महिला उद्यमीलाई सार्वजनिक प्रस्तुतीकरण सीप तालिम, २५ जनाको सहभागिता
काठमाडौं । मोरङ उद्योग व्यापार संघको महिला उद्यम समितिको आयोजनामा तथा विराटनगर महानगरपालिकाको सहयोगमा सञ्चालन गरिएको तीन दिने ‘प्रभावकारी सार्वजनिक प्रस्तुतीकरण तथा कार्यक्रम सञ्चालन सीप विकास तालिम’ सफलतापूर्वक सम्पन्न भएको छ । महिला उद्यमीहरूको नेतृत्व क्षमता, सार्वजनिक प्रस्तुतीकरण, बोल्ने कला तथा कार्यक्रम सञ्चालन सम्बन्धी सीप अभिवृद्धि गर्ने उद्देश्यसहित आयोजित तालिममा मोरङ जिल्लाका २५ जना महिला उद्यमीहरूको सहभागिता रहेको थियो । जेठ २९, ३० र ३१ गते सञ्चालन गरिएको तालिममा प्रभावकारी प्रस्तुतीकरण, वक्तृत्वकला, सञ्चार सीप, आत्मविश्वास अभिवृद्धि, कार्यक्रम सञ्चालनका विधि तथा व्यवहारिक अभ्यासजस्ता विषयमा प्रशिक्षण प्रदान गरिएको थियो । उद्घाटन समारोहमा महिला उद्यम समितिकी सह–संयोजक साधना झाको सभापतित्व तथा संघका उपाध्यक्ष अनिल सारडाको प्रमुख आतिथ्यता रहेको थियो । कार्यक्रममा प्रमुख अतिथि सारडाले महिला उद्यमीहरूलाई व्यवसायसँगै आफ्नो विचार र उत्पादन प्रभावकारी रूपमा प्रस्तुत गर्न सक्ने क्षमता आजको आवश्यकता भएको उल्लेख गरे । तालिमको सहजीकरण ए वान मिडिया प्रालिका सञ्चारकर्मी तथा प्रशिक्षक भागिरथ कुमार पोखरेलले गरेका थिए । प्रशिक्षणका क्रममा सहभागीहरूलाई आत्मविश्वासका साथ बोल्ने तरिका, बडी ल्याङ्ग्वेज, आवाजको प्रयोग, प्रस्तुतीकरण कला तथा प्रभावकारी संवादजस्ता व्यावहारिक अभ्यास गराइएको थियो । समापन समारोहमा संघका अध्यक्ष अनुपम राठीले तालिमबाट प्राप्त सीपले महिला उद्यमीहरूको व्यवसायिक तथा व्यक्तिगत जीवनमा महत्वपूर्ण योगदान पुर्याउने विश्वास व्यक्त ग रे। उनले आगामी दिनमा पनि यस्ता तालिमलाई निरन्तरता दिने प्रतिबद्धता जनाए । महासचिव संजय कुमार श्रेष्ठले तालिमले महिला उद्यमीहरूलाई व्यवसायिक तथा सामाजिक क्षेत्रमा अझ सक्रिय बनाउन मद्दत गर्ने बताए । सह–संयोजक साधना झाले यस्ता सीप विकास तालिम महिला उद्यमीहरूको सशक्तीकरणका लागि अत्यन्त महत्वपूर्ण रहेको बताउँदै सहयोग गर्ने सबै पक्षप्रति धन्यवाद व्यक्त गरिन् । सहभागीहरूले तालिमपछि सार्वजनिक रूपमा बोल्ने आत्मविश्वास, कार्यक्रम सञ्चालन सीप तथा व्यवसाय प्रवद्र्धनका लागि आवश्यक प्रस्तुतीकरण कला विकास भएको प्रतिक्रिया दिएका छन् ।
दुई वन कर्मचारीविरुद्ध मुद्दा दर्ता, १० जना रिहा
