नेको इन्स्योरेन्सले १० प्रतिशत बोनस दिने
काठमाडौं । नेको इन्स्योरेन्सले आफ्ना सेयरधनीलाई १० प्रतिशत बोनस सेयर दिने भएको छ । साथै, कम्पनीले गत आर्थिक वर्षको नाफाबाट कर प्रयोजनको लागि शुन्य दशमलब ५२ प्रतिशत नगद लाभांश पनि दिने निर्णय गरेको छ । उक्त निणर्य भदौ ४ गते बसेको कम्पनी सञ्चालक समितिको बैठकले गरेको हो । बैठकको निर्णयलाई बीमा समितिले स्वीकृत तथा कम्पनीको आगामी साधारणसभाले पारित गर्नु पर्ने छ ।
मंसिर १० गते दुवै तहको निर्वाचन गर्ने मन्त्रिपरिषदको निर्णय, भारत भ्रमणमा बाँधका विषय उठाइने
काठमाडौं। सरकारले आगामी मंसिर १० गते प्रदेश र संघीय संसदको निर्वाचन गर्ने निर्णय गरेको छ । प्रधानमन्त्री तथा मन्त्रिपरिषद् कार्यालय सिंहदरबारमा आज बसेको मन्त्रिपरिषद्को बैठकले प्रदेश र संघको निर्वाचन एकै दिन मंसिर १० गते गर्न निर्वाचन आयोगलाई सिफारिस गर्ने निर्णय गरेको सूचना तथा सञ्चार मन्त्री मोहनबहादुर बस्नेतले जानकारी दिए । त्यसैगरी, मन्त्रिपरिषद्ले प्रधानमन्त्री देउवाको आसन्न भारत भ्रमणमा भूकम्पपछि पुनःनिर्माण प्राधिकरणलाई आर्थिक सहयोग गर्ने भनी भारतले गरेको प्रतिबद्धता, पुराना सन्धि सम्झौता, लक्षणपुर बाँध, कोशी बाँध र त्यसबाट भएको नोक्सानीका बारेमा छलफल गर्ने निर्णय गरेको छ । कोशी बाँध बगाउँदा स्थानीय जनतालाई भारत सरकारले दिने भनेको रु ५० करोड अहिलेसम्म नदिएको हुँदा त्यसबारे समेत भ्रमणमा छलफल हुनेछ । पञ्चेश्वर जलविद्युत् आयोजना, वाणिज्य व्यापार, सन् १९५० को सन्धि, नेपाल–भारत रेल्वेलगायतका बारेमा पनि भ्रमणमा छलफल हुने बताइएको छ ।
सिटिजन्स बैंकको भदौ १२ गतेदेखि ५ दिन बुक क्लोज
काठमाडौं । सिटिजन्स बैंक इन्टरनेशनलको आगामी भदौ १२ गतेदेखि ५ दिन बुक क्लोज हुने भएको छ । वार्षिक साधारणसभा प्रयोजनको लागि भदौ १२ गतेदेखि १६ गतेसम्म बैंकको बुक क्लोज हुन लागेको हो । बैंकले हालसम्म साधारणसभाकोे मिति भने तोकेको छैन । साभामा बैंकले सेयरधनीलाई १७ प्रतिशत लाभांश वितरण गर्ने विशेष प्रस्ताव लैजाँदै छ । बैंकको सञ्चालक समितिले गत आर्थिक वर्ष २०७३/७४ को वितरण योग्य मुनाफाबाट उक्त लाभांश वितरण गर्ने निर्णय गरेको हो ।
नियमन शुल्क नतिरेपछि नेप्सेले ७ ब्रोकरको कारोबार रोक्यो
काठमाडौं । नेपाल स्टक एक्सचेन्ज लिमिटेड (नेप्से) ले सोमबार ७ वटा ब्रोकर कम्पनीको सेयर कारोबार रोक्का गरेको छ ।धितोपत्र बोर्डलाई नियमन शुल्क नबुझाएपछि नेप्सेले उनीहरुको कारोबार रोक्का गरेको हो । कारोबार रोक्का हुने ब्रोकर कम्पनीमा अग्रवाल सेक्युरिटिज, आशुतोष ब्रोकरेज एन्ड सेक्युरिटिज, भृकुटी स्टक ब्रोकिङ कम्पनी, क्रियटिभ सेक्युरिटिज, डाइनमिक मनी म्यानेजर सेक्युरिटिज, श्री कृष्ण सेक्युरिटिज र साउथ एसियन बुल्स प्रालिलाई कारोबार गर्न बन्देज लगाएको नेप्सेले जनाएको छ । गत वर्षको नियमन शुल्क नबुझाएपछि बोर्डको निर्देशनमा कारोबार रोक्का गरेको नेप्सेका प्रवत्ता मुराहरि पराजुलीले बताए । बोर्डलाई शुल्क तिरेपछि कारेबार खुला हुने उनको भनाई छ । कुल कारोबारको ०.६ प्रतिशत सेवा शुल्क बुझाउनु पर्ने छ ।
