हिमालयन एयरलाइन्सको दुबई उडान दुई दिनको लागि रद्द
काठमाडौं । हिमालयन एयरलायन्सले आज (शनिबार) र भोलि (आइतबार)को लागि तय गरेको काठमाडौं–दुबई र दुबई–काठमाडौँं उडान अस्थायी रूपमा रद्द गरेको छ । एयरसलाइन्सले एक सूचना जारी गर्दै दुबई अन्तर्राष्ट्रिय विमानस्थलमा जारी परिस्थितिका कारण उडान अ रद्द गरिएको जानकारी दिएको छ । एयरलाइन्सले यात्रुहरूलाई थप जानकारीका लागि एयरलाइन्सको आधिकारिक सामाजिक सञ्जाल तथा वेबसाइट नियमित रूपमा हेर्न अनुरोध समेत गरेको छ ।
झापा ५ मा ४३ हजारभन्दा बढीको मतान्तरले केपी ओली पछाडि
काठमाडौं । झापा निर्वाचन क्षेत्र नं. ५ को मतगणना अन्तिम चरणमा पुग्दा राष्ट्रिय स्वतन्त्र पार्टी (रास्वपा) का उम्मेदवार बालेन्द्र शाहले भारी मतान्तरले अग्रता कायम गरेका छन् । निर्वाचन अधिकृतको कार्यालयका अनुसार शाहले नेकपा एमाले अध्यक्ष एवं पूर्व प्रधानमन्त्री केपी शर्मा ओलीलाई ४३ हजार २ सय १८ को भारी मतान्तरले पछाडि पारेका हुन् । कुल १ लाख ६ हजार ३ सय ७२ मत खसेको यस क्षेत्रमा हालसम्म ९३ हजार ९ सय ४७ मत गणना भइसकेको छ । पछिल्लो परिणाम अनुसार बालेन्द्र शाहले ५९ हजार ५ सय ६८ मत प्राप्त गरेका छन् भने उनका निकटतम प्रतिस्पर्धी नेकपा एमालेका केपी शर्मा ओलीले १६ हजार ३ सय ५० मत प्राप्त गरेका छन् । त्यस्तै, नेपाली कांग्रेसकी मन्धरा चिमरिया १ हजार ६ सय २७ मतसहित तेस्रो स्थानमा र नेपाली कम्युनिस्ट पार्टीका रन्जित तामाङ १ हजार ३ सय २७ मतका साथ चौथो स्थानमा रहेका छन् । अब गणना गर्न केवल १२ हजार ४ सय २५ मत मात्र बाँकी रहँदा बालेन्द्र शाहको जित प्राविधिक रूपमा सुनिश्चित भइसकेको छ ।
टीकाटिप्पणी नगर्न कार्यकर्तालाई रास्वपाको अनुरोध
काठमाडौं । राष्ट्रिय स्वतन्त्र पार्टी (रास्वपा)ले निर्वाचन परिणामलाई लिएर विभिन्न तह र सामाजिक सञ्जाललगायत माध्यमबाट टीकाटिप्पणी नगर्न सम्पूर्ण पार्टीपङ्तिमा आग्रह गरेको छ । सो पार्टीको केन्द्रीय अनुशासन आयोगका कार्यवाहक प्रमुख रमाकान्त रिमालले आज विज्ञप्ति जारी गर्दै जनताको अभिमतलाई उच्च मूल्याङ्कन गरी पूर्ण विश्वासकासाथ जवाफदेहीपूर्ण कार्यसम्पादन गर्न अनुरोध गरेका हुन् । 'निर्वाचनको पूर्ण परिणाम आउन अझै केही समय धैर्य गर्नुपर्ने देखिन्छ । यसै सन्दर्भमा पार्टीका सम्पूर्ण जिम्मेवार सदस्यलाई धैर्यपूर्वक अन्तिम परिणामको प्रतीक्षा गर्न आयोग हार्दिक अनुरोध गर्दछ', विज्ञप्तिमा भनिएको छ, 'निर्वाचनको यस घडीमा त्यस्ता गतिविधि भए गरेको कहीँकतै भेटिएमा पार्टीको विधान, कार्यविधि, आचारसंहिताका आधारमा कारबाही हुनेतर्फ आयोग सबैलाई सचेत गराउँदछ ।' पार्टीको निर्देशनविपरीत कुनै किसिमका गतिविधि नगर्न पार्टीपङ्तिलगायत सम्पूर्णमा अनुरोध गरिएको छ ।
जाजरकोटमा कांग्रेसका खडकबहादुर बुढा विजयी
काठमाडौं । जाजरकोटबाट नेपाली कांग्रेसका खडकबहादुर बुढा विजयी भएका छन् । उनी २० हजार १४२ मतसहित विजयी भएका हुन् । नेपाली कम्युनिस्ट पार्टीका उम्मेदवार शक्तिबहादुर बस्नेतले १७ हजार ४०७ मत ल्याएर दोस्रो भए । त्यस्तै, नेकपा एमालेका डम्बरबहादुर सिंहले १६ हजार ८८३ मत ल्याएका छन् भने राष्ट्रिय स्वतन्त्र पार्टी (रास्वपा)का राघव कार्कीले २ हजार ४७१ मत प्राप्त गरेका छन् ।
