हुम्लामा कांग्रेसका जयपति रोकाया विजयी
काठमाडौं । प्रतिनिधिसभातर्फ एक मात्र निर्वाचन क्षेत्र रहेको हुम्लामा नेपाली कांग्रेसका उम्मेदवार जयपति रोकाया निर्वाचित भएका छन् । मुख्य निर्वाचन अधिकृतको कार्यालयका अनुसार कांग्रेसका रोकाया ८ हजार ७९६ मत प्राप्त गरेर विजयी भएका हुन् । उनका निकटतम प्रतिद्वन्द्वी नेपाल कम्युनिष्ट पार्टीका डा. दिपेन्द्र रोकायाले ७ हजार २४३ मत प्राप्त गरे । यस्तै नेकपा (एमाले)का दल फडेराले ४ हजार ३३१, रास्वपाका टासी ल्हाजोमले १ हजार, प्रलोपाका जटिल कार्कीले २४८, नेपाल कम्युनिष्ट पार्टी (माओवादी) का कुम्भ बुढाले १२८ र राष्ट्रिय प्रजातन्त्र पार्टीका छक्क बुढाले १२४ मत प्राप्त गरे । हुम्लाका ६४ मतदान केन्द्रमा २२ हजार ४६७ मत खसेको थियो ।
मनाङको थप पर्यटन र पूर्वाधार विकासमा मेरो प्राथमिकता रहन्छ : नवनिर्वाचित सांसद गुरुङ
काठमाडौं । नवनिर्वाचित प्रतिनिधिसभा सदस्य टेकबहादुर गुरुङ मनाङको समग्र उन्नयनमा आफूले पहिलो प्राथमिकता दिने बताएका छन् । प्रतिनिधिसभा सदस्य पदमा निर्वाचित भएपछि उनले आफूलाई अमूल्य मतदान गरि विजयी गराउने सबै मतदातालाई विशेष धन्यवाद समेत दिए । प्रतिनिधि सभा सदस्य निर्वाचनमा नेपाली काङ्ग्रेसका उम्मेदवार गुरुङ २ हजार ४१५ मत प्राप्त गरी विजयी भएका हुन् । उनको प्रतिस्पर्धी नेपाली कम्युनिष्ट पार्टी (नेकपा) का यशोदा सुवेदी गुरुङले ४५४ मत प्राप्त गरेको मुख्य निर्वाचन अधिकृत रामप्रसाद पौडेलले जानकारी दिए । उनका अनुसार मङ्गोल नेसनल अर्गनाइजेसनका रामबहादुर गुरुङ (नवीन)ले नौ मत पाए । कूल ७ हजार मतदातामध्ये २ हजार ९२३ मत खसेको र ४५ मत बदर भएको जिल्ला निर्वाचन अधिकारी जीवन कुँवरले जानकारी दिए । जिल्ला कूल मतदाता ७ हजार रहेका छन् । अस्थायीसहित २९ मतदान केन्द्रमार्फत मतदाताले मतदान गरेका थिए । जिल्लाको विकासमा सक्रिय रहँदै उनी पर्यटन र पूर्वाधार विकाससँगै राजनितिक प्रतिनिधित्व गर्छन् । विसं २०११ मङ्सिर ११ गते मनाङ ङिस्याङ गाउँपालिका-८ टङ्की मनाङमा उनको जन्म भएको थियो । ७१ वर्षीय नेता गुरुङ पार्टीका पाका नेताको रुपमा परिचित छन् । मनाङको पूर्वाधार, पर्यटन, उर्जा क्षेत्रमा विकासमा उनको विशेष योगदान रहेको छ । विसं २०७० मा दोस्रो संविधानसभा निर्वाचनमा पनि गुरुङ निर्वाचित भएका उनी विसं २०७४ को प्रतिनिधि सभा सदस्य निर्वाचनमा नेकपा (एमाले)का पोल्देन छोपाङ गुरुङसँग २८९ मतले पराजित भएका थिए । त्यसपछि उनी पुनः विसं २०७९ को प्रतिनिधि सभा सदस्य निर्वाचनमा निर्वाचित भएका थिए । नेपाली कांग्रेसका तत्कालीन सभापति सुशील कोइराला प्रधानमन्त्री हुँदा विसं २०७० फागुन १३ गतेदेखि विसं २०७२ पुस ९ गतेसम्म श्रम तथा रोजगार राज्यमन्त्रीसमेत बनेका थिए । विसं २०३६ सालमा वीपी कोइरालाबाट कांग्रेसको सदस्यता लिएर राजनीतिमा प्रवेश गरेका उनी कांग्रेस मनाङको पूर्व जिल्ला सभापति पनि हुन् ।
शरतसिंह भण्डारीलाई हराउँदै महोत्तरी-२ मा रास्वपाका साह निर्वाचित
काठमाडौं । गत बिहीबार भएको प्रतिनिधिसभा सदस्य निर्वाचनअन्तर्गत आज मतगणना सम्पन्न हुँदा महोत्तरी क्षेत्र नं २ बाट राष्ट्रिय स्वतन्त्र पार्टीका दीपककुमार साह निर्वाचित भएका छन् । रास्वपाका साह ३२ हजार ७३२ मत प्राप्त गरी निर्वाचित भएको मुख्य निर्वाचन अधिकारी माधवप्रसाद अधिकारीले जानकारी दिए । उनका निकटतम प्रतिद्वन्द्वी जनता समाजवादी पार्टीका शरतसिंह भण्डारीले १० हजार १९८ र नेपाली कांग्रेसका किरण यादवले ९ हजार ७४५ मत प्राप्त गरेको मुख्य निर्वाचन अधिकृतको कार्यालयले जनाएको छ । सो क्षेत्रमा विभिन्न दलका र स्वतन्त्र समेत गरी ३७ उम्मेदवार चुनावी मैदानमा थिए ।
पूर्वउपसभामुखसँग पूर्वसभामुख घिमिरे पराजित, कसले कति मत ल्याए ?
