हिमालयन जनरलले हकप्रद सेयर निष्कासन गर्ने, अनुमतिका लागि पुग्यो धितोपत्र बोर्ड
काठमाडौं । हिमालयन जनरल इन्स्योरेन्स कम्पनीले हकप्रद सेयर निष्कासन गर्ने प्रक्रिया अघि बढाएको छ । सो प्रयोजनको लागि अनुमति माग्न कम्पनी नेपाल धितोपत्र बोर्ड पुगेको छ । कम्पनीले १६६ दशमलब ६७ (एक बराबर १.६६६७ को अनुपातमा) हकप्रद जारी गर्ने अनुमति मागेको हो। कम्पनीले अंकित मूल्य १०० रुपैयाँको ६४ लाख २० हजार कित्ता सेयर निष्कासन गर्ने प्रक्रिया अघि बढाएको हो । कम्पनीले चैत २० गते धितोपत्र बोर्डमा निवेदन दिएर एनएमबी क्यापिटल मार्फत ६४ करोड २० लाख रुपैयाँ बराबरको हकप्रद जारी गर्न अनुमति मागेको हो ।
मंगलबारको सेयर बजारमा उतारचढाव, एक अर्ब ६३ करोडको सेयर कारोबार
काठमाडौं । मंगलबारको सेयर बजारमा उतारचढाव देखिएको छ । बजार खुलेको करिब आधा घण्टामा घटेर १६३५ अंकमा पुगेको बजारलाई त्यसपछिको कारोबारमा भने केही टेवा पुगेको देखिएको छ । बजारमा बन्द हुँदा नेप्से परिसूचक ३ अंकले घटेर १६५६ अंकमा झरेको छ । सो दिनको बजारमा एक अर्ब ६३ करोड रुपैयाँ बराबरको सेयर कारोबार भएको छ । जुन अघिल्लो दिनको तुलनामा ९० करोड रुपैयाँ घटी हो । सोमबारको बजारमा २ अर्ब ५३ करोड रुपैयाँ बढीको सेयर कारोबार भएको छ । मंगलबार सबैभन्दा बढी नेपाल बैंकको १२ करोड ८५ लाख रुपैयाँ बराबराको सेयर किनबेच भएको छ । सो दिन बैंकको सेयर मूल्य प्रतिकित्ता ५२५ रुपैयाँ रहेको छ । बजारमा कारोबार भएका तीन समूहको परिसूचक उकालो लागेका छन् भने बाँकी चार समूहको परिसूचक ओरालो लागेका छन् । उकालो लाग्नेमा होटल, बीमा र फाइनान्स समूह रहेका छन् । यी तीनको परिसूचक क्रमशः ७७, ९ र २ अंकले उकालो लागेको छ । त्यस्तै, हाइड्रोपावर, विकास बैंक, अन्य समूह र बैंकिङ समूहको परिसूचक क्रमशः ३३, ६.१३, ६.०७ र ३ अंकले ओरालो लागेका छन् ।
गरिमा विकास बैंकले ७० प्रतिशत हकप्रद निष्कासन गर्दै, चैत ३० गते बुक क्लोज
काठमाडौं । गरिमा विकास बैंकले सर्वसाधारणकोलागि ७० प्रतिशत हकप्रद सेयर निष्कासन गर्ने भएको छ । सो प्रयोजनको लागि आगामी चैत ३० गते कम्पनीको बुक क्लोज हुने छ । हाल कम्पनीको चुक्ता पूँजी एक अर्ब २९ करोड ६६ लाख रुपैयाँ रहेको छ । बोनस बाहेक हकप्रद पश्चात कम्पनीको पूँजी २ अर्ब २० करोड ४२ लाख रुपैयाँ नाघ्ने छ । मंगलबार बैंकको सेयर प्रतिकित्ता ४६५ रुपैयाँको हाराहारीमा कारोबार भइरहेको छ ।
