सुुकुम्बासी बस्तीमा बुवा-आमा खोजिरहेका सिम्सन
काठमाडौं । आँखा रसाएका छन्, जीउ निथ्रुक्क भिजेको छ । अनुहार मलिन भएको छ । सिम्सन राई सोध्छन्, ‘मेरो बुवा-आमा कहाँ जानु भयो ?’ जडिबुटीको मनोहराको किनारमा आइतबार बिहानैदेखि डोजर चलिरहेको छ । सयौं सुरक्षाकर्मीको सहयोगमा सरकारले मनोहराको सुकुम्बासी बस्तीका घर टहरा धमाधम भत्काउँदैछ । वर्षौंदेखि आफ्नै घर सम्झिएर बस्दै आएका सुकुम्बासीको टहरा एक्कासि डोजर चल्दा उनीहरुको मनमात्रै आत्तिएको छैन, अब के गर्ने होला भन्ने चिन्ताले पनि पिरोल्न थालेको छ । केहीले साना बालबच्चामा समातेर सुरक्षित ठाउँ खोजिरहेका छन् । केहीले घरबाट धमाधम सामान ओसारिरहेका छन् । त्यही भीडमा ८ वर्षीय सिम्सन राई बिहानैदेखि आफ्ना बाआमा खोज्दैछन् । सिम्सन बिहानैदेखि आफ्ना बुबाआमासँग छुटेका थिए । डोजर चलेसँगै मानिसहरू भागदौडमा निस्किँदा उनी कसरी छुट्टिए ? उनलाई आफैंलाई थाहा छैन । उनका बुबा रामजी राई र आमा जानुका राई पनि त्यही सुकुम्बासी बस्तीमा बसोबास गर्दै आएका थिए । परिवारको एक मात्र सन्तान सिम्सन स्थानीय सरस्वती माध्यमिक विद्यालयमा अध्ययनरत छन् । बस्तीमा डोजर चलेपछि धेरै परिवार विस्थापित भएका छन् । कसैले आफ्ना सामान बोकेर सडक किनारमा थुपारेका छन्, कोही आफन्तको घरतिर लागेका छन् । सिम्सन भने त्यो त्यो भीडमा बाआमालाई खोज्दैछन् । स्थानीयहरूका अनुसार बस्तीमा वर्षौंदेखि बसोबास गर्दै आएका सयौं परिवार एकैपटक हटाइँदा यस्तो अवस्था सिर्जना भएको हो । ‘हामीलाई विकल्प नदिई एक्कासि डोजर आयो,’ एक स्थानीयले भने, ‘सामान जोगाउने कि बच्चा सम्हाल्ने भन्ने अवस्था आयो ।’ सुरक्षाकर्मीहरूले भने सरकारी निर्णयअनुसार बस्ती खाली गराइएको बताएका छन् । उनीहरू भीड नियन्त्रण र सुरक्षा व्यवस्थापनमा केन्द्रित छन् । सिम्सन कहिले भत्किएका टहराको अवशेषतिर हेर्थे, कहिले मानिसहरूको भीडतिर । उनलाई आशा थियो– शायद आमा त्यही कतै हुनुहुन्छ, सायद बुबा पनि फर्केर आउनेछन् । तर, समय बित्दै जाँदा उनको अनुहारमा देखिने चिन्ता गहिरिँदै गएको छ । स्सुरक्षाकर्मीले उनको नाम, ठेगाना र विद्यालयको जानकारी लिँदै परिवार खोजी भइरहेको बताइएको छ । तर, यस्ता घटनाले सुकुम्बासी बस्ती हटाउने प्रक्रियामा मानवीय पक्ष कति कमजोर छ भन्ने प्रश्न फेरि उठाएको छ । साँझ पर्नै लाग्दा सिम्सन अझै एउटै आशामा छन्, ‘बाआमा पक्कै भेटिन्छिन् ।’
काल्सबर्ग क्लासिक २०२६ (गोकर्ण संस्करण) मा तेन्जिङ छिरिङ विजयी
काठमाडौं । काल्सबर्ग गल्फ क्लासिक (गोकर्ण संस्करण) मा तेन्जिङ छिरिङ विजयी भएका छन् । शून्य ह्यान्डिक्यापमा खेलेका तेन्जिङले ३९ स्टेबलफोर्ड अंक जोड्दै उपाधि जितेका हुन् । यस जितसँगै उनले मलेसियामा गल्फ यात्रा, गल्फ ब्याग तथा अन्य उपहारहरू प्राप्त गरे । उनले बोगी-रहित उत्कृष्ट खेल प्रदर्शन गर्दै ८, ११ र १३औं होलमा बर्डी बनाए । सन्‍योग शाही ३७ अंकसहित काउन्टब्याकका आधारमा उपविजेता बने । सात ह्यान्डिक्यापमा खेलेका उनले अगाडिको नौ होलमा १६ र पछाडिको नौ होलमा २१ अंक जोडे । ताशी छिरिङले बेस्ट ग्रस र मोस्ट बर्डीज दुवै उपाधि जिते । उनले ३९ ग्रस