लुम्बिनी जनरल इन्स्योरेन्सले घोषणा गर्यो दुई वर्ष यताकै उच्च बोनस
काठमाडौं । लुम्बिनी जनरल इन्स्योरेन्सले गत आर्थिक वर्षको लाभांश घोषणा गरेको छ । कम्पनीले आर्थिक वर्ष २०७७/७६ को नाफाबाट चुक्ता पुँजीको १० प्रतिशत लाभांश वितरण गर्ने घोषणा गरेको हो । माघ २६ गते बसेको कम्पनीको सञ्चालक समितिको बैठकले चुक्ता पुँजीको ९.५२३८१ प्रतिशत बोनस र कर प्रयोजनको लागि ०.४७६१९ प्रतिशत नगद गरी कूल १० प्रतिशत लाभांश प्रस्ताव गरेको हो । प्रस्तावित बोनस सेयर गत दुई वर्ष यताकै उच्च हो । इन्स्योरेन्सले आर्थिक वर्ष २०७५/७६ र आर्थिक वर्ष २०७६/७७ को नाफाबाट चुक्ता पुँजीको क्रमशः ८.१२५ प्रतिशत र ५ प्रतिशत बोनस सेयर वितरण गरेको थियो । बोनस र नगदसहित कूल लाभांश भने क्रमशः ८.५३१ र १० प्रतिशत वितरण गरेको थियो । हाल इन्स्योरेन्सको चुक्ता पुँजी १ अर्ब १९ करोड रुपैयाँ छ । ९.५२३८१ प्रतिशत बोनसपछि इन्स्योरेन्सको चुक्ता पुँजी १ अर्ब ३० करोड रुपैयाँ नाघ्ने छ । प्रस्तावित लाभांशलाई बीमा समितिले स्वीकृत तथा इन्स्योरेन्सको आगामी वार्षिक साधारण सभाले पारित गर्नुपर्ने छ ।
‘बीमा कम्पनीको नयाँ लाइसेन्स दिदैनौं, बरु संख्या घट्ला’
काठमाडौं । बीमा समितिले नयाँ बीमा कम्पनीको लागि लाइसेन्स नदिने मनस्थिति बनाएको छ । नयाँ लाइसेन्सको लागि तिब्र दबाब परिरहेको समयमा समितिले नयाँ लाइसेन्स नदिने दाबी गरेको हो । नेपालको आर्थिक आकार र भुगोल अनुसार अहिले भएका कम्पनीहरु नै पर्याप्त भएकोले नयाँ लाइसेन्सको आवश्यकता नदेखिएको समितिका कार्यकारी निर्देशक राजुरमण पौडेलले बताए । ‘नयाँ कम्पनीको लागि लाइसेन्स दिने तयारी र योजना केही छैन, अहिले भएका कम्पनीहरु नै पर्याप्त छन् भन्ने समितिको ठहर छ, त्यसैले नयाँ कम्पनी संचालनको लागि लाइसेन्स दिइदैन,’ कार्यकारी निर्देशक पौडेलले विकासन्युजसँग भने । उनले भएकै कम्पनीलाई बलियो बनाउँदै जाने रणनीति अख्तियार गरिएको पनि बताए । अहिले संचालनमा रहेका कम्पनीहरुको पुँजी आधार ठूलो बनाउन समितिले नगद लाभांश वितरणमा रोक लगाएको छ । कम्पनीहरु आफ्नो नाफाबाट सेयरधनीलाई बोनस सेयर प्रदान गरी चुक्ता पुँजी बृद्धि गरिरहेका छन् । ‘अहिले भएका कम्पनीहरु नै नेपालको लागि बढी भए कि भन्ने कोणबाट प्रश्नहरु उठिरहेका छन्, त्यसैको लागि हामी अध्ययन नै गर्दैछौं, कम्पनीको संख्या बढी भयो भन्ने अध्ययनले देखायो भने मर्जर र एक्वीजीसनमा बढी जोड दिनुपर्ने अवस्था आउँला, त्यसैकारण कम्पनीको संख्या बरु घट्ला, नयाँ लाइसेन्स दिएर संख्या बढाउने काम हुदैन,’ कार्यकारी निर्देशक पौडेलले भने । यद्यपि, लघु बीमाको लाइसेन्स भने दिने सोचमा समिति छ । बीमाको दायरा बढाउनको लागि ग्रामीण तहसम्म पुग्न लघु बीमा आवश्यक देखिएकोले त्यस्ता कम्पनीको नयाँ लाइसेन्स दिने तयारी समितिले गरेको छ । तर, कति