सर्वसाधारणलाई अप्पर हेवाखोलाको आइपिओ आउँदै
काठमाडौं । अप्पर हेवाखोला हाइड्रोपावर कम्पनी लिमिटेडले सर्वसाधारणमा साधारण सेयर निष्काशन गर्ने भएको छ । कम्पनीले यही असार २४ गतेदेखि प्रतिकित्ता १०० रुपैयाँ अङ्कित १५ करोड रुपैयाँ मूल्य बराबरको १५ लाख कित्ता साधारण सेयरको प्रारम्भिक सार्वजनिक निष्काशन (आइपिओ) बिक्री खुला गर्न लागेको हो । कम्पनीले कूल निष्काशनको दुई प्रतिशतले हुने ३० हजार कित्ता कर्मचारीलाई र पाँच प्रतिशत अर्थात् ७५ हजार कित्ता सामूहिक लगानी कोषलाई छुट्याई बाँकी १३ लाख ९५ हजार कित्ता शेयर सर्वसाधारणका लागि निष्काशन गर्ने जनाएको छ । कम्पनीले सार्वजनिक गरेको आह्वान पत्रानुसार सर्वसाधारणले यही असार २८ गतेसम्म न्यूनतम १० कित्तादेखि अधिकतम एक लाख कित्ता शेयर खरिदका लागि आवेदन दिन पाउने छन् । जसमा मागबमोजिम आवेदन नपरे आगामी साउन ६ गतेसम्म बिक्री खुला हुने पत्रमा उल्लेख छ । कम्पनीले सङ्खुवासभा जिल्लामा ८.५ मेगावाट क्षमताको आयोजना निर्माण गरिरहेको छ । लगानीकर्ताले नेपाल धितोपत्र बोर्डबाट अनुमतिप्राप्त आस्वा सेवामा सहभागी बैंक तथा वित्तीय संस्थाबाट आस्वा प्रणालीमार्फत तथा ‘मेरो शेयर’ को मोबाइल एप तथा वेबसाइटमार्फत शेयर खरिदका लागि आवेदन दिन सक्नेछन । कम्पनीको धितोपत्र निष्काशन तथा बिक्री प्रबन्धक एनएमबी क्यापिटल लिमिटेड रहेको छ । कम्पनीलाई केयर रेटिङ्स नेपालले ‘केयरएनपी–बिबी आइएस्’ ग्रेडिङ प्रदान गरेको छ ।
नीति तथा कार्यक्रमको लागि धितोपत्र बोर्डले माग्यो सुझाव
काठमाडौं । नेपाल धितोपत्र बोर्डले आर्थिक वर्ष २०७९/०८० को नीति तथा कार्यक्रमको लागि सुझाव दिन आग्रह गरेको छ । बोर्डले धितोपत्र तथा वस्तु विनिमय बजार सम्बन्धि नीति तथा कार्यक्रमको लागि सल्लाह तथा सुझाव आह्वान गरेको हो । बोर्डले सम्बन्धित सबै सरोकारवालाहरुसँग बजारको विकास, विस्तार,तथा सुधारको लागि सल्लाह तथा सुझाव दिन अनुरोध गरेको हो । बोर्डले असार २० गतेसम्म आफ्नो सुझाव [email protected] मा पठाउन आग्रह गरेको छ ।
टिकेन नेप्सेको वृद्धि, परिसूचक दोहोरो अंकले घट्दा सीआईटीको सार्वधिक कारोबार
काठमाडौं । आइतबार उच्च अंकले उकालो लागेको नेप्से सोमबार दोहोरो अंकले घटेको छ । सोमबारको बजारमा सेयर मूल्य मापक नेप्से परिसूचक २३.८५ अंकले घटेर १९३३.१३ बिन्दुमा झरेको छ । जुन अघिल्लो दिनको तुलनामा १.२२ प्रतिशतले घटी हो । करेक्सन देखिएको बजारमा कारोबार रकम पनि घटेको छ । आइतबार २ अर्ब १९ करोडको सेयर कारोबार भएको बजारमा सोमबार २ अर्ब रुपैयाँमा सीमित भएको छ । सोमबार सबैभन्दा बढी नागरिक लगानी कोषको सेयर कारोबार भएको छ । कोषको एकैदिन १५ करोड ६५ लाख रुपैयाँ बराबरको सेयर कारोबार भएको छ । जसको सेयर मूल्य पनि बढेर प्रतिकित्ता २५४२ रुपैयाँ पुगेको छ । घटेको बजारमा पनि दुई लघुवित्तको सेयर सर्किट लेभलमा कारोबार भएको छ भने एक इन्स्योरेन्सको ९ प्रतिशतभन्दा बढीले बढेको छ । सीवाईसीएल नेपाल लघुवित्त वित्तीय संस्था र न्यादी हाइड्रोपावरको सेयर मूल्य क्रमशः ९.९९ र ९.९६ प्रतिशतले बढेको छ । त्यस्तै, लाइफ इन्स्योरेन्स कर्पोरेशन (नेपाल)को सेयर मूल्य ९.१५ प्रतिशतले बढेर प्रतिकित्ता १४१९ रुपैयाँ पुगेको छ । बजारमा उन्नत्ति सहकार्य लघुवित्त वित्तीय संस्थाको सेयर मूल्य भने १० प्रतिशतले घटेर प्रतिकित्ता ८९१ रुपैयाँमा अन्तिम कारोबार भएको छ । बजारमा इन्भेष्टमेन्ट र जीवन बीमा बाहेक सबै समूह राताम्मे देखिएका छन् । इन्भेष्टमेन्ट र जीवन बीमा समूह क्रमशः ०.६४ र ११३.९६ अंकले बढेका छन् ।