अंकसहित बेस्ट ग्रस जित्दा पाँच बर्डी बनाउँदै मोस्ट बर्डीजको उपाधि समेत हात पारे । महिलातर्फ सुष्मा सिंह ३८ अंकसहित विजेता बनिन् । उनले पनि पुरुष विजेतासरह मलेसियामा गल्फ यात्रा सहितका पुरस्कार प्राप्त गरिन् । तारा कार्की चित्रकार ३३ अंकसहित उपविजेता बनिन् । ६० वर्ष वा सोभन्दा माथिका सिनियर खेलाडी तर्फ बाबु शेर्पा ३६ अंकसहित विजेता बने । उनले अगाडिको नौ होलमा १५ र पछाडिको नौ होलमा २१ अंक जोडे । शंकर मान रोक्काले ‘क्लोजेस्ट टु द पिन’ अवार्ड जिते भने डार्टानिएन गिर्केले ‘लङ्गेस्ट ड्राइभ’ जिते । गोरखा ब्रुअरी प्रालिको प्रायोजनमा आयोजित प्रतियोगितामा कुल १११ खेलाडीहरूको सहभागिता रहेको थियो । प्रतियोगिता ३/४ ह्यान्डिक्यापसहित स्टेबलफोर्ड ढाँचामा खेलाइएको थियो । विजेताहरूलाई गोरखा ब्रुअरीका वित्त निर्देशक अमर वैद्य, सेल्स निर्देशक काजिमान सुब्बा, मार्केटिङ निर्देशक रोजन् अमात्य, कानुनी तथा कम्प्लायन्स निर्देशक प्रतिमा बर्मा, पिपल एण्ड कल्चर निर्देशक दिनेश मान श्रेष्ठ, ब्रान्ड म्यानेजर ईशा पौडेल, साथै गोकर्ण गल्फ क्लबका अध्यक्ष सुध्रिढ घिमिरे र क्याप्टेन जोसेफ नाथनले पुरस्कार वितरण गरे ।
लागुऔषधसहित विभिन्न ठाउँबाट ४१ जना पक्राउ
काठमाडौं । नियमित गस्तीमा रहेको प्रहरी टोलीले देशका विभिन्न स्थानबाट ४१ जनालाई पक्राउ गरेको छ । काठमाडौं महानगरपालिका-३२ जडीबुटीबाट चिकित्सकको सिफारिसमा मात्र खरिद गर्न पाइने १३० थान ट्रामाडोल ट्याब्लेट नगद ६८ हजार २०० रुपैयाँसहित एक जनालाई पक्राउ गरिएको छ । केन्द्रीय प्रहरी समाचारकक्षका अनुसार कैलालीको टीकापुर नगरपालिका–१ बाट एक, घोडाघोडी नगरपालिका–१० पहलमानपुरबाट दुई, वीरेन्द्रनगर नगरपालिका-८ सिम्ताली चोकबाट दुई, कपिलवस्तुको बुद्धभूमि नगरपालिका-९ बाट एक, सुनसरीको इनरुवा नगरपालिका-४ बसचोकबाट दुई र दाङको घोराही उपमहानगरपालिका-१५ भानुचोकबाट दुई जनालाई खैरो हेरोइनसहित पक्राउ गरिएको हो । अभियुक्त शनिबार पक्राउ परेका हुन् । उनीहरुबाट नगद र लागुऔषध जोख्न प्रयोग हुने तराजुसमेत बरामद गरिएको छ । यसैगरी, काठमाडौं महानगरपालिका–४ सुकेधाराबाट खैरो हेरोइनसहित एक, बल्खुचोकबाट दुई जनालाई ९९८ थान ट्रामाडोल ट्याब्लेट र १६ हजार ५०० नगदसहित पक्राउ गरिएको छ । यसैगरी, इलामको सूर्योदय नगरपालिका-११ कालापानीबाट दुई, झापाको भद्रपुर नगरपालिका–५ बाट नौ, शिवसताक्षी नगरपालिका-१ बाट दुई, कञ्चनपुरको वेदकोट नगरपालिका-८ बाट दुई, भिमदत्त नगरपालिका-११ गड्डाचौकीबाट दुई, रुपन्देहीको बुटवल उपमहानगरपालिका-१५ गोब्रैयाबाट दुई, सैनामैना नगरपालिका-५ बुद्धनगरबाट एकजनालाई पक्राउ गरिएको हो । यसैगरी, विराटनगर महानगरपालिका-१५ बाट एक, रुकुमपश्चिमको त्रिवेणी गाउँपालिाका–२ बिसौनीबाट एक, दाङको घोराही उपमहानगरपालिका-५ बाट शीतलपुरबाट एक, बर्दियाको बढैयाताल गाउँपालिका-६ रानीपुरबाट चार जना, पोखरा महानगरपालिका-५ प्रस्याङबाट दुई र धनुषाको गणेशमान चारनाथ नगरपालिका-२ राधापुरबाट एक जनालाई चिकित्सकको सिफारिसमा मात्र खरिद गर्न पाइने २५० थान नाइट्राजेपाम ट्याब्लेटसहित एक जनालाई पक्राउ गरिएको जनाइएको छ ।