संख्यामा लाइसेन्स दिने भन्ने यकिन भइसकेको छैन । नयाँ कम्पनीको लाइसेन्स माग्नेको ओइरो समितिमा दिनदिनै नयाँ कम्पनीको लाइसेन्स माग्दै निवेदन दर्ता गर्नेको ओइरो लाग्न थालेको छ । अहिलेसम्म लघु बीमा कम्पनीको लागि १८ वटा निवेदन दर्ता भइसकेका छन् । यस्तै, निर्जीवन बीमा व्यवसायको लाइसेन्स माग्दै मनकामना, अभियान, गरिमा, मुक्तिनाथ, माछापुच्छ्रे, उपकार लगायतका प्रस्तावित नामका कम्पनी समिति पुगेका छन् । यसमध्ये गरिमा विकास बैंक संचालन गरिरहेको समुहले गरिमा जनरल, मुक्तिनाथ विकास बैंक संचालन गरिरहेको समुहले मुक्तिनाथ जनरल र उपकार सहकारी संस्था संचालन गरिरहेको समुहले उपकार जनरल इन्स्योरेन्स कम्पनीको नाममा लाइसेन्स मागेको हो । मनकामना जनरल भने यसअघिका अध्यक्ष चिरन्जिवी चापागाईंको पालामै लाइसेन्स माग्दै दर्ता भएको कम्पनी हो । पूर्व अध्यक्ष चापागाईंकै कार्यकालमा लाइसेन्स माग्दै दर्ता भएका युनि लाइफ र स्ट्याण्डर्ड लाइफले लाइसेन्स दिनको लागि समितिसँग फेरि माग गरेका छन् । यी दुबै कम्पनीले जीवन बीमा व्यवसाय गर्ने कम्पनीको अनुमति मागेका हुन् । उपकार सहकारी संस्था चलाउने समुहले उपकार लाइफ इन्स्योरेन्स कम्पनीको पनि लाइसेन्स मागेका छन् । यस्तै, जीवन बीमा व्यवसाय गर्नको लागि अनुमति माग्दै पायोनियर लाइफको तर्फबाट पनि निवेदन दर्ता भएको समिति स्रोतले जानकारी दियो ।
ननलाइफ इन्स्योरेन्सले संकलन गरे १९ अर्ब बढी प्रिमियम, यूनाईटेडसहित ६ कम्पनी अर्बौंको क्लबमा
काठमाडौं । निर्जीवन बीमा व्यवसाय गर्ने कम्पनीहरुले १९ अर्ब ९ करोड ८२ लाख रुपैयाँ बराबरको बीमाशुल्क संकलन गरेका छन् । सञ्चालित २० कम्पनीहरुले चालु आर्थिक वर्षको ६ महिनामा सो मात्राको प्रिमियम संकलन गरेका हुन् । बीमा समितिले उपलब्ध गराएको तथ्यांक अनुसार निर्जीवन बीमा कम्पनीहरुले समीक्षा अवधिमा १४ लाख ८५ हजार ८५१ वटा बीमालेख जारी गरेका छन् । त्यस्तै, पुस एक महिनामा मात्रै निर्जीवन बीमा कम्पनीले २ लाख ६१ हजार ६८७ वटा बीमालेख जारी गरी ३ अर्ब ६७ करोड १२ लाख रुपैयाँ बराबरको बीमाशुल्क संकलन गरेका छन् । २० कम्पनीमध्ये शिखर इन्स्योरेन्सले सबैभन्दा बढी प्रिमियम संकलन गरेको छ । ६ महिनामा शिखरले १ लाख ३१ हजार ६६९ वटा बीमालेख जारी गरी २ अर्ब ४३ करोड रुपैयाँ बराबरको बीमाशुल्क संकलन गरेको छ । त्यस्तै, शिखरसहित ६ वटा कम्पनी अर्ब क्लबमा रहेका छन् । सगरमाथा, नेको, यूनाईटेड, सिद्धार्थ, एनएलजी इन्स्योरेन्सले ६ महिनामा एक अर्बभन्दा बढी प्रिमियम संकलन गरेका छन् । सबैभन्दा कम बीमाशुल्क संकलन गर्नेमा सानिमा जनरल इन्स्योरेन्स रहेको छ । इन्स्योरेन्सले चालु आवको ६ महिना अर्थात पुस मसान्तसम्ममा ४६ करोड ११ लाख रुपैयाँ बराबरको बीमाशुल्क संकलन गरेको छ । यो अवधिमा इन्स्योरेन्सले ४५ हजार ७८६ वटा बीमालेख जारी गरेको छ ।