काठमाडौं । पूर्वउपसभामुखले पूर्वसभामुखलाई पराजित गरेकी छिन् । झापा प्रतिनिधिसभा सदस्य निर्वाचन क्षेत्र नम्बर २ मा पूर्वसभामुख तथा नेकपा (एमाले)का उम्मेदवार देवराज घिमिरेलाई पराजित गर्दै पूर्वउपसभामुख तथा राष्ट्रिय स्वतन्त्र पार्टी (रास्वपा)की उम्मेदवार इन्दिरा राना मगर विजयी भएकी हुन् । निर्वाचन परिणामअनुसार मगरले ५२ हजार ३०६ मत प्राप्त गरी विजय हासिल गरिन् भने घिमिरेले ९ हजार ८०५ मत प्राप्त गरे । यसैगरी श्रम संस्कृति पार्टीका केशवकुमार भण्डारीले ६ हजार ३४७ मत प्राप्त गरेका छन् भने नेपाली कांग्रेसकी सरिता प्रसाईले ४ हजार ९७६ मत प्राप्त गरिन् ।
धनकुटामा एमालेका राजेन्द्रकुमार राई विजयी
काठमाडौं । प्रतिनिधिसभा सदस्यमा धनकुटाबाट नेकपा (एमाले) का राजेन्द्रकुमार राई विजयी भएका छन् । उनले १८ हजार १३२ मत प्राप्त गरे । विजयी राईका निकतम प्रतिद्वन्द्वी नेपाली कांग्रेसका दिनेश राईले १४ हजार २५७ मत पाए । यस्तै श्रम संस्कृति पार्टीका सानबहादुर राईले ११ हजार ९३२ मत तथा रास्वपाका दिनेश भण्डारीले ९ हजार ९४४ मत प्राप्त गरे । विजयी राईलाई निर्वाचन अधिकृत हरिषचन्द्र इङ्नामले प्रमाणपत्र प्रदान गरे । जिल्लामा कुल १ लाख १८ हजार ४२५ मतदाता रहेका छन् । निर्वाचनमा ३ स्वत्रन्त्र र १४ दलसहित १७ उम्मेदवार चुनावी मैदानमा थिए ।
सुदुरपश्चिममा रास्वपाको हालसम्म ५ क्षेत्रमा जित, को कहाँबाट ?
