इश्वरपुर नगरपालिकाका वडा सदस्य साढे १ लाख घुससहित पक्राउ
काठमाडौं । सर्लाहीको इश्वरपुर नगरपालिकाका वडा नं ११ का वडा सदस्य सोनेलाल साह र उमेश राय साढे १ लाख घुससहित पक्राउ परेका छन् । अख्तियार दुरुपयोग अनुसन्धान आयोगको वर्दिबास टोलीले सूचनाको आधारमा साह र रायलाई वडा नं ७ स्थित साहक कृष्ण इन्टरप्राइजेजबाट घुससहित पक्राउ गरेको हो । उनीहरुले ढलानसम्बन्धी काम सम्पन्न भएपछि उपभोक्ता समितीलाई सिफारिस गरिदिए वापत घुस मागेका थिए । उनीहरुमाथि थप अनुसन्धान भइरहेको आयोगले जनाएको छ ।
गल्छी गाउँपालिकाले विद्यार्थीलाई दियो न्यानाे ट्रयाक सुट
काठमाडौं । धादिङको गल्छी गाउँपालिकाले विद्यार्थीलाई ट्रयाक सुट वितरण सुरु गरेको छ । गाउँपालिकाले ३८ सामुदायिक विद्यालयका कक्षा ४ सम्म अध्ययन गरिरहेका विद्यार्थीलाई निःशुल्क रूपमा ट्रयाक सुट वितरण सुरु गरेको हो । गाउँपालिकाकी उपाध्यक्ष राधा तिमल्सिनाका् अनुसार जाडो मौसममा कपडाको अभावमा बिरामी पर्ने सम्भावनालाई मध्यनजर राख्दै न्यानो ट्र्याक सुट विद्यार्थीलाई हस्तान्तरण गरिएकाे हाे । गाउँपालिकाले गत आर्थिक वर्षमा १० लाख रुपैयाँ बजेट विनियोजन गरेको थियो । सो बजेटबाट नै ट्र्याक सुट खरिद गरी पालिका भित्रका ३८ वटा सामुदायिक विद्यालयका सबै विद्यार्थीलाई वितरण गर्ने गरी हस्तान्तरण गरिएको तिमल्सिनाले जनाइन् । तिमल्सिनाका अनुसार सो बजेट पालिकाको आन्तरिक स्रोतबाट नै संकलन भएको हो । ‘ ट्रयाक सुट कक्षा ४ सम्मका सबै विद्यालयका विद्यार्थीलाई एक हप्ताभित्र वितरण गरीसकेपछि ८ कक्षासम्मका विद्यार्थीलाई पनि सुट वितरण गर्ने हाम्राे याेजना छ,’ उनले भनिन् । गाउँपालिकाको सबै विद्यालयको विद्यार्थीको ड्रेस एउटै होस् भनेर पनि एउटै खाले ट्र्याक सुट वितरण गरिएको उनले बताइन् । गाउँपालिकाले हिजो बागेश्वरी मा.वि र बागेश्वरी आधारभूत विद्यालयमा ट्र्याक सुट वितरण गरिसकेको छ । गाउँपालिकाभित्रका विद्यालयको शैक्षिक गुणस्तर सुधार गर्न पूर्वाधार, स्तरीय पठनपाठन र अतिरिक्त क्रियाकलापमा लगानी गरिरहने तिमल्सिनाले बताएकी छिन् ।
काठमाडौं महानगरको वडा ७ मा मैजुबहाल पार्कको शिलान्यास
काठमाडौं । काठमाडौं महानगरको वडा ७ मा आज मैजुबहाल पार्कको शिलान्यास भएको छ । काठमाडौं महानगरका प्रमुख विद्यासुन्दर शाक्यले उक्त पार्कको शिलान्यास गरेका हुन् । उक्त पार्क निर्माणका जिम्मा शारदादृेवी कन्स्ट्रक्सनले पाएको छ । कन्स्ट्रक्सनले ३३ लाख ६५ हजार १९२ रुपैयाँमा आउँदो चैत मसान्तभित्र उक्त पार्क निर्माण हुने प्रतिबद्धता जनाएको छ ।पार्क सडक किनारामा रहेको करीव २ रोपनी क्षेत्रफलमा निर्माण हुने भएको हो । शिलान्यास अवसरमा बोल्दै प्रमुख शाक्यले, स्वास्थ्य, शिक्षा, पूर्वाधार निर्माण, आर्थिक, सामाजिक तथा पर्यटन विकास, सम्पदाको पुनस्निर्माणलगायत महानगरबासीले आवश्यकता महसुस गरेका सबै क्षेत्रमा काठमाडौं महानगरले लगानी गरेको बताए । यस्तै उपप्रमुख हरिप्रभा खड्गी श्रेष्ठले खुल्ला ठाउँ बचाएर पार्क बनाउने महानगरको नीति कार्यान्वयनमा आएपछि धेरै ठाउँका खुल्ला क्षेत्र बचाउन सकिएको बताइन् । उक्त कार्यक्रममा उपप्रमुख हरिप्रभा खड्गी श्रेष्ठ, वडाध्यक्ष शुद्धकुमार डंगोलसहित जनप्रतिनिधि र स्थानीयबासीको सहभागी रहेको थियो ।
