व्यवसायी वीरेन्द्र बस्नेतले आफैले खोलेको पार्टी त्यागे
काठमाडौं । व्यवसायी वीरेन्द्रबहादुर बस्नेतले आफैले खोलेको पार्टी त्याग गरेका छन् । उनले सामाजिक सञ्जालमार्फत पार्टी त्यागेको जानकारी दिएका हुन् । पार्टी छोडेको घोषणा गर्दै उनले लेखेका छन्, ‘अब म एक स्वतन्त्र, जिम्मेवार नागरिकका रूपमा समाजसेवी अभियानमार्फत् मातृभूमिको सेवामा समर्पित रहने छु ।’ व्यवसायी बस्नेत गतिशील लोकतान्त्रिक पार्टीका केन्द्रीय सदस्य थिए । उनले सामाजिक सञ्जालमा हालको राजनीतिक संस्कारले आफ्नो आत्मासँग मेल नखाएको र पद र दलको सीमाभित्र रहेर आफ्नो अनुभव, क्षमता र देशप्रतिको अथाह प्रेमले खोजेको योगदान दिन नसक्ने उल्लेख गरेका छन् । अबको बाटो फरक रहेपनि देशप्रतिको समर्पण यथावत् रहने उनले बताएका छन् ।
ललितपुर- १ मा उदयशमशेर राणाको अग्रता कायमै
ललितपुर । ललितपुर क्षेत्र नम्बर १ को मतगणनामा नेपाली कांग्रेसका उम्मेदवार उदय शम्शेर राणाले आफ्नो अग्रतालाई निरन्तरता दिइरहेका छन् । पछिल्लो प्राप्त मतपरिणाम अनुसार राणाले अन्य प्रतिस्पर्धीहरूलाई निकै पछाडि पार्दै विजयतर्फको यात्रा सुदृढ बनाएका हुन् । उनले ४ हजार १३३ मत प्राप्त गरेका छन् । राष्ट्रिय स्वतन्त्र पार्टी (रास्वपा) का उम्मेदवार बुद्धरत्न महर्जनले नेकपा एमालेका उम्मेदवार चेतनाथ सञ्जेललाई उछिनेर दोस्रो स्थान कब्जा गरेका छन् । महर्जनले २ हजार ६६३ र सञ्जेलले २ हजार २९१ मत प्राप्त गरेका छन् ।
झापा –३ मा रास्वपाका प्रकाश पाठक अगाडि
काठमाडौं । झापा –३ मा राष्ट्रिय स्वतन्त्र पार्टी (रास्वपा) का उम्मेदवार प्रकाश पाठक २ हजार २८१ मतसहित अगाडि छन् । उनका निकटतम प्रतिस्पर्धी राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले १ हजार ६०० मत ल्याएका छन् । तेस्रोमा नेकपा एमालेका उम्मेदवार हरिबहादुर राजवंशीले ६२० मत प्राप्त गरेका छन् भने नेपाली कांग्रेसका उम्मेदवार राजेन्द्रकुमार घिमिरेले ५१० मत ल्याएका छन् । त्यस्तै, नेपाली कम्युनिष्ट पार्टी डिल्लीराम घिमिरेले ७० मत ल्याएका छन् ।
झापा– ४ मा रास्वपाको सुरुवाती अग्रता
भद्रपुर । झापा प्रतिनिधिसभा सदस्य निर्वाचन क्षेत्र नं ४ मा राष्ट्रिय स्वतन्त्र पार्टी (रास्वपा) का शम्भुप्रसाद ढकालले सुरुआती अग्रता लिएका छन् । निर्वाचन कार्यालयले सार्वजनिक गरेको विवरणअनुसार उनले ७५०, नेकपा एमालेका लालप्रसाद साँवा लिम्बूले ३०० मत प्राप्त गरेका छन् । त्यस्तै, नेपाली कांग्रेसका देउकुमार थेबेले २७१ मत प्राप्त गरेका छन् ।
प्रारम्भिक मतगणनामा रास्वपाको ‘लहर’: ओली-गगनजस्ता शीर्ष नेता पछि
काठमाडौं । प्रतिनिधिसभा निर्वाचनको प्रारम्भिक मतगणनाले यसपटकको चुनावी प्रतिस्पर्धामा नयाँ शक्ति राष्ट्रिय स्वतन्त्र पार्टी (रास्वपा) को बलियो उपस्थिति देखाएको छ । विभिन्न दलका अध्यक्ष तथा शीर्ष नेताहरू नै आफ्ना निर्वाचन क्षेत्रमा पछि पर्न थालेपछि राजनीतिक वृत्तमा ठूलो चर्चा सुरु भएको छ । झापा-५ मा केपी शर्मा ओली रास्वपाका उम्मेदवारसँग पछि परेका छन् । नेपाल कम्युनिस्ट पार्टी (एमाले) का अध्यक्ष तथा पूर्वप्रधानमन्त्री ओली प्रारम्भिक मतगणनामा रास्वपाका उम्मेदवारसँग पछाडि परेपछि त्यहाँ रोचक प्रतिस्पर्धा देखिएको छ । यस्तै, सर्लाही-४ मा गगन थापा पनि रास्वपाका उम्मेदवारसँग पछि परेको प्रारम्भिक परिणामले देखाएको छ । नेपाली