काठमाडौं । प्रतिनिधिसभा सदस्य निर्वाचनअन्तर्गत सुदुरपश्चिम प्रदेशमा राष्ट्रिय स्वतन्त्र पार्टी (रास्वपा) ले हालसम्म ५ सिट जितेको छ । डडेल्धुरामा ३४ वर्षपछि नेपाली कांग्रेसको गढ ढलेको छ । डडेल्धुराबाट रास्वपाका डा. ताराप्रसाद जोशी १९ हजार १३१ मतसहित विजयी भएका छन् । उनले आफ्ना निकटतम प्रतिद्वन्द्वी कांग्रेसका नैनसिंह महरलाई ७ हजार १० मतको फराकिलो अन्तरले पछि पारे । त्यसैगरी, नेकपाका मानसिंह मालले ६ हजार ८३४ मत पाए भने एमालेका चक्र स्नेही ३ हजार २६ मतसहित चौथो स्थानमा रहे । कञ्चनपुरमा पनि रास्वपाले शानदार प्रदर्शन गर्यो । कञ्चनपुर-२ मा दीपक बोहरा ३३ हजार ९५२ मतसहित विजयी भए, कांग्रेसका नारायणप्रकाश साउँदले १० हजार ८२७ मत ल्याए भने एमालेका बचनबहादुर सिंहले ६ हजार ४१८ मत प्राप्त गरे । कञ्चनपुर-३ मा ज्ञानेन्द्र सिंह महताले २७ हजार ११८ मत ल्याएर कांग्रेसका हरि प्रसाद बोहरालाई १७ हजार ६७५ मतान्तरले पराजित गरे । कैलालीमा पनि रास्वपाको प्रभुत्व देखियो । कैलाली-१ बाट कमोल ज्ञवाली १७ हजार ८२६ मतसहित विजयी भइन् । कैलाली-३ बाट जगतप्रसाद जोशी २० हजार ३५९ मतसहित फराकिलो अन्तरले जिते । कैलाली-५ बाट आनन्दबहादुर चन्द ३१ हजार ९५३ मतसहित निर्वाचित भए । यो जितसँगै रास्वपाले सुदुरपश्चिमका परम्परागत कम्युनिस्ट र कांग्रेसको गढमा आफ्नो प्रभुत्व स्थापित गरेको छ । अन्य क्षेत्रमा मतणना जारी छ ।
डोनाल्ड ट्रम्पले भने- आज इरानमाथि अत्यधिक प्रहार गरिनेछ
काठमाडौं । अमेरिकी राष्ट्रपति डोनाल्ड ट्रम्पले शनिबार इरानमाथि ‘धेरै कडा’ आक्रमण गरिने चेतावनी दिएका छन् । उनले आवश्यक परे नयाँ लक्ष्यहरूमा आक्रमण गर्न सकिने सङ्केत पनि दिए । ट्रम्पले सामाजिक सञ्जालमार्फत भने, ‘आज इरानमाथि अत्यधिक प्रहार गरिनेछ ।’ उनले इरानको ‘खराब व्यवहार’का कारण केही क्षेत्र र समूहहरूलाई पूर्ण विनाश र निश्चय मृत्युको खतरा भइरहेको बताए । यसअघि इरानी राष्ट्रपति मसूद पेझेस्कियनले .कहिल्यै इजरायल र अमेरिकाको सामु आत्मसमर्पण नगर्ने बताएका थिए । अमेरिका र इजरायलले फेब्रुअरी २८ मा इरानविरुद्ध अभियान सुरु गरेका थिए र त्यसयता इरानले इजरायल र गल्फका अमेरिकी क्षेत्रहरूलाई क्षेप्यास्त्र तथा ड्रोनमार्फत प्रहार गर्दै आएको छ । ट्रम्पले भने, ‘इरान अब मध्यपूर्वको धम्की दिने शक्ति होइन । उहाँहरू मध्यपूर्वको हार्ने पक्ष हुन् ।’
देशभरको मतपरिणाम अपेक्षा अनुसार छैन: नवनिर्वाचित प्रतिनिधिसभा सदस्य राई
काठमाडौं । नेपाल कम्युनिष्ट पार्टी (एमाले) बाट बाँके निर्वाचन क्षेत्र नं २ मा प्रतिनिधिसभा सदस्यमा निर्वाचित मोहम्मद इश्तियाक राईले जनताको विश्वासलाई कमजोर हुन नदिने बताएका छन् । प्रतिनिधिसभा सदस्यमा निर्वाचित भएपछि आज नेपालगञ्जका आमजनतालाई सम्बोधन उनले देश र जनतालाई केन्द्रमा राखेर जनहित र समृद्ध मुलुक निर्माणमा सकारात्मक काम गर्ने प्रतिबद्धता जनाए । नवनिर्वाचिन सदस्य राईले भने, ‘मुलुकभरको पछिल्लो मतपरिणाम पार्टीले गरेको अपेक्षा अनुसार नभएको अवस्थामा बाँके-२ का जनताले आफूलाई जिताउनु भनेको यो क्षेत्रको समग्र विकासप्रति जनताको विश्वास हो, मैले यो विश्वासलाई कमजोर हुन दिनेछैन ।’ उनले जनता समक्ष गरेका सबै प्रतिबद्धता क्रमशः पूरा गर्दै जाने बताउँदै विकासका बाँकी कामलाई पनि निरन्तरता दिने उल्लेख गरे । राईले २४ हजार ६२८ मत प्राप्त गरे भने उनका निकटतम प्रतिस्पर्धी राष्ट्रिय स्वतन्त्र पार्टी (रास्वपा) का उम्मेदवार विवेक कुमार श्रेष्ठले १८ हजार ६८२ मत प्राप्त गर्नुभएको मुख्य निर्वाचन अधिकृतको कार्यालय नेपालगञ्जका प्रवक्ता लालबहादुर कार्कीले जानकारी दिए ।