काठमाडौं । कैलालीमा वनका कर्मचारीले टेम्पो भिरबाट खसालेको घटनामा दुई कर्मचारीविरुद्ध मुद्दा चलेको छ। प्रहरीले डिभिजन वन कार्यालय, कैलालीका वरिष्ठ वन अधिकृत कृष्णबहादुर बोहरा र जमदार चेतराज फूलाराविरुद्ध शान्ति विरुद्धको कसुरमा मुद्दा चलाएको जनाएको छ । जिल्ला प्रशासन कार्यालय, कैलालीले उनीहरूलाई सात दिन थुनामा राखेर अनुसन्धान गर्न अनुमति दिएको छ । सार्वजनिक स्थानमा शान्ति भंग गरेको कसुरमा मुद्दा चलाउन अनुमति दिएको हो । जिल्ला प्रहरी प्रवक्ता डिएसपी योगेन्द्र तिमिल्सिनाले पक्राउ गरिएका वनका १२ जना कर्मचारीमध्ये दुई जनाविरूद्ध मुद्दा दर्ता गरी बाँकी १० जनालाई रिहा गरिएको जानकारी दिए । पीडितको जाहेरीका आधारमा दुई जनाविरूद्ध मुद्दा चलाइएको उनको भनाइ छ । गत शुक्रबार दिउँसो कैलालीको गोदावरी नगरपालिका–४ भीमदत्त राजमार्गअन्तर्गत पर्ने बासपानीमा डिभिजन वन कार्यालयका कर्मचारीले गोदावरीकै स्थानीय ४४ वर्षीया धनादेवी धामीको टेम्पो भिरबाट धकेलेर खसालेका थिए । धामीले आफ्नो घर नजिकै भीमदत्त राजमार्गको गाईमारे डाँडाको सडक किनारमा टेम्पो राखी पानी, चाउचाउ, बिस्कुट, अण्डा लगायतका वस्तु बिक्री गर्दै आएकी थिइन्। सडक किनारमा बसेर वन क्षेत्र अतिक्रमण गरी व्यापार गर्न नपाइने भन्दै वनका कर्मचारीले धामीको टेम्पो भिरबाट खसालिदिएका थिए । उक्त घटनाको सामाजिक सञ्जालहरूमा आलोचनासमेत भएको थियो। त्यसपछि प्रहरीले टेम्पोधनी महिलासँग सोधपुछ पनि गरेको थियो । भीरबाट खसालेको टेम्पोको वास्तविकता के हो ?
टिभिएसको सवारी किन्दा दुई वर्षसम्म कर तिर्न नपर्ने
काठमाडौं । नेपालका लागि टिभिएस दुईपाङ्ग्रे तथा तीनपाङ्ग्रे सवारी साधनको आधिकारिक वितरक जगदम्बा मोटर्स प्रालिले ‘२ वर्ष ट्याक्स फ्री टिभिएसमा खुशी नै खुशी’ योजना सार्वजनिक गरेको छ । ग्राहकलाई सहज र किफायती सवारी स्वामित्व अनुभव प्रदान गर्ने उद्देश्यसहित ल्याइएको यस योजनाअन्तर्गत टिभिएसका मोटरसाइकल तथा स्कुटर खरिद गर्दा २ वर्षसम्मको सवारी कर सुविधा उपलब्ध हुने कम्पनीले जनाएको छ । योजनासँगै ग्राहकले न्यूनतम प्रक्रिया मार्फत फाइनान्स सुविधा, २ हजार ८९९ रूपैयाँबाट सुरु हुने ईएमआई, पुरानो सवारी साटेर नयाँ टिभिएस खरिद गर्ने एक्सचेन्ज सुविधा समेत प्राप्त गर्नेछन् । कम्पनीका अनुसार यस अफरले सवारी खरिद प्रक्रिया अझ सहज, किफायती र आकर्षक बनाउने विश्वास लिइएको छ । ग्राहकलाई नजिकको आधिकारिक टिभिएस शोरुममा गई योजनाबारे विस्तृत जानकारी लिन आग्रह गरिएको छ । नेपालमा टिभिएस मोटर कम्पनीको एकमात्र वितरकका रूपमा रहेको जगदम्बा मोटर्सले देशभर सञ्जाल विस्तार गर्दै अटोमोबाइल क्षेत्रमा योगदान दिँदै आएको जनाएको छ ।