काभ्रे २ मा रास्वपाका बदन भण्डारी निर्वाचित
काठमाडौं । काभ्रे २ मा रास्वपाका उम्मेदवार बदन भण्डारी निर्वाचित भएका छन् । भण्डारीले ५३ हजार ३४४ मत प्राप्त गरी प्रतिनिधि सभा सदस्यामा विजयी भएका हुन् । उनका निकटतम प्रतिद्वन्द्वी नेपाली कांग्रेसका मधु आचार्यले १७ हजार ८६८ मत ल्याए । त्यस्तै नेकपा एमालेका अशोक व्यान्जुले १३ हजार ९४० मत प्राप्त गरे । नेकपाका बसुन्धरा हुमागाइले ८ हजार १०७ मत प्राप्त गरे ।
अर्घाखाँचीमा रास्वपाका भुसाल विजयी
अर्घाखाँची । प्रतिनिधिसभा सदस्य निर्वाचनमा अर्घाखाँचीमा राष्ट्रिय स्वतन्त्र पार्टी (रास्वपा)का हरिप्रसाद भुसाल विजयी भएका छन् । मुख्य निर्वाचन अधिकृत शिवलाल पाण्डेका अनुसार भुसालले ३५ हजार २३ मत प्राप्त गरे । यस क्षेत्रमा नेकपा (एमाले)का पीताम्बर भुसालले २२ हजार ६४९, नेपाली कांग्रेसका विष्णुप्रसाद खनाल (मुस्कान)ले १८ हजार ९८३, नेपाली कम्युनिष्ट पार्टीका रामबहादुर चौहानले तीन हजार ८४७ मत प्राप्त गरे । अर्घाखाँचीमा कूल एक लाख ७१ हजार ६५२ मतदाता रहेकामा ८६ हजार ६६८ मत खसेको थियो ।
दोस्रो पटक संसदमा सोविता, हालसम्मकै उच्च मतले विजयी
चितवन । चितवन-३ मा राष्ट्रिय स्वतन्त्र पार्टी (रास्वपा) की उम्मेदवार सोविता गौतम अत्यधिक मतसहित विजयी भएकी छन् । गौतम ५९ हजार २ सय ७७ मत ल्याएर विजयी भएकी हुन् । उनी ३८ हजार ६६२ मतान्तरले विजयी भएकी हुन् । उनले निकटतम प्रतिस्पर्धी नेपाली कम्युनिस्ट पार्टीकी उम्मेदवार रेनु दाहाललाई पराजित गरेकी हुन् । रेनुले २० हजार ६ सय १५ मत ल्याएर दोस्रो भइन् । यसअघि काठमाडौं-२ बाट जितेकी गौतम अहिले चितवन-३ बाट विजयी भएका हुन् । २०५२ सालमा दोलखाको तामाकोशी गाउँपालिका जामुनेमा जन्मिएकी गौतमले कानुनमा स्नातक गरेकी छन् । अधिवक्ता गौतमसँग टेलिभिजन कार्यक्रम निर्माता, प्रस्तोता भएर काम गरेको अनुभव छ ।
कामबाट मन जितें, मत जित्न सकिनँ : रेनु दाहाल
काठमाडौं । चितवन क्षेत्र नम्बर ३ मा नेकपा उम्मेदवार रेनु दाहालले कामबाट जनताको मन जिते पनि मत जित्न नसकेको बताएकी छन् । उनले सामाजिक सञ्जालमा एक स्टास राख्दै सो कुरा बताएकी हुन् । सामाजिक सञ्जालमार्फत उनले रास्वपा उम्मेदवार सोविता गौतमलाई फेसबुकमार्फत् बधाईसमेत दिएकी छिन् । सामाजिक सञ्जालमा उनले लेखेकी छिन्, ‘मैले कामद्वारा तपाईंहरुको मन त जितेँ तर मत जित्न सकिनँ । मत जित्ने सोविता गौतमलाई धेरै धेरै बधाई भन्न चाहान्छु ।’ सामाजिक सञ्जालमा दाहालले झन्डै ३० वर्षे राजनितिक जिवनकालमा भरतपुरमा आफ्नो जीवनको उर्जाशील ९ वर्ष यस ठाउँको विकास, समृद्धि र सुशासनका लागि समर्पित गरेको उल्लेख गरेकी छिन् । त्यस्तै उनले १५ महिना नगर प्रमुखको कार्यकाल बाँकी छँदै बाहिरिएर प्रतिनिधिसभा निर्वाचन चितवन ३ बाट उम्मेदवारी दिएर निर्वाचनमा होमिएकी बताएकी छिन् । सामाजिक सञ्जालमा जनताको साथमा निरन्तर रहने उल्लेख गरेकी छिन् । उनले भनेकी छिन्, ‘चितवनबासीको हक हित, विकास र समृद्धिका लागि भने म निरन्तर साथमा हुनेछु ।’
