वित्त : विविध

काठमाडौं । एनआईसी एसिया बैंक लिमिटेडले ग्राहकहरूलाई खातामा स्थायी लेखा नम्बर (प्यान) तथा इमेल ठेगाना अद्यावधिक गर्न अनुरोध गरेको छ । बैंकले जारी गरेको सूचनामा ग्राहकको खाताबाट काटिएको कर विवरण आयकर ऐन, २०५८ अनुसार नेपाल सरकार, अर्थ मन्त्रालयअन्तर्गत आन्तरिक राजस्व विभागद्वारा जारी गरिएको स्थायी लेखा नम्बर प्रणालीमा आबद्ध गर्नुपर्ने भएकाले प्यान अद्यावधिक अनिवार्य रहेको उल्लेख गरिएको छ । ग्राहकले बैंकको पोर्टल panupdate.nicasiabank.com तथा मोबाइल बैंकिङ अनुप्रयोग (एनआईसी एसिया मोबाइल बैंक) मा रहेको ‘प्यान अद्यावधिक’ विकल्प प्रयोग गरी आफ्नो प्यान सहजै अद्यावधिक गर्न सक्ने बैंकले जनाएको छ । साथै, नजिकको कुनै पनि एनआईसी एसिया बैंकको शाखा कार्यालयमा गई आवेदन दिएर पनि प्यान अद्यावधिक गर्न सकिने व्यवस्था मिलाइएको  छ। बैंकका अनुसार ब्याज भुक्तानीमा काटिएको कर विवरण विद्युतीय कर कट्टी विवरण प्रणाली (ई–टीडीएस) मा समावेश गर्न प्यान अत्यावश्यक हुन्छ। प्यान अद्यावधिक भएपछि कर विवरण स्वचालित रूपमा सम्बन्धित प्यानमा प्रविष्ट हुने र यसले कर कट्टी प्रमाणपत्र तथा कर चुक्ता प्रमाणपत्र प्राप्त गर्न सहज हुने बैंकको विश्वास छ । प्यान अद्यावधिक नगरिएकै कारण ई–टीडीएसमा ब्याज कर दाखिला नभएमा वा पछि कर समायोजन गर्नुपरेको अवस्थामा बैंक जिम्मेवार नहुने स्पष्ट पारिएको छ । यसैगरी बैंकले ग्राहकलाई खातामा इमेल ठेगाना पनि अद्यावधिक गर्न अनुरोध गरेको छ । ग्राहकले बैंकको भिडियो ग्राहक पहिचान (भिडियो केवाईसी) सेवा, मोबाइल बैंकिङ अनुप्रयोगको ‘मेरो प्रोफाइल’ खण्डमार्फत ‘इमेल परिवर्तन’ विकल्प प्रयोग गरी इमेल ठेगाना अद्यावधिक गर्न सक्नेछन् । शाखा कार्यालयमार्फत पनि इमेल ठेगाना अद्यावधिकको सुविधा उपलब्ध रहेको बैंकले जनाएको छ । यसअघि प्यान उपलब्ध गराए पनि कर विवरण अद्यावधिक नभएको वा इमेल ठेगाना परिवर्तन गर्न बाँकी रहेको अवस्थामा नजिकको शाखा कार्यालय वा ग्राहक सेवा केन्द्रका फोन नम्बर १६६०–०१–७७७७ र ०१–४७८९८९८ मा सम्पर्क गर्न बैंकले अनुरोध गरेको छ ।

काठमाडौं । साताको पहिलो कारोबारको दिन सोमबार सेयर बजार सामान्य अंकले घटेको छ । नेपाल स्टक एक्सचेन्ज (नेप्से) परिसूचक ५ अंकले घटेर २६३५ बिन्दुमा झरेको छ । नेप्सेका अनुसार ७५ कम्पनीको सेयर मूल्य बढ्दा १७८ कम्पनीको मूल्य घटेको छ । ७ कम्पनीको मूल्यमा भने कुनै परिवर्तन आएको छैन ।  सोमबार ३३३ कम्पनीको १ करोड कित्ता सेयर किनबेच हुँदा ६ अर्ब ४७ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार एसवाई प्यानलको ४२ करोड रुपैयाँ बराबरको कारोबार भएको छ । राधी विद्युतको ३१ करोड, मन्जुश्री फाइनान्सको २७ करोड, श्रीनगर एग्रीटेकको २५ करोड र शिवम् सिमेन्टको २४ करोड रुपैयाँ बराबरको कारोबार भएको छ । सोमबार २ कम्पनीको सेयर मूल्यमा सकारात्मक सर्किट लागेको छ । एसवाई प्यानल र श्रीनगर एग्रीटेकको सेयर मूल्य १० प्रतिशतले सकारात्मक सर्किट लागेको हो । उत्पादन तथा प्रशोधन समूह सबैभन्दा धेरै १.०२ प्रतिशतले बढेको छ । त्यस्तै व्यापार समूह सबैभन्दा धेरै १.१६ प्रतिशतले घटेको छ । विकास बैंक ०.०२, होटल तथा पर्यटन ०.१० प्रतिशतले बढेको छ । त्यस्तै बैंकिङ ०.२५, फाइनान्स ०.५३, हाइड्रोपावर ०.११, लगानी ०.४२, जीवन बीमा ०.१८, माइक्रोफाइनान्स ०.६६, निर्जीवन बीमा ०.१४, अन्य ०.२९ प्रतिशतले घटेको छ ।

काठमाडौं । डिप्रोक्स लघुवित्त वित्तीय संस्था लिमिटेडको २४औँ वार्षिक साधारण सभा सोमबार चितवनको सौराहामा सम्पन्न भएको छ । कम्पनीको साधारण सभाबाट १५ प्रतिशत लाभांश पारित भएको हो । साधारण सभाले आर्थिक वर्ष २०८१/८२ को वार्षिक प्रतिवेदन पारित गर्नुका साथै सोही आर्थिक वर्षका लागि लेखापरीक्षक नियुक्त गर्ने प्रस्ताव स्वीकृत गरेको छ । साथै, सेयरधनीलाई १० प्रतिशत बोनस सेयर र ५ प्रतिशत नगद लाभांश (बोनस सेयर र नगद लाभांशमा लाग्ने करसमेत) वितरण गर्ने प्रस्ताव पनि सभाले पारित गरेको छ। बोनस सेयर वितरणपछि संस्थाको चुक्ता पुँजी २ अर्ब ५ करोड ५१ लाख १४ हजार रुपैयाँ पुगेको छ। संस्थाका सञ्चालक समितिका अध्यक्ष दीपक खनालको अध्यक्षतामा सम्पन्न सभामा आर्थिक वर्ष २०८१/८२ को वार्षिक प्रतिवेदनमाथि सेयरधनीहरूले उठाएका जिज्ञासाहरूको अध्यक्षले स्पष्टिकरण गरेका थिए । सभामा प्रमुख कार्यकारी अधिकृत शेषरमण आचार्यले स्वागत मन्तव्य राखेका थिए भने कार्यक्रम सञ्चालन कम्पनी सचिव ज्ञानेन्द्र अर्यालले गरेका थिए । सभाबाट संस्थापक समूहको तर्फबाट नेपाल बैंक लिमिटेडका प्रतिनिधि प्रदीप कुमार पाठक र सर्वसाधारण समूहको तर्फबाट शिवप्रसाद भट्टराई, आयुषी सापकोटा तथा पुष्करनाथ भण्डारी सञ्चालक पदमा निर्विरोध निर्वाचित भएका छन् ।