सचिवहरूको संयुक्त बैठकमा पुस्करमाथि कारवाही केन्द्रित
काठमाडौं । नयाँ सरकार गठन भएपछि पहिलोपटक नेपाल सरकारका सचिवहरूको बैठक बसेको छ । प्रधानमन्त्री तथा मन्त्रिपरिषद्को कार्यालय, सिंहदरबारमा मुख्यसचिव सुमनराज अर्यालको अध्यक्षतामा बसेको बैठकमा प्रस्तावित निजामती विधेयकसहित विविध विषयमा छलफल भएको स्रोतले जनाएको छ । मुख्यसचिवको अध्यक्षतामा हरेक महिनाको पहिलो सोमबार सचिव बैठक बस्ने प्रचलन रहेपनि नयाँ सरकार गठनपछि नियमित बैठक हुन सकेको थिएन । ‘मुख्यसचिव अर्यालले अग्रसरता नलिएपछि लामो समयसम्म बैठक बस्न सकेको थिएन,’ एक सचिवले भने । उनका अनुसार यसअघि एकपटक बैठकको सूचना आए पनि अन्तिम समयमा स्थगित भएको थियो । एक सचिवले बैठकमा चारवटा एजेन्डाका रूपमा जेन–जी आन्दोलनका क्रममा जलेर काम नलाग्ने अवस्थामा पुगेका सवारीसाधनको लिलामी प्रक्रिया, मन्त्रालय तथा सरकारी निकायहरूको संगठन तथा व्यवस्थापन सम्बन्धी कार्यको प्रगति, तत्काल कार्यान्वयन गर्नुपर्ने योजनाहरू र कार्यविधिसम्बन्धी विषयमा छलफल भएको जानकारी दिए । मुख्यतः चारवटा एजेन्डामा आज सचिव बैठक बसे पनि छलफलका क्रममा निजामती प्रशासन विरुद्ध राजनीतिक नेतृत्वले गरिरहेको अपमानपूर्ण व्यवहार र यसमा मुुख्यसचिव अर्यालको मौनताबारे पनि बैठकमा प्रश्न उठेको थियो । खासगरी सचिव कृष्णहरि पुस्कारमाथि भएको दुर्व्यवहारबारे सचिवहरूले मुख्यसचिवसँग छलफल गरेको ती सचिवले जानकारी दिए । बैठकमा संघीय निजामती सेवा विधेयकको प्रावधानमा मुख्यसचिव अर्यालले विधेयकका केही प्रावधानबारे चासो र असन्तुष्टि राखेको ती सचिवले बताए । सचिवहरूको चासोका विषयमा मुख्यसचिवले केही स्पष्ट पार्ने प्रयत्न गरेका थिए । उनका अनुसार निजामती प्रशासनमा देखिएका चुनौती र सुधारका विषयमा पनि बैठकमा छलफल भएकाे थियो । सामान्यतया सचिव बैठकमा मन्त्रालयहरूको कार्यसम्पादन समीक्षा, सरकारका प्राथमिकता निर्धारण, आगामी कार्ययोजना तथा अन्तरमन्त्रालय समन्वयका विषयमा छलफल हुने गरेको विगतको अभ्यास रहिआएको छ । विगतमा बैठकबाट निष्कर्षमा पुगेका विषयहरू सम्बन्धित मन्त्रालयमार्फत मन्त्रिपरिषदमा प्रस्तावका रूपमा लगेर निर्णय गराउने अभ्याससमेत रहँदै आएको छ ।
