एनआरएनएका १२ घोषणा: छुट्टै निकाय स्थापनादेखि सङ्कटमा परेकालाई उद्धारमा सहकार्य
काठमाडौं । ‘हाम्रो एकता, समृद्धिको आधार’ भन्ने मूल नारासहित आयोजित गैर आवासीय नेपाली सङ्घ (एनआरएनए) को १२औँ विश्व सम्मेलन तथा वृहत् अन्तर्राष्ट्रिय एकता महाधिवेशन सम्पन्न भएको छ । सम्मेलनले नेपालको विकासमा प्रवासी नेपालीको लगानी, श्रमिक अधिकार र संस्थागत एकतालाई प्राथमिकतामा राख्दै १२ बुँदे घोषणापत्र जारी गरेको छ । फागुन ३० गतेदेखि चैत २ गतेसम्म काठमाडौंमा भएको सम्मेलनले विश्वभर छरिएका नेपाली समुदायलाई नेपालको समृद्धि, विकास तथा विश्वव्यापी रूपमा रहेका नेपालीको हित प्रवर्द्धनका लागि एकताबद्ध भएर अघि बढ्ने प्रतिबद्धता व्यक्त गरेको छ । सम्मेलनले नेपालमा गैर आवासीय नेपालीहरूको लगानी भित्र्याउन कानुनी तथा नीतिगत सुधार गर्दै सहज वातावरण बनाउन सरकारसँग आग्रह गरेको छ । सम्मेलनले रोजगारी सिर्जना, उद्यमशीलता विकास तथा भौतिक पूर्वाधार निर्माणमा प्रवासी नेपालीको लगानीलाई प्रोत्साहन गर्ने प्रतिबद्धता जनाएको छ । घोषणापत्रमा गैर आवासीय नेपालीको लगानी व्यवस्थापनका लागि छुट्टै निकाय स्थापना, बैंक खाता खोल्ने र लगानी फिर्ता लैजान सहज व्यवस्था गर्न सम्बन्धित ऐन तथा नियमावली संशोधन गर्न सरकारसँग माग गरिएको छ । सम्मेलनले मध्यपूर्वको पछिल्लो अवस्थाप्रति चिन्ता व्यक्त गर्दै सङ्कटमा परेका नेपालीको उद्धार, राहत र पुनःस्थापनामा नेपाल सरकार तथा अन्तर्राष्ट्रिय निकायसँग सहकार्य सुदृढ गर्ने जनाएको छ । यसैगरी, विश्वका विभिन्न देशमा कार्यरत नेपाली श्रमिकहरूको सुरक्षा, अधिकार र सम्मानजनक रोजगारी सुनिश्चित गर्न सम्बन्धित देश, अन्तर्राष्ट्रिय संस्था तथा नेपाल सरकारसँग सहकार्य गर्ने प्रतिवद्धतासमेत व्यक्त गरिएको छ । घोषणापत्रमा प्रवासमा जन्मिएका दोस्रो पुस्ताका युवालाई नेपाली भाषा, संस्कृति र इतिहाससँग जोड्न शिक्षा, सांस्कृतिक कार्यक्रम तथा डिजिटल माध्यममार्फत पहल गरिने उल्लेख छ । सम्मेलनले जलविद्युत्, कृषि, पर्यटन, सूचना प्रविधि तथा नवप्रवर्तन मूलक उद्योगमा गैर आवासीय नेपालीको लगानी प्रवर्द्धन गर्दै लगानीमैत्री वातावरण निर्माणका लागि नेपाल सरकारसँग सहकार्य गर्ने प्रतिबद्धता जनाएको छ । यसैगरी, विश्वभर रहेका नेपालीहरूको ज्ञान, अनुभव र पुँजीलाई मातृभूमिसँग जोड्दै समृद्ध, समावेशी र आत्मनिर्भर नेपाल निर्माणमा योगदान गर्ने सामूहिक सङ्कल्प पनि गरिएको छ । सम्मेलनमा ४ हजार २८६ प्रतिनिधि सहभागी भएका थिए । तीमध्ये ४ सयभन्दा बढी प्रतिनिधि काठमाडौंमा भौतिक र बाँकी प्रतिनिधि अनलाइनमार्फत सहभागी भएका आयोजकले जनाएको छ ।
‘भ्लगर’ मोटरसाइकल चालकमाथि हातपात गर्ने कार चालकको पहिचान खुल्यो
काठमाडौं । नगरकोट जाने बाटोमा बाइक राइडरमाथि कुटपिट गर्ने कार चालकको पहिचान खुलेको छ । जिल्ला प्रहरी परिसर, भक्तपुरले मोटरसाइकल चालकमाथि कुटपिट गर्ने कार चालकको पहिचान खुलेको जनाएको छ । प्रहरीका अनुसार कार चालकको पहिचान खुलिसकेको छ । कार चालक नगरकोटदेखि तल पर्ने भक्तपुरकै रहेको प्रहरीले जनाएको छ । प्रहरीका अनुसार कार चालकको खोजी भइरहेको छ । शनिबार नगरकोट जाने बाटोमा कार चालकले लक्स के राई र विशाल तामाङमाथि हातपात गरेका थिए । प्रहरीले खोजी गरेपछि कार चालक फरार रहेका छन् ।
