२ हजारको बिन्दुबाट पनि तल झर्यो नेप्से परिसूचक, शिवमको सर्वाधिक कारोबार
काठमाडौं । सेयर मूल्य मापक नेप्से परिसूचक २ हजार बिन्दुबाट तल झरको छ । मंगलबार कारोबार शुरु भएदेखि निरन्तर ओरालो लागेकोे परिसूचक ३६.०७ अंकले घटेर १९९६.२६ बिन्दुमा झरेको छ । जुन अघिल्लो दिनको तुलनामा १.७८ प्रतिशतले घटी हो भने १८ महिनायताकै न्यून बिन्दु हो । दिनभरको कारोबारमा परिसूचक घटेर १९९०.६९ बिन्दुसम्म झरेको थियो । सोमबारको तुलनामा मंगलबारको कारोबार रकममा भने वृद्धि भएको छ । सोमबार ९९ करोड ८६ लाख रुपैयाँमा खुम्चिएको सेयर कारोबार मंगलबार एक अर्ब माथिको सेयर किनबेच भएको छ । दिनभरको कारोबारमा १ अर्ब १८ लाख रुपैयाँ बराबरको ४१ लाख ४७ हजार कित्ता सेयर खरिद बिक्री भएको हो । २३२ वटा स्क्रिप्सको किनबेच भएको बजारमा शिवम् सिमेन्टको उच्च कारोबार भएको छ । सिमेन्टको एकैदिन ४ करोड ६७ लाख रुपैयाँ बराबरको सेयर कारोबार भएको छ । जसको सेयर मूल्य घटेर प्रतिकित्ता ६९८ रुपैयाँमा झरेको छ । त्यस्तै, कारोबारमा आएका सबै समूह राताम्मे देखिएका छन् । हिमालयन पावर पार्टनरको सेयर मूल्य ९.९९ प्रतिशतले झरेर प्रतिकित्ता ३४४.३० रुपैयाँमा झरेको छ । घटेको बजारमा पनि आँधिखोला लघुवित्त वित्तीय संस्थाको सेयर मूल्य ८.१८ प्रतिशतले बढेर प्रतिकित्ता ४४८.४० रुपैयाँमा पुगेको छ ।
आयोजना प्रभावित इलामका बासिन्दाका लागि पिपुल्स पावरको आइपीओ आउँदै
काठमाडौं । पिपुल्स पावर लिमिटेडले आयोजनाबाट असर पर्नसक्ने स्थानीय बासिन्दाका लागि साधारण शेयर निष्कासन तथा बिक्री खुला गर्ने भएको छ । कम्पनीले आगामी असार ८ गतेदेखि प्रतिकित्ता १०० अङ्कित दरमा छ करोड ३२ लाख ६० हजार मूल्य बराबरको छ लाख ३२ हजार ६०० कित्ता प्रारम्भिक सार्वजनिक निष्कासन (आइपीओ) बिक्री खुला गर्ने भएको हो । कूल निष्कासनमध्ये आयोजनाबाट असर पर्ने इलाम जिल्लाको इलाम नगरपालिका–१ र ४ का बासिन्दालाई एक लाख ८९ हजार ७८० कित्ता र ती वडाबाहेक इलाम जिल्लाका बासिन्दाले आगामी असार २२ गतेसम्म चार लाख ४२ हजार ८२० कित्ता शेयर खरिदका लागि आवेदन दिन सक्नेछन् । सो अवधिमा मागबमोजिम आवेदन नपरे साउन ५ सम्म न्यूनतम १० कित्तादेखि अधिकतम ५० हजार कित्ता शेयर खरिदका लागि पुनः आवेदन दिन पाउने कम्पनीले सार्वजनिक गरेको आह्वानपत्रमा उल्लेख छ । कम्पनीले इलाम जिल्लाको इलाम नगरपालिका–१ र ४ मा पर्ने पुवा खोलामा चार दशमलव ९६ मेगावाट क्षमताको पुवा–२ जलविद्युत् आयोजना निर्माण गरिरहेको छ । लगानीकर्ताले नेपाल धितोपत्र बोर्डबाट अनुमति प्राप्त आस्वा सेवामा सहभागी बैंक तथा वित्तीय संस्थाबाट आस्वा प्रणालीमार्फत शेयर खरिदका लागि आवेदन दिन सक्नेछन् । साथै नेपाल बङ्गलादेश बैंकको फिक्कल शाखा, प्रभु बैंकको सन्दुकपुर र इलाम शाखा, ग्लोबल आइएमई बैंकको फिक्कल र इलाम शाखा, प्राइम कर्मशियल बैंकको राँके, मङ्गलबारे, विलौते, तीन घरे र इलाम शाखा कार्यालयबाट आवेदन दिन सकिने कम्पनीको धितोपत्र निष्कासन तथा बिक्री प्रबन्धक प्रभु क्यापिटल लिमिटेडले जनाएको छ । कम्पनीलाई केयर रेटिङ्ग नेपालले ‘केयरनपी–बिबी इस्युअर’ रेटिङ प्रदान गरेको छ ।
एक्सेल डेभलपमेन्टले घोषणा गर्यो गत वर्षको लाभांश
काठमाडौं । एक्सेल डेभलपमेन्ट बैंकले गत आर्थिक वर्षको लाभांश घोषणा गरेको छ । बैंकले आर्थिक वर्ष २०७७/७८ को नाफाबाट ८.९५ प्रतिशत लाभांश वितरण गर्ने घोषणा गरेको हो । जेठ ३० गते बसेको सञ्चालक समितिको बैठकले सेयरधनीलाई ८.५० प्रतिशत बोनस र कर प्रयोजनको लागि ०.४५ प्रतिशत नगद लाभांश वितरण गर्ने प्रस्ताव गरेको हो । जसलाई नेपाल राष्ट्र बैंकले स्वीकृत तथा संस्थाको आगामी वार्षिक साधारण सभाले पारित गर्नुपर्छ । प्रस्तावित लाभांश हालसम्मकै न्यून हो । संस्थाले आर्थिक वर्ष २०६७/६८देखि आर्थिक वर्ष २०७६र७७ सम्ममा सेयरधनीलाई न्यूनतम १२.६३ र अधिकतम ५२.६४ प्रतिशतसम्म लाभांश वितरण गरेको छ ।