६४ जिल्लामा रास्वपाको अधिवेशन सम्पन्न
काठमाडौं । राष्ट्रिय स्वतन्त्र पार्टी (रास्वपा)ले आफ्नो संगठनात्मक संरचना निर्माण अभियानअन्तर्गत देशभरका अधिकांश तहमा अधिवेशन सम्पन्न गरेको जनाएको छ । पार्टीका महामन्त्री कबिन्द्र बुर्लाकोटीले हालसम्म ४ हजार ३६३ वडामा, ६०९ पालिकामा तथा ६४ जिल्लामा अधिवेशन सम्पन्न भइसकेको जानकारी दिए । रास्वपाका अनुसार कर्णाली प्रदेशका डोल्पा र हुम्ला, लुम्बिनी प्रदेशको रुकुम पूर्व, गण्डकी प्रदेशका मनाङ र मुस्ताङ तथा मधेश प्रदेशका धनुषा, सप्तरी, बारा र सर्लाही जिल्लामा अधिवेशन हुन बाँकी रहेको छ । त्यस्तै, अधिवेशन प्रक्रिया सुरु भएर विभिन्न कारणले स्थगित भएका जिल्लामा सिन्धुपाल्चोक, सिराहा, महोत्तरी र रौतहट रहेका छन् । पार्टीले कोशी, बागमती, गण्डकी र लुम्बिनी प्रदेशका प्रदेश अधिवेशन सम्पन्न भइसकेको जनाएको छ । मधेश प्रदेशको अधिवेशन स्थगित रहेको तथा कर्णाली र सुदूरपश्चिम प्रदेशको अधिवेशन प्रक्रिया जारी रहेको जानकारी दिइएको छ । रास्वपाले आफ्नो पहिलो राष्ट्रिय महाधिवेशन आगामी असार ७, ८ र ९ गते चितवनमा आयोजना गर्ने तयारीलाई तीव्र बनाएको जनाएको छ। पार्टी नेतृत्वका अनुसार महाधिवेशनमार्फत नयाँ नेतृत्व चयनसँगै आगामी राजनीतिक कार्यदिशा तय गरिनेछ। महामन्त्री बुर्लाकोटीले संगठन विस्तार अभियान अपेक्षाअनुसार अघि बढिरहेको उल्लेख गर्दै बाँकी जिल्लाहरूमा पनि छिट्टै अधिवेशन सम्पन्न गरिने बताए।
सरकारी नियन्त्रणमा रहेका बीवाईडीका सबै गाडी फुकुवा
काठमाडौं । मुस्ताङमा दुई सातादेखि सशस्त्र प्रहरीले नियन्त्रणमा लिइएका बिवाइडी कम्पनीको चाइनिज विद्युतीय सवारी साधनलाई फुकुवा गरिएको छ । सशस्त्र प्रहरी बल नेपालले जोमसोम र कोरलानाकामा नियन्त्रणमा लिइएका ती सवारीसाधन आइतबार साँझदेखि फुकुवा गरेको सशस्त्र प्रहरी बल नेपाल ३३ नं गुल्म जोमसोमले जनाएको छ । मुस्ताङको उत्तरी कोरलानाका हुँदै गत जेठको दोस्रो र तेस्रो हप्तामा बीवाईडी कम्पनीका ७७५ विद्युतीय सवारी साधनहरु नेपाल भित्रिएका थिए । ती मध्ये ६४९ विद्युतीय सवारीको मुस्ताङ भन्सार कार्यालय नेचुङले भन्सार जाँचपास गरेको जनाइएको छ । कोरला नाकाबाट यसरी भित्रिएका ती विद्युतीय सवारीसाधनको पैठारी प्रक्रियामा कैफियत हुनसक्ने आशङ्कामा सशस्त्र प्रहरी बलले उक्त सवारीसाधन नियन्त्रणमा लिएको थियो । कोरलानाकाबाट ती सबै विद्युतीय सवारीसाधनलाई साइमेक्स