्त्री बब्लु गुप्ता राष्ट्रिय स्वतन्त्र पार्टी (रास्वपा) बाट उम्मेदवार बनेका छन् । ऊर्जा मन्त्री कुलमान घिसिङ उज्यालो पार्टीबाट र शिक्षामन्त्री महावीर पुन स्वतन्त्र उम्मेदवारका रूपमा चुनाव लडेका छन् । प्रारम्भिक मतगणनाले ललितपुर-२ मा खरेललाई स्पष्ट अग्रता दिएको छ । उनले ३ हजार १९९ मत ल्याउँदा दोस्रो स्थानमा रहेका नेपाली कांग्रेसका प्रेमकृष्ण महर्जनले ४९३ मत पाएका छन् भने नेकपा एमालेका प्रेमबहादुर महर्जन ४०७ मतसहित तेस्रो स्थानमा छन् । प्रारम्भिक नतिजाले खरेलको जिततर्फ बलियो संकेत गरेको देखिन्छ । काठमाडौं-३ मा भने पूर्वऊर्जामन्त्री घिसिङ र रास्वपाका राजुनाथ पाण्डेबीच कडा प्रतिस्पर्धा भइरहेको छ । पछिल्लो मतगणना अनुसार पाण्डेले ६ हजार ५ सय ८४ मत ल्याउँदा घिसिङ ४ हजार २ सय २० मतमा सीमित छन् । दुई हजारभन्दा बढी मतले पछि परेका घिसिङलाई जित निकाल्न चुनौतीपूर्ण देखिएको छ । म्याग्दीमा स्वतन्त्र उम्मेदवार महावीर पुन पनि अगाडि छन् । सिराहा-१ मा भने खेलकुद मन्त्री बब्लु गुप्ता उम्मेदवार रहे पनि मतगणना सुरु भएको छैन । यस क्षेत्रमा नेपाली कांग्रेसका रामसुन्दर चौधरी र नेकपा एमालेका रामशंकर यादव मुख्य प्रतिस्पर्धीका रूपमा देखिएका छन् । तर, देशभरि र मधेस प्रदेशको राजनीतिक रुझानलाई हेर्दा गुप्ता पनि जितका बलिया दाबेदार मानिएका छन् । निर्वाचनको प्रारम्भिक परिणामले अन्तरिम सरकारका मन्त्रीहरूको राजनीतिक भविष्य कस्तो बन्छ भन्ने चासो बढाएको छ ।
रौतहट –१ मा रास्वपाका राजेश चौधरी अगाडि
रौतहट । रौतहट- १ मा राष्ट्रिय स्वतन्त्र पार्टी (रास्वपा) का उम्मेदवार राजेश चौधरी १ हजार ४९९ मतसहित शीर्ष स्थानमा छन् । जनता समाजवादी पार्टीका योगेन्द्र यादवले ६३१ मत ल्याएका छन् भने नेपाली कांग्रेसका अनिल कुमार झाले ३६६ मत ल्याएका छन् । पूर्वप्रधानमन्त्री माधवकुमार नेपाल भने ३२० मतसहित पाँचाैमा छन् ।
भविष्यका सरकारले पनि भत्काउन नसक्ने मानकहरू
काठमाडौं । गृहमन्त्री ओमप्रकाश अर्यालले चुनाव कसरी शान्तिपूर्ण रुपमा सम्पन्न भयो भन्ने विषय खुलाएका छन् । शुक्रबार भिडियो सन्देश जारी गर्दै उनले यो निर्वाचन कसरी शान्तिपूर्ण र हिंसारहित हुन सक्यो भन्ने विषय खुलाएका हुन् । ‘यो चुनावले मानवता जोगाउने, मुलुक जोगाउने र संविधान जोगाउने कुराको प्रत्याभूति दिएको छ । यो निर्वाचन हुन नसकेको भए हाम्रो मुलुक, संविधान र मानवता नै जोखिममा पर्न सक्थ्यो । अब हामीले चुनाव गरेका छौं र निष्पक्ष चुनाव गरेका छौं, यो सरकारले सुदृढ चुनाव गरोस् भन्ने अपेक्षा थियो,’ उनले भनेका छन् । यस्तै, विगतको भन्दा यस पटक गुणस्तरीय चुनाव भएको उनको भनाइ छ । ‘सुदृढ चुनाव गरेका छौं, सबैलाई थाहा छ, यसपालि एक थोपा रगत नखसिकन चुनाव सम्पन्न गर्न सकेका छौं, हाम्रो सरकार गठन भएदेखि राजनीतिक हिंसाबाट रगतको थोपो खसेको छैन । त्यो प्रत्याभूति हामीले दियौं, चुनावको क्रममा पनि हिंसात्मक झडपहरू हुन पाएनन्, एकाधबाहेक । हुन खोजेका ठाउँमा पनि रोकथाम गरेर त्यसलाई काबुभित्र राखेर चुनाव गरायौं,’ उनले भने । उनले भनेका छन्, ‘पहिला पहिला धेरै ठाउँमा स्थगन हुन्थ्यो र फेरि चुनाव गराउनुपर्थ्यो । तर, यसपालि देशभरि एकैचोटि मतदान सम्पन्न भएको छ । स्थगन गर्नुपरेको अवस्था पनि छैन । यसरी हामीले राजनीतिक सुशासनका मानकहरू बढाउनैपर्छ । यी मानकहरुलाई सुदृढ गर्नुपर्छ । ताकि भविष्यमा आउने सरकारहरूले ती मानकहरू भत्काउन नसकून्, ती मानक घटाउन नसकून् भन्ने तहको लक्ष्य र अपेक्षा राखेर हामीले काम गरेका हौं ।’
व्यवसायी वीरेन्द्र बस्नेतले आफैले खोलेको पार्टी त्यागे
काठमाडौं । व्यवसायी वीरेन्द्रबहादुर बस्नेतले आफैले खोलेको पार्टी त्याग गरेका छन् । उनले सामाजिक सञ्जालमार्फत पार्टी त्यागेको जानकारी दिएका हुन् । पार्टी छोडेको घोषणा गर्दै उनले लेखेका छन्, ‘अब म एक स्वतन्त्र, जिम्मेवार नागरिकका रूपमा समाजसेवी अभियानमार्फत् मातृभूमिको सेवामा समर्पित रहने छु ।’ व्यवसायी बस्नेत गतिशील लोकतान्त्रिक पार्टीका केन्द्रीय सदस्य थिए । उनले सामाजिक सञ्जालमा हालको राजनीतिक संस्कारले आफ्नो आत्मासँग मेल नखाएको र पद र दलको सीमाभित्र रहेर आफ्नो अनुभव, क्षमता र देशप्रतिको अथाह प्रेमले खोजेको योगदान दिन नसक्ने उल्लेख गरेका छन् । अबको बाटो फरक रहेपनि देशप्रतिको समर्पण यथावत् रहने उनले बताएका छन् ।
