कृषि विकास बैंकको ११ प्रतिशत लाभांश सेयरधनीको खातामा जम्मा
काठमाडौं । कृषि विकास बैंकले सेयरधनीहरुको बैंक खातामा नगद लाभांश जम्मा गरेको छ । बैंकका सेयरधनीहरुको हितग्राही खातामा अद्यावधिक गराएको बैंक खातामा नगद लाभांश जम्मा गरेको बैंकले जनाएको छ । बैंकको चैत १४ गते सम्पन्न १६औँ वार्षिक साधारण सभाले गत आर्थिक वर्ष २०७८/७९ को नाफाबाट सेयरधनीहरूलाई ११ प्रतिशत नगद लाभांश वितरण गर्ने प्रस्ताव पारित गरेको थियो । सोही नगद लाभांश आईपीएस मार्फत सेयरधनीहरुको बैंक खातामा जम्मा गरेको बैंकले जनाएको छ । हालसम्म पनि हितग्राही खातामा बैंक खाता अद्यावधिक नगराएका सेयरधनीहरुलाई तत्काल गर्न बैंकले आग्रह गरेको छ । साथै डिम्याट नगराएका सेयरधनीहरुले डिम्याट खोलि अभौतिकीकरण गराई बैंक खाता अद्यावधिक गराउनु पर्ने र सोही बैंक खातामा लाभांश जम्मा गर्ने जनाएको छ । नगद लाभांश बैंक खातामा नगएका सेयरधनीहरुको विवरण सेयर रजिष्ट्रार एनआईबिएल एस क्यापिटलको वेभसाइटमा हेर्न सकिनेछ । साथै सेयर धितोमा राखी उपभोग गर्दै आएका सेयरधनीहरुले नो अब्जेक्सन लेटर वा कर्जा चुक्ता भएको प्रमाणपत्र बुझाउनु पर्नेछ ।
सनराइज बैंकको १ लाख २२ हजार कित्ता सेयर बिक्रीमा, मूल्य कति छ ?
काठमाडौं । सनराइज बैंकले संस्थापक सेयर बिक्री गर्ने भएको छ । बैंकले सवा १ लाख कित्ता संस्थापक सेयर बिक्री गरेको हो । बैंकले संस्थापक सेयरधनी लिला देवी खेतानको नाममा रहेको १ लाख २२ हजार ४५ कित्ता सेयर बिक्री गर्न लागेको हो । उक्त सेयरको मूल्य प्रतिकित्ता १२५ रुपैयाँ तोकिएको छ । बैंकका विद्यमान संस्थापक सेयरधनीहरुले उक्त सेयर खरिद गर्न ३५ दिनभित्र विवरण खुलाई बैंकको प्रधान कार्यालय काठमाडौंमा निवेदन पेश गर्नुपर्नेछ । बैंकको अनुसार म्यादभित्र संस्थापक सेयरधनीहरुबाट आवेदन नपरेमा सर्वसाधारण लगानीकर्तालाई सेयर बिक्रीको प्रक्रिया अघि बढ्ने छ ।
घोराही सिमेन्टले प्रतिकित्ता ४३५ रुपैयाँमा आईपीओ बिक्री गर्ने, बोर्डले दियो अनुमति
काठमाडौं । नेपाल धितोपत्र बोर्ड (सेबोन)ले घोराही सिमेन्ट इन्डस्ट्रीलाई प्रिमियम मूल्यमा आईपीओ बिक्री गर्न अनुमति दिएको छ । घोराही सिमेन्टलाई प्रिमियम मूल्यमा आईपीओ बिक्री गर्न बोर्डले बैशाख ६ गते अनुमति दिएको हो । बोर्डले अनुमति दिएसँगै कम्पनीले छिट्टै निष्काशन प्रक्रिया अघि बढाउने छ । कम्पनीले ३ अर्ब ४४ करोड १६ लाख ६१ हजार ७८५ रुपैयाँको ७९ लाख ४३ हजार ८०१ कित्ता सेयर बिक्री गर्नेछ । कम्पनीले आयोजना प्रभावित स्थानियको लागि प्रतिकित्ता ४ सय रुपैयाँ अंकित मूल्य दरका लाख ९७ हजार १९० कित्ता र सर्वसाधारण लगानीकताएका लागि प्रतिकित्ता ४३५ रुपैयाँमा ७५ लाख ४६ हजार ६११ कित्ता सेयर बिक्री गर्नेछ । घोराही सिमेन्टको आईपीओ निष्काशन तथा बिक्री प्रबन्धकमा हिमालयन क्यापिटल र नबिल इन्भेस्टमेन्ट बैंकिङ्ग रहेका छन् ।
