युनाईटेड इदी-मर्दीकाे आईपीओ बाँडफाँडः भाग्यमानी ६ जनाले पाए ११ कित्ता सेयर
काठमाडौं । युनाईटेड इदी-मर्दी एण्ड आर बि हाईड्रोपावरले निष्काशन गरेको प्राथमिक सेयर (आईपीओ)को आज आइतबार (मंसिर १४ गते) बाँडफाँड भएको छ । उक्त सेयरको बाँडफाँड आज दिउँसो ४ बजे सेयर निष्काशन तथा बिक्री प्रबन्धक ग्लोबल आईएमई क्यापिटलको कार्यालय जमलमा भएको हो । यससँगै बिक्री प्रबन्धक क्यापिटलका अनुसार याेग्य आवेदकमध्ये ८१ हजार २७३ जनाले गोलाप्रथाबाट १० कित्ताका दरले कम्पनीको सेयर हात पारेका छन् । र, बाँकी ४ लाख ५९ हजार १२९ जनाको भने हात खाली भएको छ । त्यस्तै बाँकी रहेको ६ कित्ता सेयर थप ६ जना आवेदकलाई एक एक कित्ताको दरले बाँडफाँड गरिएको छ । उक्त सेयर न्युनतम २० कित्तादेखि अधिकतम १० हजार कित्ताको लागि आवेदन गरेका भाग्यमानी ६ जना आवेदकले पाएका छन् । उक्त आईपीओमा कूल ५ लाख ४१ हजार २६३ जना आवेदकले कम्पनीको ९४ लाख ९८ हजार ४ सय कित्ता सेयरको लागि आवदेन दिएका थिए । जसमध्ये ८६१ जनाको आवेदन रद्द भएको थियो । उक्त याेग्य आवदेन संस्थाले सर्वसाधारणमा माग गरेको भन्दा ११.६९ गुणा बढी हो । कम्पनीले गत मंसिर ३ गतेदेखि मंसिर ७ गतेसम्म ८ लाख ७३ हजार ९१० कित्ता सेयर निष्काशन तथा बिक्री खुल्ला गरेको थियो । कम्पनीले आयोजना प्रभावित क्षेत्रका स्थानिय बासिन्दाहरुको लागि चुक्ता पुँजीको १० प्रतिशतले हुने ४ लाख २० हजार कित्ता सेयर छुट्याएको थियो । जसमध्ये एक लाख ७६ हजार ९० कित्ता सेयर बाँडफाँड गर्दा २ लाख ४६ हजार ९१० कित्ता सेयर बाँकी रहेको छ । त्यसैले सर्वसाधारणको लागि छुट्याएको ६ लाख ३० हजार कित्ता सेयरमा उक्त बिक्री नभएको २ लाख ४६ हजार ९१० कित्ता सेयर गरी कूल ८ लाख ७३ हजार ९१० कित्ता साधारण सेयर निष्काशन गरेको हो । जसमध्ये सामूहिक लगानी कोषमा ४३ हजार ६९६ कित्ता सेयर बाँडफाँड गरेपश्चात ८ लाख १२ हजार ७३६ कित्ता सेयर बाँकी रहेको छ । र, कर्मचारीहरुको लागि १७ हजार ४७८ कित्ता सेयर सुरक्षित गरेकाे छ ।
नेरुडे लघुवित्तको बोनस सेयर सूचीकृत
काठमाडौं । नेरुडे लघुवित्त वित्तीय संस्थाको १५ प्रतिशत बोनस सेयर सूचीकृत भएको छ । संस्थाको आज शुक्रबार मात्रै सो मात्रा अर्थात ५ लाख ९६ हजार ४७० कित्ता बोनस सेयर नेपाल स्टक एक्स्चेञ्जमा सूचीकृत भएको हो । यससँगै, लघुवित्तको बोनस सेयर सेयरधनीको खातामा हस्तान्तरण हुने छ । त्यसपछि दोश्रो बजारमा किनबेच गर्न पनि पाइने छ ।
अरुण काबेलीको सेयर मूल्य समायोजन
काठमाडौं । अरुण काबेली पावरको सेयर मूल्य समायोजन भएको छ । संस्थाको ५.७१ प्रतिशत बोनस पछिको मूल्य समाजोन भएको हो । समायोजन पश्चात संस्थाको सेयर मूल्य प्रतिकित्ता २५४ रुपैयाँ कायम भएको छ । यसअघि संस्थाको सेयर मूल्य प्रतिकित्ता २६९ रुपैयाँ थियो । यससँगै आगामी आइतबार संस्थाको सेयर कारोबार प्रतिकित्ता २५४ रुपैयाँदेखि हुने छ ।