ईंकले खरिद गरी नेपाल भित्र्याएको थियो । ती सवारीसाधनको कैफियत रहे/नरहेको यकिन गर्न अर्थ मन्त्रालयले भन्सार विभाग, नीति तथा सञ्चालन महाशाखाअन्तर्गतको मूल्याङ्कन शाखा प्रमुख रहेका निर्देशक भुपालराज शाक्यको संयोजकत्वमा तीन सदस्य छानबिन समिति गठन गरिएको थियो । सरकारद्वारा गठित छानबिन समितिको टोलीले गत जेठ २१ मा कास्की, पर्वत र मुस्ताङको जोमसोम र कोरलानाकामा सशस्त्र प्रहरीले नियन्त्रणमा लिइएका विद्युतीय सवारीसाधनको स्थलगत अनुमगन गरी अनुसन्धान सुरुआत गरेको थियो । उक्त समितिको प्रारम्भिक प्रतिवेदनअनुसार कोरलानाकाबाट नेपाल भित्रिएका विद्युतीय सवारीसाधनमा कैफियत फेला नपरेको प्रारम्भिक निष्कर्ष निकालेको जनाइएको छ । यसअघि सशस्त्र प्रहरी बल नेपालले गत दुई सातादेखि कास्कीको हेमजामा ९८ र पर्वतको कुश्मा १७ विद्युतीय सवारीसाधन नियन्त्रणमा लिएको थियो । यसैगरी मुस्ताङको कोरलानाकाबाट लोमान्थाङ हुँदै जोमसोम झारिएका २६६ र कोरलानाकामा ३९४ विद्युतीय सवारी साधनलाई सशस्त्र प्रहरीले नियन्त्रणमा लिएको थियो । सशस्त्र प्रहरीद्वारा नियन्त्रणमा लिएका ती साधनलाई आइतबार साँझ सम्बन्धित पक्षको जिम्मा लगाइएको सशस्त्र प्रहरी बल नेपाल ३३ गुल्मका सशस्त्र प्रहरी नायब उपरीक्षक भेषराज गिरीले जानकारी दिए । सशस्त्र प्रहरी बल नेपालको केन्द्रीय निर्देशनअनुसार नियन्त्रणमा लिइएका सबै विद्युतीय सवारीसाधन आइतबार साँझदेखि फुकुवा गरिएको उनले बताए । कैफियतको आशङ्कामा कोरलानाकाबाट नेपाल भित्रिएका विद्युतीय सवारीसाधन दुई सातासम्म सशस्त्र प्रहरीको नियन्त्रणमा रहेको थियो । कैफियत फेला नपरेपछि जोमसोम र कोरलानाकामा नियन्त्रणमा ती सवारी साधनलाई फुकुवा भएसँगै गन्तव्यतर्फ प्रस्थान गरेका सशस्त्र प्रहरी नायव उपरीक्षक गिरीले बताए । उनका अनुसार जोमसोम बसपार्कमा राखिएका २६६ विद्युतीय सवारीसाधनमध्ये आइतबार र सोमबार गरी २२३ विद्युतीय सवारीसाधन गन्तव्यतर्फ प्रस्थान गरेको जनाइएको छ । जोमसोम बसपार्कमा अहिले २६६ विद्युतीय सवारीसाधनमध्ये ४३ मात्रै बाँकी रहेको सशस्त्र प्रहरीले उल्लेख गरेको छ । यसैगरी कोरलानाकामा राखिएका विद्युतीय सवारीमध्ये भन्सार जाँचपास भएका सवारीसाधन पनि क्रमशः गन्तव्यतर्फ लैजाने र भन्सार जाँचपास नभएका विद्युतीय सवारीसाधनको पनि आवश्यक भन्सार प्रक्रिया पुरा गरी गन्तव्यतर्फ लैजान समस्या नभएको सशस्त्र प्रहरी बल नेपाल ३३ गुल्मले जनाएको छ । रासस