कांग्रेस का सभापति थापा पछि परेपछि यो क्षेत्र पनि चर्चामा आएको छ । त्यसैगरी काठमाडौं-३ मा कुलमान घिसिङ पनि रास्वपाका उम्मेदवारसँग प्रतिस्पर्धामा पछि देखिएका छन् । मधेशकेन्द्रित राजनीतिमा प्रभाव राख्ने नेताहरू महेन्द्र राय यादव र राजेन्द्र महतो समेत आफ्ना क्षेत्रमा रास्वपाका उम्मेदवारसँग पछाडि परेको प्रारम्भिक मतपरिणाम सार्वजनिक भएका छन् । यसबीच पुराना दलका शीर्ष नेतामध्ये पुष्पकमल दाहाल मात्रै प्रारम्भिक मतगणनामा अग्रता लिइरहेका छन् । देशका धेरै निर्वाचन क्षेत्रमा रास्वपाका उम्मेदवारहरूले अग्रता लिइरहेका छन् भने अन्य साना दलका उम्मेदवारहरूको उपस्थिति निकै कमजोर देखिएको छ । पुराना दलका मात्र होइन, नयाँ दलका शीर्ष नेताहरू समेत मतगणनामा पछि पर्न थालेपछि यसपटकको चुनावी परिणाममा रास्वपाको ‘लहर’ बलियो देखिएको विश्लेषण हुन थालेको छ ।
३२ वर्षीय योगेशको संसदमा दोस्रो पटक इन्ट्री, यस्तो छ व्यावसायिक र राजनीतिक पृष्ठभूमि
काठमाडौं । नेपाली कांग्रेसका उम्मेदवार योगेश गौचन विजयी भएका छन् । उनी मस्ताङ–१ बाट विजयी भएका हुन् । उनले निकटतम् प्रतिस्पर्धी नेकपा एमालेका इन्द्र धारा विष्टलाई हराएर जित निकालेका हुन् । ३२ वर्षीय गौचनले ३ हजार ३०७ मत पाएर विजयी भएका हुन् । उनले प्रतिस्पर्धीको भन्दा १ हजार ५ सय १ मतले जित निकालेका हुन् । उनी अघिल्लो प्रतिनिधि सभा सदस्य निर्वाचनमा पनि विजयी भएका थिए । उनी नेपाली कांग्रेस मुस्ताङका सभापति रोमी गौचन थकालीका छोरा हुन् । योगेश थासाङ गाउँपालिका लेतेका बासिन्दा हुन् । उनले बिजनेस म्यानेजमेन्टमा स्नातक गरेका छन् । उनी पर्यटन व्यवसायी र होटल व्यवसायी पनि हुन् । उनी पार्टीको साविक लेते गाउँ सभापति, जिल्ला सदस्य हाल कांग्रेस गण्डकी प्रदेश सदस्य र महाधिवेशन प्रतिनिधि भएर नेपाली कांग्रेसमा सक्रिय बन्दै आएका छन् । सानै उमेरदेखि राजनीतिमा सक्रिय थकालीले जिल्लामा नेपाल विद्यार्थी संघबाट राजनीति सुरु गरेका थिए । नेविसंघको राजनीतिसँगै भूगोलमा पनि जोडिएका थकाली जिल्ला कार्यसमिति सदस्य पनि सानै उमेरमा भएका थिए । उनले होटल कालोपानी, लेते मुस्ताङ र पोखरामा त्रिथुङ्गा ट्राभल्स एण्ड टुर्स प्रालि एमडी, मुस्ताङमा किवी खेतीलगायत अर्गानिक कृषि फार्म सञ्चालन गर्दै आएका छन् ।
काभ्रे– २ मा रास्वपाका बदनको अग्रता
काठमाडौं । काभ्रेपलाञ्चोक- २ मा राष्ट्रिय स्वतन्त्र पार्टी (रास्वपा)का उम्मदेवार बदन भण्डारीले अग्रता कायम गरेका छन् । उनले पछिल्लो मतपरिणाम अनुसार १ हजार ५३३ मत प्राप्त गरेका छन् । नेकपा एमालेका अशोक ब्यन्जुले १ हजार ४०, नेपाली कांग्रेसका उम्मेदवार मधु आचार्यले ५५३ र नेकपाकी बसुन्धारा हुमागाईंले १८५ मत पाएकी छन् ।
मुस्ताङ –१ मा कांग्रेसका योगेश गौचन विजयी, घोषणा हुन बाँकी
काठमाडौं । मुस्ताङ –१ मा ३ हजार ३०७ मत ल्याएर नेपाली कांग्रेसका योगेश गौचन थकाली विजयी भएका छन् । निर्वाचन आयोगले उनको जीत घोषणा गर्न भने बाँकी छ । गौचनका निकटतम प्रतिस्पर्धी नेकपा एमालेका इन्द्र धारा डादु विष्टले १ हजार ८०६ मत ल्याए । त्यसैगरी, राष्ट्रिय स्वतन्त्र पार्टी (रास्वपा) का अधितीय चन्द थकालीले ७५९ मत पाए । गौचन अघिल्लो प्रतिनिधि सभा सदस्य निर्वाचनमा पनि विजयी भएका थिए । उनले नेकपा एमालेका प्रेमप्रसाद तुलाचलाई हराउँदै जीत हासिल गरेका हुन् ।
