रास्वपाको कार्यक्रममा मोबाइलसँगै फोटो खिच्न पनि निषेध, परिवारका सदस्य र साथीलाई पनि भेट्न नमिल्ने
काठमाडौं । राष्ट्रिय स्वतन्त्र पार्टी (रास्वपा)ले प्रतिनिधिसभा निर्वाचनमा निर्वाचित भएका आफ्ना सांसदहरुका लागि अभिमुखीकरण कार्यक्रम आयोजना गर्ने भएको छ । रास्वपाले चैत ३ र ४ गते ललितपुरको होटल रोयल टुलिपमा कार्यक्रमको आयोजना गर्ने जानकारी दिएको हो । सो कार्यक्रममा पार्टीले कार्यक्रम हलमा मोबाइल फोन प्रयोग निषेध गरेको छ भने कार्यक्रम स्थलमा अन्य व्यक्ति वा पाहुनाको प्रवेश पनि निषेध गरेको सूचनामा उल्लेख छ । परिवारका सदस्य, साथी वा अन्य अतिथि होटलमा आमन्त्रण नगर्न पनि रास्वपाले निर्देशन गरेको छ । सूचनमा भनिएको छ, होटलमा तपाईंलाई छोडेपछि वाहन होटल परिसरमा वा बाहिर पार्क गर्न सकिनेछ । चालक तथा अन्य व्यक्तिको भोजन र आवासको व्यवस्था तपाईंको जिम्मेवारी हुनेछ । सो व्यवस्था अन्य होटल तथा स्थानमा गर्न अनुरोध छ ।’ सांसदहरूले कार्यक्रम स्थलमा परिवारका सदस्य, वा अन्य व्यक्तिसँग भेटघाट, फोटो खिच्ने वा बैठक नगर्न पनि निर्देशन दिएको छ ।
हुन्डी र क्रिप्टो कारोबार गर्ने दुई युवा १ करोड १६ लाख रुपैयाँसहित पक्राउ
काठमाडौं । हुन्डी तथा क्रिप्टो कारोबार गर्ने दुई जना काठमाडौंबाट पक्राउ परेका छन् । १ करोड १६ लाख रुपैयाँ नगदसहित नागार्जुन नगरपालिका ८ भीमढुङ्गास्थित अभौतिक मुद्राको कारोबार भइरहेको भन्ने सूचनाको आधारमा उनीहरू पक्राउ परेका हुन् । जिल्ला काठमाडौं नागार्जुन नगरपालिका ८ भीमढुङ्गा घर बस्ने पक्राउ पर्नेमा २८ वर्षीय सागर गिरी र २८ वर्षीय प्रमोदप्रसाद धिताल रहेको काठमाडौं जिल्ला प्रहरी परिसरका प्रवक्ता पवनकुमार भट्टराईले जानकारी दिए । उनका अनुसार विभिन्न बैंकको विभिन्न व्यक्तिको नाममा रहेको चेक बुक तीन थान, व्यक्तिको नाममा काटेको २७ लाख ३० हजार रुपैयाँको तीन थान चेकसमेत बरामद गरिएको छ । विभिन्न बैंकको एटीएम कार्ड चार थान, नागरिकता एक थान, दुई वटा चार पाङ्ग्रे सावरीसाधन, एक थान दुई पाङ्ग्रे सवारी साधन, सवारी दर्ता ब्लु बुक,३१ थान एनसेल र एनटीसीको सीमकार्ड, कम्प्युटर एक थान र बैंक खातामा ७ हजार १७५ युएसडी डलरसमेत बरामद गरिएको छ ।
काठमाडौंमा भीषण हावाहुरी
काठमाडौं । देशका केही स्थानमा यति बेला (सोमबार साँझ ५ः३) बजे) व्यापक हावाहुरी सुरु भएको छ । हावाहुरीसँगै वर्षा पनि सुरु भएको छ ।
