देश अप्ठ्यारो अवस्थामा पुग्यो भन्ने भाष्य गलत : रवि लामिछाने
काठमाडाैं । राष्ट्रिय स्वतन्त्र पार्टी (रास्वपा)का सभापति रवि लामिछानेले देश अप्ठ्यारो अवस्थामा पुगेको भन्ने भाष्य गलत भएको बताएका छन् । आइतबार सांसदहरूको प्रशिक्षण कार्यक्रमको समापन समारोहलाई सम्बोधन गर्दै उनले देश गलत दिशातर्फ नगएको दाबी गरेका हुन् । उनले कतिपय विश्लेषकहरूले देश कहाँ गयो भन्दै नकारात्मक भाष्य निर्माण गर्न खोजिरहेको उल्लेख गर्दै अहिले देश ट्र्याकमा फर्काउने काम भइरहेको बताए । ‘कतिपय विश्लेषकहरूलाई देश कहीँ अप्ठ्यारोमा पर्यो कि भन्ने लाग्न सक्छ । तर म भन्छु देश कहीँ पनि अप्ठ्यारोमा छैन, हामी देशलाई ट्र्याकमा ल्याउने कोसिसमा छौं । ट्र्याकबाहिर त हिजो थियो,’ लामिछानेले भने। सभापति लामिछानेले रास्वपा देशको सार्वभौमिकता र अखण्डताप्रति अडिग रहेको पनि बताए । उनले पार्टी युवापुस्ताको भविष्यप्रति संवेदनशील रहेको उल्लेख गर्दै राष्ट्रिय हितका विषयमा कुनै सम्झौता नगर्ने स्पष्ट पारे । ‘हामी निर्भीक भएर अडिन सक्छौं, बाल्न सक्छौं । यी विषयहरूमा हामी कहिल्यै सम्झौता गर्दैनौं,’ उनले भने । रास्वपामा केही सांसदहरूको मात्रै सार्वजनिक चर्चा हुने गरेको उल्लेख गर्दै उनले पार्टीभित्र थुप्रै सक्षम र विज्ञ व्यक्तित्व रहेको दाबी गरे । उनले सार्वजनिक वृत्तमा आठ–दश जना सांसदको बढी चर्चा भएपनि पार्टीमा एकसेएक विज्ञ र क्षमतावान नेता रहेको बताए । ‘कोही साथीहरूको सार्वजनिक वृत्तमा चर्चा भइरहन्छ । त्यो समय र आवश्यकताअनुसार चल्ने प्रक्रिया हो । हामी संख्यामा धेरै छौं, कतै न कतै कसैको कुनै विषयमा विवाद भइहाल्न सक्छ,’ उनले भने । लामिछानेले पार्टीका नेता तथा सांसदहरूको अभिव्यक्ति र गतिविधिले मतदातामा निराशा पैदा गर्न सक्ने भन्दै त्यसतर्फ गम्भीर हुन निर्देशनसमेत दिए । उनले आशा र भरोसाका साथ मतदान गरेका नागरिकको भावनामा चोट पुग्ने खालका गतिविधि नगर्न समेत आग्रह गरे ।
आफ्ना सांसदहरूलाई परिणाममुखी काम गर्न रास्वपा सभापति लामिछानेको आग्रह
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आगामी पाँच वर्ष परिणाममुखी काम गर्न नसके आफूहरू अयोग्य सावित हुने बताएका छन् । आइतबार पार्टीका सांसदहरूका लागि ललितपुरमा आयोजना गरिएको दुई दिने प्रशिक्षण कार्यक्रमको समापन सभालाई सम्बोधन गर्दै सभापति लामिछानेले यस्तो बताएका हुन् । उनले केही सांसदहरूले पार्टीमा योगदानको नाममा व्यक्तिगत अपेक्षा राखेर आफू कहाँ आउने गरेको उल्लेख गर्दै योगदानको मूल्य माग्ने समय भइनसकेको स्पष्ट पारे । उनले पार्टीले सहज रूपमा राजनीतिक उचाइ हासिल गरेको भएपनि त्यसको आधार विगतका राजनीतिक आन्दोलन र परिवर्तनले तयार पारेको बताए । सभापति लामिछानेले भने, ‘हामीलाई चुनावमा जाँदा नै बहुमत आउँछ भन्ने थाहा थियो । यति सजिलो संघर्ष दुनियाँमा कहिल्यै कसैले गरेको छैन । हामी त्यति सजिलो संघर्षबाट आएका हौं ।’ फरक विचार, सिद्धान्त र राजनीतिक दृष्टिकोण भएपनि अघिल्ला पुस्ताका नेताहरूले गरेको संघर्षकै जगमा यो क्रान्ति सम्भव भएको उनको भनाइ छ । उनले आफ्नो अभिव्यक्ति र क्रियाकलापहरूले आम नागरिकमा चोट पुग्ने कुरामा सचेत हुन सबै सांसदहरूलाई आग्रहसमेत गरे ।
मुलुकको राष्ट्रिय स्वाधिनता सबैभन्दा अप्ठयारो अवस्थामा पुगेको छ : दाहाल
काठमाडौं । नेपाली कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहालले मुलुकको राष्ट्रिय स्वाधिनता सबै भन्दा अप्ठयारो अवस्थामा पुगेको बताएका छन् । जेनजी आन्दोलनपछिका सबै परिघटनालाई लिएर हेर्दा मुलुकको स्वाधिनता निकै अप्ठयारो अवस्थामा पुगेको देखिएको संयोजक दाहालको जिकिर थियो । आईतवार काठमाडौंमा आयोजित एक कार्यक्रममा बोल्दै उनले मुलुकलाई सो संकटबाट जोगाउनका लागि सबै देशभक्त कम्युनिष्टहरूबीच एकता आवश्यक रहेको बताए । उनले सबै कम्युनिष्ट पार्टीहरूभित्र सिँगै कम्युनिष्ट आन्दोलनलाई एकतावद्ध गरेर अघि बढाउने आवाज उठेकाले नेतृत्वले त्यसलाई स्वीकार गरेर अघि बढ्नुपर्ने बेला आएको पनि बताए । त्यस अवसरमा संयोजक दाहालले नेतृत्वको कम्युनिष्ट आन्दोलनलाई एकतावद्ध बनाउनका लागि अभिभावकीय भूमिका निर्वाह गरिदिन नेकपा (मसाल)का महामन्त्री मोहनविक्रम सिंहलाई आग्रह पनि गरे ।
