३९ कम्पनीको करिब १० अर्बको बोनस सेयर सूचिकृत, कसले दियो सबैभन्दा बढीे ?
काठमाडौं । चालू आर्थिक बर्ष शुरु भएयता धितोपत्र बजारमा बोनसबाट मात्रै करिब १० अर्ब रुपैयाँ बराबरको सेयर थपिएको छ । नेपाल धितोपत्र बोर्डका अनुसार ६ महिनाको अवधिमा करिब १० करोड ७६ लाख कित्ता बराबरको बोनस सेयर सूचिकृत भएको हो । बोर्डका अनुसार ०७४ साउन एक गतेदेखि ०७४ माघ १९ गतेसम्ममा ३९ कम्पनीको सो मात्राको बोनस सेयर सूचिकृत भएको छ । उक्त ६ महिनाको अवधिमा विभिन्न बैंक तथा वित्तीय संस्था, जलविद्युत, बीमा, होटल र अन्य गरी कुल ९ अर्ब ९८ करोड ७५ लाख ९० हजार ३५० रुपैयाँ बराबरको बोनस सूचिकृत भएको हो । सो मध्ये राष्ट्रिय बीमा संस्थानले सबैभन्दा बढी बोनस सेयर दिएको छ । यस इन्स्योरेन्सले आफ्ना सेयरधनीलाई ११४.२७ प्रतिशत बोनस वितरण गरेको हो । त्यस्तै, सबैभन्दा कम नेपाल इन्स्योरेन्स कम्पनी र बरुण हाइड्रोपावरले ५/५ प्रतिशत बोनस सेयर वितरण गरेका छन् । बोनस सूचिकृत गर्ने मध्ये अन्य बाँकी ३६ कम्पनीको विवरण हेर्नलाई यसमा क्लिक गर्नुहोस् । नेपाल राष्ट्र बैंकले पूँजीवृद्धि योजना सार्वजनिक गरेपश्चात नेप्सेमा सूचिकृत कम्पनीहरुले बोनस सेयर वितरणलाई प्राथमिकता दिँदै आएका हुन् ।
नेप्सेमा ६२ लाख ८८ हजार कित्ता सेयर थपियो, कुन कुन कम्पनीले थपे ?
काठमाडौं । नेपाल स्टक एक्स्चेञ्ज(नेप्से)मा बिहीबार मात्रै ६२ लाख ८८ हजार ५९७ कित्ता सेयर थपिएको छ । बजारमा विभिन्न तीन कम्पनीको हकप्रद र बोनस गरी सो मात्राको सेयर थपिएका छन् । नेप्सेमा जेबिल्स फाइनान्स र गुहेश्वरी मर्चेन्ट बैंकिङ एण्ड फाइनान्सको हकप्रद सेयर सूचिकृत भएका छन् भने ओरियन्टल होटल लिमिटेडको बोनस सेयर सूचिकृत भएको छ । सबैभन्दा बढी जेबिल्स फाइनान्सको २८ लाख ८९ हजार ५६२ कित्ता र गुहेश्वरी मर्चेन्टको १९ लाख ७३ हजार ९२८ कित्ता हकप्रद सेयर नेप्सेमा थपिएको हो । त्यस्तै, ओरियन्टल होटलको १४ लाख २५ हजार १०६ कित्ता बोनस सेयर थपिएको छ । बिहीबार सूचिकृत सेयर मध्ये सबैभन्दा बढी हकप्रद सेयर सूचिकृत भएको छ । सो दिन दुई कम्पनीको गरी ४८ लाख ६३ हजार हकप्रद सेयर नेप्सेमा थपिएको छ ।
सेञ्चुरी कमर्शियल बैंकको फागुन ११ गतेदेखि बुक क्लोज, ७औँ वार्षिक साधारणसभामा जाँदै
काठमाडौं । सेञ्चुरी कमर्शियल बैंकको आगामी फागुन ११ गतेदेखि बुक क्लोज हुने भएको छ । बैंकले साधारणसभामा जाने प्रयोजनको लागि सो दिन देखि फागुन ३० गते(अर्थात १९ दिन)सम्म बुक क्लोज गर्न लागेको हो । बैंकको आगामी ७औँ वार्षिक साधारणसभा फागुन ३० गते हुँदै छ । उक्त सभामा बैंकले सेयरधनीलाई ५ प्रतिशत बोनस र ५ प्रतिशत नगद गरी १० प्रतिशत लाभांश दिने प्रस्ताव पारित गर्दै छ । हाल कम्पनीको चुक्ता पुँजी ७ अर्ब ६७ करोड ९४ लाख रुपैयाँ रहेको छ । ५ प्रतिशत बोनस पश्चात कम्पनीको पुँजी ८ अर्ब नाघ्ने कम्पनीले जनाएको छ । साथै, बैंकले हालको चुक्ता पुँजीको ५ प्रतिशत अर्थात ३८ करोड ३९ लाख ७३ हजार रुपैयाँ बराबरको नगद लाभांश(कर सहित) वितरण गर्ने भएको छ ।
