नबिल ब्यालेन्स फण्ड-१ले ४२ प्रतिशत नगद लाभांश दिने, भदौ ११ गते बुक क्लोज
काठमाडौं । नबिल म्युचल फण्ड अन्तर्गत संचालित नबिल ब्यालेन्स फण्ड-१ ले आफ्ना इकाईधनीहरुलाई ४२ प्रतिशत नगद लाभांश दिने भएको छ । फण्डले २०७३/७४को नाफाबाट सो मात्राको लाभांश वितरण गर्न लागेको हो । साथै, सोही नगद लाभांश प्रयोजनको लागि आगामी भदौ ११ गते फण्डको इकाई दर्ता किताब बन्द(बुक क्लोज) हुने छ । उक्त निर्णय फण्डको सञ्चालक समितिको बैठकले गरेको हो ।
अरुण भ्याली हाइड्रोले १० प्रतिशत बोनस दिने
काठमाडौं । अरुण भ्याली हाइड्रोपावर डेभलपमेन्ट कम्पनीले आफ्ना सेयरधनीहरुलाई १० प्रतिशत बोनस सेयर दिने भएको छ । साथै, कर प्रयोजनको लागि कम्पनीले शून्य दशमलब ५२६ प्रतिशत नगद लाभांश दिने निर्णय गरेको छ । उक्त निर्णय साउन ३२ गते बसेको कम्पनी सञ्चालक समितिको बैठकले गरेको हो । बैठकको निर्णयलाई कम्पनीको आगामी २०औँ वार्षिक साधारणसभाले पारित गर्नु पर्ने छ ।
स्वरोजगार लघुवित्त विकास बैंकको २९ सय कित्ता सेयर लिलामीमा
काठमाडौं । स्वरोजगार विकास बैंकको २९ सय ८० कित्ता सेयर लिलामीबाट विक्री गरिने भएको छ । यो लघुवित्तले गत असार १ देखि साउन ४ गतेसम्म खुला गरेको हकप्रद सेयरमा बिक्री नभएको सेयर लिलामीबाट बेच्ने भएको छ । यो लघुवित्तले संस्थापकतर्फको १५ सय ८४ कित्ता र सर्वसाधारण तर्फको १३ सय ९६ कित्ता सेयर लिलामीबाट विक्री गर्ने भएको छ । एक सय रुपैयाँ अंकित यो संस्थाको सेयर आवदेन यही भदौ ८ देखि १६ गतेसम्ममा दिइसक्नु पर्ने छ । यसको विक्री प्रवन्धक एनएमबी क्यापिटल लिमिटेड हो ।
