टीएमएसमा समस्या देखिएपछि कारोबार बन्द, नेप्सेले भन्यो- सरी
काठमाडौं । आइतबार ब्रोकरको टीएमएसमा प्राविधिक समस्या देखिएको छ । टीएमसमसमा समस्या आएपछि दिउँसो १२ बजेर ३ मिनेट पछि सेयर कारोबार हुन सकेको छैन । ‘नेप्से कारोबार व्यवस्थापन प्रणालीमा केही प्राविधिक समस्या आएकोले हाल कारोबार रोक्का राखिएको छ । हामी उक्त समस्या समाधानका लागि प्रयासरत छौं । यसबाट पर्न गएको असुविधा प्रति क्षमा प्रार्थी छौं ।’, नप्सेले भन्याे । टीएमएसमा समस्या देखिएपछि सेयर बेच्दा मल्टीपल इन्ट्री भएकाे लगानीकर्ताले गुनासाे गरेका छन् ।
लक्ष्मी इक्वीटी फण्डले नगद लाभांश वितरण गर्ने
काठमाडौं । लक्ष्मी क्यापिटल मार्केट योजना व्यवस्थापक रहेको लक्ष्मी म्युचुअल फण्ड अन्तर्गत सञ्चालित लक्ष्मी इक्वीटी फण्डले इकाईधनीहरुलाई नगद लाभांश वितरण गर्ने छ । फण्डले आर्थिक वर्ष २०७६/७७ को लागि योजनाको इकाईधनीहरुलाई कर सहित ४.२५ प्रतिशत नगद लाभांश दिने प्रस्ताव गरेको छ । उक्त प्रस्ताव भदौ १२ गते शुक्रबार सम्पन्न संस्थाको ६०औं सञ्चालक समितिको बैठकले गरेको हो । उक्त प्रस्तावलाई संस्थाको आगामी साधारणसभाले पारित गरेपछि इकाईधनीहरुले सो मात्राको नगद लाभांश पाउने छन् ।
८ हजार ७० जनाले समाज लघुवित्तको आईपीओ पाउने
काठमाडौं । समाज लघुवित्त वित्तीय संस्थाले निष्काशन गरेको साधारण सेयर(आईपीओ)को शुक्रबार प्रिअलोटमेन्ट भएको छ । जस अनुसार ८ हजार ७० जना आवेदकले १० कित्ताकाे दरले संस्थाको सेयर पाउने बिक्री प्रबन्धक सिद्धार्थ क्यापिटलले जनाएको छ । क्यापिटलका अनुसार उक्त आईपीओमा परेको आवेदन मध्ये ५ लाख ४७ हजार ३ सय ७० वटा आवेदन योग्य भएका छन् भने बाँकी १६ हजार ७ सय ६८ वटा आवेदन रद्द भएकाे छ । गत भदौ ४ गतेदेखि भदाै ८ गतेसम्म निष्काशन भएकाे उक्त आईपीओमा ५ लाख ६४ हजार एक सय ३८ जना आवेदकबाट एक करोड १९ लाख ८९ हजार ८० कित्ता सेयरको लागि आवेदन परेको थियाे । जुन संस्थाले सर्वसाधारणमा माग गरेको तुलनामा १४८.५६ गुणा बढी आवेदन परेको थियो । साथै, कम्पनीकाे सेयर बाँडफाँड भने सम्भवतः बेलुकासम्म हुन सक्ने क्यापिटलले जनाएकाे छ । ‘हामीले प्रिअलोटमेन्ट गरी बाेर्डमा रिपाेर्ट पठाएका छाैं । उताबाट अनुमति आयाे भने आजै बाँडफाँड हुन्छ । आज अनुमति आएन भने साेमबारसम्ममा बाँडफाँड गर्छाैं ।’, क्यापिटलका प्रमुख कार्यकारी अधिकृत धुर्व तिमल्सिनाले विकासन्युजसँग भने । संस्थाले गत भदौ ४ गतेदेखि भदाै ८ गतेसम्म ८३ हजार कित्ता अर्थात ८३ लाख रुपैयाँ बराबरको सेयर निष्काशन खुल्ला गरेको थियो । जसमध्ये जारी पुँजीको ०.५० प्रतिशत अर्थात एक हजार सेयर कर्मचारीलाई सुरक्षित गरेको छ । त्यस्तै, कूल साधारण सेयर मध्येको ५ प्रतिशत अर्थात ४ हजार ३ सय कित्ता सेयर सामूहिक लगानी कोषको लागि बाँडफाँड भएको र बाँकी रहने ८० हजार ७ सय कित्ता साधारण सेयरहरुको सार्वजनिक निष्काशन गरेकाे छ । उक्त सेयरमा लगानीकर्ताले न्यूनतम १० कित्तादेखि अधिकतम ५ हजार कित्तासम्मका लागि आवेदन दिन सक्ने व्यवस्था रहेकाे थियाे ।