विद्युत् सेवा सञ्चालन भएको एक दिन नबित्दै फेरि अवरुद्ध
गुल्मी । गुल्मीको परोपकार सहकारी लघु जलविद्युत् परियोजनाको विद्युत् सेवा फेरि अवरुद्ध भएको छ । मुसीकोट नगरपालिका–७ को बसेरीमा करिब ३० मिटर नहर भत्किँदा विद्युत् सेवा फेरि अवरुद्ध भएको हो । एक सय ३५ किलोवाट क्षमता भएको विद्युत् परियोजना अवरुद्ध भएसँगै नगरपालिकाका वडा नं १, २, ८ का झण्डै एक हजार २०० घरधुरीका उपभोक्ता अन्धकारमा बस्न बाध्य भएका छन् भने विभिन्न उद्योगधन्दा, कलकारखानासमेत ठप्प भएका छन् । एक हप्ताअघि अवरुद्ध विद्युत् ३ गते सञ्चालनमा ल्याइए पनि आइतबारदेखि पुनःअवरुद्ध भएको छ । विद्युत् सेवा सञ्चालन गर्न केही दिन लाग्ने विद्युत् सञ्चालक समितिका अध्यक्ष धन्मेन्द्रकुमार मल्लले जानकारी दिए । रासस
रोल्पाका ६० प्रतिशत जनता टेलिफोनको पहुँचमा
रोल्पा । दुर्गम पहाडी जिल्ला रोल्पाका ६० प्रतिशतभन्दा बढी जनता टेलिफोन सेवाको पहुँचमा रहेको नेपाल टेलिकम रोल्पाले जनाएको छ । अघिल्लो आर्थिक वर्षमा जिल्लाका विभिन्न पाँच स्थानमा विस्तार गरिएको टेलिफोन टावरसँगै सेवा विस्तार भएको कार्यालय प्रमुख कैलाश आचार्यले जानकारी दिए । अघिल्लो आर्थिक वर्षमा जिल्लाका सिर्प, जेल्वाङ, होलेरी, भावाङ र लिवाङमा नयाँ टावर स्थापना गरिएसँगै सेवामा सुधारसमेत भएको हो । चालु आवमा थप छ स्थानमा नयाँ टावर थप्ने कार्यक्रम रहेकाले जिल्लामा टेलिफोनको पहुँचमा ८० प्रतिशत जनता पुग्ने टेलिकमले जनाएको छ । यसैगरी नेपाल टेलिकमले जिल्लाका सिर्प र जेल्वाङमा एक हजार ५८० सिम निःशुल्क वितरण गरेको छ । जनताले निःशुल्क सिम माग गरेपछि क्षेत्रीय निर्देशकको अनुगमनपश्चात् आवश्यकता महसुस गरी निःशुल्क वितरण गरेको बताइएको छ । जनताको माग भएमा चालु आर्थिक वर्षमा पनि अझ केही सिम निःशुल्क बाँडिने आचार्यले बताए।
नेपाल औषधीले असोजदेखि सिटामोल उत्पादन थाल्ने, १० प्रतिशत सस्तोमा पाइने
काठमाडौं । सरकारी स्वामित्वको नेपाल औषधि लिमिटेडले आगामी असोजदेखि सिटामोल पनि उत्पादन थाल्ने भएको छ । हाल जीवनजल मात्र उत्पादन गरिरहेको लिमिटेडले आफनो उत्पादनमा विविधिकरण गरी सिटामोलको पनि उत्पादन गर्न लागेको हो । हप्तामा ५ लाख सिटामोल ट्याब्लेट उत्पादन गर्ने लक्ष्य लिएको लिमिटेडका महाप्रवन्धक रोभस कुसम सुवेदीले बताए । उनका अनुसार १ ब्याचमा साढे ३ लाख ट्याब्लेटसम्म सिटामोल उत्पादन गर्न सकिन्छ । एक ब्याजका लागि ३ देखि ४ दिनसम्म लाग्छ । लिमिटेडले बिक्री गर्ने सिटामोल बजार मूल्य भन्दा १० प्रतिशत सस्तो पर्ने सुवेदीले जानकारी दिए । सिटामोल उत्पादन थाल्न नयाँ उपकरण जडान भइसकेको उनले बताए । बन्द भएको ८ वर्षपछि उद्योग पुनः सञ्चालनमा आएको हो । औषधि लिमिटेडले सुरुवाती दिनदेखि जीवनजल उत्पादन गर्दै आइरहेको छ । दोस्रो चरणमा अत्यावश्यक र बजारमा खपत बढी भएका १५ भन्दाबढी प्रकारका औषधि उत्पादन गर्ने उनको भनाई छ । तेस्रो चरणमा क्याप्सुल, पेनसिलिन गु्रपका औषधि, झोल तथा मलम उत्पादन गर्ने र सर्पले डसेपछि लगाउने खोप एन्ट्राभेनसका लागि शाखा सञ्चालनमा ल्याई स्लाइन र हेमोडाइलसिस फ्युल्ड जस्ता अति आवश्यक औषधिको उत्पादनका लागि काम अगाडि बढाएको छ । तत्कालिन उद्योगमन्त्री नविन्द्रराज जोशीको पहलमा उद्योग सञ्चालनमा आएको हो । उद्योग सञ्चालनका लागि सरकारले १४ करोड रुपैयाँ अनुदान दिएको छ । औषधी उत्पादन गर्नका लागि नयाँ उपकरण खरिद गरि सञ्चालनमा ल्याइएको छ । वि.