एनआरएनएलाई एकजुट बनाउँदै निर्वाचन र नागरिकताको मुद्दामा केन्द्रित हुने अध्यक्ष केसीको घोषणा
काठमाडौं । गैरआवासीय नेपाली संघ (एनआरएनए) का अध्यक्ष डा. बद्री केसीले संसारभर छरिएर रहेका नेपालीहरूलाई एउटै सूत्रमा बाँध्ने र उनीहरूको अधिकार सुनिश्चित गर्ने अभियानमा संघ प्रतिबद्ध रहेको बताएका छन् । सोमबार राजधानीमा आयोजित एक कार्यक्रममा बोल्दै उनले यस्तो बताएका हुन् । सन् २००३ मा स्थापना भएको यस संस्थाले दुई दशक लामो इतिहासमा अनेकौं उतारचढाव झेल्दै हाल ८० लाख नेपालीलाई आफ्नो नेटवर्कमा जोड्न सफल भएको उनले उल्लेख गरे । अध्यक्ष केसीका अनुसार हाल एनआरएनए विश्वका ९२ देशमा फैलिएको छ । नेपाल सरकारको उपस्थिति ४० देशमा मात्र सीमित रहे पनि एनआरएनएले ९२ वटै देशमा रहेका नेपालीहरूको प्रतिनिधित्व गरिरहेको छ । ‘जसको शरीरमा नेपाली रगत बगिरहेको छ, उनीहरू सबैलाई गोलबन्द गर्नु नै हाम्रो मुख्य एजेन्डा हो,’ केसीले भने । विगतमा एउटा समितिले अर्कोलाई नटेर्ने जस्ता आन्तरिक विवादहरू देखिए तापनि अहिले संस्था पुनः एकजुट भएको उनको दाबी छ । भदौमा भएको ‘जेनजी’आन्दोलनको समयमा एनआरएनए भवन समेत सुरक्षित रहन नसकेको दुःखद स्मरण गर्दै उनले अबका दिनमा त्यस्ता अशान्तिका घटना दोहोरिन नहुनेमा जोड दिए । यसैबीच, मुलुकमा समयमै निर्वाचन सम्पन्न गरी शान्ति बहाली गरेकोमा प्रधानमन्त्री सुशीला कार्कीलाई एनआरएनएले ‘राष्ट्र माता’ को रूपमा घोषणा गर्ने निर्णय गरेको छ । आगामी निर्वाचनमा गैरआवासीय नेपालीहरूलाई पनि मताधिकार दिनुपर्ने मागलाई केसीले प्रमुखताका साथ उठाएका छन् । यसपटकको निर्वाचनमा प्रयास गर्दागर्दै पनि प्राविधिक कारणले सम्भव नभएको बताउँदै उनले भने, ‘संविधान वा नागरिकता ऐन संशोधन गरेर भए पनि विदेशमा रहेका नेपालीलाई ‘नेपाली’ कै रूपमा बस्न पाउने वातावरण सुनिश्चित गरिनुपर्छ ।’ मध्यपूर्वमा बढ्दै गएको युद्धको डढेलोले त्यहाँ कार्यरत नेपालीहरूमा त्रास सिर्जना गरेको प्रति संघले गम्भीर चिन्ता व्यक्त गरेको छ । अध्यक्ष केसीले जोखिमपूर्ण क्षेत्रमा रहेका नेपालीहरूको तत्काल उद्धार गर्न सरकारसँग माग गरेका छन् । ‘सरकारले उद्धारको प्रक्रिया अगाडि बढाओस्, एनआरएनए त्यसका लागि आवश्यक हरेक किसिमको सहयोग र समन्वय गर्न तयार छ,’ उनले प्रतिबद्धतासमेत जनाए । हाल विश्वभर करिब ८० लाख नेपालीहरू छरिएर रहेको र उनीहरूसँग नेपालको कुल गार्हस्थ्य उत्पादन (जीडीपी) को हाराहारीमा सम्पत्ति रहेको उल्लेख गर्दै उनले अब उक्त विशाल पुँजी र क्षमतालाई सिधै नेपालको विकाससँग जोड्ने काम एनआरएनएले गर्ने दावीसमेत गरे । विशेषगरी साना-साना लगानी भित्र्याउनका लागि कानुनी व्यवस्था सरल र सहज बनाइएमा वार्षिक रूपमा थप २ खर्ब रुपैयाँ नेपाल भित्र्याउन सकिने उनको दाबी छ। देश विकासमा गैरआवासीय नेपालीहरूको भूमिका अपरिहार्य रहेको चर्चा गर्दै उनले अभियानलाई सफल पार्न सरकारले आवश्यक कानुनी र नीतिगत सहजीकरण गरिदिनुपर्नेमा जोड दिए । त्यसैगरी, एनआरएनएका संस्थापक अध्यक्ष उपेन्द्र महतोले व्यक्तिगत सफलताले जतिसुकै उचाइ छोए पनि देश समृद्ध हुन सकेन भने व्यक्ति सफल हुन नसक्ने बताए । देश बनाउने अभिप्रायले एनआरएनएको गठन भएपनि बीचमा मनोटोनस हुँदा केही समस्या आएको उनको भनाइ छ । एनआरएनएप्रति पहिला नेपालीले दिएको विश्वास अनि उत्साह फेरि दिन उनले आग्रह समेत गरे ।