नेको नेपालको अध्यक्षमा पुनः राजेन्द्रप्रसाद पाण्डे निर्वाचित
काठमाडौं । मनमोहन मेडिकल कलेज स्थापना तथा सञ्चालन गर्ने उद्देश्यसहित स्थापित नेपाल स्वास्थ्य सेवा सहकारी संस्था लिमिटेड (नेको नेपाल) को अध्यक्षमा पुनः राजेन्द्रप्रसाद पाण्डे निर्वाचित भएका छन् । राजधानीमा सोमबार सम्पन्न संस्थाको २०औँ वार्षिक साधारणसभापछि नयाँ नेतृत्व चयनका लागि भएको निर्वाचनमा पाण्डेले आफ्ना दुई प्रतिस्पर्धीलाई पराजित गर्दै अध्यक्ष पदमा दोस्रो कार्यकालका लागि नेतृत्व सुरक्षित गरेका हुन् । बागमती प्रदेशका पूर्व मुख्यमन्त्री तथा नेकपा नेता समेत रहेका पाण्डेले संस्थाको आगामी नेतृत्व सम्हाल्ने भएका छन् । निर्वाचन परिणामअनुसार उपाध्यक्षमा डा. झलक गौतम र हरिप्रसाद उप्रेती निर्वाचित भएका छन् । त्यस्तै सचिवमा टेकबहादुर बम, सहसचिवमा (निर्वाचन परिणामअनुसार) र कोषाध्यक्षमा चुनादेवी केसी खड्का निर्वाचित भएकी छन् । निर्वाचित सदस्यहरूमा ईश्वरी खनाल, लक्ष्मी राई, शोभा सापकोटा, डा. रविन्द्र रेग्मी र बोधकुमार अधिकारी रहेका छन् । यसपटकको निर्वाचनमा अध्यक्षका प्रत्याशीका रूपमा राजेन्द्रप्रसाद पाण्डे, ई. गम्भीरलाल श्रेष्ठ र शिवप्रसाद सिम्खडाको नेतृत्वमा छुट्टाछुट्टै प्यानल चुनावी मैदानमा उत्रिएका थिए । निर्वाचन परिणामअनुसार अधिकांश पदाधिकारी तथा सदस्यहरू पाण्डे र श्रेष्ठ समूहबाट उम्मेदवार बनेकाहरू निर्वाचित भएका छन् ।
सेफ सन्तोष शाह छुटे, पीडितले पाए रकम
काठमाडौं । सेफ सन्तोष शाह ठगी कसुरमा पक्राउ परेपछि रिहा भएका छन् । बैंकिङ कसुरको आरोपमा पक्राउ परेका शाह सोमबार बेलुका छुटेका हुन् । काठमाडौं जिल्ला प्रहरी परिसरका प्रमुख दिलीप घिमिरेका अनुसार पीडित पक्षसँग लेनदेन मिलेर चेक बमोजिमको रकम प्राप्त भइसकेपछि शाहलाई रिहा गरिएको हो । उपत्यका अपराध अनुसन्धान कार्यालयले शाहलाई धनुषाबाट पक्राउ गरी काठमाडौं ल्याएको थियो । थप अनुसन्धानका लागि उनलाई जिल्ला प्रहरी परिसर, भद्रकालीमा बुझाइएको थियो । प्रहरीले यसै प्रकरणमा सोही रेष्टुरेन्टका अर्का सञ्चालक नारायण साह सुडीलाई पनि पक्राउ गरेको थियो । गैरीधारास्थित रेष्टुरेन्टसँग सम्बन्धित विवादमा सकुन्तला अधिकारी थापाले मुद्दा दर्ता गराएकी थिइन् । सन्तोष शाह नेपाली खानालाई अन्तर्राष्ट्रिय स्तरमा चिनाउने चर्चित सेफ हुन् । उनी सन् २०२१ मा बीबीसी मास्टरसेफ कार्यक्रममा सहभागी भई चर्चामा आएका थिए ।