सं. ०६७ मा विश्व स्वास्थ्य सङ्गठनले अन्तराष्ट्रिय मापदण्डअनुसार असल उत्पादन प्रणाली (गुड म्यानुफ्याक्चरिङ प्राक्टिस, जिएमपी) अनिवार्य र निरन्तर नोक्सानमा गएपछि उद्योग बन्द भएको थियो । बाढी प्रभावित क्षेत्रमा जीवनजल वितरण लिमिटेडले बाढी प्रभावित क्षेत्रमा जीवनजल वितरण गरिरहेको छ । पछिल्लो समयमा अविरल वर्षाका कारण तराईका विभिन्न क्षेत्रमा बाढीबाट प्रभावितका लागि लिमिटेडले जीवनजल वितरण गरिरहेको छ । हालसम्म सप्तरी र मोरङ गरी दुई ठाँउमा ३ हजार पुरिया जीवनजल वितरण गरिसकेको सुवेदीले जानकारी दिए । अन्य प्रभावित जिल्लामा पनि १५ हजारसम्म जीवनजल वितरण गर्ने लक्ष्य रहेको उनले बताए । “बाढी प्रभावित क्षेत्रमा झाडा पखाला लाग्ने सम्भावना प्रबल भएपछि तत्कालका लागि हामीले समयमा नै जिवन जल पठाउन सकेनौं भने महामारीको रुप लिने सम्भावना हुन्छ”उनले भने ।
कमला सिँचाइ आयोजनामा १३ करोडको क्षति, सिँचाइ प्रभावित
सिरहा । हालै आएको बाढीपहिरोले कमला नहर सिँचाइ आयोजनामा करिब १३ करोड रूपैयाँ बराबरको क्षति भएको छ । कमला नहर हर्दिनाथ सिँचाइ आयोजना डिभिजन कार्यालय, पोर्ताहाका कार्यालय प्रमुख गौतम ठाकुरका अनुसार नहरको पूर्वी नहर प्रणाली सिरहातर्फ ५ करोड र कमला नहर पश्चिमी नहर प्रणालीतर्फ ७ करोड र हर्दिनाथ सिँचाइ प्रणालीतर्फ १ करोड रूपैयाँ बराबरको संरचना बाढीपहिरोबाट पूर्णरुपमा क्षतिग्रस्त भएको बताइएको छ । सिरहाको १२ हजार ५०० हेक्टर जमिन र धनुषाको १२ हजार ५०० हेक्टर जमिन गरी कूल २५ हजार हेक्टर जमिनमा सिँचाइ सुविधा पु¥याइरहेको सो आयोजना बाढीबाट क्षतिग्रस्त हुदा सिँचाइमा समस्या पुगेको प्रमुख ठाकुरले बताए । विसं २०१७ मा तत्कालीन सिँचाइमन्त्री गणेशमान सिंहले शिलान्यास गरेकाे कमला सिँचाइ आयोजना विगत ३ वर्षदेखि पूर्णरुपमा निर्माण भएपछि सिरहा र धनुषाको धान, गहँ खेतीमा सिँचाइ सुविधा पु¥याउँदै आएको थियो । कमला नहर र हर्दिनाथ सिँचाइ आयोजनाको नहरको पुरानो तथा नयाँ संरचना भासेको बाँध तथा केनल पूर्णरुपमा क्षतिग्रस्त भएको नहरका ग्राभेलबाटो टुटफुट भएको र नहर संरचनामा बाढीले तोडफोड गरेकाले त्यसलाई पुनःनिर्माणमा ठूलो रकम खर्च हुने सो कार्यालयका इन्जिनियर अरुण यादवले राससलाई भने । साथै सो नहर क्षतिग्रस्त हुँदा सिरहा एवं धनुषाको धानखेतीसमेत बालुवा र माटोले पुरिएर नष्ट भएको जिल्ला कृषि विकास कार्यालय सिरहाले जनाएको छ । कमला नहरको निर्माणले विगत दुई वर्षदेखि कृषि उत्पादन वृद्धि हुनुका साथै कमला नदीलाई समेत नियत्रण गर्दै आएको शारसर गाउँका रतिस यादवले भने । गत वर्ष २०७३र०७४ मा कमला नहर सिँचाइका लागि १७ करोड र समृद्ध तराई कार्यक्रमतर्फ र ५ करोड रूपैयाँ खर्च गरी सो नहरको संरचनाका साथै सिँचाइका कार्य गरिएको सो कार्यालयले जनाएको छ ।
